1. ¿Imaraykun Jehová Diospa testigonkuna kusisqa kausanchis? (Kay paginapi fotota qhaway.)

JEHOVÁ DIOSPA testigonkunaqa kusisqan kausanchis. Chaytan rikukun juñunakuyninchiskunapi, fiestakuna ruwasqanchispipas, chaypin hermanokunaqa asirikuspa kusisqa kanchis. Noqanchisqa kusisqa kausaq Jehová Diostan adoranchis, chaymi kusisqa kausanchis (1 Tim. 1:11; Sal. 16:11). Jehová Diosninchispas kusisqa kausananchistan munan, imaymanatataqmi qowanchis kusisqa kausananchispaq (Deut. 12:7; Ecl. 3:12, 13).

2, 3. a) ¿Imaynan kusisqa kausaq runa? b) ¿Imakunan jark’awasunman kusisqa kausananchista?

² Kusisqa runaqa thajmi sientekun manataqmi imamantapas llakikunchu. Qanrí, ¿kusisqachu kausanki? Bibliaq nisqan jina cheqaq kusikuyta tarinanchispaqqa Jehová Diospa amigonmi kananchis. Chaywanpas kay tiempopi kusisqa kausayqa sasan kanman. ¿Imaraykun sasa kanman?

³ ¿Imakunan kusisqa kausananchista jark’awasunman?  Llank’ananchismanta qarqowaqtinchis, divorciakuqtinchis, mayqen familianchispas wañupuqtin otaq expulsasqa kaqtin. Chaymantapas familianchispi problemakuna kaqtin, llank’ananchispi otaq escuelanchispi compañeronchiskuna burlakuqtinku. Jinaspapas Diosta servisqanchisrayku qatikachawaqtinchis otaq carcelman wisq’awaqtinchis, sinchita onqoqtinchis otaq depresión onqoywan kaqtinchis. Chhaynapiña tarikuqtinchispas Jesusqa consolawanchismi, kusisqa kausananchistataq munanpas, payqa kusisqa kamachikuqmi (1 Tim. 6:15; Mat. 11:28-30). Orqopi yachachishaspan Jesusqa willaran imaynatas kusisqa kausasunman sasa tiempopiña tarikuspapas.

4, 5. ¿Imatan ruwananchis kusisqa kausananchispaq?

⁴ Jesusmi niran: “Kusisqa kachunku Diosta necesitasqankuta reparakuqkunaqa, paykunaqmi janaq pacha gobiernoqa”, nispa (Mat. 5:3). ¿Imaynatan rikuchinchis Diosta necesitasqanchista, paypa munaynin ruwayta munasqanchistapas? Chaytaqa ruwanchis Bibliata estudiaspan, kamachikuyninkunata kasukuspan, Jehová Diosta ñaupaqta servispa ima. Chaykunata ruwasun chayqa kusisqan kausasun, astawantaq confiasun Diospa promesankuna cumplikunanmanta. Jinaspapas Biblian willawanchis ‘sumaq suyakuyninchismanta’, chaypi piensaypas yanapawanchismi ima problematapas aguantananchispaq (Tito 2:13).

⁵ Jinaspapas kusisqa kausananchispaqqa Jehová Diosninchiswanmi amigontin kananchis. Apóstol Pablo niran: “Señorninchisrayku kusikullaychispuni. Wajmantan nillaykichistaq: ¡Kusikuychis!”, nispa (Filip. 4:4). Jehová Dioswan amigontin kananchispaqqa yachananchismi imatachus Jehová Dios piensasqanta. Biblian nin: “Kusisamiyoqmi yachayta tariq runaqa, allin yuyaytapas tariq runaqa. Yachayqa kausay sach’a jinan chayta chaskikuqkunapaqqa, kusisamiyoqmi yachayman k’askakuqkunaqa”, nispa (Prov. 3:13, 18).

6. ¿Iman yanapawasun kusisqa kausananchispaq?

⁶ Jinaspapas kusisqa kausananchispaqqa Bibliapi yachasqanchisman jinan kausananchis. Jesusmi niran: “Yachankichistaq chaykunata chayqa, chayman jina ruwaspaykichisqa ancha kusisqan kankichis”, nispa (Juan 13:17; leey Santiago 1:25). Kasukuq kaspaqa atisunmi Jehová Dioswan amigontin kayta, wiñaypaq kusisqa kausaytapas. Ichaqa, ¿atisunmanchu kusisqa kayta ima llakipiña tarikuspapas? Arí, chaymanta qatimuqpi yachasun.

7. ¿Imamantan llakikunku Jehová Diosta serviqkuna? Ichaqa, ¿imaraykun kusisqa kanku?

⁷ Jesusmi niran: “Kusisqa kachunku llakisqa sonqoyoqkunaqa, paykunan llakikuyninkupi kallpachasqa kanqaku”, nispa (Mat. 5:4). Jehová Diosta mana serviq runakunaqa kay ‘sasa tiempopi’ imaymana problemakuna pasasqanmantan llakikunku (2 Tim. 3:1). Chay runakunaqa paykunallapin piensanku manataqmi Jehová Diospa amigonchu kanku, chaymi mana kusisqa kausayta atinkuchu. Jesusmi ichaqa rimasharan Jehová Diosta serviq runakuna llakikusqankumanta. ¿Imamantataq paykunari llakikunku? Paykunaqa llakikunku askha runakuna Jehová Diosta qhepanchasqankumanta, juchayoq kasqankumanta, jucha jawa kay pachapi imaymana problemakuna kasqanmantawan. Chayta rikumuspan Jehová Diosqa Bibliawan paykunata kallpachan, jinaspa yanapan kusisqa kausanankupaq (leey Ezequiel 5:11; 9:4).

8. ¿Imaraykun llamp’u sonqo runakuna kusisqa kausanku?

⁸ “Kusisqa kachunku llamp’u sonqoyoqkunaqa, paykunan kay pachata herenciapaq chaskinqaku” (Mat. 5:5). Wakin runakunan ñaupaqpi millay genioyoq saltaq sonqo ima karanku, jinaspa imaymana problemakunapi tarikuranku. Bibliata estudiaspan ichaqa cambiapuranku jinaspa sumaq sonqo, khuyapayakuq, k’umuykukuq, llamp’u sonqo, pacienciakuq runaman tukupuranku (Col. 3:9-12). Chhayna kasqankuraykun kunanqa sumaqta jujkunawan kausanku. Jamuq tiempopitaq kay pachata herenciapaq chaskinqaku (Sal. 37:8-10, 29).

9. a) ¿Imaynapin llamp’u sonqo runakuna kay pachata herenciata jina chaskinqaku? b) ¿Imaraykun “chanin kaymanta yarqachikuqkunaqa ch’akichikuqkunapas” kusisqa kanku?

⁹ ¿Imaynapin llamp’u sonqo runakuna kay pachata herenciata jina chaskinqaku? Janaq pachaman riq cristianokunaqa herenciata jina chaskinqaku kay allpata kamachiyta qallariqtinkun (Apo. 20:6). Kay allpapi tiyaqkunataq herenciata jina chaskinqaku wiñaypaq thajpi kusisqa kay allpapi tiyaspanku. Jesusqa chay runakunamantan nillarantaq: “Kusisqa kachunku chanin kaymanta yarqachikuqkunaqa ch’akichikuqkunapas”, nispa (Mat. 5:6). Jamuq tiempopin Jehová Diosqa mana chanin kausayta tukuchinqa (2 Ped. 3:13). Chay tiempopiqa manañan millay kausay kanqachu, jinan runakunaqa kusisqa kausasunchis (Sal. 37:17).

10. ¿Imaynan khuyapayakuq runa?

¹⁰ “Kusisqa kachunku khuyapayakuqkunaqa, paykunan khuyapayasqa kanqaku” (Mat. 5:7). Khuyapayakuq runaqa llakikunmi sufriq runamanta jinaspa tukuy atisqanta ruwan yanaparinanpaq.

11. ¿Imatan yachanchis Samaria llaqtayoq runamanta?

¹¹ (Leey Lucas 10:30-37). Khuyapayakuq runa imayna kasqanta yachachinanpaqmi Jesusqa willaran Samaria llaqtayoq runamanta. Chay runaqa judío runaq sufrisqanta rikuspan khuyapayaspa  yanaparan. Chay rijch’anachiymanta willayta tukuspan Jesusqa niran noqanchispas kaqta ruwananchispaq. Chhaynaqa kaypin piensananchis: “¿Samaria llaqtayoq runa jinachu khuyapayakuq kani? ¿Imatan ruwayman sufriq runakunata yanapanaypaq?”, nispa. Ejemplopaq, yanapasunmanmi kuraq hermanonchiskunata, viudakunata, sapallanku Diosta serviq wayna-sipaskunatapas. Depresión onqoyniyoq hermanonchiskunatapas sumaqtan kallpachananchis (1 Tes. 5:14; Sant. 1:27).

12. ¿Imaraykun kusisqa kanku khuyapayakuqkuna?

¹² ¿Imaraykun kusisqa kanku khuyapayakuqkuna? Khuyapayakuq kaspaqa jujkunatan yanapanchis chaymi kusisqa kanchis. Jesuspas niranmi: “Qoypin aswan kusikuyqa kan”, nispa. Jinaspapas khuyapayakuq kaspaqa Jehová Diostan kusichishanchis (Hech. 20:35; leey Hebreos 13:16). Rey Davidpas khuyapayakuq runamanta rimaspan niran: “Señor Diosmi waqaychanqapas kausachinqapas, kay pachapiqa kusisamiyoqmi kanqa”, nispa (Sal. 41:1, 2). Jujkunata khuyapayasun chayqa, Jehová Diosmi noqanchistapas khuyapayawasun, jinaspa kusisqa wiñaypaq kausasun (Sant. 2:13).

13, 14. ¿Imaraykun ‘ch’uya sonqoyoqkuna’ kusisqa kanku?

¹³ Jesusmi niran: “Kusisqa kachunku ch’uya sonqoyoqkunaqa, paykunan Diosta rikunqaku”, nispa (Mat. 5:8). Ch’uya sonqoyoq kanapaqqa piensasqanchispas imachus munasqanchispas limpion kanan. Chhayna kallaqtinchismi Jehová Diosqa aceptanqa adorasqanchista (leey 2 Corintios 4:2; 1 Tim. 1:5).

¹⁴ Ch’uya sonqoyoqkunamantan Biblia nin: “Kusisqa kachunku pampakama p’achankuta t’aqsaqkunaqa”, nispa (Apo. 22:14). ¿Imatan chaywan nishan? Jehová Diosmi janaq pachaman riqkunata ch’uyapaq qhawarin, paykunaqa manan jayk’aqpas wañunqakuchu, kusisqataqmi wiñaypaq kausanqaku. Kay allpapi qhepaqkunatataq Jehová Diosqa chaninpaq  paykunata qhawarisqanrayku permiten amigonkuna kanankuta. Chaymi Biblia nin: “Paykunan pampakama p’achankuta corderoq yawarninwan t’aqsaspa yuraqyachiranku”, nispa (Apo. 7:9, 13, 14).

15, 16. ¿Imaynapin ch’uya sonqoyoqkuna Diosta rikunchis?

¹⁵ Jehová Diosmi nin: “Manan pi runapas rikuwaspaqa kausanmanchu”, nispa (Éx. 33:20). Chhaynaqa, ¿imaraykun Jesús niran: “Ch’uya sonqoyoqkuna Diosta rikunqaku”, nispa? Griego rimaypin “rikuy” simita “reqsiy” nispa nikullanmantaq. Chhaynaqa ch’uya sonqoyoqkunaqa reqsinkun Jehová Dios imayna kasqanta valorankutaqmi cualidadninkunata. Chhaynapin Jehová Diosta rikushanku (Efes. 1:18). Jesusqa Jehová Dios jinan karan, chaymi niran: “Pipas noqata rikuwaqqa Yayatapas rikullantaqmi”, nispa (Juan 14:7-9).

¹⁶ Jinaspapas Jehová Diosta rikusunman vidanchispi yanapawasqanchista reparaspa (Job 42:5). Chaymantapas Jehová Diosqa prometenmi ch’uya sonqoyoq runakunapaq sumaq kausay apamunanta, chaykunapi piensaspan Diosta rikullasunmantaq. Ajllasqa cristianokunan ichaqa Diosta rikunqaku janaq pachapi kausarispanku (1 Juan 3:2).

17. ¿Imaraykun kusisqa kanku thaj kayta maskhaqkuna?

¹⁷ Jesusmi nillarantaq: “Kusisqa kachunku thaj kausay kananpaq allipunachiqkunaqa”, nispa (Mat. 5:9). Kallpachakunanchismi jujkunawan thajpi kausananchispaq chhaynapin kusisqa kasunchis. Santiagon niran: “Chanin kay ruru mujutaqa maypichus thaj kausay kan chaypin t’akakun, thaj kausayta maskhaqkunaq allinninpaqtaqmi chayqa kanpas”, nispa (Sant. 3:18). Sichus mayqen hermanowanpas otaq mayqen familianchiswanpas phiñachinakunchis chayqa, Diosmantan mañakunanchis paykunawan sumaqta kausanapaq. Jinan Jehová Diosqa santo espiritunta qowasun sumaq sonqo runa kananchispaq. Jesusmi niran thaj kayta maskhananchista, niranmi: “Sichus altarman ofrendaykita apashanki, chaypitaq yuyarinki wayqeyki qanpaq phiñasqa kashasqanta chayqa, altarpa ñaupanpi ofrendaykita saqeykuy, jinaspa phaway wayqeykiwanraq allipunamuy, chaymanta kutimuspaña ofrendaykitaqa jaywanki”, nispa (Mat. 5:23, 24).

18, 19. ¿Imaraykun kusisqa kanku cristianokuna qatikachasqaña kaspapas?

¹⁸ “Kusisqa kaychis noqarayku runakuna k’amisuqtiykichis, qatikachasuqtiykichis, llullakuspa tukuy mana allin kaqta contraykichispi rimaqtinkupas”. ¿Imaraykun Jesús chayta niran? Pay kikinmi kutichiran: “Anchatapuni  kusikuychis, janaq pachapi premioykichisqa jatunmi, chhaynatapunin profetakunatapas ñaupa tiempopiqa qatikacharanku”, nispa (Mat. 5:11, 12). Apostolkunata maqaspan kamachiranku amaña predicanankupaq, chaywanpas, “paykunaqa Jatun Juntaq ñaupanmanta kusisqa ripuranku”. ¿Imaraykun kusikuranku? ‘Jesuspa sutinpi ñak’arisqankurayku’ (Hech. 5:41).

¹⁹ Kay tiempopipas Diosta serviqkunaqa imaymana pruebakunapi tarikuspaqa kusisqan aguantanchis (leey Santiago 1:2-4). Diosta kasukusun chayqa, paymi yanapawasun aguantananchispaq. Chaypaq yachasun Henryk Dornik hermanonchismanta hermanonmantawan, paykunatan 1944 watapi agosto killapi campoman aparanku esclavo jina llank’anankupaq. Enemigonkunan niranku: “Imataña ninki chaypas manan Diosninkuta kacharikunkuchu, yaqachus jina kusikunku ñak’arisqankumanta”, nispa. Dornik hermanonchismi ichaqa niran: “Manan maqawasqankumantachu kusikurani, aswanpas Diospaq junt’aq sonqo kasqaymantan. Jinaspapas Diosmanta mañakusqaymi yanapawaran aguantashanallaypaq, payman astawan achhuykunaypaq otaq qayllaykunaypaqpas. ¡Chay ratopiqa Diosllan yanapawaran!”, nispa.

20. ¿Imaraykun kusisqa kanchis Jehová Diosta serviqkuna?

²⁰ Jehová Diosqa ‘kusisqa Diosmi’. Sichus paypa sonqonpaq jina imatapas ruwasun chayqa, kusisqan sientekunchis jujkunaña qatikachawaqtinchispas, familianchisña jark’awaqtinchispas, onqosqaña otaq kuraqña kaqtinchispas (1 Tim. 1:11). Jehová Diosqa “mana jayk’aq llullakuq Diosmi”, chaymi mana iskayanchischu imachus prometesqanta cumplinanmantaqa, chayta yachaspan kusisqa sientekullanchistaq (Tito 1:2). Jamuq tiempopi Jehová Dios promesankunata cumpliqtinqa manañan yuyarisunchu problemanchiskunata. Chay tiempopi kausayqa may sumaqchá kanqa. ¡Llapallanchismi thajpi kausasunchis! (Sal. 37:11.)