Kaypi willakuq wakin profeciakunaqa kaq tiempopi junt’akunanmantan rimashan. Chaykunan rikuchiwanchis tukukuy p’unchaykunapiña kausashasqanchista (Dan. 12:4).

• Bibliapi maskhanapaq: Apo. 11:7; 12:13, 17; 13:1-8, 12.

  Profecía: “Manchay phiña animalqa” unayñan kay pachata kamachishan. Ichaqa tukukuy p’unchaykunapin qanchis kaq umanqa k’irisqa karan, thanipuqtintaq “lliu kay pacha” runakuna chay animalta qatikunku. Satanasqa kay manchay phiña animalwanmi “warmiq mirayninmanta qhepaqkunawan guerra ruwaq pasaran”.

  Junt’akusqan: Noepa kausasqan qhepamanqa Jehová Dios contra kaq askha gobiernokunan rijurimuranku. Jujninmi karan Gran Bretaña nación, chay nacionqa yaqallan atipachikuran Primera Guerra Mundialpi. Chaymi Estados Unidos nacionwan jujllachakapuran. Kay tukukuy p’unchaykunapiqa Satanasmi chay gobiernokunawan Diospa llaqtanta qatikachashan.

• Bibliapi maskhanapaq: Dan. 11:25-45.

  Profecía: Wichay ladomanta reyqa uray ladomanta reywanmi guerrapi jatarinku aswan atiyniyoq kayta munaspa.

  Junt’akusqan: Alemania nacionmi guerrapi jatariran Gran Bretaña nación Estados Unidos nación contra. 1945 watapiqa “Unión Soviética” nisqan wichay ladomanta rey kapuran, ichaqa 1991 watapin chinkapuran. Qhepamanqa Rusia nacionmi yanapaqninkunapiwan wichay ladomanta rey kapunku.

• Bibliapi maskhanapaq: Is. 61:1; Mal. 3:1; Luc. 4:18.

  Profecía: Jehová Diosmi ‘willakuqninta’ kachamun manaraq Jesús janaq pachapi rey kashaqtin. Chay willaqkunaqa Diosmanta jamuq “allin willakuykunatan” willanku.

  Junt’akusqan: 1870 watamantapachan Charles Russell yanapaqninkunapiwan Biblia estudiayta qallariranku. 1880 watakunapitaq iñiqmasinchiskunata kallpacharanku Diosmanta runakunaman willanankupaq. Chaymantapas orqomuranku “Se solicitan 1.000 predicadores” chaymantapas “Ungidos para predicar” nisqa qelqakunata.

• Bibliapi maskhanapaq: Mat. 13:24-30, 36-43.

  Profecía: Juj runan chajranpi trigota t’akaran. Enemigontaq t’akasqa pataman qorata t’akallarantaq. Trigoqa qorawan kuskan wiñaran. Cosechana tiempopitaq trigoqa qoramanta t’aqasqa karan.

  Junt’akusqan: 1870 watamantapachan sut’ita yachakun pikunachus cheqaq cristianokuna kanku chayta. Tukukuy p’unchaykunapiqa cheqaq cristianokunatan juñukuran, jinaspa pantasqa cristianokunamanta t’aqakuran.

• Bibliapi maskhanapaq: Dan. 2:31-33, 41-43.

  Profecía: Fierromanta t’urumantawan estatuaq chakinkuna.

  Junt’akusqan: T’uruqa Gran Bretaña Estados Unidos nacionpiwan kamachisqanku runakunan kanku. Chay runakunamanta wakinqa kamachiqninku contran jatarinku. Chaymi chay nacionkunaqa mana aswan atiyniyoq kayta atinkuchu.

• Bibliapi maskhanapaq: Mat. 13:30; 24:14, 45; 28:19, 20.

  Profecía: “Trigota” cosechaspan “taqena wasiman” waqaychakun, chaymantataq ‘allin yuyayniyoq junt’aq kamachita’ wasi qhawariqta jina churakun”. Jinaspapas Diosmanta jamuq “allin willakuykunatan pachantinpi” willakun.

  Junt’akusqan: 1919 watamantapachan allin yuyayniyoq junt’aq kamachiqa Diospa llaqtanta qhawarishan. Chaymantapachan astawan Diosmanta willayta qallariranku. Kay tiempopipas Jehová Diospa testigonkunaqa 200 más nacionkunapiñan Diosmanta willashanchis, waranqa más simikunapi.

• Bibliapi maskhanapaq: Dan. 12:11; Apo. 13:11, 14, 15.

  Profecía: Iskay waqrayoq manchay phiña animalmi kamachiran qanchis umayoq “manchay phiña animalpa rijch’ayninta” ruwanankupaq, chaymantataq ‘phukuykuspa kausayta’ qoran.

  Junt’akusqan: Gran Bretaña nacionqa Estados Unidos nacionpiwanmi “Sociedad de Naciones” nisqata rijurichiranku. Chaypiqa juj nacionkunapas yanapakurankun, wichay ladomanta reypas 1926 watamanta 1933 watakaman yanapakuran. Llapa nacionkunapas “Sociedad de Naciones” nisqatan jatunchayta qallariranku. Kay tiempopipas Jehová Diospa gobiernonta jatunchanankumantaqa “Naciones Unidas” (ONU) nisqatan jatunchashanku.

• Bibliapi maskhanapaq: Dan. 8:23, 24.

  Profecía: Juj millay reymi “sinchita purunyachinqa”.

  Junt’akusqan: Gran Bretaña nacionqa Estados Unidos nacionpiwanmi sinchi ñak’ariykunata, sasachakuykunata apamuran. Arí, Segunda Guerra Mundialpin Estados Unidos nacionqa iskay bombakunata kachaykuran contranpi kaq nacionman.

• Bibliapi maskhanapaq: Dan. 11:31; Apo. 17:3, 7-11.

  Profecía: Chunka waqrakunayoq “k’anchaq puka colorniyoq” animalqa chinkay-chinkay ukhumantan lloqsimun. Chay animalqa pusaq kaq reymi. Daniel qelqapin willan chay reyqa “ch’usaqyachiq millakunapaq” kasqanta.

  Junt’akusqan: “Sociedad de Naciones” nisqaqa Segunda Guerra Mundialpin chinkapuran, qhepamantaq “ONU” nisqa sutiwan rijurimuran. Kay tiempopipas Jehová Diospaq gobiernonta jatunchanankumantaqa “ONU” nisqatan jatunchashanku. “ONU” nisqata yanapaq nacionkunan llapa pantasqa religionkunata chinkachinqa.

• Bibliapi maskhanapaq: 1 Tes. 5:3; Apo. 17:16.

  Profecía: Kamachikuqkunan nishanqaku: “Thajmi kasunchis, allin waqaychasqan kasunchispas”, nispa. Chayllamanmi ‘chunka waqrakunaqa’ ‘manchay phiña animalpiwan’ ‘qhelli kausaypi puriq warmiman’ phawaykuspa chinkachinku. Chaymantaqa llapa nacionkunapas chinkachisqan kapunku.

  Junt’akusqan: Nacionkunan ninqaku: “Thajmi kasunchis, allin waqaychasqan kasunchispas”, nispa. Chayllamanmi “ONU” nisqaqa yanapaqninkunapiwan llapa pantasqa religionkunata chinkachinqaku. Chhaynapin qallarinqa manchay ñak’ariy tiempo, Armagedón guerrapitaq Satanaspa kamachisqan pachata chinkachinqa.

• Bibliapi maskhanapaq: Ezeq. 38:11, 14-17; Mat. 24:31.

  Profecía: “Gog” nisqa phawaykun Diospa llaqtanman. Angelkunataq “ajllasqa” cristianokunata juñunku.

  Junt’akusqan: Wichay ladomanta reyqa kay pachapi gobiernokunawan kuskan Diospa llaqtanta ch’usaqyachiyta munanqa. Chayllamanmi kay pachapi qhepaq ajllasqa cristianokunaqa juñusqa kanqaku janaq pachapi.

• Bibliapi maskhanapaq: Ezeq. 38:18-23; Dan. 2:34, 35, 44, 45; Apo. 6:2; 16:14, 16; 17:14; 19:20.

  Profecía: ‘Yuraq caballopi’ kaqmi, Gogta ejercitontawan ‘atipaspa’ ch’usaqman tukuchipun. “Manchay phiña animalpas” “nina rauray qochamanmi” wijch’uykusqa kapun. Jatun karay runaman rijch’akuq estatuapas chhallusqan kapun.

  Junt’akusqan: Rey Jesusmi 144.000 cristianokunawan angelkunawan kuska Jehová Diospa llaqtanta amachanqa otaq cuidanqa. Jinaspapas ch’usaqyachinqan Satanaspa kamachisqan llapa gobiernokunata.