1. ¿Imatan llapanchispas munanchis familianchiskunamanta?

HERMANANCHIS Paulinan * nin: “Bibliata estudiasqaymantapachan munarani llapa familiay paraisopi noqawan kananta, maytan munarani qosay Walterpas wawaypas Jehová Dios servinankuta”, nispa. ¿Kanchu Jehová Diosta mana serviq familiaykikuna? Chhayna kaqtinqa Paulina jinachá munashanki qanwan kuska Jehová Dios servinankuta.

2. ¿Ima tapuykunamantan kay estudiopi yachasun?

² Familianchistaqa manan obligasunmanchu Diosmanta yachanankupaq. Chaywanpas yanapasunmanmi Bibliaq yachachisqanta uyariyta munanankupaq (2 Tim. 3:14, 15). ¿Imaraykun familianchiskunaman predicananchis? ¿Imaraykun entiendenanchis imayna sientekusqankuta? ¿Imaynatan yanapasunman noqanchis jina Jehová Diosta munakunankupaq? ¿Imaynatan iñiq t’aqamanta iñiqmasikuna yanapawasunman?

3. 2 Pedro 3:9 textopi nisqanman jina, ¿imaraykun familianchiskunaman predicananchis?

³ Pisi tiempollamantan Jehová Diosqa Satanaspa kamachisqan pachata tukuchinqa. Wiñay kausayta chaskinankupaq kaqkunallataq salvakunqaku (Hech. 13:48). Tiemponchista kallpanchistan qonchis mana reqsisqanchis runakunaman  predicananchispaq. Chhaynaqa astawanraqmi familianchista yanapananchis Diosta reqsinankupaq. Munakuq papanchisqa ‘manan munanchu pipas wañunantaqa, aswanmi munan lliupas juchankumanta pesapakunankuta’ (leey 2 Pedro 3:9).

4. ¿Imata ruwaspan pantasunman familianchiskunaman predicaspa?

⁴ Reparakunanchismi imaynatachus predicasqanchista. Yaqapaschá mana reqsisqanchis runakunamanqa sumaqllata willasunman, familianchismanmi ichaqa sonqonta k’iriq jina willasunman.

5. ¿Imatan yuyarinanchis familianchiskunaman predicaspa?

⁵ Qallariypi familianchisman imayna predicasqanchista yuyarispaqa yaqapaschá sonqollanchispi ninchis: “Sumaqllata rimapayayman karan”, nispa. Apóstol Pablon cristianokunata niwanchis: “Rimayniykichisqa sumaqpuni kachun, kachiwan kachichasqa jina, chhaynapin yachankichis imaynatachus pitapas rimapayayta”, nispa (Col. 4:5, 6). Chay textopi nisqantan yuyarinanchis familianchiskunawan parlaspa. Mana chayqa yanapananchismantaqa astawanmi phiñachisunman.

6, 7. ¿Imaraykun Diosta mana serviq qosaykita otaq esposaykita imayna sientekusqanta entiendenayki? Juj ejemplota willay.

⁶ Imayna sientekusqankutan entiendenanchis. Paulinan nillantaq: “Qallariypiqa qosaymanqa Bibliallamantan rimapayarani, manan jujkunamantaqa rimaraykuchu”, nispa. Qosanmi ichaqa pisillata Bibliamanta yacharan, manataqmi entienderanchu willasqanta. Chaymi payqa niran: “Esposayqa  religionnillanpin masta piensan, chay religionqa peligroson, esposaytan engañashanku”, nispa.

⁷ Chaymantapas Paulinaqa hermanokunawanmi masta kasharan predicacionpi, juñunakuykunapi, fiestakuna ruwasqankupipas. Paymi nillantaq: “Mayninpin qosayqa wasiman chayamuspa mana pitapas tariqchu, jinan qonqasqa jina sientekuran”, nispa. Payqa munaranmi esposanwan wawanwan kayta, manataqmi reqsiranchu iñiq t’aqapi hermanokunata, jinan piensaran: “Esposaypaqqa hermanonkunan astawanqa valen”, nispa. Jinaspa amenazaran paymanta divorciakunanpaq. Esposanpa ruwasqanqa manan allinchu karan ¿riki?

8. 1 Pedro 3:1, 2 textopi nisqanman jina, ¿imatan masta familianchiskuna qhawanku?

⁸ Ejemplonchiswan yanapasun. Familianchiskunaqa astawanqa qhawarinku imachus ruwasqanchistan manan rimasqanchistachu (leey 1 Pedro 3:1, 2). Chaytan Paulinapas repararan, paymi nin: “Qosayqa munakuwaranmi ichaqa divorciakusaq niwaqtinmi repararani mana Jehová Diospa nisqanman jinachu qosayta tratashasqayta. Jinan nirani: ‘Payman predicanaymantaqa aswanpas aswan allinta portakusaq’”, nispa. Chaymi qosanta manaña obligaranchu Bibliamanta rimanankupaq, aswanmi imachus payman interesasqanmanta rimaranku. Walterqa repararanmi esposan aswan llamp’u sonqoman tukupusqanta, wawanpas allinta portakusqanta (Prov. 31:18, 27, 28). Bibliamanta yachasqankun familianta yanapasharan, chayta rikuspan paypas Bibliamanta yachayta munaran (1 Cor. 7:12-14, 16).

9. ¿Imaraykun familianchiskunata mana pisipaspa yanapashanallanchis?

 ⁹ Ama pisipaspa yanapashallasun. Jehová Diosqa askha kutipin runakunaman willachin allin willakuykunata chhaynapi wiñay kausayta chaskinankupaq (Jer. 44:4). Apóstol Pablopas Timoteotan niran ama pisipaspa jujkunata yanapashanallanpaq, chayta ruwaspan paypas uyariqninkunapas salvakunanku karan (1 Tim. 4:16). Familianchista munakunchis chayqa yanapananchismi Bibliamanta yachanankupaq. Paulinapas sumaq simikunawanmi rimaran aswan allintataq portakuran, chaymi kunanqa qosanwan kuska Jehová Diosta servishan, iskayninkun precursor kanku, qosantaq iñiq t’aqapi umalliq kashan.

10. ¿Imaraykun pacienciayoq kananchis?

¹⁰ Pacienciayoqmi kananchis. Bibliapi yachasqanchisman jina kausaqtinchisqa yaqapaschá familianchisqa mana kusikunqakuchu. Paykunaqa noqanchiswanmi phiñakunku fiestankupi politicapi ima mana participaqtinchis (Mat. 10:35, 36). Chhaynaña kaqtinpas manan ninanchischu: “Paykunaqa manan cambianqakuchu”, nispa. Sichus paykunata mana yanapasunchu chayqa, kaytapas nishasunman jinan kanman: “Paykunaqa manan wiñay kausayta chaskinankupaq jinachu kanku”, nispa. Jehová Diosqa manan noqanchistachu juzgananchispaqqa churawaranchis aswanpas Jesustan (Juan 5:22). Pacienciayoq kasun chayqa yaqapaschá jujnin familianchis Diosmanta uyarikuyta munanman (qhaway “Internetpi paginanchista utilizasun” recuadrota).

11-13. ¿Imaynatan Alicia tayta-mamanta trataran, imatan chaymanta yachanchis?

¹¹ Llamp’u sonqo kasun ichaqa iñiyninchista defiendesun (Prov. 15:2). Alicia hermananchismanta rimasun. Bibliata estudiashaqtinqa tayta-mamanqa karupin tiyaranku, manataqmi Dios kasqanpi creerankuchu, politicapitaq participasharanku. Chaymi hermananchisqa yachasqanmanta usqhayta willayta munaran, paymi nin: “Sichus familiaykiman mana usqhaychu willanki yachasqaykimanta imapi creesqaykimantapas chayqa, paykunaqa astawanmi phiñakunqaku”, nispa. Jinan cartakunata tayta-mamanman qelqayta qallariran imachus paykunaman interesanman chaykunamanta, jujninmi karan munakuymanta (1 Cor. 13:1-13). Chaymantapas anchatan agradecekuran payta uywasqankumanta, regalokunatataq apachiran. Visitaspaqa tukuy atisqanpin mamanta yanaparan. Chaywanpas qallariypiqa tayta-mamanqa manan kusisqachu kasharan Bibliata estudiasqanmanta.

¹² Tayta-mamanpa wasinpi kashaspaqa sapa p’unchaymi Bibliata leeran. Chayta rikuspan mamanqa repararan wawanpaq Biblia ancha valorniyoq kasqanta. Papanpas Bibliamantan yachayta munaran ususinpa imayna piensasqanta yachananpaq, rikuchiytataq munaran Bibliaq yachachisqan pantasqa kasqanta. Alician nin: “Juj Bibliatan qorani, sumaq simikunatataq qelqarani”, nispa. Aliciaq papanqa manan Bibliapi pantasqa yachachikuykunata tariranchu, aswanmi yachasqanqa sonqonman chayaran.

¹³ Ima pruebapiña tarikuspapas llamp’u sonqon kananchis iñiyninchistataq defiendenanchis (1 Cor. 4:12). Aliciaqa aguantananmi karan mamanpa jark’akusqanta. Paymi nin: “Bautizakuqtiymi mamayqa niwaran gustonera mana kasukuqmá kasqanki”, nispa. Sonqonña nanaran chaypas, ¿imatan  Alicia ruwaran? Paymi nin: “Mamaytan respetowan nirani, noqan decidikurani Jehová Diospa testigon kanaypaq, manan chaytaqa cambiasaqchu”, nispa. Niranitaq: “Anchatan munakuyki, jinan iskayniyku waqarayku chay qhepamantaq sumaq mijunata wayk’upurani. Chaymantapachan mamayqa niwaran: ‘Biblia estudiasqaykiqa yanapashasunkin allin runa kanaykipaq’”, nispa.

14. ¿Imaraykun mana permitinanchischu familianchiskuna decidisqanchista cambiachiwananchista?

¹⁴ Yaqapaschá familianchiskunaqa sasata entiendenqaku imarayku Jehová Diosta tukuy sonqowan servisqanchista. Aliciaq tayta-mamanmi munaran juj carrerata estudiananpaq, paymi ichaqa precursora kananpaq decidikuran, jinan mamanqa waqaran. Alician ichaqa mana cambiaranchu decidisqanta. Paymi nin: “Sichus familiayki ima decidisqaykita cambiachisunki chayqa, qhepamanpas cambiachillasunkitaqmi. Ichaqa sichus llamp’u simiwan decidisqaykita defiendenki chayqa, yaqapaschá mayqen familiaykipas astawan yachayta munanman”, nispa. Chaymi pasaran Aliciata, kunanqa tayta-mamanqa precursorkunan kapunku, taytantaq umalliq kashan.

15. Mateo 5:14-16; 1 Pedro 2:12 textopi nisqanman jina, ¿imaynatan hermanokuna allin ruwasqankuwan familianchista yanapankuman?

¹⁵ Jehová Diosqa munanmi jujkunapaq allinkuna ruwananchista, chhaynapin runakunaqa payman achhuykunqaku (leey Mateo 5:14-16; 1 Pedro 2:12). Sichus qosayki otaq esposayki mana Jehová Diosta servinchu chayqa, iñiq t’aqamanta hermanokunatan  reqsichiwaq. Paulinaqa hermanokunatan wasinman invitaran qosan paykunata reqsinanpaq. Walterqa yuyarinmi imaynatas juj hermano yanaparan Testigokunata allinta reqsinanpaq chayta. Chay hermanoqa juj p’unchaymi llank’ananmanta permisota mañakusqa Walterwan televisionpi partidota qhawanankupaq. Jinan Walterqa niran: “Paykunaqa noqa jinallamá kasqaku”, nispa.

16. ¿Imaraykun familianchiskunata juñunakuyman invitananchis?

¹⁶ Familianchista yanapanapaqqa invitasunmanmi noqanchiswan juñunakuyman rinankupaq (1 Cor. 14:24, 25). Walterqa Jesuspa wañupusqanta yuyarinapaq juñunakuymanmi ñaupaqtaqa riran, chayqa llank’asqan qhepamanmi aparikuran manataqmi unaychu karan. Paymi willakun: “Manaña llapantachu entienderani chaypas, imayna tratawasqankutan ichaqa yuyashani. Kusisqan napaykuwaranku, chaypin repararani sumaq sonqo kasqankuta”, nispa. Juj matrimonion Paulinata yanapaqpuni wawanwan juñunakuykunapi predicacionpipas, chaytan Walterqa rikullarantaq. Chaymi Biblia estudiayta munaspa hermanota niran estudiota qonanpaq.

17. ¿Imamantan mana juchachakunachu? ¿Imaraykun familianchiskunata yanapashanallanchis?

¹⁷ Maytan munanchis llapa familianchis Diosta servinankuta. Ichaqa tukuy atisqanchistaña ruwasun yanapananchispaq chaypas manapaschá munanqakuchu. Chaymantaqa manan juchachakunanchischu. Manan pitapas obligasunmanchu Diosta servinankupaqqa. Kusisqa sonqowan Jehová Diosta servishallasun chayqa, yaqapaschá wakin familianchisqa Dios serviyta munanman. Chay jinaqa paykunapaq Diosmanta mañapusun, respetowan predicashallasun, ama pisipaspataq yanapashallasun (Hech. 20:20). Diospa yanapayninpitaq confiasun. Sichus familianchiskuna uyarikunqaku chayqa paykunapas salvakunqakun.