1. ¿Pikunan yanapakuranku Filipos llaqtapi iñiq t’aqa qallarinanpaq?

APÓSTOL Pablo, Silas, Lucas, Timoteo iman Filipos llaqtaman chayaranku, jinan repararanku askha runakuna allin willakuykuna uyariyta munasqankuta. Chaymi tukuy sonqowan predicaspa chay llaqtapi iñiq t’aqata qallarichiranku. Llapallankun juñukuranku, yaqachus jina Lidiaq wasinpi (Hech. 16:40).

2. ¿Ima sasachakuykunapin tarikuranku Filipos iñiqmasikuna?

² Chay llaqtapi tiyaq hermanokunan ichaqa sasachakuykunapi tarikuranku. Satanasmi runakunata tanqaran Pabloq compañeronkunaq predicasqanta jark’anankupaq. Jinan Pablota Silastawan jap’ispanku k’aspikunawan waqtaranku carcelpitaq wisq’aranku. Qhepa p’unchaytaq carcelmanta orqopuranku. Paykunataq mosoq iñiqmasikunata visitaspa kallpacharanku. Chay qhepamantaq Timoteowan juj llaqtaman ripuranku, Lucasmi ichaqa paykunawan qhepakuran. ¿Imatan ruwaranku mosoq cristianokuna? Jehová Diosmi espiritunwan yanaparan jinan tukuy sonqowan payta servishallaranku (Filip. 2:12). Chaymi Pabloqa paykunamanta uyarispa kusikuran.

3. Filipenses 1:9-11 textopi nisqanman jina, ¿imatan Pablo Diosmanta mañakuran?

³ Chunka wata qhepaman jinan Pabloqa paykunaman juj cartata qelqaran. Chay cartata leespan reparanchis paykunata anchata extrañasqanta, ‘Cristo Jesús jina tukuy sonqowan munakusqantapas’ (Filip. 1:8). Nillarantaqmi  paykunapaq Diosmanta mañakusqanta. Jehová Diostan valekuran: ‘Yanapay munakuyninku astawan wiñananpaq, aswan allin kaqkunata reparanankupaq, ama ima mana allinpas paykunapi kananpaq, ama pitapas urmachinankupaq, allin kaqkunata astawanraq ruwanankupaqpas’, nispa. Pabloq nisqanqa noqanchistapas yanapawasunmanmi (leey Filipenses 1:9-11). Kay estudiopin yachasun imaynatas Pabloq nisqanman jina ruwasunman chayta.

4. a) 1 Juan 4:9, 10 textopi nisqanman jina, ¿imaynatan Jehová Dios rikuchiran munakuwasqanchista? b) ¿Imaynatan Diosta munakunanchis?

⁴ Jehová Diosqa Churintan kachamuran noqanchisrayku wañunanpaq, chaypin rikuchiran anchatapuni munakuwasqanchista (leey 1 Juan 4:9, 10). Chaymi kallpachawanchis Diosta munakunanchispaq (Rom. 5:8). ¿Imaynatan Diosta munakunanchis? Jesusmi juj fariseo runawan rimaspa niran: “Jehová Diosniykitan munakunki tukuy sonqoykiwan, tukuy almaykiwan, tukuy yuyayniykipiwan”, nispa (Mat. 22:36, 37). Tukuy sonqonchiswanmi Diostaqa munakunanchis, astawantaq munakuyninchisqa yapakunan. Pablon Filipos llaqtamanta cristianokunata niran munakuyninku astawanraq wiñananpaq. ¿Imatan ruwananchis Jehová Diosta astawanraq munakunanchispaq?

5. ¿Imatan ruwananchis Jehová Diosta astawan munakunanchispaq?

⁵ Diosta munakunanchispaqqa paytan reqsinanchis. Biblian nin: “Pipas mana munakuqmi ichaqa mana reqsinchu Diostaqa, Diosqa munakuymi”, nispa (1 Juan 4:8). Apóstol Pablon willaran munakuyninchis wiñananpaqqa k’apajta Diosmanta yachananchis kasqanta, pay jina allin reparaq kananchistapas (Filip. 1:9). Biblia estudiayta qallarispaqa Jehová Diostan munakuyta qallariranchis manaña llapantachu paymanta yacharanchis chaypas. Ichaqa Jehová Dios imayna kasqanta astawan yachaspan astawanraq payta munakuranchis. Chaymi Bibliataqa sapa kutilla estudiananchis, yachasqanchispitaq allinta piensananchis (Filip. 2:16).

6. 1 Juan 4:11, 20, 21 textopi nisqanman jina, ¿imatan ruwananchis astawanraq munakuyninchis wiñananpaq?

⁶ Diosta munakusqanchismi kallpachawanchis hermanonchiskunata munakunanchispaq (leey 1 Juan 4:11, 20, 21). Ninchispaschá: “Noqapaqqa manan sasachu hermanoykunata munakuyqa, noqaqa Diostan munakuni, chaymi pay jina kayta munani”, nispa. Chaymantapas Jesuspa ruwasqantan qatikunchis, payqa anchata munakuwasqanchisraykun vidantaraq qoran. Chhaynaña kaqtinpas mayninpiqa sasan kanman hermanonchiskunata munakuy. Yachasun Filipos llaqtapi cristianokunawan imachus pasasqanta.

7. ¿Imatan yachasunman Evodia, Síntique hermanakunata apóstol Pablo consejasqanmanta?

⁷ Evodia, Síntique hermanakunaqa Pablowan kuskan llank’aranku allin willakuykuna willaypi. Ichaqa yaqapaschá phiñachinakusqankurayku manaña amigantinchu kapuranku. Carta qelqasqanpin Pabloqa paykunata sutinkumanta wajaspa kallpacharan Jehová Diosta “juj yuyaylla servinankupaq” (Filip. 4:2, 3). Iñiq t’aqatapas niranmi: “Ama rimapakuspa, ama discutispa ima tukuy imatapas ruwaychis”, nispa (Filip. 2:14). Chay consejokuna qosqanqa  yanaparanchá chay hermanakunata iñiq t’aqapi juj hermanokunatapas paykunapura astawan munanakunankupaq.

8. ¿Iman jark’awasunman hermanonchiskunata munakunanchispaq? ¿Iman yanapawasun paykunata munakunanchispaq?

⁸ Evodia, Síntique hermanakunata jinan pasawasunman hermanonchiskunaq pantasqanta qhawasunman chayqa. Llapallanchismi sapa p’unchay imallapipas pantanchis. Sichus hermanonchiskunaq pantasqanta masta qhawasun chayqa, munakuyninchismi pisiyanman. Kay ejemplopi piensasun. Juj hermanon mana yanapawanchischu juñunakunanchis wasi limpiaypi, sichus juj kutikunapi mana allin ruwasqanta yuyarillasuntaq chayqa astawanmi paypaq phiñakusun, jinaspa manaña payta munakusunmanchu. Sichus piwanpas chhaynapi tarikushanki chayqa, kaytan yuyarinayki: Jehová Diosqa rikumushanmi pantasqanchista hermanonchispa pantasqantapas. Chaywanpas payqa llapanchistan munakuwanchis. Chay jinaqa pay jinan noqanchispas jujkunata munakunanchis, allinkuna ruwasqankutataq masta qhawananchis. Hermanonchiskunata munakuspaqa astawanmi juj nisqalla kausasunchis (Filip. 2:1, 2).

9. ¿Imakunatan vidanchispi ñaupaqman churananchis?

⁹ Diospa espiritunpa yuyaychasqanmi Pabloqa Filipos llaqtapi cristianokunata, noqanchistapas niwanchis ‘aswan allin kaqkunata allinta reparananchispaq’ (Filip. 1:10). Chaykunaqa kaykunan: Diospa sutin ch’uyanchasqa kanan, munaynin junt’akunan, hermanonchiskunawan thajpi juj nisqalla kausaypiwan (Mat. 6:9, 10; Juan 13:35). Chaykunata vidanchispi ñaupaqman churaspan rikuchishanchis Jehová Dios munakusqanchista.

10. ¿Imatan ruwananchis Jehová Dios mana juchayoq runata jina qhawariwananchispaq?

¹⁰ Apóstol Pabloqa nillarantaqmi: ‘Ama ima mana allinpas qankunapi kachunchu’, nispa. Chaywanqa manan nisharanchu tukuypi ch’uya kananchista. Noqanchisqa manan Jehová Dios jinaqa ch’uya kaytaqa atisunmanchu. Ichaqa sichus kallpachakusun munakuyninchis astawan wiñananpaq, allin kaqkunatapas allinta reparasun chayqa, mana juchayoq runata jinan Diosqa qhawariwasun. Hermanonchiskunata mana urmachispan munakuq kasqanchista rikuchinchis.

11. ¿Imaraykun cuidakunanchis ama pitapas urmachinanchispaq?

¹¹ Cuidakunanchispunin ama pitapas urmachinanchispaq. ¿Imakunawanmi urmachisunman? Kusirikusqanchiswan, imayna p’achakusqanchiswan otaq imapi llank’asqanchiswanpas. Manapaschá juchapaqchu qhawarinchis ruwasqanchista, ichaqa sichus ruwasqanchiswan jujkunaq conciencianta waqllichisunman chayqa, juchallikushasunmanmi. Jesusmi niran: ‘Pichus ovejaykunata urmachinman chayqa, aswan allinmi paypaqqa kanman asnoq muyuchisqan molino rumita kunkanman warkuruspa lamar-qocha ukhuman wijch’uykusqa kaynin’, nispa (Mat. 18:6).

12. ¿Imatan yachanchis casarasqa precursorkunamanta?

¹² Rimasun imaynata juj matrimonio cuidakuranku jujkunata ama urmachinankupaq chaymanta. Paykunaqa precursormi karanku, iñiq t’aqankupin ichaqa chayllaraq bautizakusqa juj matrimonio, chay parejaqa mana allinpaqmi qhawariranku cineman  riyta. Chaymi mana allinchu sientekuranku ñaupaq pareja cineman risqanta yachaspanku. ¿Imatan ruwaranku chay precursorkuna? Manañan rirankuchu cineman hermanokunaq conciencian allin kanankama (Heb. 5:14). Chayta ruwaspan precursorkunaqa rikuchisharanku mana simillankuwanchu jujkuna munakusqankuta (Rom. 14:19-21; 1 Juan 3:18).

13. ¿Imaynatan pi hermanonchistapas juchaman urmachillasunmantaq?

¹³ Hermanonchiskunatan urmachillasunmantaq pruebaman churaspanchis. Chayta entiendenapaq kay ejemplopi piensasun. Juj hermanonchismi Bibliata estudiaspa unay tiempopi trago ujay vicionta saqepun. Payqa reparakunmi manaña tomananchu kasqanta. Pisi-pisimantataq vidanta cambiaspa bautizakapun. Juj p’unchaymi ichaqa juj hermanonchis wasinman invitan. Jinaspa tragota jaywaspa nin: “Qanqa bautizasqañan kashanki, Diospa espirituntaq qanwan kashan. Chaymi yanapawanchis cuerponchis kamachinanchispaq. Chhaynaqa tomallawaqmi pisillataqa”, nispa. Sichus chayta uyarispa tomanman, jinaspa jujmanta vicionman urmanman chayqa, manan allinchu kanman.

14. ¿Imaynatan juñunakuykuna yanapawanchis Filipenses 1:10 textopi nisqanta kasukunanchispaq?

¹⁴ Juñunakuykunapi yachasqanchismi yanapawanchis Filipenses 1:10 textopi nisqanta kasukunanchispaq. 1) Yuyarichiwanchismi imakunatas Jehová Dios aswan allinpaq  qhawarisqanta. 2) Yanapawanchismi Bibliaq nisqanman jina kausananchispaq, chhaynapi mana juchachasqa kananchispaq. 3) Kallpachawanchismi hermanonchiskunata munakunanchispaq allinkunata ruwananchispaqpas (Heb. 10:24, 25). Hermanonchiskuna kallpachawaqtinchisqa astawanmi Jehová Diosta paykunatapas munakunchis. Sichus Diostapas hermanonchiskunatapas tukuy sonqonchiswan munakusun chayqa, cuidakusunmi ama pitapas urmachinanchispaq.

15. ¿Imakunata ruwaspan “allin kaqkunata” ruwashanchis?

¹⁵ Pablon Diosta rogakuran Filipos llaqtamanta cristianokuna astawanraq “allin kaqkunata” ruwanankupaq (Filip. 1:11). Chaytaqa ruwaranku Jehová Diosta iñiqmasikunatawan munakuspankun. Jinallataq Jesuspi iñisqankuta sumaq suyakuyniyoq kasqankumanta jujkunaman willanankupaq. Chaymi Pablo niran: ‘Kay pachapi runakunapaqmi k’anchay jina k’anchanaykichis’, nispa (Filip. 2:15). Chay nisqanqa yuyarichiwanchismi Jesuspa nisqanta: “Qankunan kay pachapaq k’anchay kankichis”, nispa (Mat. 5:14-16). Chaymantapas kamachiranmi runakunata yachachinankupaq “kay pachaq k’uchunkunakamaraq” predicanankupaqpas (Hech. 1:8; Mat. 28:18-20). Chay jinaqa chay llank’aypi tukuy atisqanchista yanapakuspan “allin kaqkunata” ruwashanchis.

16. ¿Imaynatan Filipenses 1:12-14 textopi nisqan rikuchiwanchis sasachakuykunapiña tarikuspapas k’anchariy atisqanchista? (Tapanpi kaq dibujota qhaway.)

¹⁶ Imaynapiña tarikuspapas k’ancharisunmanmi. Mayninpiqa yaqapaschá imapas jark’awasunman predicananchista, chaywanpas atinchismi predicayta, chaytan apóstol  Pablo ruwaran. Filipos llaqtapi cristianokunaman cartata qelqashaspaqa yaqachus jina Roma llaqtapi wasinpi preso jina tarikusharan. Chhaynapiña tarikuspapas Pabloqa predicashallaranmi guardiakunaman visitaqnin runakunamanpas. Paypa ejemplonmi iñiqmasikunata kallpacharan ‘Diospa siminta mana manchakuspa willanankupaq’ (leey Filipenses 1:12-14; 4:22).

17. ¿Imaynatan wakin hermanonchiskuna predicanku sasaña kaqtinpas?

¹⁷ Askha hermanonchiskunan Pablo jina mana manchakuq kanku. Tiyasqanku llaqtapin jark’asqa kashanku runakunaq kasqanpipas wasin-wasintapas predicanankupaq, chaymi juj jinamanta predicanku (Mat. 10:16-20). Jujnin kaq llaqtapin iñiq t’aqakunata watukuq umalli predicaqkunata niran familiankunata, vecinonkunata, escuelapi llank’ananpi compañeronkunata, reqsisqanku runakunamanpas predicanankupaq. Jinan visitasqan iñiq t’aqakunapi iskay watallapi iñiqkuna astawan yapakuranku. Yaqapaschá tiyasqayki llaqtapi autoridadkuna jark’akunku predicanaykita, ichaqa sichus tukuy atisqaykita kallpachakunki jujkunaman predicanaykipaq chayqa, Jehová Diosmi yanapasunki ima sasachakuytapas atipanaykipaq (Filip. 2:13).

18. ¿Imakunata ruwananchispaqmi kallpachakunanchis?

¹⁸ Kay tiempopin astawanqa kallpachakunanchis apóstol Pablo Filipos llaqtapi cristianokunaman nisqanta kasukunanchispaq. Allintan reparananchis mayqenkunachus aswan allin kaqkuna kasqanta, mana juchachanatan kausananchis, manataq pitapas urmachinanchischu, allin kaqkunatataq ruwananchis. Chaykunata ruwaspan astawanraq Jehová Diosninchista munakusun jatunchasun ima.