1. ¿Imaraykun Jehová Diosta papanchista jina qhawarinchis?

JESUSQA angelkunawan kuskan janaq pachapi papanku Jehová Diosta juj nisqalla servishanku (Col. 1:15; Sal. 103:20). Kay pachapipas millonninpi runakunan Jehová Diosta servishanku, paykunapas atinkumanmi Jehová Diosta papankuta jina qhawariyta. Chaymi Jesusqa discipulonkunata niran: “Noqan wichapushani Yayayman, Yayaykichisman”, nispa (Juan 20:17). Chaymantapas bautizakuspaqa llapa hermanonchiskunawanmi juj familia jina kapunchis (Mar. 10:29, 30).

2. ¿Imakunamantan kay yachachikuypi yachasunchis?

² Wakin hermanonchiskunaqa manan munakuq papankuta jinachu Jehová Diosta qhawarinku, chaymi paykunapaqqa sasa kanman jujkunata munakuy. Kay yachachikuypin yachasunchis imaynatas Jesusmanta yachay yanapawasunman Jehová Diosta papanchista jina qhawarinanchispaq munakunanchispaqpas chayta. Imakunata ruwaspas noqanchispas Jehová Dios jina hermanonchiskunata munakusunman chaytapas.

3. ¿Imaraykun Jehová Diosta papanchista jinapuni qhawarinanchis?

³ Jehová Diosqa munakuq Diosmi, chaymi Jesusqa munan munakuq papanchista jinapuni payta qhawarinanchista. Jesusqa manan munanchu mana munakuyniyoq patronta jina Jehová Diosta qhawarinanchistaqa, aswanpas munakuq papanchiswan jina rimananchistan munan. Chayraykun discipulonkunaman mañakuyta yachachishaspa niran: “Qankunaqa khaynatan mañakunkichis: ‘Yayayku janaq pachapi kaq’, nispa” (Mat. 6:9). Yaqapaschá Jesusqa yachachinman karan ‘wiñay-wiñaypaq rey’, ‘tukuy atiyniyoq Dios’, ‘kamaqniyku’  nispa mañakunanchista, ichaqa manan chhaynatachu yachachiran (Gén. 49:25; Isa. 40:28; 1 Tim. 1:17). Aswanpas “Yayayku” nispa ninanchistan yachachiran, chaywanmi payqa munasharan papanchista jinapuni Jehová Diosta qhawarinanchista.

4. ¿Imaraykun Jehová Diosman achhuykunanchis?

⁴ Wakinninchisqa sinchita sufrispapaschá wiñaranchis, chaymi sasa kanman Jehová Diosta munakuq papanchista jina qhawariy. Jehová Diosmi ichaqa allinta reqsiwanchis munakuwanchistaqmi kanpas, chaymi Bibliapipas niwanchis: “Diosman achhuykuychis, jinan paypas qankunaman achhuykamusunkichis”, nispa (Sant. 4:8). Jehová Diosqa anchatapunin munakuwanchis, chaymi munan papanchista jinapuni payta qhawarinanchista.

5. Lucas 10:22 nisqan jina, ¿imaynatan Jesús yanapawasunman Jehová Diosman astawan achhuykunanchispaq?

⁵ Jesusqa yanapawasunmanmi Jehová Diosman astawan achhuykunanchispaq, payqa allintan papanta reqsin, pay jinataqmi kanpas. Chaymi Jesusqa niran: “Pipas noqata rikuwaqqa Yayatapas rikullantaqmi”, nispa (Juan 14:9). Jesusqa kuraq hermanonchis jinan yanapawasunman Jehová Diosta respetananchispaq, kamachikuyninkunatapas kasukunanchispaq. Chayta ruwaqtinchismi Jehová Diosqa astawanraq munakuwasunchis. Jesusqa imaymanatan kay pachapi kashaspa ruwaran, chaykunan rikuchiwanchis Jehová Diosqa ancha munakuqpuni kasqanta (leey Lucas 10:22). Chaykunamantan kunan astawan yachasun.

6. ¿Uyariranchu Jehová Dios Jesuspa mañakusqanta?

⁶ Jehová Diosqa llapa wawankunaq mañakusqantan uyarin. Jesuspa mañakusqantapas uyariranmi (Luc. 5:16). Jesusqa Jehová Diospa yanapaynintan mañakuran 12 apostolninkunata ajllananpaq (Luc. 6:12, 13). Sasa tiempokunapipas Jehová Diospa yanapaynintan mañakuran. Chaymi Judas manaraq traicionashaqtin Diospa yanapayninta mañakuran sasachakuykunata aguantananpaq. Jehová Diosqa uyariranmi mañakusqanta, chaymi juj angelta kacharan Jesusta kallpachananpaq (Luc. 22:41-44).

7. ¿Imata yachaspan anchatapuni kusikunchis?

 ⁷ Kunanpas Jehová Diosqa llapa mañakusqanchistan uyariwanchis. Jinaspapas tiempollanpin mañakusqanchisman kutichimuwanchis, chayta yachaspan anchatapuni kusikunchis (Sal. 116:1, 2). Chaytan India nacionmanta hermananchis repararan. Paytaqa llakipakuy onqoysi jap’isqa, chaysi Diospa yanapayninta mañakusqa. Paymi nin: “2019 watamanta mayo killamanta JW Canal programata qhawaymi yanapawaran. Chaypin nimuran imaynatas atipasunman llakipakuyninchiskunata chayta, chaypin repararani mañakusqayman Jehová Dios kutichimuwasqanta”, nispa.

8. ¿Imaynapin yachanchis Jehová Dios wawan Jesusta munakusqanta?

⁸ Jehová Diosqa wawan Jesusta jinan munakuwanchis chaymi tukuy necesitasqanchista qowanchis. Jehová Diosqa imaymanamantan Jesusta yanaparan kay pachapi kashaqtin (Juan 5:20). Payqa iñiyninpin yanaparan, p’achantapas mijunantapas manan faltachiranchu. Chaymantapas bautizakushaqtinmi janaq pachamanta nimuran anchatapuni munakusqanta (Mat. 3:16, 17). Chaymi kikin Jesuspuni niran: “Noqaqa manan sapallaychu kashani, aswanpas kachamuwaqniy Yayan noqawanqa kashan”, nispa (Juan 8:16).

9. ¿Imaynapin yachanchis Jehová Dios munakuwasqanchista?

⁹ Jehová Diosqa Jesusta jinan munakuwanchis, chayraykun llaqtanman pusamuwaranchis. Kunanqa Jehová Diosta reqsispan hermanonchiskunawan kuska payta servishanchis, anchatataqmi hermanonchiskunawanqa munanakunchis (Juan 6:44). Chaymantapas Jehová Diosqa imaymana qelqakunatan qowanchis allin iñiyniyoq kananchispaq, manan p’achanchistapas mijunanchistapas faltachiwanchischu (Mat. 6:31, 32). Chaymi Jehová Diostaqa astawanraq munakunchis.

10. ¿Imatan yachasunman Jehová Dios hermanonchiskunata munakusqanmanta?

¹⁰ Jehová Diosqa anchatan hermanonchiskunata munakun. Ichaqa yaqapaschá noqanchispaqqa sasa kanman hermanonchiskunata munakuy juj costumbreyoq kasqanchisrayku otaq sinchita sufrispa wiñasqanchisrayku. Chaymantapas yaqapaschá hermanonchiskuna imapipas k’iriwasqanchisrayku sasa kallanmantaq paykunata munakuy. Chaywanpas kallpachakunanchismi Jehová Dios jina hermanonchiskunata munakunanchispaq (Efes. 5:1, 2; 1 Juan 4:19).

11. ¿Imaynatan Jesús rikuchiran papan jina khuyapayakuq kasqanta?

¹¹ Jehová Diosqa “khuyapayakuq” Diosmi (Luc. 1:78). Khuyapayakuq runaqa jujkunamantan llakikun, tukuy atisqantataqmi ruwan paykunata yanapananpaq kallpachananpaq ima. Jesuspas papan jina khuyapayakuqmi karan (Juan 5:19). Bibliaq nisqan jina Jesusqa runakunatan khuyapayaran, “paykunatan rikuran mana michiqniyoq ovejakunata jina khuyay k’irisqata, ch’eqesqata” (Mat. 9:36). Jesusqa manan runakunataqa khuyapayallaranchu, payqa onqosqakunatan jampiran llakisqa sonqoyoqkunatapas kallpacharan (Mat. 11:28-30; 14:14).

12. ¿Imakunata ruwaspan hermanonchiskunata khuyapayasqanchista rikuchisunman?

¹² Noqanchispas khuyapayakuqmi kananchis. Chaypaqmi ichaqa piensarinanchis ima sasachakuykunapis hermanonchiskuna tarikushanku chayta. Yaqapaschá iñiq t’aqanchispi mayqen hermananchispas onqosqa kashanman. ¿Imaynatan chhaynapi tarikuq hermananchiskunata  yanaparisunman? Yaqapaschá wasinman rispa mijunata wayk’upusunman otaq wasintapas limpiapusunman. Wakin hermanonchiskunapas yaqapaschá mana llank’anayoq kashanku. Paykunatapas atisqanchisman jinan qolqechanchiswan yanaparisunman juj llank’anata tarinankukama.

13, 14. ¿Imaynatan noqanchispas Jehová Dios jina qoykukuq kasunman?

¹³ Jehová Diosqa qoykukuq Diosmi (Mat. 5:45). Noqanchispas pay jina qoykukuqmi kananchis, manan hermanonchiskuna yanapananchispaq niwananchistaraqchu suyananchis. Aswanpas liston kashananchis hermanonchiskunata yanapananchispaq. Chaypaq piensasun Jehová Diospi. Payqa mana mañakushaqtinchismi millay runakunamanpas allin runakunamanpas intinta qowanchis. Chhayna qoykukuq kasqanraykun Jehová Diostaqa astawanraq munakunchis.

¹⁴ Wakin hermanonchiskunapas kallpachakunkun Jehová Dios jina qoykukuq kanankupaq. Chaymi listollapuni kashanku jujkunata yanapanankupaq. Chaytan ruwaranku 2013 watapi Filipinas nacionpi Haiyan sutiyoq jatun wayra wasikunata thuniqtin. Chaypiqa askha hermanonchiskunan mana wasiyoq qhepakapuranku. Ichaqa kaq raton askha hermanonchiskuna paykunata yanapaq riranku. Chaymantapas qolqenkuwan kallpankuwan iman yanapakuranku jujmanta hermanokunaq wasinkuta jatarichinankupaq. Chayraykun yaqa 750 wasikunata manaraq watapi jatarichiranku. Kay coronavirus onqoy mast’arikuqtinpas askha hermanonchiskunan pisi kaqniyoq hermanonchiskunata yanaparanku. Chhaynatan noqanchispas kallpachakunanchis llapa hermanonchiskunata usqhaylla yanapananchispaq, chayta ruwaspan paykunata munakusqanchista rikuchisunchis.

15, 16. Lucas 6:36 nisqan jina, ¿imayna kananchispaqmi kallpachakunanchis?

¹⁵ Jehová Diosqa khuyapayakuq perdonakuq Diosmi (leey Lucas 6:36). Chaymi Jehová Diosqa sapa p’unchay perdonawanchis khuyapayawanchis ima (Sal. 103:10-14). Jesuspas Jehová Dios jina khuyapayakuqmi karan chaymi askha kutipi discipulonkunata perdonaran. Chayraykun llapa runakunarayku vidantapas qoran (1 Juan 2:1, 2). Chhayna  khuyapayakuq perdonaq kasqankuraykun Jehová Diostapas Jesustapas anchatapuni munakunchis.

¹⁶ Sichus noqanchispas kallpachakusunchis khuyapayakuq perdonakuq kananchispaq chayqa astawanmi hermanonchiskunawan munanakusunchis (Efes. 4:32). Mayninpiqa manapaschá facilchu jujkunata perdonay kanman, chaywanpas kallpachakunanchismi perdonakuq kananchispaq. Juj hermananchismanta yachasun. Paytaqa 15 noviembre 2012 watamanta Qhawaq revistata estudiaymi yanapasqa, chaypin rimashan “Qankunapura pampachanakuychis” nispa. * Paymi nin: “Chay qelqata estudiasqaymi yanapawaran ama usqhayllachu phiñakunaypaq aswanpas perdonakuq kanaypaq. Chay qelqapin niran: ‘Jujkunata perdonayqa manan mana allin ruwasqankuta allinmi niychu, aswanpas paykunata ama cheqnipakuymi, paykunawan thajpi kausaymi’, nispa”. Hermanonchiskunata perdonaspaqa Jehová Dios jina Jesús jina munakuq kasqanchistan rikuchinchis.

17. Mateo 5:16 nisqan jina, ¿imaynata kausananchispaqmi kallpachakunanchis?

¹⁷ Ancha kusikunapaqmi Jehová Diospa llaqtanpi kayqa. Chayraykun munanchis juj runakunapas noqanchiswan kuska Jehová Diosta servinankuta. Chaypaqmi ichaqa kallpachakunanchis Diospa munayninman jinapuni kausananchispaq. Chayta rikuspan juj runakunapas Diosmanta yachayta munanqaku, chhaynapin Jehová Diospa sutintapas jatunchanqaku (leey Mateo 5:16).

18. ¿Iman yanapawasunchis ama manchakuspa jujkunaman Diosmanta willananchispaq?

¹⁸ Wakin runakunaqa Jehová Diosta kasukusqanchisraykun cheqnikuwasunchis qatiykachawasunchis ima. Yaqapaschá chhaynapi tarikuspaqa manchakusunman imakunapichus creesqanchismanta paykunaman willayta, ichaqa manan manchakunanchischu. Jehová Diosmi wawan Jesuspiwan yanapawasun. Chaymi Jesusqa discipulonkunata niran: “Aman llakipakunkichischu imaynatachus imatataqchus rimanaykichismantaqa, chay  ratopin yachankichis imatachus rimanaykichista. Manan qankunallachu rimankichisqa, aswanpas Yayaykichispa espiritunmi qankunamanta rimanqa”, nispa (Mat. 10:19, 20).

19. ¿Imatan yachasunman Robert iñiqmasinchismanta?

¹⁹ Yachasun Robert hermanonchismanta. Paytaqa chayllaraq Bibliata estudiashaqtinsi Sudáfrica nacionpi juezman apasqaku. Chaypin payqa mana manchakuspa nisqa hermanonkunata munakusqanrayku manapuni cuartelman riyta munasqanta. Jinan juj kaq juezqa tapusqa: “¿Pikunataq hermanoykikunari?”, nispa. Chay ratos payqa chay p’unchaypaq leenapaq textota yuyarisqa, chay texton karan Mateo 12:50. Jinan nisqa: “Pipas janaq pachapi kaq Yayaypa munayninta ruwaqmi wayqeypas, panaypas, mamaypas”, nispa. Pisi tiempollaraq Robert hermanonchis Bibliata estudiasharan chaypas Jehová Diosmi santo espiritunwan yanaparan juezpa tapusqanman allinta kutichinanpaq. Chhayna kutichisqanta rikuspaqa anchatachá Jehová Diosqa kusikuran, chhaynatachá kunanpas Jehová Diosqa kusikun sasa tiempokunapi paymanta willaqtinchisqa.

20. Juan 17:11, 15 nisqan jina, ¿imata ruwananchispaqmi kallpachakushanallanchis?

²⁰ Llapanchispas kusisqan kashanchis Jehová Diospa llaqtanpi kasqanchismanta. Jehová Diospas hermanonchiskunapas anchatapunin munakuwanchis, noqanchisqa manan sapallanchischu kashanchis. Satanasqa manan munanchu Jehová Diosta munakuq papanchista jina qhawarinanchista, chaymantapas manan munanchu hermanonchiskunawan kuska juj nisqalla kananchista. Chaymi Jesusqa Jehová Diosmanta mañakuran llapanchispas juj nisqalla Diospa llaqtanpi kausananchispaq (leey Juan 17:11, 15). Jehová Diosqa uyariranmi Jesuspa mañakusqanta, chaymi yanapawashanchis iñiq t’aqapi juj nisqalla kusisqa payta servinanchispaq. Noqanchispas Jesús jina kananchispaqmi kallpachakunanchis. Manan Jehová Diospa munakuwasqanchismantaqa iskayananchischu, paytaqa papanchista jinan qhawarinanchis. Chayta ruwasunchis chayqa kusisqan Diospa llaqtanpi kasunchis.