1. ¿Imata ruwanankupaqmi kuraq hermanonchiskuna kallpachakunanku?

WAKINNINCHISQA yaqapaschá kuraqña kapushasunman, chhaynapi tarikuspaqa yaqapaschá piensasunman iñiq t’aqapi manaña yanapakuyta atinanchispaq. Ichaqa kallpachakusunmanmi yachasqanchiskunawan wayna-sipas hermanonchiskunata yanapananchispaq, chhaynapin paykunapas astawan Diospa llaqtanpi yanapakunqaku. Chaymanta rimaspan juj kuraq umalliq niran: “Noqaqa kuraqña kapusqayraykun manaña ñaupaqpi jinañachu imatapas ruwarani. Ichaqa wayna-sipaskunaq llank’asqankuta rikuspan ancha kusisqapuni kasharani”, nispa.

2. ¿Imakunamantan kay yachachikuypi yachasunchis?

² Ñaupaq yachachikuypi yachamusqanchis jina wayna-sipaskunaqa imaymanatan kuraq hermanonchiskunamanta yachankuman. Chayraykun kuraq hermanonchiskunaqa kallpachakunanku wayna hermanonchiskunawan kuska llank’anankupaq. Chaypaqmi ichaqa kananku k’umuykukuq, maykamachus ruway atisqankuta reparakuq, agradecekuq, qoykukuq ima. Chaykunamantan kay yachachikuypi yachasunchis.

3. a) Filipenses 2:3, 4 nisqan jina, ¿iman k’umuykukuq kay? b) ¿Imaraykun kuraq hermanonchiskuna k’umuykukuq kananku?

³ Kuraq hermanokunaqa kallpachakunankun k’umuykukuq kanankupaq, chhaynapin wayna-sipas hermanokunata allinta yanapanqaku. K’umuykukuq runaqa jujkunatan paymantaqa aswan allinpaq qhawarin (leey Filipenses 2:3, 4). ¿Imaynatan kuraq hermanokuna rikuchinkuman k’umuykukuq  kasqankuta? Manan paykunaqa ñaupaqpi yachasqankuman jina otaq munasqankuman jina imapas ruwakunantachu suyananku, aswanpas cambiokuna kasqanmanmi yachakunanku (Ecl. 7:10; 1 Cor. 7:31).

4. ¿Imaynatan watukuq umallikuna rikuchinku Leví runakuna jina kasqankuta?

⁴ K’umuykukuq kuraq hermanonchiskunaqa reparakunkun manaña ñaupaqpi jinachu imatapas ruway atisqankuta. Chhaynan kanku watukuq umallikunapas. Paykunaqa 70 watankuman chayaspan manaña watukuq umalliñachu kapunku, aswanpas juj llank’aytañataqmi Diospa llaqtanpi chaskinku. Chay llank’aymanqa yachasqachá kasharanku, ichaqa sasaña paykunapaq chay llank’anankuta saqepuy kanman chaypas anchatan kusikunku wayna-sipas hermanokunañataq chay llank’aypi yanapakusqankumanta. Paykunaqa ñaupa tiempopi Leví runakuna jinan kanku. Leví runakunaqa 50 watankukamallan Diospa karpanpiqa llank’aqku, ichaqa manan chayraykuchu llakikuranku. Aswanpas juj waynakunatan yanaparanku Jehová Diospa karpanpi yanapakunankupaq (Núm. 8:25, 26). Kay tiempopi 70 watayoq más watukuq umallikunapas Leví runakuna jinan kallpachakushanku iñiq t’aqapi astawan yanapakunankupaq, hermanokunata kallpachanankupaq ima.

5. ¿Imatan kuraq hermanonchiskuna yachankuman Dan hermanonchismanta Katie esposanmantawan?

⁵ Yachasun Dan hermanonchismanta. Payqa 23 wata masmi watukuq umalli karan,  ichaqa 70 watanman chayaqtinmi Katie esposantawan precursor especial kanankupaq nisqaku. Juj llank’aytaña Dan hermanonchisman esposanmanwan qoranku chaypas, paykunaqa kallpachakushallankun iñiq t’aqapi hermanokunata yanapanankupaq. Qhari hermanokunatan yanapashanku iñiq t’aqapi yanapakuq kamachi kanankupaq, juj hermanokunatapas yanapashankun carcelkunapipas askha runakunaq kasqanpipas Diosmanta willanankupaq. Kuraq hermanokunapas wayna-sipas hermanokunatan yanapananku kallpachananku ima. Chaypaqmi ichaqa cambiokunaq kasqanman yachakunanku kanqa, chaymantapas atisqankuman jinan jujkunata yanaparinkuman.

6. ¿Imaraykun kuraq hermanokuna reparakunanku maykamallachus imapas ruway atisqankuta?

⁶ K’umuykukuq kuraq hermanoqa maykamachus ruway atisqantan reparakun (Prov. 11:2). Chhaynapin kusisqa iñiq t’aqapi yanapakunqa, manataqmi pisikallpayanqachu. Kaypi piensasun. Bicicletata manejaqkunaqa susigollawanmi wichaymanqa manejanku, mayninpiqa uraykusparaqmi bicicletata tanqankupas. Chhaynallataqmi kuraq hermanonchiskunapas. Yaqapaschá paykunaqa aswan susigollawan imatapas ruwananku kanqa, chhaynapin Jehová Diosta servishallanqaku hermanonchiskunatapas yanapanqaku (Filip. 4:5).

7. ¿Imatan kuraq hermanokuna yachankuman Barzilái runamanta?

⁷ Yachasun Barzilái runamanta. Paytaqa 80 watanpi kashaqtinmi rey David niran paywan kuska wasinpi tiyananpaq. Ichaqa kuraqña kasqanraykun mana munaranchu, payqa reparakuranmi manaña nishutachu imapipas yanapakuy atisqanta. Chaymi aswanpas paypa rantinpi Quimam waynata pusanankupaq niran (2 Sam. 19:35-37). Kuraq hermanonchiskunaqa Barzilái runa jinan anchatapuni kusikunku Diospa llaqtanpi wayna-sipaskuna astawan yanapakusqankuta rikuspa.

8. ¿Imaynatan rey David rikuchiran juch’uyaykukuq kasqanta?

⁸ Rey Davidpas reparakuranmi maykamallachus imatapas ruway atisqanta. Davidqa Diospa wasintan jatarichiyta munaran, ichaqa Jehová Diosmi niran chay llank’aytaqa wawan Salomón aparinanta. Chayta yachaspaqa manan Davidqa phiñakuranchu, aswanpas kusisqan wawan Salomonta yanaparan (1 Crón. 17:4; 22:5). Davidqa manan wawan waynallaraq kasqanraykuchu niran: “Noqapunin ruwasaq”, nispaqa (1 Crón. 29:1). Davidqa allintan yacharan Jehová Diospa yanapaynillanwan imapas ruwakusqanta. Kuraq hermanonchiskunapas manapaschá kaq llank’ayllapichu Diospa llaqtanpi yanapakushanku, chaywanpas paykunaqa allintan juj llak’aykunapi yanapakushallanku. Paykunaqa confiankun wayna-sipas iñiqmasinchiskunapi, yachankun Jehová Diospa yanapayninwanqa ima llank’aytapas allinta junt’anankuta.

9. ¿Imaynatan Shigeo hermanonchis juch’uyaykukuq kasqanta rikuchiran?

⁹ Shigeo hermanonchismanta yachasun. Paytaqa 30 watanpi kashaqtinmi 1976 watapi sucursalmanta juj kaq encargakuqta jina churasqaku. 2004 watapitaq sucursalpi encargakuqkunamanta coordinadorta churasqaku. Tiempowansi ichaqa reparakusqa manaña ñaupaqpi jinachu imatapas ruwasqanta. Chaymi payqa Jehová Diosmanta  mañakusqa chay llank’aypi juj wayna hermano aswanpas yanapakunanpaq. Kunanqa manañan coordinadorchu, chaywanpas sucursalmanta juj kaq encargakuqmi, chaypin askha wayna hermanokunata yanapashallan. Kuraq hermanonchiskunaqa Barzilái, rey David, Shigeo hermanonchis jinan kallpachakunanku wayna hermanonchiskunapi confianankupaq, manataqmi enemigonkuta jinachu qhawarinanku (Prov. 20:29).

10. ¿Imaynatan kuraq hermanonchiskuna iñiq t’aqapi wayna hermanonchiskunata qhawarinku?

¹⁰ Kuraq hermanonchiskunaqa manañan ñaupaqpi jinachu imatapas ruwayta atinku. Chaymi anchatapuni kusikunku iñiq t’aqapi wayna-sipas hermanonchiskunaq yanapakusqankuta rikuspa. Paykunaqa anchatan valoranku wayna-sipas hermanonchiskunata, Jehová Diospa sumaq regalonta jinataqmi qhawarinkupas.

11. Rut 4:13-16 nisqan jina, ¿imaraykun kuraq hermanokuna wayna-sipas hermanokunaq yanapayninta chaskikunankupuni?

¹¹ Noemimanta yachasun. Noemiqa kuraq warmiñan karan, paypaqqa iskay wawankunan wañukapuran. Chaymi Rut-ta niran llaqtanman kutipunanpaq. Paymi ichaqa manapuni Noemita saqeyta munaranchu, chaymi Belenkama compañananpaq niran. Noemiqa agradecekuq kasqanraykun Rutpa yanapayninta chaskikuran (Rut 1:7, 8, 18). Chay ruwasqanqa allinpunin karan, chaymi Jehová Diosqa iskayninkuta bendeciran (leey Rut 4:13-16). Kuraq hermanokunapas Noemí jinan agradecekuq kananku.

12. ¿Imaynatan apóstol Pablo agradecekuq kasqanta rikuchiran?

¹² Apóstol Pablopas agradecekuq runan karan. Payqa pisichikuypi kashaqtinmi  Filipos hermanokunaq yanapasqanmanta agradecekuran (Filip. 4:16). Timoteoq yanapasqanmantapas maytan agradecekuran (Filip. 2:19-22). Chaymantapas Roma carcelman apashaqtinkun hermanokunaq kallpachasqanmanta Jehová Diosta “gracias” niran (Hech. 28:15). Apóstol Pabloqa allin experienciayoqmi karan, iñiq t’aqapi hermanokunatapas allintan yanaparan. Chaywanpas payqa juch’uyaykukuspan hermanokunaq yanapayninta chaskikullaran.

13. ¿Imaynatan kuraq hermanonchiskuna rikuchinkuman iñiq t’aqapi wayna-sipas hermanonchiskunaq yanapakusqankumanta agradecido kasqankuta?

¹³ ¿Imaynatan kuraq hermanonchiskuna rikuchinkuman iñiq t’aqapi wayna-sipaskunaq yanapakusqankumanta agradecido kasqankuta? Wayna-sipaskunaq yanapayninta chaskikuspan. Sichus paykuna nisunkichisman maymanpas pusanasuykichispaq, imapipas yanapanasuykichispaq chayqa “gracias” nispan yanapayninta chaskikunaykichis. Chaytaqa Diospa yanapayninta jinan qhawarinaykichis. Chaymantapas kallpachakunaykichismi wayna-sipaskunata iñiyninkupi yanaparinaykichispaq. Paykunatan niwaqchis: “Allintan iñiq t’aqapi yanapakushanki. Chayta rikuspan anchatapuni kusikuni”, nispa. Chaymantapas kallpacharinaykichispaq jinan ima experienciaykichistapas willarinaykichis, chhaynapin iñiq t’aqapi wayna-sipaskunaq kasqanmanta agradecido kasqaykichista rikuchinkichis (Col. 3:15; Juan 6:44; 1 Tes. 5:18).

14. ¿Imatan rey David ruwaran qoykukuq kasqanrayku?

¹⁴ Kuraq hermanokunaqa rey David jinan qoykukuq kananku. Manaña Davidchu Diospa wasinta ruwanan karan chaypas, payqa askhanpin qoritapas qolqetapas Diospa wasinta ruwanankupaq qoran (1 Crón. 22:11-16; 29:3, 4). Chhaynatan kuraq hermanonchiskunapas atisqankuman jina qolqechankuwan yanapakunkuman juñunakuna wasikunata jatarichikunanpaq. Chaymantapas wayna-sipas hermanokunamanmi willarinkuman imaynatas Jehová Diosta ñaupaqpi serviranku chayta.

15. ¿Imakunatan apóstol Pablo Timoteoman yachachiran?

¹⁵ Apóstol Pablopas qoykukuqmi karan. Payqa llapa yachasqantan Timoteoman yachachiran. Paymi Timoteota yanaparan Diosmanta runakunaman willananpaq allin yachachiq kananpaq ima (Hech. 16:1-3). Chaymi Timoteopas allin yachachiq kapuran (1 Cor. 4:17). Timoteopas apóstol Pablo jinan jujkunata yanaparan allin yachachiq kanankupaq.

16. ¿Imaraykun Shigeo hermanonchis waynakunata yachachiran?

¹⁶ Kuraq hermanonchiskunapas wayna-sipaskunamanmi imaymana yachasqankuta yachachishanku. Paykunaqa munankun wayna-sipas hermanokunañataq paykunaq rantinpi Diospa llaqtanpi yanapakunankuta. Shigeo hermanonchisqa unay watakunañan wayna hermanonchiskunata yachachiran sucursalmanta encargakuq kanankupaq. Chaytan payqa ruwaran kuraqña kapuqtin juj wayna hermano paypa rantinpi llank’ananpaq, chhaynapi Diospa llaqtan ñauparishanallanpaq. Shigeo hermanonchisqa 45 más watakunañan sucursalmanta juj kaq encargakuq jina llank’ashan, chaywanpas chaypi llapa yachasqankunatan jujkunaman yachachishallan. Chhayna hermanokunaqa ancha valorniyoqmi Diospa llaqtanpiqa kanku.

17. Lucas 6:38 nisqan jina, ¿imaynatan kuraq hermanonchiskuna wayna-sipas hermanonchiskunata yanaparinkuman?

 ¹⁷ Kuraq hermanonchiskunaqa allin iñiyniyoqmi kanku, chaymantapas kallpachakunkun Diospa llapa kamachikuyninkunata kasukunankupaq. Paykunaqa allintan yachanku imaynatas Diospa llaqtanpi ñaupaqpi imapas ruwakuran chayta, ichaqa cambiokunaq kasqantan kasukuranku, chaymi kusisqa Jehová Diosta servishallanku. Wakin kuraq hermanonchiskunaqa yaqapaschá chayllaraq bautizakuranku, chaywanpas imaymanamantan wayna-sipas hermanokunataqa yanapankuman. Paykunamanmi willarinkuman imaraykus kuraqña kaspa Jehová Diosta reqsispa kusisqa kashanku chayta. Chaymantapas kausasqanku tiempopi imaymana yachasqankutan willankuman, chaykunata ruwanqaku chayqa Jehová Diosmi paykunata bendecinqa (leey Lucas 6:38).

18. ¿Imaraykun kuraq hermanonchiskuna wayna-sipas hermanonchiskunawan kuska llank’ananku?

¹⁸ Kuraq hermanonchiskunaqa wayna-sipas hermanonchiskunawanmi kuska llank’ananku, chhaynapin iskayninku allinta yanapanakunqaku (Rom. 1:12). Kuraq hermanonchiskunaqa allin experienciayoqmi kanku, wayna-sipas hermanonchiskunataq allin kallpayoq kanku. Sichus kuraq hermanonchiskuna wayna-sipas hermanokunawan kuska llank’anqaku chayqa Jehová Diostan jatunchanqaku, iñiq t’aqapipas allintan yanapakunqaku.