1. Efesios 6:10-13 textopi nisqanman jina, ¿imaynatan Jehová Dios munakuwasqanchista rikuchiwanchis?

JEHOVÁ DIOSMI yanapawanchis enemigonchiskuna contra allinta sayananchispaq, chaypin reparanchis munakuwasqanchista. ¿Pikunan enemigonchiskuna kanku? Satanaswan supaykunawanmi. Jehová Diosqa willawanchismi chay enemigonchiskunamanta, yanapawanchistaqmi paykuna contra kananchispaq (leey Efesios 6:10-13). Jehová Diospa yanapayninta chaskikuspa paypi confiasun chayqa, atisunmi Satanás contra sayayta. Jinaspa apóstol Pablo jina nisun: “Noqanchiswantaq Dios kashan chayqa, ¿pitaq contranchispiri kanman?”, nispa (Rom. 8:31).

2. ¿Imamantan kay estudiopi yachasun?

² Cheqaq cristianokunaqa manan Satanasmanta supaykunamantapas yachaypichu preocupakunchis. Aswanpas preocupakunchis Jehová Diosmanta yachaypi payta serviypi iman (Sal. 25:5). Chaywanpas yachananchismi imatachus Satanás ruwasqanta, ¿imarayku? Ama engañachikunanchispaq (2 Cor. 2:11; willakuyta qhaway). ¿Imawanmi Satanaspas supaykunapas astawan runakunata engañanku? ¿Imakunatan ruwananchis ama engañachikunapaq? Chaytan kay estudiopi yachasun.

3, 4. a) ¿Iman espiritismo nisqa? b) ¿Jayk’a runakunan creenku layqa ruwaykunapi?

³ Satanaspas supaykunapas astawanqa runakunata engañanku espiritismo nisqawan otaq nisunman layqa ruwaykunawan.  Chayta ruwaqkunaqa ninkun: “Watuymanmi imachus pasananta cocata, cartakunata qhawaspa”, nispa. Jujkunataq ninku: “Atinin wañuqkunawan rimayta”, nispa. Wakintaq runamasinkuta layqanankupaq imaymanata ruwanku. *

⁴ ¿Jayk’a runakunan creenku layqa ruwaykunapi? America del Sur, el Caribe nisqa ladopin tarikun 18 nacionkuna. Chay nacionkunapiqa kinsa runamanta jujninmi creen magiapi, brujeriapi, juj layqa ruwaykunapipas. Chhaytukuy runakunallataqmi ninku: “Atikunmi espiritukunawan rimayta”, nispa. África ladopin tapullarankutaq 18 nacionkunapi tiyaq runakunata. Chaypiqa kuskan más runakunan creenku layqa ruwaykunapi. Chay jinaqa maypiña tiyanchis chaypas, llapallanchismi cuidakunanchis layqa ruwaykunapi ama participananchispaq. Yachasqanchis jina, Satanasqa llapa runakunatan engañayta munashan (Apo. 12:9).

5. ¿Imaynatan Jehová Dios qhawarin layqa ruwaykunata?

⁵ Jehová Diosqa cheqaq kaqta willaq Diosmi (Juan 17:17). Chhaynaqa, ¿imaynatan qhawarin layqa ruwaykunata? ¡Mana allinpaqpunin qhawarin! Israel llaqtatan niran: “Aman qankuna ukhupiqa mayqenpas churiykichista ususiykichista ruphachina sacrificiota jina jaywankichischu. Amallataq watuqpas, suerte qhawaqpas, ch’askata qhawaqpas, layqapas, mana allin espiritukunata rimachiqpas, wañuqpa alman rimachiqpas qankuna ukhupiqa kanqachu. Chay jina ruwaqkunataqa sinchitan Señor Diosqa cheqnikun”, nispa (Deut. 18:10-12). Manaña obligasqachu kashanchis Israel llaqtaman qosqan kamachikuykunata kasukunapaq chaypas, sut’itan reparanchis imaynatachus Jehová Dios layqa ruwaykunata qhawarisqanta (Mal. 3:6).

6. a) ¿Imaynatan Satanás runakunata engañan layqa ruwaykunawan? b) Eclesiastés 9:5 textopi nisqanman jina, ¿imaynapin wañupuqkuna tarikunku?

⁶ Satanasqa layqa ruwaykunawanmi runakunata engañan, chaymi Diosqa mana munanchu chaykunapi participananchista. Ejemplopaq, runakunatan creechin wañupuqkunaq alman kausashanallanpaq (leey Eclesiastés 9:5). Chaymantapas layqa ruwaykunawanmi runakunata manchachin, Jehová Diosmantapas karunchan. Layqa ruwaykunapi participaqkunaqa millay espiritukunapin confianku, manan Jehová Diospichu, chaytan Satanasqa munan.

7. ¿Imatan Jehová Dios willawanchis?

⁷ Qhawarimusqanchis jina Jehová Diosqa willawanchismi imakunawan Satanaspas supaykunapas runakunata engañan chayta. Kunan yachasun imakunatas ruwasunman Satanás contra kananchispaq chayta.

8. a) ¿Imatan ruwananchis supaykuna contra allinta sayananchispaq? b) Salmos 146:4 texto, ¿imaninmi wañuqkunamanta?

⁸ Bibliatan leenanchis imachus yachasqanchispitaq piensananchis. Chayta ruwaspaqa manan engañachikusunchu supaykunaq yachachikuyninkunawan. Bibliaqa sut’itan reparachin Satanaspa yachachikuyninkuna llulla kasqanta (Efes. 6:17). Ejemplopaq, sut’itan willan wañupuqkunaqa manaña  piwanpas rimayta atisqankuta (leey Salmos 146:4). Willallantaqmi Jehová Dioslla jamuq tiempopi imachus pasananta willay atisqanta (Is. 45:21; 46:10). Sichus Bibliata leeshallasun, imachus yachasqanchispipas piensashallasun chayqa, preparasqan kasunchis supaykunaq yachachikuyninkunata rechazananchispaq.

9. ¿Ima ruwaykunapin mana participananchischu?

⁹ Manan layqa ruwaykunapi participananchischu. Cheqaq cristianokunaqa manan layqa ruwaqkunaman rinchischu, manataqmi wañuqkunawan imaynamantapas rimayta munanchischu. “Wañuqkunaq almanqa kausashanraqmi” nispa costumbrekuna ruwasqankupiqa manan participanchischu. Jamuq tiempopi imachus pasananta yachananchispaqpas manan rinchischu watuqkunaman otaq cartakunata qhawaqkunamanpas (Is. 8:19). Chaykunapi participaspaqa supaykunaq makinpin churakushasunman, chaymi manapuni chaykunapiqa participananchischu.

10, 11. a) ¿Imatan Éfeso llaqtamanta wakin runakuna ruwaranku Jehová Diosmanta yachaspanku? b) 1 Corintios 10:21 textopi nisqanman jina, ¿imaraykun paykunaq ejemplonta qatikunanchis, imaynatan chayta ruwasunman?

¹⁰ Wijch’unanchismi layqa ruwaykunawan tupaq cosaskunata. Ñaupaq tiempopin Éfeso llaqtamanta wakin runakuna layqa ruwaykunapi participaranku. Jehová Diosmanta yachaspan ichaqa layqananku “libronkuta juñuspa llapa runakunaq ñaupanpi kanaykapuranku” (Hech. 19:19). Chay runakunaqa tukuy atisqankutan ruwaranku supaykuna contra sayanankupaq. Layqananku librokuna askhataña valeran chaypas manan jujkunamanchu regalaranku nitaq venderankupaschu, aswanpas kanapurankun. Paykunapaqqa Jehová Dioswan allinpi kaymi aswan importante karan.

¹¹ ¿Imaynatan paykunaq ejemplonta qatikusunman? Sichus jap’ishanchis amuletokunata  otaq supaykunawan tupaq ima cosaskunatapas chayqa, allinpunin kanman chaykunata wijch’upuyqa (leey 1 Corintios 10:21).

12. ¿Imatan sapankanchis tapukunanchis?

¹² Allintan reparananchis imawan kusirikusqanchista. Sapankanchismi tapukunanchis: “¿Leenichu layqa ruwaykunamanta librokunata revistakunatapas? ¿Ima musicatan uyarini? ¿Ima clase peliculakunatan qhawani? ¿Ima clase videojuegos nisqawanmi kusirikuni? ¿Vampirokunamanta, brujokunamanta peliculakunatachu qhawani? Wakinqa manan peligrosopaqchu chay kusirikuykunata qhawarinku, ¿cuidakunichu paykuna jina ama piensanaypaq?”, nispa. Ichaqa wakin peliculakunapas cuentokunapas manan chhaqrusqachu kashan layqa ruwaykunawan. Chay jinaqa imawanchus kusirikuyta munaspaqa manan ajllananchischu Diospa cheqnisqan ruwaykunataqa. Kallpachakunanchismi Jehová Diospa ñaupanpi ch’uya concienciayoq kananchispaq (Hech. 24:16). *

13. ¿Imatan mana ruwananchischu?

¹³ Manan supaykunaq ruwasqanmanta rimashanachu. Jesuspa ejemplontan qatikunanchis (1 Ped. 2:21). Manaraq kay pachaman jamushaspan Jesusqa janaq pachapi tiyaranña, askhatataq yacharan Satanasmanta supaykunamantapas. Chaywanpas kay pachapi kashaspaqa manan sapa kutichu willaran Satanasmanta supaykunaq ruwasqanmantapas. Aswanpas Jehová Diosmantan willaran. Noqanchispas  manan supaykunaq ruwasqankumantachu willananchis, aswanpas cheqaq kaqmantan willananchis, chay sumaq willakuykunan sonqonchispi junt’a kanan (Sal. 45:1).

14, 15. a) ¿Imaraykun supaykunata mana manchakunanchischu? b) ¿Imaynapin reparanchis Jehová Dios llaqtanta cuidasqanta?

¹⁴ Manan supaykunata manchakunanchischu. Kay tiempopiqa llapallanchistan ima mana allinpas pasawasunman. Qonqayllan onqosunman, accidente pasawasunman otaq wañusunmanpas. Ichaqa manan ninanchischu: “Supaykunan chaykunata ruwawanchis” nispaqa. Biblian willan “qonqaylla” mayqenninchispas imapipas tarikusqanchista (Ecl. 9:11, 12). Jehová Diosmi ichaqa rikuchiran supaykunamanta aswan atiyniyoq kasqanta. Ejemplopaq, Satanastan mana permitiranchu Jobta wañuchinanpaq (Job 2:6). Moisespa tiemponpitaq Jehová Diosqa rikuchiran Egipto llaqtapi layqakunamanta aswan atiyniyoq kasqanta (Éx. 8:18; 9:11). Chaymantataq Jehová Diosqa Jesusman atiyta qoran Satanasta supaykunatapas janaq pachamanta kay allpaman wijch’umunanpaq. Pisillamantataq wijch’unqa chinkay-chinkay ukhuman, chaypiqa manañan pitapas dañota ruwanqachu (Apo. 12:9; 20:2, 3).

¹⁵ Sut’itan reparanchis Jehová Dios llaqtanta cuidasqanta. Yachasqanchis jina, mundontinpin cheqaq kaqmanta predicashanchispas yachachishanchispas (Mat. 28:19, 20). Chhaynapin sut’ita rikuchishanchis Satanaspa millay ruwasqankunata. Atiyninpi kashanman chayqa tatichinmanchá llank’asqanchista, ichaqa manan atinchu. Chaymi mana manchakunanchischu supaykunataqa. Jehová “Diosqa kay pachantintan qhawashan tukuy sonqo payta serviqkunarayku atiyninta rikuchinanpaq” (2 Crón. 16:9). Sichus Jehová Diospaq junt’aq kasun chayqa, supaykunaqa manan wiñaypaq dañota ruwayta atiwasunchu.

16, 17. ¿Imaraykun supaykuna contra allinta sayanapaq valorta necesitanchis? Juj experienciata willay.

¹⁶ Ima mana allinpas pasawananchista piensaspanku wakin familianchisqa tanqawanchis  costumbrenkunapi participananchispaq. Jehová Diosmi ichaqa kasukuq serviqninkunata bendecin. Erica hermananchismanta rimasun, payqa Ghana nacionpin tiyan. 21 watayoq kashaqtinmi Bibliamanta estudiayta qallariran. Paypa papanqa layqan karan, chaymi familianqa diosninkunaman ofrendata jaywaqku, chay qhepamantaq llapallanku jaywasqanku aychata mijuqku. Erican ichaqa mana chayta ruwayta munaranchu, jinan familianqa niranku: “Diosninchiskunatan phiñachishanki. Juchaykipin llapanchista onqoykunawan castigawasun”, nispa.

¹⁷ Chay costumbrepi participananpaqmi obligayta munaranku, paymi ichaqa mana kasukuranchu, jinan wasimanta ripunanpaq niranku. Juj hermanonchiskunan ichaqa wasinkupi alojaranku. Jehová Diosmi hermananchis Ericata bendeciran mosoq familiawan (Mar. 10:29, 30). Familiankunaqa cheqnikapurankun hermananchista cosasninkunatapas kanapurankun. Chaywanpas payqa Jehová Diospaqmi junt’aq karan, bautizakuspataq kunanqa precursora regular kashan. Manataqmi manchakunchu supaykunata. Erican nin: “Maytan munayman familiay Jehová Diosta reqsinanta, chhaynapin mana manchan-manchanchu kausankuman, chaytan sapa p’unchay Diosmanta mañakuni”, nispa.

18. ¿Ima bendicionkunatan chaskinchis Jehová Diospi confiasqanchisrayku?

¹⁸ Chay jina pruebapiqa manan llapanchischu tarikusunchis. Chaywanpas llapallanchismi supaykuna contra allinta sayananchis, Jehová Diospipas confiananchis. Chayta ruwaspaqa askha bendicionkunatan chaskisun. Manan engañachikusunchu Satanaspa yachachikuyninkunawan. Manataqmi supaykunata manchakusunchu. Astawanqa Jehová Diosninchiswanmi allin amigontin kasunchis. Santiagon qelqaran: “K’umuykukuywan Diosta kasukuychis, Saqraq contranpitaq qaqata sayaychis, jinan payqa qayllaykichismanta ayqerikapunqa. Diosman achhuykuychis, jinan paypas qankunaman achhuykamusunkichis”, nispa (Sant. 4:7, 8).