1. ¿Imaraykun nisunman: “Diospa siminqa atiyniyoqmi”, nispa? (Kay paginapi fotokunata qhaway.)

BIBLIAQ nisqan jina “Diospa siminqa kausashaqmi, atiyniyoqtaqmi kanpas” (Heb. 4:12). ¿Imaynataq chayri? Diospa siminqa atiyniyoqmi runaq vidanta cambiananpaq. Manan pipas chaytaqa neganmanchu. Wakinqa manaraq Testigo kashaspan suwa karanku, wakintaq drogakuqku, wakintaq qhelli kausaypi puriqku, jujkunataq allin reqsisqa qolqesapa ima karanku chaywanpas ch’usaqmi sonqonku kaq (Ecl. 2:3-11). Kunanmi ichaqa Bibliaq yanapayninwan manaña chhaynachu kanku, aswanmi kusisqa kausashanku. Yaqapaschá Qhawaq revistapi “Bibliaq yanapayninwan cambianku” nisqa partepi sumaq experienciakunata leeranki. Ichaqa manan paykunallachu necesitaranku Bibliaq yanapaynintaqa, llapa Testigokunapas yanapachikunanchismi Bibliawanqa, chhaynapin astawan Diosta munakusun.

2. ¿Imaynatan apostolkunaq tiemponpi runakunata yanaparan Diospa simin?

² Manan kunallanchu runakunaqa chhaynata cambiashanku, apostolkunaq tiemponpi runakunapas imaymanapin  vidankuta cambiaranku (leey 1 Corintios 6:9-11). Pikunachus mana Diospa gobiernonman jaykunqachu chay runakunamanta rimashaspan apóstol Pablo niran: “Chhaynan wakinniykichisqa karankichis”, nispa. Ichaqa Bibliaq yanapayninwan espirituq yanapayninwan iman paykunaqa cambiaranku. Chaywanpas wakinqa juchapin urmaranku chhaynapin Diosmanta karunchakuranku. Chaymi pasaran juj ajllasqa cristianowanpas, chaymi payqa Diospa llaqtanmanta qarqosqa karan. Chaymantan ichaqa juchanmanta pesapakuspa wajmanta cristiano kapuran (1 Cor. 5:1-5; 2 Cor. 2:5-8). Chhaynatan paykunatapas Diospa simin yanaparan. Chaykunata yachayqa maytachá kallpachawanchis Diospa siminpi confiananchispaq.

3. ¿Imakunamantan kaypi yachasun?

³ Rikusqanchis jina Diospa siminqa atiyniyoqmi, chaymi tukuy atisqanchista ruwananchis chaywan yanapachikunanchispaq (2 Tim. 2:15). Chayrayku, ¿imaynatan Diospa siminwan yanapachikusunman vidanchispi, predicacionpi, juñunakuykunapi yachachispapas? Chaykunamantan kaypi yachasunchis. Chay yachasqanchisqa maytachá yanapawasun munakuq Diosninchista munakunanchispaq, yachachiwasqanchismanta agradecekunanchispaqpas (Is. 48:17).

4. a) ¿Imatan ruwananchis Diospa simin yanapawananchispaq? b) ¿Ima ratopin Bibliata leenki?

⁴ Diospa simin yanapawananchista munanchis chayqa sapa p’unchaymi chayta leenanchis (Jos. 1:8). Ichaqa imaymanakunapaschá ruwananchis kashan, manapaschá tiempo aypawanchischu. Chhaynaña kaqtinpas Bibliataqa leenanchispunin, manapunin imawanpas jark’achikunanchischu (leey Efesios 5:15, 16). Yaqapaschá leesunman tutaymantan, chaupi p’unchayta, tardenta otaq ch’isinta. Chhaynapin Salmos librota qelqaq jina nisun: “¡Maytapunin yachachikuy simiykitaqa munakuni! P’unchay-ch’isiyaqmi chayllapiña yuyaymanani”, nispa (Sal. 119:97).

5, 6. a) ¿Imaraykun leesqanchispi allinta piensananchis? b) ¿Imakunatan tapukunanchis? c) ¿Imaynatan yanaparasunki Diospa siminpi piensasqayki?

⁵ Bibliataqa manan leeyllachu leenanchis aswanmi imachus leesqanchispi allinta piensananchis (Sal. 1:1-3). Manachus chay leesqanchispi piensasun chayqa, ¿imaynatan sonqonchisman jaykunqa? Chaymantapas, manachá Diospa siminman jinachu imatapas ruwasunman. Chaymi papelpiña ima aparatopiña Bibliata leenchis chaypas sonqonchisman chayananpaq jina leenanchis.

⁶ Ichaqa, ¿imaynatan chayta ruwasunman? Chaypaqqa yaqapaschá tapukusunman: “¿Imatan kay yachachiwan Diosmanta?  ¿Kaypi nisqanman jinachu kausashani? ¿Imakunapin kay yanapawanman?”, nispa. Sichus chhaynata Diospa siminpi piensasun, mañakusuntaq yanapawananchispaq chayqa, kallpachakusunmi Diospa munayninman jina kausananchispaq. Chhaynapin allinta yanapachikusun Diospa siminwan (2 Cor. 10:4, 5).

7. ¿Imaynatan Diospa siminwan yanapachikusunman predicacionpi?

⁷ ¿Imaynatan Diospa siminwan yanapachikuwaq predicacionpi? Llapa rimasqayki runamanmi Bibliata leepunayki. Chaymanta rimashaspan juj hermano niran: “Jehová Dioswan wasin-wasinta rispaqa, ¿qanchu llapa punkupi rimawaq icha Jehová Diostachu rimachiwaq?”, nispa. ¿Imatan chaywan chay hermano nisharan? Piwanpas Diosmanta rimaspaqa, Bibliawanmi rimananchis chhaynapin Diospas rimashanman jina kanqa. Yachasqanchis jina, juj texton aswan atiyniyoq ima rimasqanchismantapas (1 Tes. 2:13). Chayrayku, predicacionman rispa, ¿kallpachakunkichu runakunaman Bibliata leepunaykipaq?

8. ¿Imaraykun runakunaman Biblia leesqanchista allinta explicananchis?

⁸ Runakunaman Diosmanta willaspaqa manan Bibliataqa leeyllachu leenanchis. ¿Imarayku? Ñaupa tiempopi jinan wakin runakunaqa mana entiendenkuchu imachus leesqanchista (Rom. 10:2). Chaymi runakunaman Bibliata leespanchisqa allinta explicananchis imachus leesqanchista. Chhaynapin Diospa siminqa paykunaq yuyayninman sonqonkuman ima chayanqa (leey Lucas 24:32).

9. Runakuna respetanankupaq jinan Bibliataqa leenanchis, ¿imaynatan chayta ruwasunman? Willay ejemplokunata.

⁹ Chaymantapas runakunaman Bibliata leespaqa respetanankupaq jinan leenanchis. Yaqapaschá nisunman: “Qhawariy ima ninsi Dios”, nispa. Ichaqa manan llapa runachu Bibliapi creenku, paykunawan rimaspaqa yaqapaschá nisunman: “Qhawariy ima ninsi juj ancha respetasqa libro”, nispa. Pipas religionpi mana interesakuq runawan tupaspataq tapurisunman: “¿Jayk’aqllapas kay rimayta uyarirankichu?”, nispa. Runakunaqa manan igualchu kanchis manataqmi igualtachu piensanchis chaymi sapanka runapaq jina textokunata ajllananchis (1 Cor. 9:22, 23).

10. a) ¿Iman pasaran juj hermanowan? b) ¿Jayk’aqllapas chay hermanota jina pasarasunkichu?

¹⁰ Bibliaqa atiyniyoqpunin, askha hermanokunan chhayna kasqanta repararanku. Yachasun juj hermanowan imachus pasaran chayta. Payqa unayñan juj wiraqochaman sapa killan revistakunata apaq. Juj kutinsi chayraq lloqsimuq Qhawaq revistata apasqa, chay kutipiqa manas  saqellasqachu, aswansi chay revistapi lloqsimuq 2 Corintios 1:3, 4 textota leepusqa. Chaypin Jehová Diosmanta rimaspa nishan: “Paymi may khuyapayakuq Yayaqa, tukuy ima llakipi kallpachaq Diospas [...] Paymi tukuy imaymana pruebakunapi kallpachawanchis”, nispa. Chay texton chay runaq sonqonman chayasqa, jinaspan nisqa: “Manachu wajmanta leerapuwankiman”, nispa. Chaymantataq nisqa: “Esposaywan noqapiwanmi sinchi llakipi tarikushayku, ¿manachu astawan Bibliamanta yachachiwankikuman?”, nispa. Rikusqanchis jina Diospa siminqa atiyniyoqmi, runakunaq sonqontan kuyurichin (Hech. 19:20).

11. ¿Imatan ruwananku juñunakuykunapi yachachiq hermanokuna?

¹¹ ¿Gustasunkichu juñunakuykunaman asambleakunamanpas riy? Chay juñunakuykunaqa may munaymi ¿riki? Chaypin Jehová Diosta adoranchis paymantapas imaymanata yachanchis. Juñunakuykunapi yachachiy ancha munayña chaypas, chaypi yachachiq hermanokunaqa allintan preparakunanku (Sant. 3:1). Chaymantapas Diospa siminman jinan paykunaqa yachachinanku. Sichus qan juñunakuykunapi asambleakunapipas yachachiq hermano kashanki chayqa, ¿imatan ruwawaq  Diospa simin uyariqniykikunata yanapananpaq?

12. ¿Imatan ruwanan juj hermano Bibliaq nisqanman jina yachachinanpaq?

¹² Discursota qospaqa Bibliawanmi yachachinayki (Juan 7:16). ¿Imaynatan chayta ruwawaq? Chaypaqqa manan experienciakunamantachu, ejemplokunamantachu, ni comparacionkunamantachu masta rimanayki aswanmi Bibliamanta. Chaymantapas Bibliataqa manan leeyllachu leena, aswanmi chayta allinta entiendechina. Chaypaqqa manan askha textokunatachu leena aswanmi pisi textokunallata. Chaytataq explicana, comparacionta churana, chaymantataq imaynatas chaywan vidankupi yanapachikunkuman chayta entiendechina (Neh. 8:8). Sichus discursota qonki juj bosquejoq yanapayninwan chayqa allinta estudiay chay bosquejota textokunatapas. Chaymantataq ajllay ima textokunatas leenki chayta. (Bibliamanta Allin Yachachiq Kanapaq Escuelapi Yachay nisqa libropi qhaway 21-23 yachachikuykunata) Chaykunamanta astawanqa Diospa yanapayninta mañakuy chhaynapin allinta yachachinki (leey Esdras 7:10; Proverbios 3:13, 14).

13. a) ¿Imaynatan Biblia yanaparan juj hermanata? b) ¿Imaynatan qanta Biblia yanaparasunki?

¹³ Australia nacionpi juj hermanatapas  Bibliaqa yanaparanmi. Paymanta kunan yachasun. Payqa wawa kasqanmantapachan nishuta sufrisqa. Tiempowanmi ichaqa Diosmanta yachasqa, ichaqa manaraqsi allintachu entiendesqa Diospa munakuyninmanta. Juj kutinsi payqa juj discursopi juj sumaq textota uyarisqa. Chaypis payqa piensayta qallarisqa, leesqas chay jina juj textokunatapas. Chaykunapi allinta piensaspañas allinta yachasqa Diosqa payta munakusqanta. * Yaqapaschá qanpas juñunakuykunapi asambleapi ima uyariranki chhayna munay textokunata. Maytachá chay textokunaqa yanaparasunki (Neh. 8:12).

14. ¿Imaynatan rikuchisunman Diospa simin valorasqanchista?

¹⁴ Yachasqanchis jina Diospa munayninpin Bibliaqa kashan paymi qelqachiran, paypa munayninpin kay tiempokamapas chayamuran (1 Ped. 1:24, 25). Chayrayku, sapa p’unchay leesun, chayman jina kausasun, jujkunaman yachachispapas chaywan yachachisun. Chaykunata ruwaspan rikuchisun chay regalo valorasqanchista. Astawanqa qelqachiq Diostan tukuy sonqo munakusun.