1, 2. a) Salmos 37:3, 4 nisqan jina, ¿imaraykun chayllaraq casarasqakuna Jehová Diospa nisqanman jina imatapas ruwananku? b) ¿Imamantan kay yachachikuypi yachasunchis?

YAQAPASCHÁ wakin hermanonchiskuna chayllaraq casarakuranku, otaq yaqapaschá casarakunankupaq yuyaykushanku. Paykunaqa kusisqa kausaytachá munashanku. Ichaqa qallariypiqa imaymana sasachakuykunan kanqa casado kausaypiqa. Chaymi warmi-qhariqa allinta rimanakunanku kanqa imatas casarakusqanku qhepaman ruwanqaku chayta. Sichus Jehová Diospa kamachikusqanman jina imatapas ruwanqaku chayqa kusisqan kausanqaku. Ichaqa manachus Jehová Diospa nisqanman jinachu kausanqaku chayqa imaymana sasachakuykunapin tarikunqaku, manataqmi kusisqachu kausanqakupas (leey Salmos 37:3, 4).

² Kay yachachikuyqa llapa casarasqakunatan yanapanqa astawan Diosta servinankupaq, astawanqa chayllaraq casarasqakunatan yanapanqa. Kay yachachikuypin yachasunchis imatas casarasqakuna ñaupa tiempopi Diosta serviq casarasqakunamanta yachankuman chayta, imatas kay tiempopi Diosta serviq casarasqakunamantapas yachankuman chaytapas.

3, 4. ¿Ima sasachakuykunapin chayllaraq casarasqakuna tarikunkuman?

³ Wakin llaqtakunapiqa tayta-mamankun chayllaraq casarasqakunata mat’ipayanku wawayoq kanankupaq. Otaq  amigonkupas familiankupas ninkuman: “Kusisqa kausanaykichispaqqa wasiyoq carroyoq iman kanaykichis, imaymanaykichispas junt’an kanan”, nispa.

⁴ Chayllaraq casarasqakunaqa allinta piensaykuspan imatapas ruwananku. Sichus runakunaq nisqanman jina imatapas ruwanqaku chayqa yaqapaschá manupi ima rikukunkuman. Yaqapaschá chay manuta paganankupaq iskayninku llank’ananku kanqa. Chhayna kaqtinqa manapaschá tiemponku kanmanñachu Bibliata estudianankupaq, familiantin kuska estudianankupaq, Diosmanta willaq rinankupaqpas. Chaymantapas yaqapaschá qolqeta astawan ganayta munaspa manaña tiemponku kanmanñachu juñunakuykunaman rinankupaq, chhayna kaqtinqa manañan Jehová Diostapas kusisqañachu servinkuman.

5. ¿Imatan Klaus hermanonchismanta Marisa esposanmantapas yachasunman?

⁵ Askha casarasqakunan kusisqa kayta munaspa imaymanata rantikuranku, ichaqa chaywanpas manan kusisqapunichu kausaranku. Chaysi Klaus hermanonchistapas Marisa esposantapas pasasqa. * Paykunaqa casarakusqanku qhepamansi imaymanayoq kayta munaspa iskayninku llank’ayta qallarisqaku. Ichaqa manas chaywanqa kusisqachu kasqaku. Hermanonchis Klausmi nin: “Manan imaykupas faltawarankuchu, ichaqa manan tukuy sonqochu Jehová Diosta servisharayku. Chaymi imaymana sasachakuykunapi tarikurayku, manataqmi kusiqapaschu kausarayku”, nispa. Yaqapaschá Klaus hermanonchis jina wakin casarasqakunapas chhayna sasachakuykunapi tarikushanku. Ichaqa chhaynapiña tarikunkuman chaypas manan pisipanankuchu, paykunataqa Diosta serviq casarasqakunaq ejemplonmi yanapanman. Ñaupaqta yachasunchis Jehosafat reymanta.

6. Proverbios 3:5, 6 nisqan jina, ¿imatan rey Jehosafat ruwaran jatun sasachakuypi tarikuqtin?

⁶ Qosakunaqa tukuy atisqankutan kallpachakunku familiankuta allinta uywanankupaq. Mayninpin ichaqa sasapaq familianku uywayta qhawarinkuman. Qosakunataqa Jehosafatpa ejemplonmi yanapanqa. Rey Jehosafatqa imaymanatan ruwaran llaqtanta cuidananpaq. Payqa llaqtaq perqankunatan allinta jatarichiran enemigonkunamanta pakaykunanpaq, chaymantapas 1.160.000 soldadokunayoqmi karan (2 Crón. 17:12-19). Tiempowanmi ichaqa paypas, familianpas, llaqtanpas juj jatun sasachakuypi tarikuranku. Paykuna contran maqanakuq jamusharanku Ammón runakuna, Moab runakuna, Seír orqo-orqopi tiyaq runakunapas (2 Crón. 20:1, 2). ¿Imatan chayta rikuspa rey Jehosafat ruwaran? Payqa manan yuyaykusqanman jinallachu ruwaran, aswanpas  Jehová Diospa yanapaynintan mañakuran (leey Proverbios 3:5, 6). Chhayna mañakusqanmi kashan 2 Crónicas 20:5-12 textopi. Chayta leespan reparanchis Jehosafatqa tukuy sonqowan Jehová Diospi confiasqanta. ¿Imaynatan Jehová Dios rey Jehosafat-ta yanaparan?

7. ¿Ima niranmi Jehová Dios rey Jehosafat-ta?

⁷ Jehová Diosmi Leví ayllumanta Jahaziel runawan Jehosafat-ta niran: “Ama maymanpas puririspa kikinpi allinta sayaykunkichis, jinaspa rikunkichis imaynatachus noqa qankunata qespichisqaykichis chayta”, nispa (2 Crón. 20:13-17). Rey Jehosafatqa Jehová Diospa nisqantan kasukuran. Chaymi enemigonkuwan tupaq rinankupaqqa takiqkunata soldadokunaq ñaupaqenman churaranku. Jinaspan paykunaqa takispa riranku. Chay kutipiqa Jehová Diosmi enemigonkuta atiparan, paykunaqa manan maqanakurankuchu (2 Crón. 20:18-23).

8. ¿Imatan rey Jehosafat jina qosakuna ruwananku?

⁸ ¿Imatan qosakuna Jehosafat reymanta yachankuman? Tukuy atisqankutaña qosakuna ruwankuman familiankuta yanapanankupaq chaypas mayninpiqa kanqapunin sasachakuykuna. Chaymi paykunaqa mana piensasqankuman jinachu imatapas ruwananku, aswanpas Jehová Diospa yanapayninpin confiananku. Chaymi qosakunaqa Jehová Diosmanta mañakunanku, chaymantapas esposankuwan kuskan mañakunanku, Bibliatapas qelqanchiskunatapas leenanku, chayman jinataqmi kausanankupas. Ichaqa yaqapaschá Diospa kamachisqanman jina ruwasqaykichista rikuspa mayqen familiaykichispas nisunkichisman: “¿Manachu aswanpas llank’awaqchis qolqeyoq wasiyoq kanaykichispaq?”, nispa. Chhaynapi tarikuspaqa Jehosafat jinan Jehová Diosmanta mañakunaykichis. Jehová Diosqa manan jayk’aqpas pay sonqo runakunataqa saqerpariranchu. Sichus qankunapas Jehová Diospi confiankichis chayqa manan saqerparisunkichischu (Sal. 37:28; Heb. 13:5).

9. ¿Imata ruwanankupaqmi profeta Isaiaspas esposanpas kallpachakuranku?

⁹ Profeta Isaiasqa esposanpiwan kuskan Jehová Diosta tukuy sonqo serviranku. Isaiaspas esposanpas Jehová Diospa profetankunan karanku (Isa. 8:1-4). Paykunapaqqa Jehová Diosta serviymi aswan importante karan. Chaymi kallpachakuranku Jehová Diosta astawan servinankupaq. Chaymi Isaiaspas esposanpas allin ejemplo kanku kay tiempopi casarasqakunapaq.

10. ¿Imaraykun casarasqakuna estudiananku Bibliapi profeciakunata?

¹⁰ ¿Imata ruwanankupaqmi kay tiempopi casarasqakunapas kallpachakunanku? Isaías jina esposan jinan tukuy atisqankuta kallpachakunanku Jehová Diosta astawan servinankupaq, allin iñiyniyoq kanankupaqtaq kuska Bibliapi profeciakunata estudiananku. Chaymantapas allintan reparananku imaynatas Diospa willasqan profeciakuna junt’akushan chayta (Tito 1:2). * Jesusmi willaran kay tukukuy p’unchaykunapi Diospa gobiernonmanta allin willakuykuna pachantinpi willasqa kananta (Mat. 24:14). Sichus casarasqakuna reparanqaku chay profecía  kay tiempopi junt’akushasqanta chayqa astawanmi kallpachakunqaku Jehová Diosta servinankupaq, tukuy atisqankutataqmi ruwanqaku Jehová Diosmanta runakunaman willanankupaqpas.

11. ¿Imata ruwanankupaqmi Priscilapas Aquilapas kallpachakuranku?

¹¹ Chayllaraq casarasqakunaqa imaymanatan Priscilamanta Aquilamantawan yachankuman. Paykunaqa judío runakunan karanku, Roma llaqtapitaqmi tiyarankupas. Tiempowanqa Jesuspin iñipuranku, jinaspa Jehová Diosta serviranku. Ichaqa Roma llaqtapi kamachikuq Claudion llapa judiokunata kamachiran Roma llaqtamanta ripunankupaq. Paykunaqa kusisqachá tiyaranku Roma llaqtapiqa. Ichaqa paykunaqa tukuy imaymana kaqninkutan saqepuranku, yaqapaschá paykunapaqqa amigonkuta wasinkuta saqeyqa sasa karan. ¿Chayraykuchu Diosta manaña serviranku? Manan. Paykunaqa Corinto llaqtamanmi ripuranku, chaypi kashaspaqa tukuy atisqankutan yanapakuranku. Chaymantapas apóstol Pablowan kuskan hermanokunatapas kallpacharanku. Chaymantapas juj llaqtakunamanmi Diosmanta willaq ripuranku (Hech. 18:18-21; Rom. 16:3-5).

12. ¿Imaraykun casarasqakuna Jehová Diospa gobiernonta ñaupaqman churananku?

¹² Casarasqakunaqa Priscila jina Áquila jinan kallpachakunanku Diospa gobiernonta ñaupaqman churanankupaq. Chaypaqmi ichaqa chayllaraq reqsinakushaqtinku chaykunamanta allinta rimananku. Chaymi paykunata yanapanqa ima sasachakuyña kaqtinpas Jehová Diosta servishanallankupaq, chhaynapin Jehová Diospa yanapayninta rikunqaku (Ecl. 4:9, 12). Chaytan Russell hermanonchispas Elizabeth esposanwan kuska ruwaranku. Russell hermanonchismi nin: “Chayllaraq reqsinakushaqtiykuqa kuskan rimaq kayku imaynatas Jehová Diosta astawan serviykuman chayta”, nispa. Elizabeth hermananchismi nillantaq: “Chaykunamanta allinta rimasqaykun yanapawaranku  allinta imatapas ruwanaykupaq, chhaynapi Jehová Diosta servishanallaykupaq”, nispa. Russell hermanonchispas esposanpas tiempowanqa Micronesia ladomanmi ripuranku Jehová Diosmanta willanankupaq.

13. Salmos 28:7 nisqan jina, ¿iman kanqa sichus casarasqakuna Jehová Diospi confianqaku chay?

¹³ Wakin casarasqa hermanonchiskunapas Russell hermanonchis jinan esposan jinan tukuy imaymanata saqespa imachus kaqnillankuwan Jehová Diosmanta willashanku. Sichus casarasqakunapas Jehová Diosta servinankupaq kallpachakunqaku chayqa imaymana bendicionkunatan chaskinqaku, Jehová Diospipas astawanmi confianqaku, kusisqataqmi kausanqakupas (leey Salmos 28:7).

14. Mateo 6:25, 31-34 nisqan jina, ¿imatan apóstol Pedropas esposanpas ruwaranku?

¹⁴ Casarasqakunaqa imaymanatan apóstol Pedromantapas esposanmantapas yachankuman. Apóstol Pedroqa challwata jap’ispan llank’aran, chaywanmi familianta uywaran. Payqa juj wata jinañan Jesusta reqsiran, jinan Jesusqa niran payta qatikunanpaq. ¿Imatan Pedro ruwaran chayta uyarispa? (Luc. 5:1-11.) Pedroqa Jesustan qatikuran, esposanpas yanaparanmi Jesusta qatikunanpaq. Payqa Dios sonqo warmin karan. ¿Imaynapin chayta yachanchis? Biblian willan Jesuspa kausarimpusqan qhepaman apóstol Pedrowan kuska juj llaqtakunaman yanapakuq risqankuta (1 Cor. 9:5). Apóstol Pedroq esposanqa allin ejemplon karan chay tiempopi cristianakunapaq. Chaychá apóstol Pedropas iñiq t’aqapi casarasqa cristianokunata sumaqta yuyaycharan (1 Ped. 3:1-7). Apóstol Pedropas esposanpas Jehová Diospin confiaranku. Chaymi paykunaqa tukuy tiemponkuwan Jehová Diosta serviranku (leey Mateo 6:25, 31-34).

15. ¿Imata ruwanankupaqmi casarasqa hermanonchiskuna kallpachakunkuman Tiago hermanonchis jina esposan jina?

¹⁵ Wakin hermanonchiskunaqa unayñan casarasqa kashanku. ¿Imatan paykunapas ruwankuman Jehová Diosta astawan servinankupaq? Juj casarasqa hermanonchiskunaq ejemplonmanta yachaymi paykunataqa yanapanqa. Chaypaqmi qelqanchiskunapi leenkuman “Tukuy sonqowanmi yanapakushanku” nisqata. Chaytan Brasil nacionmanta Tiago hermanonchispas Esther esposanpas ruwaranku. Chay experienciakunata leespan paykunaqa yuyaykusqaku juj llaqtakunaman yanapakuq rinankupaq. Tiago hermanonchismi nin: “Chay experienciakunata leespan repararayku imaynata Jehová Dios serviqninkunata cuidasqanta, chaymi noqaykupas paykuna jina kayta munarayku”, nispa. Tiago hermanonchispas esposanpas Paraguay nacionmanmi yanapakuq ripuranku. 2014 watamantataqmi portugués simipi yanapakushanku. Esther hermananchismi nin: “Iskayniykumanmi gustawanku Efesios 3:20 textoq nisqan. Chaypi nisqan jinapas Jehová Diosqa manan imaykutapas faltachiwarankuchu, tukuy ima necesitasqaykutan qowaranku”, nispa. Éfeso llaqtapi tiyaq cristianokunaman apóstol Pabloq nisqan jina, Jehová Diosqa manan saqerpariwasunchu tukuy ima mañakusqanchismantapas astawanraqmi payqa qowasunchis.

16. ¿Pikunatan chayllaraq casarasqakuna tapurikunkuman astawan Jehová Diosta servinankupaq?

¹⁶ Chayllaraq casarasqakunaqa imaymanatan unayña casarasqa hermanonchiskunamanta  yachankuman. Paykunatan tapurikunkuman imaynatas tukuy tiemponkuwan Jehová Diosta servishanku chayta. Chayta ruwaspaqa Jehová Diospi confiasqankutan rikuchinqaku (Prov. 22:17, 19). Chaymantapas umalliqkunaq yanapaynintan mañakunkuman. Paykunan sumaqta yuyaycharinqaku astawan Jehová Diospa llaqtanpi yanapakunankupaq.

17. ¿Imatan casarasqakuna yachankuman Klaus hermanonchismantapas esposanmantapas?

¹⁷ Askha casarasqa hermanonchiskunan tukuy atisqankuta kallpachakushanku Jehová Diosta tukuy tiemponkuwan servinankupaq, ichaqa qonqaymi imapas cambianman. Chhaynapin tarikuranku Klaus hermanonchispas Marisa esposanpas. Kinsa wata casarakusqanku qhepallamanmi Finlandia nacionpi Betel wasita jatarichiypi yanapakunankupaq ripusqaku, soqta killamantan ichaqa paykunata nisqaku manaña chaypi yanapakunankupaq. Chaymi paykunaqa llakisqa kasharanku. Jinallamanmi paykunata nisqaku árabe simita yachanankupaq. Kunanqa juj nacionpin árabe simipi yanapakushanku. Marisa hermananchismi nin: “Mayninpiqa manchakunchismi mana reqsisqanchis llaqtaman riytaqa. ‘¿Cheqaqtapunichu Jehová Dios yanapawanqa?’ nisparaqmi piensanchispas. Ichaqa Jehová Diosqa manan jayk’aqpas noqaykutaqa saqerpariwarankuchu. Payqa sumaqtan cuidawaranku, chaymi noqaykuqa paypi confiayku”, nispa. Jehová Diospi confiayqa may allinpunin, sichus tukuy sonqowan payta servisunchis chayqa manan jayk’aqpas saqerpariwasunchu.

18. ¿Imatan casarasqa hermanonchiskuna ruwananku Jehová Diosta astawan servinankupaq?

¹⁸ Casado kausayqa Jehová Diospa regalonmi, chaymi payqa munan casarasqakuna sumaqta kausanankuta (Prov. 5:18; Mat. 19:5, 6). Chayllaraq casarasqa hermanonchiskunaqa tukuy atisqankutan kallpachakunanku Jehová Diosta astawan servinankupaq. Chaymi Jehová Diospa yanapayninta mañakunanku, kuskan Bibliata leenanku, chayman jinataqmi kausanankupas. Tukuy sonqowanchus casarasqakuna Jehová Diosta servinqaku chayqa kusisqan kausanqaku.