1, 2. a) ¿Ima premiotan chaskinqa Diosta serviqkuna? b) ¿Iman yanapawasun chay premiota mana chinkachinanchispaq? (Kay paginapi dibujota qhaway.)

JANAQ pachapaq ajllasqa cristianokunaqa apóstol Pablo jinan ‘janaq pachaman’ rinqaku, chay premiotan paykunaqa suyakushanku (Filip. 3:14). Janaq pachamantan paykunaqa Jesucristowan kuska gobiernamunqaku. Llapa runakunatan yanapanqaku ch’uya kausayman chayanankupaq (Apo. 20:6). ¡May kusisqachá paykunaqa kashanku chay sumaq premio chaskinankuta yachaspaqa! Waj t’aqamanta ovejakunan ichaqa kay pachapi wiñaypaq kausanqaku. Chaytan paykunapas tukuy sonqo suyakushallankutaq (2 Ped. 3:13).

² Pabloqa munasharanmi janaq pachapaq ajllasqamasinkuna premio chaskinankuta. Chaypaqmi ichaqa Diosmanta mana t’aqakunankuchu karan. Chaymi paykunata niran: “Janaq pacha kaqkunapi yuyayniykichisqa kachun”, nispa (Col. 3:2). Pabloq nisqan jina, premionkupin paykunaqa  piensananku karan (Col. 1:4, 5). Noqanchispas, janaq pachapaqña kay pachapaqña kanchis chaypas manapunin qonqananchischu premionchistaqa (1 Cor. 9:24).

3. ¿Imakunamantan cuidakunanku cristianokuna?

³ ¿Imakunan premionchista qonqachiwasunman? Chaykunamantan Pabloqa Colosas llaqtapi cristianokunaman willallarantaq. Pabloq willasqan jina falso cristianokunamantan cuidakunanku karan. Paykunaqa ñaupa kamachikuykunamanmi imaman jinaraq k’askakuqku manataqmi Jesuspiqa iñiqkuchu (Col. 2:16-18). Chaymantapas qhelli ruwaykunamantan cuidakunanku karan. Cuidakunallankutaqmi karan hermanokunawan qhawanakuymanta, familiapi phiñachinakuymantapas. Chaykunan kay tiempopipas premionchista qonqachiwasunman. Chaymi kunan chay problemakunapaq Pabloq qosqan consejokunamanta yachasunchis.

4. ¿Imaynapin qhelli ruwaykuna premionchista pierdechiwasunman?

⁴ Premionkumanta yuyarichisqan qhepamanmi Pabloqa Colosas llaqtapi cristianokunata niran: “Wañuchiychis aycha cuerpoykichista, chhaynapi ama qhelli juchaman urmanaykichispaq, ama millakunapaq kaqkunata ruwanaykichispaq, ama sinchi warminayachikuywan otaq qharinayachikuywan vencechikunaykichispaq, ama mana allin ruwaykunapi piensanaykichispaq, ama imatapas sinchita munapayanaykichispaqwan”, nispa (Col. 3:5). Chay qhelli ruwaykunaqa Diosmantan karunchawasunman, chaymi manapuni chaykunataqa munapayananchischu. Juj hermanon qhelli juchaman urmaspa qarqochikusqa. Paypa nisqan jina qhelli ruwaykunata munapayayqa nishu fuertes paypi karusqa, manapunis yuyayman kutiyta atisqachu mana allinpi rikukunankama.

5. ¿Imatan ruwananchis ama ima juchamanpas urmananchispaq?

⁵ Allin yuyaywanmi tukuy imatapas ruwananchis chhaynapin mana faciltachu ima juchamanpas urmasun. Chaymi chayraq reqsinakushaq warmi-qharikunaqa, reqsinakuyta qallarishaspanku jina rimanakunanku respetanakunankupaq. Manan llaminakushanankuchu ni much’anakushanankuchu. Allintan cuidakunanku sapallanku puriymantapas (Prov. 22:3). Llank’anarayku otaq negociorayku viajaq cristianokunapas allintan cuidakunanku (Prov. 2:10-12, 16). Chaypaqqa lliumanmi willakunanku Testigo kasqankuta. Lliutan respetananku, manataqmi pitapas pujllapayanankuchu. Wakinqa yaqapaschá sapanchis tarikuspa munashanchis pillapas uyariwananchista. Chhayna kaqtinqa yaqapaschá comunta piwanpas reqsinakuyta qallarisunman. Ichaqa allintan cuidakunanchis chaymanta, mana chayqa premionchistan pierdechiwasunman. Llakisqa tarikushanchis chayqa Diospa yanapayninta, hermanokunaq yanapayninta iman maskhananchis (leey Salmos 34:18; Proverbios 13:20).

6. ¿Imamantan cuidakunanchis ama qhelli ruwayman urmanapaq?

⁶ Qhelli ruwaykunamanta cuidakunapaqqa manan qhawananchischu qhelli ruwaykunamanta peliculakunata. Kunan tiempopiqa  yaqa llapa peliculakunapin sinchi millay ruwaykuna rijurimun. Ñaupa tiempopi Sodoma Gomorra llaqtakunapi jinaraqmi chaykunaqa kashan (Jud. 7). Chay peliculakunataqa yaqapaschá pipas qhawarinman mana imanakuqta jina. Chhaynata qhawarinanchistan munanku chaykunata ruwaqkunapas. Ichaqa, manapunin chaykunataqa qhawananchischu manataqmi munapayananchispaschu. Chaymi allin yuyaywan ima peliculatapas ajllakunanchis, chaytachus ruwasun chayqa manan premionchista chinkachisunchu (Prov. 4:23).

7. ¿Imakunan pasanman Diospa llaqtanpi?

⁷ May kusisqachá kashanchis Jehová Diospa llaqtanpi kaspaqa. Chay llaqtallapin jujkuna-jujkunawan sumaqta kausanchis Diospa simintapas estudianchis. Chaykunaqa kusatan yanapawanchis premionchispi piensananchispaq. Ichaqa, yaqapaschá mayninpiqa hermanonchiskunawan phiñachinakusunman. Manachus usqhaylla chaykunata allichasun chayqa hermanonchistan cheqnipakuyta qallarisunman (leey 1 Pedro 3:8, 9).

8, 9. a) ¿Imayna runan kananchis premiota chaskinanchispaq? b) ¿Imatan yuyarinanchis pi hermanopas sonqonchista k’iriwaqtinchis?

⁸ ¿Imatan ruwasunman ama phiñasqalla kanapaq? Apóstol Pabloq consejontan kasukunanchis. Paymi niran: “Diospa ajllakusqankunataq munakusqan ch’uya wawankunataq kankichis chayqa, p’achakuychis sumaq khuyapayakuq kaywan, sumaq sonqo kaywan, k’umuykukuq kaywan, llamp’u sonqo kaywan, pacienciawan ima. Qankunapura paciencianakuychis, perdonanakuychis razonwanña pipaqpas phiñasqa kashankichis chaypas. Imaynan Jehová Diospas tukuy sonqowan perdonarasunkichis chhaynallatataq qankunapas ruwaychis. Chaymantapas munakuywan p’achakuychis, munakuymi lliuta allintapuni jujllaman tukuchin”, nispa (Col. 3:12-14).

⁹ Munakuq sumaq sonqo kasun chayqa, faciltan pitapas perdonasun. Yaqapaschá pipas sonqonchista k’iriwasunman. Chhayna kaqtinqa yuyarinanchismi noqanchispas imallapipas jujkunaq sonqon k’irisqanchista. Chay pasawaranchis chayqa, maytachá agradecekuranchis chay hermano perdonawasqanchismanta (leey Eclesiastés 7:21, 22). Astawanqa Jesustan agradecekunanchis munakuq kasqanmanta sumaq sonqo kasqanmantawan; paymi noqanchistaqa jujllachawashanchis (Col. 3:15). Kaq Diosllatan noqanchisqa munakunchis, kaq willakuyllatataqmi willamushanchispas. Chaymantapas mayninpiqa kaq problemakunapin tarikunchis. Chaymi astawanraq munanakunanchis, khuyapayanakunanchis, perdonanakunanchis ima; chhaynapin sumaqta kausasun, manataqmi premionchistapas chinkachisunchu.

10, 11. a) ¿Imaraykun mana allinchu kanman envidiakuy? b) ¿Imatan ruwasunman envidiakuy premionchista ama chinkachinanpaq?

¹⁰ Envidianakuypas jark’awallasunmantaqmi premio chaskinanchista. Bibliaq willasqan jina envidiakuyqa manapunin allinchu. Ejemplopaq, Cainmi envidiakuran wayqen Abelta chaymi wañuchiran. Corepas, Datanpas, Abirampas Moisestan  envidiakuranku chaymi pay contra jatariranku. Rey Saulpas Davidtan envidiakuran, chaymi payta wañuchiyta munaran. Biblian nillantaq: “Maypichus envidianakuy churanakuypas kan chaypin kallantaq ch’aqwaypas tukuy mana allin kaqkunapas”, nispa (Sant. 3:16).

¹¹ Sichus kallpachakusun munakuq sumaq sonqo kananchispaq chayqa manan pimantapas envidiakusunchu. Biblian nin: “Pipas munakuqqa pacienciakuqmi, sumaq sonqon. Pipas munakuqqa manan envidiakunchu”, nispa (1 Cor. 13:4). Envidiakuy sonqonchispi mana wiñananpaqqa Jehová Dios jinan imatapas qhawarinanchis. Chaymantapas Diospa llaqtanpiqa llapanchismi juj cuerpolla kanchis. Chaymi pipas ‘jatunchasqa kaqtinqa, llapanchis paywan kuska kusikunanchis’ (1 Cor. 12:16-18, 26). Arí, pipas ima privilegiotapas chaskiqtinqa manan envidiakunanchischu aswanmi paywan kuska kusikunanchis. Yuyarisun Jonatanta, payqa manan envidiakuranchu Davidmanta, aswanmi payqa munakuywan sumaq sonqo kaywan ima Davidta yanaparan (1 Sam. 23:16-18). Noqanchisri, ¿atisunmanchu pay jina kayta?

12. ¿Bibliapi ima consejon familianchista yanapanman premiota chaskinanpaq?

¹² Familianchis ukhupi Diospa kamachikuyninman jina kausasun chayqa, thajpin kausasun kusisqataqmi kausasunpas, premiotapas chaskisunmi. Pablon familiakunata consejaran: “Esposakuna, qosaykichista kasukuychis, chhaynatapunin ruwananku Señorpa discipulonkunaqa. Qankunapas, qosakuna, esposaykichista munakuychis, amataq paykunawanqa  phiñakuychischu. Qankunapas, wawakuna, tayta-mamaykichista tukuy imapi kasukuychis, chaymi Señortaqa anchata kusichin. Taytakuna, ama wawaykichista colerachiychischu, chhaynapi mana umphuyanankupaq”, nispa (Col. 3:18-21). ¿Imaynan kankuman familiakuna chay consejokunata kasukuspanku? Sumaqtan kausankuman ¿riki?

13. ¿Imaynatan juj cristiana qosanta yanapanman Diosta servinanpaq?

¹³ Wakin hermanakunaq qosanqa manan Testigochu. Chaymi mayninpiqa mana allintachu tratanku esposankuta. Ichaqa, ¿chayraykuchu pi hermanapas discutinan qosanta? ¿Discutiqtinchu allin tratota qonqa? Allin tratotaña qonqa chaypas, ¿yanapanqachu qosanta Diosta servinanpaq? Chhaynatataq portakunqa chayqa manapaschá faciltachu Diosman achhuykunqa. Chaymi chay hermanakunaqa kallpachakunanku qosankuta respetanankupaq. Chayta ruwanqaku chayqa thajmi familia kausanqa jatunchasqan Diospas kanqa. Chaymantapas yaqapaschá iskayninku premiota chaskikunqaku (leey 1 Pedro 3:1, 2).

14. ¿Imatan juj cristiano ruwanman esposan mana respetaqtin?

¹⁴ Wakin hermanokunaq esposanpas manan Testigochu kanku. Chhaynataq chayqa manapaschá respetanqakuchu qosankuta. Ichaqa, ¿chayraykuchu pi hermanopas qaparispa esposanta kamachinan? Manan. Aswanmi payqa Jesús jina esposanta munakuywan tratanan, chaytan Jehová Diospas munan (Efes. 5:23). Yachasqanchis jina Jesusqa munakuywan pacienciawan iman iñiq t’aqata cuidan (Luc. 9:46-48). Chhaynatan chay hermanopas ruwanan, chhaynapin esposanpas facilta Diosman achhuykunqa.

15. ¿Imaynatan juj cristiano esposan munakusqanta rikuchinman?

 ¹⁵ Jehová Diosmi qosakunata kamachin: “Qosakuna, esposaykichista munakuychis, amataq paykunawanqa phiñakuychischu”, nispa (Col. 3:19). ¿Imaynatan juj qosa rikuchinman esposan munakusqanta? Imachus rimasqanta makilla uyarispan (1 Ped. 3:7). Manaña llapanpichu esposanta kasunqa chaypas uyarinanpunin paytaqa (Prov. 15:22). Munakuq qosaqa manan simiwanchu ni makiwanchu respetachikun, aswanmi munakuq sumaq sonqo kasqanwan. Esposantapas wawankunatapas sumaqta cuidanqa chayqa, yanapanqan paykunata wiñay kausay premiota chaskinankupaq.

16, 17. Wayna-sipas, ¿imatan ruwanayki tayta-mamaykiq imachus nisqasuykiwan ama aburrikunaykipaq?

¹⁶ Wayna-sipas, piensayniykiman jinaqa yaqapaschá tayta-mamayki nishuta controlashasunki, manapaschá dejasunkikuchu ima ruwanaykitapas. Chhaynapi tarikushanki chayqa yaqapaschá aburrisqa ninki: “Manan munaymanchu Dios serviyta”, nispa. Ichaqa, Jehová Diosta saqenki chayqa manan maypipas tarinkichu tayta-mamaykiq munakuyninta jinaqa ni hermanokunaq munakuyninta jinapas.

¹⁷ Tayta-mamaykichus mana jayk’aqpas yuyayta qosunkiman ni wanachisunkimanpaschu chayri, ¿“munakuwanmi” niwaqchu? Manan ¿riki? (Heb. 12:8.) Ichaqa, manapaschá gustoykiman jinachu imatapas nisunkiku. Chaypi piensashanaykitaqa aswanpas piensay imaraykus imatapas nishasunkiku chaypi. Amapuni tayta-mamaykimanqa kutipakunkichu. Bibliapipunin nin: “Tajasqa runaqa tupusqallatan riman, allin reparaqqa samp’a sonqollan”, nispa (Prov. 17:27). Kallpachakuy allin yuyayniyoq runa kanaykipaq amataq usqhayllaqa phiñakuychu, aswanpas sumaqta ima consejotapas chaskikuy (Prov. 1:8). Jehová Diosta munakuq tayta-mamayoq kayqa manan imawanpas igualakunchu. Chayrayku chaskikuy paykunaq yanapayninta chhaynapin kausay premiota chaskinki.

18. ¿Imaraykun premiollanchispi yuyayninchis kashanan?

¹⁸ Llapanchispaqmi juj munay premio kashan. ¿Ima premio? Kaypi yachasqanchis jina ajllasqa cristianokunan janaq pachaman ripunqaku. Waj ovejakunataq kay pachapi wiñaypaq kausanqaku. Chaytan nin munakuq kamaqninchis. Chaymantapas pisi tiempollamantan ‘kay pachaqa Señor Diosta reqsiq runakunawan junt’a kanqa’ (Is. 11:9). Arí, Dios kikinmi kay pachapi llapa tiyaqkunata yachachiwasun payta allinta reqsinanchispaq. Manan chay premio jinaqa ima premiopas kanmanchu. Chayrayku, amapuni imaraykupas Diostaqa saqesunchu. Amataq premionchistaqa imawanpas qechuchikusunchu.