1. ¿Imapaqmi Biblia yanapawanchis?

JEHOVÁ DIOSQA ancha allin yachachiqninchismi, yanapayninwanqa ima problematapas atipanchismi (Is. 30:20, 21). Bibliawanmi yanapawanchis ‘tukuy allin ruwaykunapaq allin-allin preparasqa kanapaq’ (2 Tim. 3:17). Bibliaq yachachisqanman jina kausaspaqa aswan yachayniyoqmi kanchis ‘kay pachaq yachayninwan’ pusachikuqkunamantaqa (1 Cor. 3:19; Sal. 119:97-100).

2. ¿Imamantan kay estudiopi yachasun?

² Kay pachaq yachayninman jina kausaq runakunaqa munapayasqankuwanmi aysachikunku. Chaymi facil-llata Diosta mana serviq runakuna jina piensasunman ruwasunmanpas. Biblian niwanchis: “Allinta cuidakuychis, paqtataq pipas runaq piensayninman jina yachaykunawan yanqa engañokunawan presota jina apasunkichisman, chaykunaqa runaq costumbrenkunaman jinallan kashan”, nispa (Col. 2:8). Kay estudiopin yachasun imaynata runakuna Satanaspa iskay yachachisqanta pisi-pisimanta aceptasqankuta. Sapanka yachachikuyta qhawarishaspan yachasun imarayku kay pachaq yachayninman jina kausay mana allin kasqanta, Bibliaq yachachisqanman jina kausay imarayku allinpuni kasqantapas.

3, 4. Estados Unidos nacionpi 1920 watakunapi jina, ¿imaynatan runakuna piensayta qallariranku?

³ Estados Unidos nacionpin 1920 watakunapi jina runakuna warmi-qhari puñuymanta piensasqankuta cambiayta qallariranku. Chay tiempokamaqa askhan niranku: “Casarasqakunallan warmi-qhari puñuypiqa kananku, manataqmi  chay temamantaqa askha runaq kasqanpi rimanachu”, nispa. Ichaqa, ¿iman pasaran chay qhepaman?

⁴ 1920 watakuna qhepamanmi askha runakuna jujnirayta piensayta qallariranku. Investigaq warmin nin: “Peliculakunapi, teatro nisqapi, takikunapi, novelakunapi, letrerokunapi iman askhanpi lloqsimuran warmi-qhari puñuymanta imagenkuna willakuykunapas”, nispa. Chay watakunapi tusuykunapas warmi-qhari puñuyta munapayanankupaq jinan lloqsimuyta qallariran. Cuerponkuta qhawachikunankupaq jinataq p’achakuyta qallariranku. Bibliaq willasqan jina tukukuy tiempopi kausaq runakunaqa aycha kusichiyllapin purinanku karan (2 Tim. 3:4).

5. ¿Imaynatan runakuna qhawariranku 1960 watamantapacha warmi-qhari puñuyta?

⁵ 1960 watakunapi jinan runakunaqa manaña juchapaqchu qhawariranku qharipura puñuyta, mana casarakuspalla tiyayta, imallamantapas divorciakuyta. Chaymantapas kusirikuykunapin mana p’enqarikuspa warmi-qhari puñuymanta imagenkunata churaranku. ¿Ima karan chaykuna kasqanmanta? Investigaq warmi nisqanman jinaqa warmi-qhari puñuyta comunta qhawachisqankuraykun askha familiakuna t’aqanakupushanku, wawakuna taytallankuwan otaq mamallankuwan tiyashanku, sonqo nanaypi tarikushanku, pornografiata ima jinallaña qhawashanku, imaymana onqoywantaq tarikushanku, jujninmi sida onqoy. Chaywanmi yachanchis kay pachaq yachayninqa mana allin kasqanta (2 Ped. 2:19).

6. ¿Imaraykun Satanás munan runakuna qhelli juchapi purinankuta?

⁶ Satanasqa munanmi warmi-qhari puñuyta pay jina qhawarinanchista. Warmi-qhari puñuypas casarakuypas Diospa regalonmi, runakunan ichaqa chaykunata mana respetankuchu, Satanastaq chaywan kusikun (Efes. 2:2). Qhelli juchapi puriqkunaqa manan valorankuchu wawayoq kanapaq Diospa regalo qowasqanchista, manataqmi wiñaypaq kausayta atinqakuchu (1 Cor. 6:9, 10).

7, 8. ¿Imaraykun warmi-qhari puñuymanta Bibliaq yachachisqan aswan allin kay pachaq yachachisqanmanta?

⁷ Kay pachaq yachayninman jina kausaq runakunaqa ninkun: “Bibliapi kaq yachachikuykunaqa manan kay tiempopaqqa valenchu”, nispa. Nillankutaqmi: “¿Imaraykutaq Diosri warmi-qhari puñuyta munananchispaq  kamawashaspanchis controlakunanchista munan?”, nispa. Chhaynataqa piensanku munasqallankuta ruwanankuraykun. Biblian ichaqa willawanchis mana allin munapayaykunata wijch’unanchispaq (Col. 3:5). Jinaspapas Jehová Diosqa casarasqakunallatan permiten warmi-qhari puñuypi kusirikunankuta (1 Cor. 7:8, 9). Chayta kasukuqkunaqa manan pesapakunkuchu parejankuwan puñusqankumanta.

⁸ Bibliaqa yachachiwanchismi warmi-qhari puñuyta allin yuyaywan qhawarinanchispaq. Willanmi casarasqakuna chaywan kusikusqankuta (Prov. 5:18, 19). Ichaqa nillantaqmi: ‘Sapankaykichismi yachanaykichis cuerpoykichis kamachiyta, chhaynapi ch’uya kanaykichispaq allin qhawarisqa kanaykichispaqwan. Ama Diosta mana reqsiq runakuna jinaqa kaychischu, paykunaqa mana controlakuspan sinchita warminayachikunku qharinayachikunkupas’, nispa (1 Tes. 4:4, 5).

9. a) 1920 watakunapi jina, ¿imaynatan Dios serviqkunata yanaparan Bibliaq yachachisqanman jina kausasqanku? b) ¿Imatan 1 Juan 2:15, 16 texto consejawanchis? c) Romanos 1:24-27 textopi nisqanman jina, ¿ima qhelli ruwaykunatan rechazananchis?

⁹ 1920 watakunapi jinan Jehová Diosta serviqkunaqa manan engañachikurankuchu mana p’enqarikuspa millay ruwaqkunawanqa (Efes. 4:19). Aswanmi kallpachakuranku Diospa kamachikuyninkunata kasukunankupaq. 1926 wata 15 mayo killamanta Qhawaq revistan inglés simipi niran: “Qharikunapas warmikunapas limpion kananku piensasqankupi ruwasqankupipas, astawanqa qhariwan warmiwan rimashaqtinku”, nispa. Diosta serviqkunaqa Bibliaq yachachisqanman jinan kausaranku millay runakuna ukhupiña tiyaranku chaypas (leey 1 Juan 2:15, 16). Anchatan Jehová Diosta agradecekunchis Bibliamanta, tiempollanpi yachachiwasqanchismantapas, chaymi yanapawanchis qhelli kausayta rechazananchispaq * (leey Romanos 1:24-27).

10, 11. ¿Tukukuy tiempopi ima pasanantan Biblia willaranña?

¹⁰ Bibliaqa willaranñan tukukuy p’unchaykunapi runakuna “paykuna kikinkuta munakuqkuna” kanankuta (2 Tim. 3:1, 2). Chaymi runakunaqa ancha allinpaq qhawarikunku. 1970 watakunamanta libropin niran: “Askha librokunan lloqsimushan aswan allinta kausanapaq”, nispa. Wakinmi “leeqkunata kallpacharan kikinkuta reqsikunankupaq, imayna kasqankuta aceptaspa kusikunankupaq”. Ejemplopaq, jujnin kaq libropin leeqkunata niran imayna kasqankuwan kusikunankupaq, chaypin niran: “Qan jina munay runa ancha valorniyoqqa manan kanchu”, nispa. Chay libropin nillarantaq: “Qanllamantan decidinayki imayna portakuyta, munasqaykiman jinataq decidinayki imas allin mana allin chayta”, nispa.

¹¹ ¿Uyarirankichu chay jina rimayta? Satanasmi Evata niran: ‘Qanqa atiwaqmi Dios jina kayta’, nispa (Gén. 3:5). Kay tiempopiqa askha runakunan ancha allinpaq qhawarikuspanku piensanku: “Manan pipas niwananchu imachus allin kasqanta mana allin kasqantapas”, nispa. Askha runakunan chhaynata piensanku casarakuymanta.

12. ¿Imaynatan Diosta mana serviq runakuna casarakuyta qhawarinku?

¹² Bibliaqa ninmi qosapas esposapas respetanakuspa kausanankuta, prometenakusqankuta  junt’anankutawan. Kallpachantaqmi ama t’aqanakunankupaq. Chaymi nin: “Chayrayku, runaqa taytantapas mamantapas saqepunqa, jinaspan warminman jujllachaykakapunqa, juj aychallataq kapunqaku”, nispa (Gén. 2:24). Kay pachaq yachayninman jina kausaqkunan ichaqa ninku: “Qosapas esposapas kikinkupin masta preocupakunanku”, nispa. Divorciomanta rimaq libron nin: “Casarakushaspankun ninku: ‘Wañuy t’aqawananchiskama kuska tiyasunchis’, nispa. Wakinmi ichaqa chay rimayta cambiaspa kunanqa ninku: ‘Munanakusqanchis tukupunankama kuska tiyasunchis’”, nispa. Chhaynata piensaspan askha casarasqakuna t’aqanakapunku, jinaspa sinchita k’irinakunku. Rikusqanchis jina kay pachaq yachachisqanman jina casarakuyta qhawariyqa manan allinchu.

13. ¿Imaraykun Jehová Dios cheqnikun orgulloso runakunata?

¹³ Bibliapin nin: “Señor Diosqa millakunmi llapan jatunchakuq sonqoyoqtaqa”, nispa (Prov. 16:5). ¿Imaraykun Jehová Dios orgulloso runakunata cheqnikun? Orgulloso runakunaqa Satanás jinan kanku, jujkunatataq tanqanku chhayna kanankupaq. ¿Imaynapin yachanchis Satanás sinchi orgulloso kasqanta? Diosmi Jesusta utilizaran tukuy imaymana kamaypi yanapananpaq, chaywanpas Satanasqa munaranmi Jesús qonqorikunanta adoranantapas (Mat. 4:8, 9; Col. 1:15, 16). Orgulloso runakuna imayna kasqankuta rikuspan sut’ita reparanchis kay pachaq yachayninqa mana allinpuni kasqanta.

14. ¿Imaynatan Romanos 12:3 texto yanapawanchis allin yuyaywan kikinchista qhawarikunanchispaq?

¹⁴ Bibliaqa willawanchismi kikinchista munakuyqa allin kasqanta. Ejemplopaq, Jesusmi niran: “Runamasiykitapas qan kikiykita jinan munakunki”, nispa (Mat. 19:19). Imaymanatan necesitanchis kausananchispaq, chaykunata tariyqa manan juchachu. Ichaqa niwanchismi jujkunamanta ama aswan allinpaq qhawarikunanchista. Chaypin  nin: “Ama imatapas ruwaychischu cheqnipakuspaqa, imapas kawaqchis jinaraq piensakuspapas; aswanpas k’umuykuywan jujkunata qankunamanta aswan allinpaq qhawariychis”, nispa (Filip. 2:3; leey Romanos 12:3).

15. Imaynata qhawarikunanchismanta Bibliaq yachachisqanqa allinpunin, ¿imaraykun chaymanta seguro kashanchis?

¹⁵ Kay pachapi askha educacionniyoq runakunan ninku: “Bibliaqa ninmi ama orgulloso kanapaq, chay nisqanqa asikunapaqmi. Sichus jujkunata noqanchismanta aswan allinpaq qhawarisun chayqa, noqanchismantan aprovechakunkuman”, nispa. Ichaqa, ¿imaynatan runakuna kausashanku Satanaspa piensasqanman jina? ¿Kusisqachu kausanku paykunallapi piensaq runakuna? ¿Familiankuwanpas kusisqachu kausanku? ¿Cheqaq amigokunayoqchu kanku? ¿Diospa sonqonpaq jinachu kausanku? Qhawarisqaykiman jina mayqenmi allin, ¿kay pachaq yachachisqanman jina kausaychu icha Bibliaq yachachisqanman jina kausaychu?

16, 17. ¿Imamantan anchata agradecekunchis, imarayku?

¹⁶ Kaypi piensasun, juj turistan viajashaspa mana yachanchu maynin rinanta, sichus mana yachaq runata tapukunman chayqa manan yanapanqachu riki. Chay turista jinan kanku kay pachapi yachayniyoq runakunaq consejonkunata kasukuqkunaqa. Jesusmi tiemponpi yachayniyoq runakunamanta niran: “Paykunaqa ñausa umallikunan kanku. Juj ñausachus juj ñausallatataq pusanman chayqa, iskayninkun t’oqoman urmaykunqaku”, nispa (Mat. 15:14). Diospaqqa kay pachaq yachayninqa mana allinpunin.

¹⁷ Bibliapi kaq consejokunaqa allinpunin “yachachinapaq, anyanapaq, imatapas allinyachinapaq, chanin kaywan wanachinapaqpas” (2 Tim. 3:16). ¡Anchatan Diosta agradecekunchis kay pachaq yachayninmanta llaqtanwan cuidawasqanchismanta! (Efes. 4:14.) Askhanpin qelqakunata videokunatapas qowanchis, chaymi kallpachawanchis kamachikuyninkunata kasukunapaq. Manan maypipas Bibliaq yachachisqanta jinaqa tarisunmanchu, chaymi anchata kusikunchis Bibliata Dios qowasqanchismanta.