1, 2. a) ¿Iman yanapawasun sasachakuykunata aguantananchispaq? b) ¿Imakunamantan yachasun?

SASACHAKUYPI tarikusqanchis qhepamanqa niranchispaschá: “Imaynatan aguantarani”, nispa. Yaqapaschá chayta niranchis sinchi onqosqa tarikuqtinchis otaq familianchis wañukapusqanrayku. Chaykunataqa aguantaranchis ‘runakunaq mana aypay atisqan atiyta’ Dios qowallaqtinchismi (2 Cor. 4:7-9).

² Kay pachaq millay ruwayninkunamanta karunchakunanchispaq,‘millay espiritukunawan’ maqanakunanchispaqpas necesitanchismi Diospa santo espiritunta (1 Juan 5:19; Efes. 6:12). ¿Imaynatan yanapawanchis sasachakuykunata atipananchispaq? Kaypin yachasun iskay yanapaykunamanta. Jinallataq yachasun imakunatas ruwananchis Diospa santo espiritun yanapawananchispaq chaytawan.

3. ¿Imakunapi tarikuspan Diospa santo espiritun yanapawasunman?

³ Diospa santo espiritun yanapawanchis llapa ruwananchiskunata junt’ananchispaq sasachaypiña tarikuqtinchispas. Apóstol Pablopas ‘Cristoq atiyninpin’ confiaran, chaymi sasachakuypiña tarikuspapas ruwayninkunata junt’aran (2 Cor. 12:9). Iskay kaq viajasqanpin Pabloqa tukuy atisqanta ruwaran Diosmanta willananpaq, chaymantapas imachus necesitasqanta rantikunanpaqmi llank’aran. Corinto llaqtapi kashaspan Áquila, Priscila iñiqmasikunaq wasinpi alojakuran, paykunaqa karpakunata ruwaspan llank’aranku. Pablopas chay ruwaytan yacharan, chaymi paykunawan wakin p’unchaykuna llank’aran (Hech. 18:1-4). Diospa santo espiritunmi Pablotaqa kallpacharan  llank’ananpaq Diosmanta willashanallanpaqpas.

4. 2 Corintios 12:7-9 textopi nisqan jina, ¿iman Pablota sufrichisharan?

⁴ (Leey 2 Corintios 12:7-9). Chay textopi nisqan jina apóstol Pablopaqqa “kiska jinan” sinchi nanay cuerponpi kasharan. ¿Imaynan sientekusunman cuerponchisman kiska jaykuqtin? Sinchitachá nanawasunman. Chay jinallataqmi Pablopas juj nanaywan sufrisharan. Chaymi niran: “Chay kiskaqa Satanaspa angelninpas ch’aqlakachawashanman jinan”, nispa. Manapaschá Satanaschu nitaq supaykunachu chay nanayninta rijurichiranku, ichaqa yacharankun Pablo chay nanaywan sufrishasqanta, chaymi chay kiskatapas astawan tanqaykushankuman jina karan. ¿Imatan Pablo ruwaran?

5. ¿Imaynatan Jehová Dios Pablota yanaparan?

⁵ Apóstol Pablo chay nanayninmanta librakunanpaqmi Jehová Diosmanta mañakuran, niranmi: “Kinsa kutita Señorta rogakurani chay kiskata noqamanta orqonanpaq”, nispa. Maytaña Diosmanta rogakuran chaypas, nanayninqa manan chinkaranchu. Chhaynaqa, ¿manachu Dios mañakusqanta uyariran? Uyariranmi. Manaña chay nanayninta chinkachiranchu chaypas kallpatan qoran aguantananpaq. Chaymi Diosqa niran: “Pisi kallpa kasqaykipin astawanraq atiyniyqa rikukunqa”, nispa (2 Cor. 12:8, 9). Diospa yanapayninwanmi Pabloqa kusisqa thaj sientekuran (Filip. 4:4-7).

6. a) ¿Imaynatan Jehová Dios yanapawasun sasachakuypi tarikuqtinchis? b) ¿Ima textokunan yanapawasun ama pisikallpayananchispaq?

⁶ Yaqapaschá Pablo jina sapa kutilla Jehová Diosmanta mañakushanchis sasachakuyninchis chinkapunanpaq, rogakushanchisña chaypas manan chinkanchu aswanpas astawanmi yapakun. Chhayna kaqtinqa Pabloq ejemplontan yuyarinanchis. Paytaqa Jehová Diosmi yanaparan sasachakuyninta aguantananpaq, noqanchistapas yanapawasunmi. Manaña sasachakuyninchis chinkanqachu chaypas, Jehová Diosqa santo espiritunwanmi yanapawasun sasachakuyninchista aguantananchispaq (Sal. 61:3, 4). Imapiña tarikusun chaypas Diosqa manan saqerpariwasunchu (2 Cor. 4:8, 9; Filip. 4:13).

7, 8. a) ¿Imaynapin rijch’akun Diospa santo espiritun wayrawan? b) ¿Imaynatan Diospa santo espiritun yanapawanchis?

⁷ Jehová Diospa santo espiritunta rijch’anachisunman wayrawan. Sinchi phoqchiqesqan lamar-qochapi kaq barcoqa wayraq yanapaynillanwanmi maychus rinanman chayan. Chay jinallataqmi Diospa santo espiritun yanapawasun mosoq pacha chayamunankama sasachakuykunata aguantananchispaq.

⁸ Apóstol Pedroqa challwaq runan karan, chaymi payqa yacharan imas barcokunata yanaparan purinankupaq chayta. Chaychá chay rijch’anachiywan yachachiran imaynatas Diospa santo espiritun yanapawanchis chayta. Chaymi niran: “Manan jayk’aqpas runaq munayninpichu profeciakunaqa karan, aswanmi profecía willaqkunaqa santo espirituq apasqan kaspa Diosmanta rimaranku”, nispa (2 Ped. 1:21).

9. ¿Imatan apóstol Pedro nisharan “apasqan” karanku nisqa simiwan?

⁹ ¿Imatan apóstol Pedro nisharan “apasqan” kanku nisqa simiwan? Hechos librota  qelqaq Lucaspas rimallarantaqmi barcokuna wayrawan apachikusqankumanta (Hech. 27:15). Apóstol Pedro nisqan jina, barcokunaqa wayratan necesitanku lamar-qochanta purinankupaq, chay jinallataqmi profetakunapas, Biblia qelqaqkunapas Diospa santo espiritunta necesitaranku llank’ayninkuta junt’anankupaq. Bibliamanta yachaq runapas niranmi: “Profetakunaqa barcokuna jinan telankuta altoman oqarinku”, nispa. Chayta ruwasqankuwanmi paykunaqa rikuchisharanku santo espirituwan pusachikunankupaq listo kasqankuta.

10, 11. ¿Imakunatan ruwananchis Diospa santo espiritun yanapawananchispaq? Juj ejemplowan willay.

¹⁰ Diosmi santo espiritunwan runakunata yuyaycharan Bibliata qelqanankupaq, kay tiempopi manaña chayta ruwanchu chaypas, serviqninkunataqa yanapashallanmi santo espiritunwan. Chhaynaqa, ¿imatan ruwananchis Diospa santo espiritunwan yanapachikushanallanchispaq?

¹¹ Kay ejemplopi piensasun. Sichus barcota manejaq wayrawan yanapachikuyta munan chayqa kaykunatan ruwanan: 1) Mayneqpichus wayra phukushan chaymanmi Barconta apanan, mana chayqa barconqa kikillanpin sayanqa. 2) Barcopi tolderatan altoman oqarispa allinta mast’arispa watanan, chhaynapin wayraq phukusqanwan barcoqa puririnqa. Noqanchispas santo espirituq yanapaynillanwanmi Diostaqa servisun. ¿Imaynatan chayta ruwasunman? 1) Maypichus Diospa santo espiritunta chaskisunman chaypin kashananchis. 2) Kallpachakunanchismi Jehová Diosta allinta servinanchispaq (Sal. 119:32). Chaykunata ruwasun chayqa Diospa santo espiritunmi yanapawasun ima sasachakuykunatapas  atipananchispaq, chhaynapin Diosta servishallasun mosoq pacha chayamunankama.

12. ¿Imakunatan qatimuqpi yachasun?

¹² Yachasqanchis jina Diospa santo espiritunmi kallpata qowanchis sasachakuykunata aguantananchispaq. Chaymantapas yanapawanchismi Diospa qowasqanchis llank’ayta junt’ananchispaq, chhaynapi mosoq pachaman jaykunapaq. Qatimuqpi yachasun ima tawa ruwaykunatas ruwananchis Diospa santo espiritun yanapawananchispaq chayta.

13. a) 2 Timoteo 3:16, 17 textopi nisqan jina, ¿imaynatan Diospa palabran yanapawasunman? b) ¿Imatan chaypaq ruwananchis?

¹³ Juj kaq, Bibliatan allinta estudiananchis (leey 2 Timoteo 3:16, 17). Diosmi Biblia qelqaqkunata santo espiritunwan ‘yuyaycharan’. Sichus Bibliata leesun leesqanchispitaq piensasun chayqa, Diospa yuyaykusqanmi umanchisman sonqonchisman jaykunqa, jinaspa Diospa munasqanman jina kausasun (Heb. 4:12). Diospa santo espiritun allinta yanapawananchispaqqa tiempotan orqonanchis sapa kuti Bibliata estudiananchispaq, yachasqanchispitaq allinta piensananchis. Chhaynapin Diospa palabran yanapawasun rimasqanchispi ruwasqanchispipas.

14. a) ¿Imaraykun ninchis: “Juñunakuykunapiqa Diospa santo espiritunmi wayra jina kashan”, nispa? b) ¿Imatan ruwananchis juñunakuykunapi Diospa santo espiritunta chaskinanchispaq?

¹⁴ Iskay kaq, Diostan hermanonchiskunawan kuska servinanchis (Sal. 22:22). Juñunakuyninchispiqa wayra jinan Diospa santo espiritun kashan (Apo. 2:29). ¿Imaraykun chayta ninchis? Juñunakuykunapiqa Diospa santo espirituntan mañakunchis, sumaq takikunatan takinchis, santo espirituwan nombrasqa hermanokunaq yachachimusqankutataq uyarinchis. Jinaspapas hermanakunatan yanapallantaq sumaq demostracionkunata ruwanankupaq. Sichus munanchis Diospa santo espiritun yanapawananchista chayqa, allintan preparakunanchis juñunakuykunapi comentananchispaq. Chayta ruwaspan listo kashanchis Diospa espiritunta chaskinanchispaq.

15. Diosmanta willaq lloqsispa, ¿imatan ruwananchis Diospa santo espiritun yanapawananchispaq?

¹⁵ Kinsa kaq, Diosmanta willaqmi lloqsinanchis. Runakunaman predicashaspa yachachishaspa iman Bibliata leenanchis, chhaynapin Diospa santo espiritun yanapawasun (Rom. 15:18, 19). Diospa santo espiritun allinta yanapawananchispaqqa sapa kutillanmi Diosmanta willaq lloqsinanchis atikusqanman jinataq runakunaman Bibliata leepunanchis. Chaymantapas runakunawan parlata sumaqta tupachinapaqqa Diospaq Kausasunchis nisqa qelqapi kaq yachachikuykunawanmi yanapachikunanchis.

16. ¿Imatan ruwananchis Diospa santo espiritunta astawan chaskinanchispaq?

¹⁶ Tawa kaq, Jehová Diosmantan mañakunanchis (Mat. 7:7-11; Luc. 11:13). Jehová Diosmanta mañakuspan astawanqa santo espirituta chaskinchis. Diosmanta mañakusqanchistaqa manan pipas jark’ayta atiwanchischu nitaq Satanaspas jark’ayta atinmanchu santo espiritunta chaskinanchistaqa (Sant. 1:17). ¿Imaynatan mañakunanchis Jehová Diospa santo espiritunta astawan chaskinanchispaq? Chayta  yachananchispaq qhawarisun Lucas qelqapi kaq ejemplomanta. *

17. Lucas 11:5-9, 13 textopi rijch’anachiymanta Jesuspa willasqan, ¿imatan yachachiwanchis mañakuymanta?

¹⁷ (Leey Lucas 11:5-9, 13). Chay textopi nisqan jina chay runaqa mana manchakuspan kuska tutata amigonman riran imachus necesitasqanta mañakunanpaq, uyarinankamataq amigonta wajakuran. Chay rijch’anachiywanmi Jesusqa yachachisharan imaynatas Diosmanta mañakunanchis santo espiritunta. Chaymi niran: “Mañakushallaychis, chaskinkichismi; maskhashallaychis, tarinkichismi; punkutapas takashallaychis, kicharimusunkichismi”, nispa. ¿Imatan chaymanta yachanchis? Santo espirituta chaskinanchispaqqa Diosmantan sapa kuti mañakushanallanchis. *

18. ¿Imaraykun mana iskayananchischu Jehová Dios santo espiritunta qowananchismanta?

¹⁸ Jehová Diosqa maytan munashan santo espiritunta qoyta, chaytan rikuchin Jesuspa willasqan rijch’anachiypi. Chay runaqa mana imayoqmi karan, chaywanpas allintan atiendeyta munaran visitaqninta. Chaymi vecinonta wajakuran t’antata chaskinankama. ¿Imatan chaymanta yachanchis? Juchasapa runaña kashaspapas qoranmi t’antata vecinonman, chaymi janaq pacha Taytanchisqa astawanraq santo espiritunta qonqa mana pisipaspa mañakuqninkunaman. Chayraykun mana iskayaspa Diospa santo espiritunta mañakunanchis (Sal. 10:17; 66:19).

19. ¿Imaraykun mana iskayananchischu ima sasachakuytapas atipananchismanta?

¹⁹ Satanasqa imaymanatan ruwashallanqa pisipananchispaq chaypas manan atinqachu. ¿Imarayku? Diospa santo espiritunmi yanapawanchis: 1) Kallpatan qowanchis ima sasachakuytapas atipananchispaq. 2) Mosoq pacha chayamunankama yanapawasun Jehová Diosta servishanallanchispaq. Chay jinaqa tukuy atisqanchista ruwasun Diospa santo espiritunta astawan chaskishanallanchispaq.