Arí, nisunman chayqa ¿imaynan kasunman? Chaypaq yachasun juj hermanomanta, paypa wawanmi wañurachikusqa, chaymi payqa niran: “Diosqa yacharanchá riki chaykuna pasawanankuta, yacharanchá chayta aguantasaqkuchus manachus chaytapas, chaychá khaynapiqa tarikushayku”, nispa. Kay mundopiqa lliutan imaymanakuna pasawashanchis. Ichaqa, ¿kanchu ima razonpas Jehová Diosmanta chhaynata piensanapaq?

Manan kanchu. 1 Corintios 10:13 textopipas manan chaytachu nishan. ¿Imaraykun chayta ninchis? Chayta allinta entiendenapaq tawa formapi chayta explicasun.

Juj: Noqanchisqa libren kashanchis imata ruwananchispaqpas. Sapankan ajllakunanchis Diosta servisunchus icha manachus chaytapas (Deut. 30:19, 20; Jos. 24:15). Ichaqa paytachus kasukusun chayqa cuidasqan kasunchis (Prov. 16:9). Munasqanchisman jina puriyta ajllakusun chaytaq imachus tarpusqanchista cosechasunchis (Gál. 6:7). Chhaynaqa, Dioschus ima pruebapi tarikunanchistapas ajllanman chayqa, ¿librechu kashasunman imata ruwananchispaqpas?

Iskay: Mayninpiqa qonqaymi imapipas tarikunchis, manataqmi Diosqa chaykunamantaqa librawanchischu (Ecl. 9:11). Yaqapaschá mayninpiqa mana piensaylla imapipas tarikusunman. Jesuspas rimaranmi chhayna juj accidente pasasqanmanta, Jerusalenpis juj torre urmaykamusqa jinaspa 18 runakunata wañuchisqa. Chayqa manas Diospa munayninpichu pasasqa (Luc. 13:1-5). Chhaynaqa, manan allinchu kanman imapas pasaqtin: “Diospa munayninpichá wañupun o kausashan”, nispa niyqa, ni: “Jinapaqchá horan karan” nispa niypas.

Kinsa: Sapankanchismi rikuchinanchis may tukuytas Jehová Diosta munakunchis chayta. Satanaspa nisqan jina, noqanchisqa Diosta servinchis imapas chaskinanchisraykullas o interesraykullas, ima pruebapas kaqtinqa saqepusunmansi Diosta (Job 1:9-11; 2:4; Apo. 12:10). Chhaynaqa, Jehová Dioschus pruebakunamanta librawasunman chayqa, ¿manachu Satanasqa razonwan rimashanman?

Tawa: Jehová Diosqa manan lliutachu yachayta munan. Ichaqa, munaspaqa yachanmanmi imachus qhepaman pasawasun chayta (Is. 46:10). Bibliaq nisqan jina, wakin cosaskunatan ichaqa mana yachayta munanchu (Gén. 18:20, 21; 22:12). ¿Imarayku? Payqa munakuq Diosmi chaymi respetan ima ruwananchispaqpas libre kasqanchista (Deut. 32:4; 2 Cor. 3:17).

Chhaynaqa, ¿imatan nisharan Pablo “Diosqa [...] manan dejanqachu mana aguantanaykichiskama tentasqa kanaykichistaqa” nispa nisqanwan? Pabloqa rimasharan imaynatas Dios yanapawanchis pruebapi tarikuqtinchis chaymantan, manan imatas ruwan manaraq prueba kashaqtin chaymantachu. * Sichus tukuy sonqowan paypi confiasun chayqa paymi kallpata qowasun imatapas aguantanapaq (Sal. 55:22). Ichaqa ¿imaraykun Pablo niran: “Diosqa [...] manan dejanqachu mana aguantanaykichiskama tentasqa kanaykichistaqa” nispa? Chayta entiendenapaq kunan yachasun iskay razonkunamanta.

Juj: Noqanchisqa ima pruebapipas tarikuspaqa “lliu runaq tarikusqanpi jinallan” tarikushanchis. Arí, kay mundopiqa lliu runatan  imaymana mana allinkuna pasawashanchis, mayninpiqa desgraciakunapi imaraqmi tarikunchispas. Ichaqa Jehová Diospichus confiasun chayqa aguantallasunmi imatapas (1 Ped. 5:8, 9). Chaymi pasaran Israel llaqta runakunawanpas, manaraq 1 Corintios 10:13 textota qelqashaspan Pabloqa ñaupaqta rimaran ch’inneqpi kashaqtinku imakunapichus paykuna tarikuranku chaymanta (1 Cor. 10:6-11). Diospi confiaqkunaqa aguantarankun pruebakunata, mana confiaqkunan ichaqa mana aguantaspa mana allinkunata ruwaranku.

Iskay: Diosqa, junt’aq Diosmi. ¿Ima ninantaq chayri? Payqa allintan cuidan payta kasukuqkunataqa. Payqa “kamachikuyninta junt’aqkunawan rimanakusqantan” junt’aq, chaymantapas paykunatan yanapaq (Deut. 7:9). Chhaynapin rikuchiran siminta junt’aq kasqanta (Jos. 23:14). Chhaynaqa Diosqa manan dejanqachu payta munakuqkuna mana aguantanankukama ima pruebatapas pasanankutaqa, aswanmi paykunata yanapanqa.

Ichaqa, ¿imayna formapin yanapanqa? Munaspaqa chinkachipunmanmi ima pruebatapas, ichaqa Pabloq nisqan jina ‘yanapaytan qonqa, chhaynapi aguantanankupaq’. Arí, kallpatan qowasun tukuy imatapas aguantananchispaq. Ichaqa, ¿imaynatan chayta ruwanqa? Wakinmanta kunan yachasun.

• ‘Payqa tukuy imaymana pruebakunapin kallpachawasun’ (2 Cor. 1:3, 4). ¿Imaynata? Bibliawan, santo espiritunwan, “allin yuyayniyoq junt’aq kamachiq” apachimusqan qelqakunawan iman llakisqa sonqonchista tiyaykachinqa, thaj kaytataq qowasunpas (Mat. 24:45; Juan 14:16, willakuy; Rom. 15:4).

• Santo espiritunwanmi yuyayta qowasun (Juan 14:26). ¿Imaynata? Ima sasachakuypas kaqtinmi Bibliapi leesqanchis textokunata yuyarichiwasun chhaynapi allin yuyaywan imatapas ruwananchispaq.

• Angelkunawanpas yanapachiwasunmanmi (Heb. 1:14).

• Chaymantapas hermanokunawanmi yanapachiwasun paykunan kallpata qowasun (Col. 4:11).

Chhaynaqa, ¿Jehová Dioschu ima pruebatapas ajllan sapanka runapaq jina? ¿Chaytachu nishan 1 Corintios 10:13 textopi? Manan. Kaypi yachasqanchis jina, Jehová Diosqa manan jayk’aqpas chaytaqa ruwanmanchu. Aswanmi payqa paypi confiaqkunata yanapan. Chaymi noqanchisqa tukuy sonqo paypi confiananchis, paypa yanapayninwanqa ima pruebaña ima llakiña jamuwasun chaypas aguantallasunmi.