1, 2. ¿Imaraykun Jesús sinchi llakisqa kasharan?

¿IMARAYKUN Jesús juj p’unchayllaña wañupunanpaq faltashaqtin sinchi llakisqa kasharan? Enemigonkunan sinchita ñak’arichispa wañuchinanku karan. Ichaqa manan chayllamantachu llakisqa kasharan. Jesusqa anchatan Papanta munakuran, chaymi sonqonta kusichiyta munaran. Yacharanmi ñak’ariypi tarikuspapas junt’aq kaspa Jehová Diospa sutinta jatunchanan kasqanta. Chaymantapas yacharanmi wañupunankama junt’aq kaspalla runakuna wiñaypaq kausayta atisqankuta.

² Chaykunamantan Jesusqa sinchi llakisqa kasharan, chaywanpas thajmi sientekuran, chaymi niran: “Noqaq qosqay thaj kaytan saqeshaykichis”, nispa (Juan 14:27). Diospa qosqan thaj kaytaqa tarinchis Jehová Dioswan allinpi kaspallan. Chay thaj kaymi Jesusta yanaparan ama sinchita llakikunanpaq (Filip. 4:6, 7).

3. ¿Imamantan kay estudiopi yachasun?

³ Manan pipas Jesuspa tarikusqanpi jinaqa tarikuranchischu, chaywanpas imaymana problemakunapin tarikunchis (Mat. 16:24, 25; Juan 15:20). Chaymi mayninpi Jesús jina sinchi llakisqa sientekusunman. Llakisqa kaspaqa manañan thajchu sientekunchis. Chhaynaqa, ¿iman yanapawasun ama llakisqalla kanapaq? ¿Imakunatan Jesús ruwaran ama llakisqalla kananpaq? ¿Imaynatan noqanchispas kaqta ruwallasunmantaq sinchi llakipi tarikuqtinchis? Chaykunamantan kay estudiopi yachasun.

4. 1 Tesalonicenses 5:17 textopi nisqanman jinan Jesusqa askha kutita Diosmanta mañakuran, ¿imaynapin chayta yachanchis?

⁴ (Leey 1 Tesalonicenses 5:17). Juj p’unchayllaña wañupunanpaq faltashaqtinmi Jesusqa sapa kutilla Diosmanta mañakuran. Wañupusqanta yuyarinankupaq t’antata vinotapas jaywashaspapas Diosmantan mañakuran (1 Cor. 11:23-25). Manaraq chay wasimanta ripushaspapas Diosmantan discipulonkunawan kuska mañakuran (Juan 17:1-26). Getsemaní huertaman chayaqtinkupas askha kutipin Diosmanta mañakuran (Mat. 26:36-39, 42, 44). Wañupunanña kashaqtinpas Diosmantan mañakullarantaq (Luc. 23:46). Rikusqanchis jina, chay p’unchaypiqa askha kutitan Diosmanta mañakuran.

5. ¿Imaraykun apostolkuna mana kallpayoq tarikuranku?

⁵ Jesusqa sapa kutillanmi Diospa yanapayninta mañakuran, chaymi yanaparan aguantananpaq. Apostolkunan ichaqa mana chaytachu ruwaranku, chaymi mana kallpanku karanchu jatun pruebapi tarikuqtinku (Mat. 26:40, 41, 43, 45, 56). Chhaynaqa jatun pruebapi tarikushaspa allinta sayananchispaqqa Jesús jinan Diosmanta mañakushanallanchis. Ichaqa, ¿imatan mañakunanchis?

6. ¿Imaynatan iñiyninchis yanapawanchis thajlla kananchispaq?

⁶ Diosmantan mañakunanchis ‘paypi astawan iñinanchispaq’ (Luc. 17:5; Juan 14:1). Yachasqanchis jina, Satanasqa llapa Dios serviqkunatan pruebaman churanqa (Luc. 22:31). Chhaynaqa, ¿imaynatan iñiyninchis yanapawasun thajlla kananchispaq ima  problemapipas tarikuqtinchis? Tukuy atisqanchistaña ruwanchis ima problemata atipanapaq chaypas, iñisqanchisraykun confianchis Jehová Dios chay problemata tiempollanpi allichananta, chaymi mana nishuta llakikunanchischu (1 Ped. 5:6, 7).

7. ¿Imatan yachanchis hermanonchis Robertmanta?

⁷ Ima llakipiña tarikuspapas Diosmanta mañakuymi yanapawanchis thajpi kausananchispaq. Hermanonchis Robertmanta yachasun, payqa umalliqmi 80 watanpitaq kashan. Paymi nin: “Filipenses 4:6, 7 texton yanapawaran imaymana llakipi tarikuqtiy. Juj tiempon mana qolqey karanchu, juj tiempotaq manaña umalliqchu karani”, nispa. ¿Iman yanaparan sonqonpi thaj sientekunanpaq? Paymi nin: “Llakikuyta qallarishaspa jinan Diosmanta mañakuq kani. Astawan mañakuqtiytaq, astawan thaj sientekuq kani”, nispa.

8. Juan 8:29 textopi nisqanman jina, ¿imaraykun Jesús thaj sientekullarantaq?

⁸ (Leey Juan 8:29). Jesusta qatiykacharankuña chaypas thajmi sientekuran, ¿imarayku? Diosta kusichinanpaq jina imatapas ruwasqanrayku. Sasaña karan chaypas, kasukuranmi Diosta. Payqa munakuranmi Diosta chaymi Dios serviyta vidanpi ñaupaqman churaran. Manaraq kay pachaman jamushaqtinmi Diospa ‘llank’aqmasinña’ karan (Prov. 8:30). Kay allpapi kashaspataq tukuy sonqonwan Papanmanta runakunaman  yachachiran (Mat. 6:9; Juan 5:17). Chay llank’aymi anchata kusichiran (Juan 4:34-36).

9. ¿Imaynatan predicaypi ocupasqa kasqanchis yanapawanchis thaj sientekunanchispaq?

⁹ Jehová Diosta kasukuspa, llaqtanpi imaymanata ruwaspan Jesusta qatikushanchis (1 Cor. 15:58). Predicaypi ocupasqa kaspan mana nishutachu problemanchiskunamanta llakikunchis (Hech. 18:5). Ejemplopaq, predicashaspaqa sapa kutillanmi aswan sasa problemakunapi tarikuq runakunawan rimanchis. Bibliata estudiaspan ichaqa Jehová Diosta munakunku, yachasqankuman jinataq kausayta qallarinku, jinaspa aswan allinta kausanku kusisqataq kankupas. Chayta rikuspaqa astawanmi confianchis Jehová Dios yanapawananchispi, jinaspa thaj sientekunchis. Depresión onqoyniyoq hermananchismi nin: “Predicaypi ocupasqa kaspan thaj sientekuni kusisqataqmi kanipas. Reparanin predicashaspa Dioswan kashasqayta”, nispa.

10. ¿Imatan Brenda hermananchismanta yachasunman?

¹⁰ Brenda sutiyoq hermananchismanta yachasun. Paypas ususinpas millay onqoyniyoqmi tarikunku. Manan kallpan kanchu purinanpaq, chaymi silla de ruedas nisqapi kashan. Payqa cartata qelqaspan predican, maynintaq atisqanman jina wasin-wasinta predican. Paymi nin: “Entienderanin kay tiempopiqa onqoyniypaq mana jampi kasqanta. Jinan tukuy yuyayniyta churani predicayman. Predicaspaqa manan nishutachu onqoyniypi piensani. Aswanpas predicasqay runakunata yanapaypin astawanqa preocupakuni. Jinaspapas predicaspaqa sapa kutillanmi yuyarini jamuq tiempopi sumaq kausay kananta”, nispa.

11-13. a) ¿Imatan apostolkunapas jujkunapas ruwaranku Jesuspa amigonkuna kasqankuta rikuchinankupaq? b) ¿Imaynan Jesús sientekuran amigonkunaq yanapasqanwan?

¹¹ Predicasqan tiempopiqa apostolninkunan Jesuspa amigonkunaqa karanku. Paykunaqa Proverbios 18:24 textoq nisqan jina amigokunan karanku, chaypin nin: “Kallantaqmi wayqemantapas aswan munakuq amigo”, nispa. Jesusqa anchatan amigonkunata valoraran. Predicasqan tiempopiqa manan mayqen hermanonpas paypi iñiranchu (Juan 7:3-5). Aswanpas locoyapunanpaqmi piensaranku (Mar. 3:21). Chaymi Jesusqa junt’aq sonqo apostolninkunata wañupunanpaq juj p’unchayllaña faltashaqtin niran: “Qankunaqa noqallawanpunin kasharankichis pruebakunapiña tarikuqtiypas”, nispa (Luc. 22:28).

¹² Mayninpi apostolkuna piensayninkupi ruwayninkupipas pantarankuña chaypas, Jesusqa manan chaytachu qhawaran aswanpas paypi iñisqankutan (Mat. 26:40; Mar. 10:13, 14; Juan 6:66-69). Wañupunanpaq juj p’unchayllaña faltashaqtinmi Jesusqa junt’aq sonqo apostolninkunata niran: “Yayaymanta tukuy imaymana uyarisqayta qankunaman willaykichis, chaymi ‘amigoykuna’ niykichis”, nispa (Juan 15:15). Rikusqanchis jina amigonkunaqa allintan Jesusta kallpacharanku. Anchatachá Jesusqa kusikuran predicasqan tiempopi amigonkuna yanapasqanmanta (Luc. 10:17, 21).

¹³ Manan apostolkunallachu amigonkunaqa karan, karanmi juj amigonkunapas. Paykunaqa predicay llank’ayninpin yanaparanku. Wakinqa wasinkumanmi aparanku mijunata invitanankupaq (Luc. 10:38-42; Juan  12:1, 2). Jujkunataq paywan kuska viajaspa kaqninkuwan Jesusta atiendeqku (Luc. 8:3). ¿Imaraykun Jesús allin amigokunayoq karan? Payqa imaymana allinkunatan amigonkunapaq ruwaran, manataqmi mana atinankutaqa amigonkunamanta mañaqchu. Amigonkunataq Jesusta yanaparanku thaj sientekunanpaq.

14, 15. ¿Imatan ruwananchis allin amigokunayoq kanapaq? ¿Imaynatan yanapawanchis allin amigokuna?

¹⁴ Allin amigokunaqa yanapawanchismi Diospaq junt’aq sonqo kananchispaq. Allin amigokunayoq kanapaqqa noqanchismi allin amigo kananchis (Mat. 7:12). Chaymi Bibliaqa kallpachawanchis jujkunata yanapanapaq astawanqa necesidadpi tarikuqkunata (Efes. 4:28). Tapukunanchismi: “¿Pi hermanopas yanapayniyta necesitashanchu? Onqosqa hermanopaq, ¿ima necesitasqanta rantiq riymanchu? ¿Necesidadpi tarikuq familiata pusaymanchu wasiyman mijunata invitanaypaq? ¿Yanapaymanchu jw.org^®, JW Library^® nisqa programakunata utilizayta yachanankupaq?”, nispa. Jujkunata yanapaypi ocupasqa kasun chayqa, aswan thajmi sientekusunchis (Hech. 20:35).

¹⁵ Amigonchiskunaqa yanapawasunmi ima problemapipas tarikuqtinchis, yanapawasuntaqmi thaj sientekunanchispaq. Imaynan Elihupas pacienciawan uyariran Jobpa llakikuyninta, chhaynatan amigonchiskunapas pacienciawan uyariwanchis imayna sientekusqanchista willakuqtinchis (Job 32:4). Ichaqa manan ninanchischu rantinchispi imatapas decidinankupaq, aswanpas  tukuy yuyaywanmi uyarinanchis Bibliaq nisqanman jina consejokuna qowasqanchista (Prov. 15:22). Rey David jinataqmi k’umuykukuspa amigonchiskunaq yanapayninta chaskikunanchis (2 Sam. 17:27-29). Rikusqanchis jina chay jina amigokunaqa Jehová Diospa regalonmi kanku (Sant. 1:17).

16. Filipenses 4:6, 7 textopi nisqanman jina, ¿imaraykun Jesusllawan thaj kayta chaskisunman?

¹⁶ (Leey Filipenses 4:6, 7). ¿Imaraykun Jehová Dios niwanchis thaj kaytaqa ‘Cristo Jesusllawanmi’ chaskinkichis nispa? Jesuspa ruwasqanwanmi Diospa munayninqa junt’akunqa, chayta allinta entiendesun Jesuspitaq iñisun chayqa, sonqonchispin thaj sientekusun. Ejemplopaq, Jesuspa sacrificakusqanraykun juchanchismanta perdonasqa kanchis, chayqa consolawanchismi (1 Juan 2:12). Chaymantapas Diospa gobiernonpi Jesús kay allpata kamachiyta qallariqtinmi Satanasta, kamachisqan runakunaq mana allinkuna ruwasqanta chinkachipunqa, chayta yachaspan suyakuyniyoq kanchis (Is. 65:17; 1 Juan 3:8; Apo. 21:3, 4). Chaymantapas Jesusmi yanapawanchis kay sasa tiempopi Dios serviyninchiswan junt’ananchispaq, chayta yachaypas kallpachawanchismi (Mat. 28:19, 20). Rikusqanchis jina Jesusmi yanapawanchis consolasqa, kallpachasqa, suyakuyniyoq kananchispaq, chaykunataq yanapawanchis thaj sientekunanchispaq.

17. a) ¿Imatan ruwananchis thajlla sientekunanchispaq? b) Juan 16:33 textopi nisqanman jina, ¿ima ruwaytan atisun?

¹⁷ Chhaynaqa, jatun problemapiña tarikuspapas thaj sientekunanchispaqqa Jesuspa ruwasqantan ruwananchis. Ñaupaq kaq, Diosmantan mañakushanallanchis. Iskay kaq, sasachakuypiña tarikuspapas Jehová Diostan kasukunanchis, tukuy sonqowantaq predicananchis. Kinsa kaq, amigonchiskunaq yanapayninta chaskikunanchis. Chaykunawanmi Diospa thaj kayninqa sonqonchista yuyayninchistapas waqaychanqa, chhaynapin Jesús jina ima pruebatapas atipasunchis (leey Juan 16:33).