1. ¿Imatan Jehová Dios mana jark’awanchischu?

JEHOVÁ DIOSQA manan jark’awanchischu imayna kausay munasqanchista. Sonqonpaq jina kausanapaqmi ichaqa yanapawanchis, chhaynapin imatapas allinta decidinchis (Sal. 119:173). Bibliapi yachachikuykunata kasukusqanchispas yanapawanchismi allinta decidinanchispaq (Heb. 5:14).

2. ¿Iman pasanman decidisqanchis qhepaman?

² Imachus ruway munasqanchista allintaña decidinchis chaypas, yaqapaschá sasa kanman chayta tukunanchiskama ruwayqa. Juj wayna hermanonchismi tukunankama Biblia leenanpaq decidikun. Iskay kinsa semanakunan allinta leeshan, chayllamanmi ichaqa saqepun. Juj hermanchispas precursora kananpaqmi decidikun, ichaqa jayk’aqchus qallarinanpaqmi mana fechata churanchu. Iñiq t’aqapi umalliqkunapas decidinkun askha hermanokunata visitanankupaq, ichaqa askha killaña pasarun chaypas mana pitapas visitankuraqchu. Sapankankupas allintaña decidiranku chaypas manan decidisqankuta junt’ayta atinkuchu. Chay jinallataqmi pasaran ñaupaq tiempopi Corinto llaqtapi cristianokunawan. ¿Imatan paykunamanta yachasunman? Chaymanta kaypi yachasun.

3. ¿Imata ruwanankupaqmi Corinto llaqtapi kaq cristianokuna decidiranku? Ichaqa, ¿iman pasaran?

³ 55 watakunapi jinan Jerusalenpi, Judea llaqtakunapi hermanokuna sinchi pisichikuypi tarikusharanku, chaymi wakin iñiq t’aqakunaqa paykunata yanapanankupaq qolqeta juñuranku. Corintio llaqtapi cristianokunapas sumaq sonqo kasqankuraykun yanapakuyta munaranku, chaymi apóstol Pablota tapuranku imaynatas yanapakunkuman chayta. Jinan Pabloqa iñiq t’aqata niran imaynatas ruwankuman chayta, Titotataq kamachiran qolqe juñuypi yanapakunanpaq (1 Cor. 16:1; 2 Cor. 8:6). Askha killakunaña pasaran chaypas, manan ima  yanapaytapas apachisqakuchu, chaytan apóstol Pablo yacharuran. Yaqachus jina donacionninkuta mana juñurankuchu juj iñiq t’aqakunawan kuska Jerusalenman apachinakupaq (2 Cor. 9:4, 5).

4. 2 Corintios 8:7, 10, 11 textopi nisqan jina, ¿imata ruwanankupaqmi apóstol Pablo Corinto llaqtapi cristianokunata niran?

⁴ Corinto llaqtapi cristianokunaqa allintan decidiranku iñiqmasinkuta yanapanankupaq, chaymi apóstol Pabloqa qoykukuq kasqankumata allin iñiyniyoq kasqankumantawan “kusa” niran. Ichaqa nillarantaqmi: “Kallpachaykichis imachus ruway qallarisqaykichista tukunaykichispaq”, nispa (leey 2 Corintios 8:7, 10, 11). Allin iñiyniyoq cristianokunapas kallpachakunankun imachus decidisqankuta tukunankukama junt’anankupaq, chaytan yachanchis Corinto llaqtapi cristianokunamanta.

5. ¿Ima tapuykunamantan yachasun?

⁵ Mayninpiqa Corinto llaqtapi cristianokuna jinan mana atisunmanchu imachus decidisqanchista junt’ayta. ¿Imarayku? Juchayoq runa kasqanchisrayku, juj p’unchaykunapaq ruwayninchista saqesqanchisrayku, otaq qonqaylla imapas pasaqtin (Ecl. 9:11; Rom. 7:18). ¿Imaynatan allinta imatapas decidisunman? Mayninpiqa imachus decidisqanchistan cambianachis kanqa ichaqa chayta ruwanapaq, ¿imatan ñaupaqta qhawarinanchis? ¿Iman yanapawasun imachus decidisqanchista tukunanchiskama ruwanapaq? Chay tapuykunamanta kaypi yachasun.

6. ¿Jayk’aqmi ima decidisqanchista cambiasunman?

⁶ Jehová Diosta servinanchispaq decidisqanchista, qosallanchiswan otaq esposallanchiswan tiyananchispaq decidisqanchitapas manan jayk’aqpas cambiananchischu (Mat. 16:24; 19:6). Wakin ruwaykuna decidisqanchistan ichaqa cambiasunman imapipas tarikusqanchisrayku. Chhaynaqa, ¿iman yanapawasunman allinta imatapas decidinanchispaq?

7. ¿Imatan Diosmanta mañakunanchis? ¿Imaraykun chayta ruwananchis?

⁷ Diosmantan mañakunanchis yachayta. Santiagon niran: “Mayqenniykichispas yachayniyoq kayta necesitashankichis chayqa, Diosmanta mañakushallaychis, jinan Diosqa chay mañakusqaykichista qosunkichis”, nispa (Sant. 1:5). Llapanchispas mayninpiqa manan yachanchischu ima decidiyta. Chaymi Jehová Diospa yanapayninta mañakunanchis decidinanchispaq otaq ima decidisqanchista cambiananchispaqpas.

8. ¿Imatan ñaupaqta ruwananchis imatapas allinta decidinanchispaq?

⁸ Chaymantapas allinta decidinapaqqa Bibliata, Diospa llaqtanpi kaq qelqakunatan allinta leenanchis jinallataq confiasqanchis iñiqmasiwan rimananchis (Prov. 20:18). Chaykunata ruwananchis llank’ananchista cambiayta piensaqtinchis, juj llaqtaman astakuyta munaqtinchis otaq imatapas estudiayta munaqtinchis.

9. ¿Imaraykun allinta qhawarinanchis imaraykuchus imatapas decidisqanchista?

⁹ Allintan qhawarinanchis imaraykuchus imatapas decidisqanchista. Diosqa qhawashanmi sonqonchis imayna kasqanta (Prov. 16:2). Sonqonchista qhawarikuspaqa reparakusunmi imaraykuchus imatapas ruwasqanchista. Sichus imatapas ruwayta munanchis runakunaq rikuwanallanchispaq chayqa, manan qallarisqanchista junt’ayta atisunchu sasachakuykunapi tarikuqtinchis. Kaypi piensasun, juj wayna hermanonchismi decidikun precursor kananpaq, ichaqa killakunaq pasasqanman jina horanwan mana junt’ayta atinchu, manataq kusisqachu  Diosmanta willanpas. Chay wayna, ¿Jehová Diosta munakuspachu precursor karan? Icha, ¿tayta-mamanta otaq jujkunata kusichinallanpaqchu chayta ruwasharan?

10. ¿Iman yanapawasun ima ruway munasqanchista ruwananchispaq?

¹⁰ Juj runamanta yachallasuntaq. Chay runaqa Bibliamanta yachasqan qhepamanmi decidikun cigarrota manaña fumananpaq. Sasaña kaqtinpas manan cigarrota fumaranchu iskay kinsa semanakuna, chayllamanmi ichaqa jujmanta fumayta qallarin. Jehová Diosta sonqomanta munakusqanmi ichaqa yanapan vicionta saqepunanpaq (Col. 1:10; 3:23).

11. ¿Imaraykun imachus ruwananchista qelqananchis?

¹¹ Imachus ruwanaykita qelqay. Chaymi yanapasunki imachus qallarisqaykita tukunaykikama ruwanaykipaq. Sichus Bibliata tukunaykikama leenaykipaq decidikunki, manataq ima programatapas ruwakunkichu chayqa, manapaschá tukunkichu qallarisqaykita. * Otaq iñiq t’aqapi umalliqkuna decidinku askha hermanokunata visitanankupaq, tiempoq pasaqanman jinataq mana pitapas visitankuchu. ¿Iman yanapanman imachus decidisqankuta junt’anankupaq? Yaqapaschá kayta tapukunkuman: “¿Qhawariranchisñachu pikunata visitananchispaq? ¿Anotaranchischu ima p’unchaykunapi visitananchispaq?”, nispa.

12. Decidisqanchista allinta qhawarispa, ¿imatan ruwananchis kanqa? ¿Imaraykun chayta ruwananchis?

¹² Atisqallaykiman jina ruway. Llapapaqpas manan tiemponchis qolqenchis kallpanchispas kanchu imaymanata ruwananchispaq. Chaymi allin yuyaywan imatapas ruwananchis. Mayninpitaq dedicisqanchista cambiananchis kanqa mana junt’ayta atisqanchisrayku (Ecl. 3:6). Yaqapaschá imachus decidisqaykita allinta qhawarispa cambiaranki, jinaspa ninki: “Kaytaqa atisaqmi ruwayta”, nispa. ¿Imakunan yanapasunkiman chayta junt’anaykipaq? Chaypaq pisqa yanapaykunamanta yachasun.

13. ¿Imatan necesitanchis decidisqanchista junt’anapaq? ¿Imatan chaypaq ruwananchis?

¹³ Diospa yanapaynintan mañakunanchis. Jehová Diosmi ‘atiyta qowasunman’ imachus ruwananchista junt’anapaq (Filip. 2:13). Chaymi kallpata mañakunanchis imachus decidisqanchista junt’anapaq . Manaña usqhaytachu mañakusqanchisman kutichimunqa chaypas mañakushanallanchismi. Jesusmi niran: “Mañakushallaychis, chaskinkichismi [santo espirituta]”, nispa (Luc. 11:9, 13).

14. Lucas 14:28 textopi nisqan jina, ¿imaynatan allinta junt’asunman decidisqanchista?

¹⁴ Ñaupaqtan tanteananchis imayna ruwananchista (leey Lucas 14:28). Imata ruwanapaqpas ñaupaqtan tanteananchis imayna ruwananchista, chayman jinataq ruwananchis. Chay jinallataq ima decidisqanchista junt’anapaqpas juj listata ruwakunanchis imaynatas ruwasunman chaymanta. Yaqapaschá sasapaq qhawarisqanchis ruwayta askhaman t’aqasunman allinta junt’anapaq. Chayta ruwaqtinchisqa mana sasachakuspallan decidisqanchista junt’asun. Apóstol Pablopas Corinto llaqtapi cristianokunatan niran: “Sapa semana qallariy p’unchaypi sapankaykichis qolqeykichista t’aqaychis kapuqniykichisman jina, jinaspa chayta waqaychaychis, chhaynapi chayamuqtiy ama qolqeta juñushanaykichispaq”, nispa (1 Cor. 16:2).

15. Imayna ruwananchista tanteasqanchis qhepaman, ¿imatawanmi ruwananchis?

¹⁵ Sichus ima ruwanaykikunata juj listapi qelqanki chayqa faciltan junt’anki decidisqaykita (1 Cor. 14:40). Kaypi piensasun, iñiq  t’aqapi umalliqkunan juj umalliqta kamachinku imachus decidisqankuta anotananpaq, jinallataq pin chayta ruwanqa, jayk’a tiempopi ruwakunqa chaytapas. Sichus llapa umalliqkuna chay kamachikuyta kasukunqaku chayqa, allintan junt’anqaku ima ruwanankutapas (1 Cor. 9:26). Noqanchispas chay jinatan ruwasunman, yaqapaschá juj listata ruwakusunman sapa p’unchay imatachus ruwayta munasqanchismanta. Chayta ruwaspaqa imachus qallarisqanchistan junt’asun pisi tiempollapitaq tukusunpas.

16. Romanos 12:11 textopi nisqan jina, ¿imatan ruwananchis imachus decidisqanchista junt’anapaq?

¹⁶ Kallpachakunanchismi ruwananchista junt’anapaq. Imatachus ruwanapaq tanteakusqanchista junt’anapaqqa kallpachakunanchismi (leey Romanos 12:11). Apóstol Pablon Timoteota niran: ‘Kallpachakushallaypuni allinta yachachinaykipaq’, nispa. Sichus noqanchispas kallpachakusun chayqa imachus ruway munasqanchistan junt’asunchis (1 Tim. 4:13, 16).

17. ¿Imaynatan Efesios 5:15, 16 textopi nisqan yanapawasunman decidisqanchista junt’ananpaq?

¹⁷ Tiemponchista ama usuchisunchu (leey Efesios 5: 15, 16). Ima ratopi ruwananchistaqa manan cambiananchischu, manataqmi suyananchischu imapas allin kanantaraqchu decidisqanchista ruwanapaqqa (Ecl. 11:4). Ama yanqa ruwaykunapi tiemponchista usuchisunchu mana chayqa manañan kallpanchispas tiemponchispas kanqachu ruwananchista junt’anapaq (Filip. 1:10). Ima ratopichus jujkuna ruwanachista mana tatichiwasunmanchu chay ratopin ruwasunman. Jujkunatataq nisunman: “Ruwanaymi kashan”, nispa. Chaymantapas telefononchistan apagasunman juj ratopiñataq mensajekunata leesunman. *

18, 19. ¿Iman yanapawasun imachus ruway munasqanchista tukunanchiskama ruwananchispaq?

¹⁸ Allin kaqta ruwayqa alllinninchispaqmi kanqa, chaypin piensananchis. Chay ruwasqanchistan comparasunman maymanchus viajayta munasqanchiswan. Sichus may llaqtamanpas chayayta munashanchis chayqa, tukuy atisqanchistan ruwanchis chay llaqtaman chayananchispaq imaña pasaqtinpas. Noqanchispas tukuy atisqanchistan ruwananchis allin kaqta ruwananchispaq, chaypaqmi piensashanallanchis allin kaqta ruwasqanchismanta imakunata chaskinanchispi (Gál. 6:9).

¹⁹ Allinta imatapas ruwananchispaq decidiyqa sasan, aswan sasaraqmi qallarisqanchista tukunanchiskama ruwayqa. Jehová Diosmi ichaqa yachayta kallpata ima qowasun qallarisqanchista tukunanchiskama ruwananchispaq.