1. ¿Imapin yanapawanchis takikuna?

JUJ kutinmi takikunata ruwaq allin reqsisqa runa niran: “Takikunapi letrakunaqa piensachisunkin. Musicataq kusirichisunki. Takiwan musicawan kuskataq sonqoman chayan”, nispa. Takinchiskunaqa Jehová Diosta jatunchanapaqmi ruwasqa kashan. Chay takikunata takispan payman achhuykusun, pay munakusqanchistapas rikuchisun. Chaymi kallpachakunanchis sapanchispas juñunakuypipas Jehová Diosman takinanchispaq. Chhaynapin rikuchisun may tukuytas Diosta munakunchis chayta.

2, 3. a) ¿Imaynatan wakin runakuna qhawarinku runaq qayllanpi takiyta? b) ¿Imakunamantan kaypi yachasun?

² Ichaqa, ¿ganaswanchu juñunakuykunapi takinchis icha p’enqakunchischu takiyta? Wakin llaqtakunapi qharikunaqa p’enqakunkun runaq qayllanpi takiyta. Juñunakuykunapi chay pasanman chayqa manan allinchu kanman. Umalliqkunan chaypiqa ejemplota qonanku, sichus takina horaskunapi juj ruwaykunata ruwanqaku chayqa, kaqtan jujkunapas ruwallanqakutaq (Sal. 30:12).

 ³ Takispataq Jehová Diosta jatunchanchis chayqa, manan chay ratoqa maytapas rinanchischu. Chaymi tapukunanchis: “¿Imatan piensani juñunakuykunapi takikusqan takikunamanta? ¿Imatan ruwayman mana manchakuspa kusikuywan takinaypaq? ¿Imatan ruwayman llapa takikunata tukuy sonqowan takinaypaq?”, nispa.

4, 5. ¿Imaynatan Israel runakuna Jehová Diosta jatunchaqku?

⁴ Jehová Diosta serviqkunaqa unay watakunañan payta jatunchashanku takikunawan. Ñaupa tiempo Israel runakunapas Diosta servisqanku tiempopiqa tukuy tiempon takikunawan Diosta jatunchaqku. Davidpas 4.000 runakunatan Leví ayllumanta ajllaran Jehová Diosman takinankupaq. Paykunamanta 288 runakunaqa kusatan takiqku (1 Crón. 23:5; 25:7).

⁵ Jerusalenpi templota inaugurashaspapas tukuy sonqowanmi paykunaqa takiranku. Bibliapipunin nin: “Cornetata, platillota, waj tocanakunatapas tocaqtinkutaq, tocaqkunapas, takiqkunapas juj kunkalla takiykuranku, Señor Diosta yupaychaspanku, payman graciasta qospanku ima [...] Chaymi wasiqa Señor Diospa qhapaq atiyninwan junt’a karan”, nispa. Chaywanqa maytachá Israel runakunaqa kallpachakuranku (2 Crón. 5:13, 14; 7:6).

6. ¿Imatan Nehemías ruwaran Jerusalenpi gobernador kashaspa?

⁶ Israel runakuna Jerusalenpi perqakunata perqashaqtinkupas karanmi takiqkunapas tocaqkunapas. Chay Leví runakunatan Nehemías churaran. Chay perqakunata inaugurashaqtinkupas astawanraqmi takiqkunapas takiranku tocaqkunapas tocaranku. Chaywanqa may kusisqachá chay llaqtapi runakunaqa karanku. Chaymantapas takispa tocaspa iman paykunaqa perqa patantakama lliu llaqta muyuriqta puriranku templo qayllaman chayanankukama. Paykunaq takisqanqa karumanraqmi uyarikuran (Neh. 12:27, 28, 31, 38, 40, 43). Jehová Diospas maytachá kusikuran chay serviqninkunaq takisqanta uyarispaqa.

7. ¿Imaynatan Jesús rikuchiran Diosman takina kasqanta?

⁷ Jesuspa tiemponpipas takispa iman Diostaqa adoraqku. Chaypaq yuyarisun juj jatun p’unchaypi Jesuspa imachus ruwasqanta. Chay p’unchaymi karan “Señorpa cenan” nisqa, chay p’unchay ch’isinmi payqa apostolninkunawan kuska Jehová Diosman takiranku (leey Mateo 26:30).

8. ¿Ima ejemplotan saqewaranchis ñaupa tiempo cristianokuna?

⁸ Ñaupa tiempopi cristianokunapas takispan Diosta adoraqku. Arí, paykunaqa manaña templopichu juñunakuqku chaypas, tukuy sonqowanmi Diosman takiqku. Apóstol Pablopunin Diospa yuyaychasqan kaspa paykunata niran: “Qankunapura yachachinakuychis kallpachanakuychis salmo takikunata takispa, Diosta alabaspa, agradecekuywan adorana takikunata takispa ima”, nispa (Col. 3:16). Chaytan noqanchispas kasukunanchis chaymi ‘adorana takikunataqa’ takinanchispuni.  Chay takikunan kallantaq ‘allin yuyayniyoq junt’aq kamachiq’ preparamusqan mijuna (Mat. 24:45).

9. a) ¿Imaraykun wakin manchakunku juñunakuykunapi takiyta? b) ¿Imaynatan Jehová Diosman takinanchis? ¿Pikunan ejemplo kananku? (3 paginapi fotota qhaway.)

⁹ Wakinqa manapaschá costumbrasqachu kashanchis takinapaq. Manapaschá familianchispi ni llaqtanchispipas takiqchu kanchis. Wakinqa yaqapaschá televisionpi takiqkunawan radiopi takiqkunawan comparakuspa nisunman: “P’enqaytamá noqaqa takini, manan jayk’aqpas paykuna jinaqa takiymanchu”, nispa. Ichaqa manan chaykunawanqa jark’achikunanchischu. Kamaqninchis Jehová Diosmantaq takishanchis chayqa, takinanchis librota altoman oqarispan tukuy sonqowan takinanchis (Esd. 3:11; leey Salmos 147:1). Kunan tiempoqa askha juñunakuna wasikunapin kashan jatun televisionkuna, chaypitaqmi rijurimun takinapaq letrakunapas. Chaykunaqa kusatachá yanapawashanchis tukuy sonqowan fuerteta takinanchispaq. Chaymantapas nombrasqa qharikunapaq escuelapin takikunata takikushan. Chhaynapi umalliqkuna takiypi allin ejemplo kanankupaq.

10. ¿Imapin piensananchis fuerteta takiyta manchakuspa?

¹⁰ Wakinqa “manan munaytachu takini” nispan p’enqakunku fuerteta takiyta. Wakintaq panta-pantata takispa ujullankuman takinku. ¿Imatan ruwasunman chay pasawaqtinchis? Chaypaq kaypi piensasun, Bibliaq nisqan jina lliupas “pantanchispunin” rimasqanchispiqa  ¿riki? Ichaqa, ¿chayraykuchu manaña rimanchis? Manan ¿riki? (Sant. 3:2.) Chhaynatan ruwananchis takispapas, manan pantasqanchisraykuchu p’enqakunanchis otaq manaña takinanchis.

11, 12. ¿Imakunatan ruwananchis allinta takinanchispaq?

¹¹ Mayninpiqa manapaschá yachanchischu imayna takiyta chayraykupaschá p’enqakunchis. Chaymi kunan yachasun wakin yanapaykunamanta. *

¹² Fuerteta takinapaqqa allinta samarispan takina. Imaynan corrienteqa focota munayta k’anchachin, chhaynatan samarisqanchis wayrapas kallpata qowasun allinta takinanchispaq. Chaymantapas takispaqa manan bajochallatachu takinanchis aswanmi rimasqanchismanta maschata. (Bibliamanta Allin Yachachiq Kanapaq Escuelapi Yachay libropi 181-184 paginakunapi “Allinta samaspa rimay” nisqa partepi yanapaykunata qhaway.) Chaymantapas Bibliaq nisqan jina Diosman takispaqa kusisqan takinanchis (Sal. 81:1).

13. ¿Imatan ruwana mana manchakuspa takinapaq?

¹³ Familiapi estudiaspa otaq sapallayki estudiaspa gustasqasuyki takita ajllakuy, jinaspa chayta leey fuerte kunkachawan. Chaymantataq allinta samarispayki kasqan kunkallawan juj puntomanta juj puntokama ama sayaspalla leey. Chaymantataq chay leesqayki parteta takiq jina leey (Is. 24:14). Chhaynata practicanki chayqa allintan takinki. Jinan mana manchakuspa takinki.

14. a) ¿Imaraykun takinapaq siminchista allinta kicharinanchis? (Qhaway “ ¿Imatan ruwasunman allinta takinapaq?” nisqata.) b) ¿Imakunatan ruwasunman kunkanchis bajolla otaq ñañulla kaqtin?

¹⁴ Kunkanchis fuerteta uyarikunanpaqqa rimasqanchismanta aswan jatunchatan siminchista kicharinanchis. ¿Kunkanchis nishu bajolla otaq nishu ñañulla kanman chayri? Chaypaqqa yaqapaschá Bibliamanta Allin Yachachiq Kanapaq Escuelapi Yachay nisqa libropi yachachikuykuna yanapawasunman. Chay yachachikuykunan kashan 184 paginapi, “atipawaqmi rimayniykipi sasachakuykunata” nisqa recuadropi.

15. a) ¿Imatan willakuran 2016 watapi “reunión anual” nisqapi? b) ¿Imaraykun takina libronchista revisakuran?

¹⁵ 2016 watapin “reunión anual” nisqapi umalliq t’aqamanta hermano Stephen Lett juj mosoq takina libro lloqsimunanmanta willaran. Chay takina libroq sutinmi Jehová Diosman kusisqa takisun nisqa. Stephen hermanoq willasqan jina, chay takina libroqa 2013 watapi inglés simipi lloqsimuq Bibliaman jinan ruwasqa kashan. Chay Bibliaman jinataq ruwasqa kashan chayqa, chay takina libropi wakin letrakunaqa cambiasqan kashan. Chaymantapas predicacionmanta rimaq takikunata, Jesuspa wañusqanmanta rimaq takikunata iman chay libropiqa yapakamushan. Jinaspapas takispa imataq Diosta adoranchis chayqa, inglespi Biblia jina allin forrasqan chay takina libroqa lloqsimunqa. Chhayna lloqsimunanpaqmi umalliq t’aqa kamachikamun.

16, 17. ¿Imaynan kashan mosoq takina libro?

¹⁶ Chaymantapas chay mosoq takina libropiqa llapa takikunan sapanka temaman jina ordenpi churasqa kashan. Ñaupaq 12 takikunan Jehová Diosmanta rimashan, chayman qatiq pusaq takikunataq Jesusmanta rimashan. Qatimuq wakin takikunapas sapanka temaman  jinan churasqa kashan. Chaymantapas chay libropiqa ñaupaq paginallapiraqmi llapa takikunamanta juj lista kashan. Allinpunin kashan discurso qoqkuna takikunata ajllakunankupaqpas.

¹⁷ Llapanchis tukuy sonqowan takinanchispaqmi chay mosoq takina libroqa fácil entiendey kashan. Wakin sasa rimana otaq sasa entiendena palabrakunapas manañan chay libropiqa kanñachu. Chhaynataq chayqa faciltachá kunanqa takisunchis. Chaymantapas chay libropi wakin takikunaqa juñunakuymanta predicacionmanta iman rimashan, chaymi wakin letrakunaqa chaypaq jina cambiasqa kashan.

18. ¿Imaraykun mosoq takinanchis librota allinta reqsinanchis? (Willakuyta qhaway.)

¹⁸ Chay mosoq takina libropi wakin takikunaqa Diosmantapas mañakushasunman jinan ruwasqa kashan. Chaykunan yanapawasun sonqomanta Diosman takinanchispaq. Wakin takikunataq yanapawasun munanakunanchispaq allin kaqkunata ruwananchispaqwan (Heb. 10:24). Chhaynaqa kallpachakusun chay takikunata allinta reqsinanchispaq tononman jina takinanchispaqpas. Chaypaqqa yaqapaschá jaykusunman jw.org nisqa paginaman, chaypin kashan llapa takikuna. Chaypi takisqankuman jina practicasun chayqa allin takiqmi kasunchis, sonqomantataqmi takisunpas. *

19. ¿Imata ruwaspan Diosta jatunchananchis?

¹⁹ Kaypi yachasqanchis jina, takispan Jehová Diosninchistaqa jatunchallanchistaq. Chaymi tukuy sonqowan takinanchis, chhaynapin rikuchisun payta munakusqanchista agradecekusqanchistapas (leey Isaías 12:5). Chaymantapas tukuy sonqowan takisun chayqa jujkunapas kaqtan ruwallanqakutaq. Llapanchismi, waynapas, sipaspas, kuraqpas, mosoqkunapas takispa kamaqninchista jatunchananchis. Chayrayku, amapuni manchakusunchu ni p’enqakusunchu Diosman takiytaqa. Bibliapipunin nin: “Señor Diosman takiychis”, nispa. ¡Chhaynaqa sonqomanta papanchis Jehová Diosman takisun! (Sal. 96:1.)