1, 2. a) ¿Imatan Jehová Dios willawanchis? b) ¿Ima promesatan tarinchis Isaías 46:10, 11; 55:11 textokunapi?

BIBLIAN khaynata qallarin: “Qallariypin Diosqa janaq pachata kay pachatawan kamaran”, nispa (Gén. 1:1). Arí, Jehová Diosqa tukuy imaymanatan kamaran, chaykunamantan runakuna wakillanta reqsinchis. Chaymantapas pisillatan yachanchis gravedad nisqamanta, k’anchaymanta jujkunamantapas (Ecl. 3:11). Jehová Diosmi ichaqa willawanchis imatan kay allpapaq runakunapaqpas munan chaykunata. Jehová Diosqa payman rijch’akuqta kamawaranchis, chaymi munaran kay pachapi kusisqa kausananchista (Gén. 1:26). Munarantaqmi llapa runakunapas wawankuna kananchista.

² Génesis 3 capitulopin willan iman jark’aran Diospa munaynin junt’akunanta (Gén. 3:1-7). Jehová Diospaqmi ichaqa mana sasachu chayta allichay, paytaqa manan pipas jark’ayta atinmanchu munayninta junt’ananpaq (Is. 46:10, 11; 55:11).  Chaymi mana iskayananchischu tiempollanpi Jehová Dios munaynin junt’ananmanta.

3. a) ¿Ima importante yachachikuykunan yanapawanchis Bibliata entiendenapaq? b) ¿Imaraykun chay yachachikuykunata estudiasun? c) ¿Ima tapuykunata estudiasun?

³ Chayllaraq Bibliata estudiashaspan yacharanchis imatan Jehová Dios munan kay allpapaq llapa runakunapaqpas chayta. Yachallaranchistaqmi imaynatan Señor Jesús yanapakushan Diospa munaynin junt’akunanpaq chaytapas. Chay yachachikuykunaqa ancha importanten. ¿Munasunmanchu jujkunaman chaykunamanta yachachiyta? Arí, chaymi invitamunanchis llapa runakunata Jesuspa wañupusqanta yuyarinanchispaq (Luc. 22:19, 20). Chay juñunakuyman jamuspaqa yachanqakun Diospa munayninmanta. ¿Imaynatan paykunata kallpachasunman chay juñunakuyman jamunankupaq? Yaqapaschá kay tapuykunata ruwasunman: “¿Imatan Dios munan kay allpapaq, runakunapaqpas? ¿Imaraykun Diospa munaynin mana junt’akuranchu? ¿Imaraykun Jesús sacrificakunanpuni karan?”, nispa. Chaykunamanta kay estudiopin yachasun.

4. ¿Imaynatan kamasqankuna Diosta jatunchan?

⁴ Jehová Diospa kamasqankunaqa ancha sumaqpunin (Gén. 1:31; Jer. 10:12). ¿Imatan yachanchis Diospa munay kamasqanmanta tukuy imapas ordenpi kasqanmantapas? Diospa tukuy ruwasqan allinninchispaq kasqantan. Anchatan admirakunchis runapi kaq celulakuna imayna funcionasqanta yachaspa, chayllaraq naceq wawata rikuspa otaq inti chinkaykuyta rikuspa. Diosqa tukuy kamasqanta qhawarispa kusikunanchispaqmi kamawaranchis (leey Salmo 19:1; 104:24).

5. ¿Imatan Jehová Dios ruwaran tukuy kamasqankuna sitionpikama kananpaq?

⁵ Jehová Diospa tukuy kamasqanpin rikunchis leykuna kasqanta. Arí, Diosqa ancha munakuq kayninpin runapaq llapa kamasqanpaqpas leykunata churan (Sal. 19:7-9). (Qhaway “Astawan yachanapaq” nisqa recuadrota.) Jehová Diosqa tukuy ruwasqantan sitionpikama churaran. Ejemplopaq, “ley de la gravedad” nisqaqa yanapan allpanchismanta atmosfera nisqa ama nishu karupi kananpaq, yanapallantaqmi lamar qocha sitiollanpi kananpaq. Sichus “ley de la gravedad” nisqa mana kanmanchu chayqa, manan allpanchispi ima kausaypas kanmanchu. Arí, Diospa churasqan leykunawanmi tukuypas allinta funcionan. Chhayna ruwasqanmi rikuchin runakunapas kay allpanchispas imapaq kamasqa kasqanta. Chaymi runakunaman predicaspa yachachinanchis Jehová Dios imayna kasqanta (Apo. 4:11).

6, 7. ¿Ima regalokunatan Jehová Dios Adanman Evamanwan qoran?

⁶ Jehová Diosqa munaranmi lliu runakunapas kay pachapi wiñaypaq kausanankuta (Gén. 1:28; Sal. 37:29). Chaymi Adanman Evamanpas sumaq regalokunata qoran (leey Santiago 1:17). Arí, paykunallamantan ajllakuyta atiranku, allin piensaq karanku, munakuq, amigokunayoq ima (qhaway “Astawan yachanapaq” nisqa recuadrota). Chaymi Jehová Dios Adanta yachachiran kasukuq kayta. Jinaspapas yachachiranmi pay kikinta cuidakunanpaq,  kay allpata llank’ananpaq, animalkunata cuidananpaq ima (Gén. 2:15-17, 19, 20). Chaymantapas ñawiyoqta, senqayoqta, ninriyoqta makiyoqta iman paykunata kamaran, chhaynapi Diospa tukuy kamasqanta rikunankupaq, muskhinankupaq, uyarinankupaq, mallinankupaq ima. Chaymantapas sumaq llank’aytan paykunaman qoran. Diosta kasukuspaqa maytaraqchá yachankuman karan, tukuy ruwasqankumantataq kusikunkuman karan.

⁷ ¿Imatawanmi Jehová Dios munaran? Munaranmi Adanwan Evawan ch’uya wawakunayoq kaspa kay pachaman junt’anankuta. Chaymantapas Diosqa munaranmi tayta-mamakuna wawankuta munakunankuta imayna paypas kamasqan runakunata munakuran jinata. Jinaspapas Jehová Diosqa kay allpata tukuy chaypi kaqkunatawanmi juj regalota jina runakunaman qoran chaypi wiñaypaq tiyanankupaq (Sal. 115:16).

8. ¿Imaraykun Jehová Dios Adanman Evamanwan juj kamachikuyta qoran?

⁸ Jehová Diosqa munasqankuta ajllakunankupaq jinan Adanta Evatawan kamaran, ichaqa maykamalla libre kankuman chayta yachanankupaqmi kayta kamachiran: “Atinkin huertapi llapa sach’a ruru mijuyta, allinkaqta mana allinkaqta reqsichiq sach’a rurutan ichaqa ama mijunkichu, chayta mijunki chayqa, wañunkipunin”, nispa (Gén. 2:16, 17). Chay kamachikuyta kasukuyqa manan sasachu karan, ¿imarayku? Edén huertapi imaymana clase mijuykuna kasqanrayku.

9, 10. a) ¿Ima nispan Satanás Jehová Diosta tumparan? b) ¿Pitan Adanwan Evawan kasukuranku? (3 paginapi dibujota qhaway.)

⁹ Satanasqa juj mach’aqwayta utilizaspan Evata engañaran Jehová Diosta mana kasukunanpaq (leey Génesis 3:1-5; Apo. 12:9). Jinaspapas kaytan creechiytan munaran: “Diosqa cheqnikunmi wawankunata, chaymi mana munanchu ‘huertapi llapa sach’aq rurunta’ mijunankuta”, nispa. Chaywanmi nisharan: “¿Imaynapitaq munasqaykichistari mana ruwayta atiwaqchischu?”, nispa. Chay qhepamanmi llullakuspa niran: “Manapunin wañunkichischu”, nispa. Nillarantaqmi: “Diosqa yachanmi chayta mijuqtiykichis jina ñawiykichis kicharikunanta”, nispa. Chaykunawanmi Satanasqa Diosta tumpasharan, nisharanmi: “Diosqa manan munanchu allin yachayniyoq kanaykichista, chaymi mana munanchu chay ruruta mijunaykichista”, nispa. Nillarantaqmi: ‘Dios jinan allinkaqta mana allinkaqta reqsiq kankichis’, nispa.

¹⁰ ¿Imatan Adanwan Evawan ruwaranku? Saqrata kasukuspan Diospa contranpi jatariranku. Chayta ruwasqankupin rikuchiranku Jehová Diosta manaña taytankuta jinachu qhawarisqankuta. Chaymantapachan Adanpas Evapas sapanku rikukapuranku, manañan Diosqa paykunata cuidaranchu (Gén. 3:6-13).

11. ¿Imaraykun Jehová Dios mana jinallatachu qhawaran Adanpa Evapa juchallikusqanta?

¹¹ Adanwan Evawanqa mana kasukusqankumantan juchasapa runakunaman tukupuranku, jinan Diospa enemigon kapuranku. Biblian nin: ‘[Diosqa] sinchi ch’uyan, chaymi millaykaqtaqa mana jinallatachu  qhawan’, nispa (Hab. 1:13). Sichus Jehová Dios jinallata qhawanman karan juchallikusqanta chayqa, manan janaq pachapipas kay pachapipas kausay allinchu kanman karan. Angelkunapas runakunapas manañan Diospa rimasqanpi confiankumanchu karan. Jehová Diosmi ichaqa tukuy rimasqanta junt’an (Sal. 119:142). Chaymi Adanwan Evawan libreña karanku imata decidinankupaq chaypas, Diospa contranpi jatarisqankumanta juchachasqa karanku, jinan wañupuspa allpaman tukupuranku (Gén. 3:19).

12. ¿Iman pasaran Adanpa wawankunawan?

¹² Mana kasukusqankumantapachan Adanpas Evapas manaña Diospa familianmantachu kapuranku. Chaymi Diosqa Edén huertamanta paykunata qarqopuran (Gén. 3:23, 24). Diospa contranpi jatarisqankumantan imaymanapi tarikuranku (leey Deuteronomio 32:4, 5). Paykunaqa manañan Jehová Diosman rijch’akuyta atirankuchu. Wawankunatapas wañuyman juchamanmi vendepuranku (Rom. 5:12). Chhaynapin Adanpas wawankunapas manaña wiñaypaq kausayta atirankuñachu. Kunanpas Satanasqa runakunatan tanqashan Diospa contranpi kanankupaq (Juan 8:44).

13. ¿Imatan Jehová Dios runakunapaq munashallan?

¹³ Adanwan Evawan juchallikurankuña chaypas, Jehová Diosqa munakushallanmi llapa runakunata. Jinaspapas munanmi paypa amigon kanankuta, manataqmi munanchu pipas wañupunanta (2 Ped. 3:9). Chaymi wawanta kay pachaman kachamuran runakuna yapamanta paypa amigon kanankupaq. Ichaqa ¿imaynatan chayta ruwaran kamachikuyninta mana p’akispa? Chaymanta yachasun.

14. a) Juan 3:16 nisqan jina, ¿imatan Jehová Dios ruwaran juchamanta wañuymantawan salvawananchispaq? b) ¿Ima tapuytan kutichinanchis kanqa?

¹⁴ Yaqapaschá Jesuspa wañupusqanta yuyarinapaq juñunakuyman invitamusqanchis wakin runakuna reqsinku Juan 3:16 (leey) textoq nisqanta. Ichaqa, ¿yachankuchu imaraykun Jesuspa sacrificakusqan yanapawasunman wiñay kausayta aypanapaq? Chay tapuytan kutichisunman invitacionta rakispa, juñunakuyman jamuqtinku, chay qhepata wasinkuta visitaspa ima. Sichus paykuna entiendenqaku imarayku Jesús wañupunan karan chayta chayqa, reparanqakun mayta Jehová Dios munakuwasqanchista, yachayniyoq kasqanta ima. ¿Imatan yachachisunman Jesuspa wañupusqanmanta?

15. ¿Imaynapin Jesús jujniray karan Adanmanta?

¹⁵ Jehová Diosmi juj ch’uya runata kachamuran  salvawananchispaq. Chay runaqa Jehová Diostan tukuy sonqonwan munakunan karan, chaymantapas runakunaraykun vidanta qonan karan (Rom. 5:17-19). ¿Pin karan chay runa? Jesusmi karan. Paytan Jehová Dios ajllaran kay pachaman jamunanpaq (Juan 1:14). Jesusqa ch’uya runan karan Adán jina. Ichaqa, ¿imaynapin Adanmanta jujniray karan? Kasukuq kasqanpin. Payqa sinchi sasachakuykunapiña tarikuran chaypas, Diospa tukuy kamachikusqantan junt’aran.

16. ¿Imaraykun Jesuspa sacrificakusqan ancha sumaq regalo?

¹⁶ Jesusqa ch’uya kausaynintan qoran juchamanta wañuymanta salvawananchispaq. Jesusqa tukuypin Diosta kasukuran, tukuy sonqowantaqmi payta munakuran (1 Tim. 2:6). Chaymi sacrificakusqanwan llapa qharikunapas warmikunapas wawakunapas wiñay kausayta aypankuman (Mat. 20:28). Arí, Jesusqa sacrificakunanpunin karan Diospa munaynin junt’akunanpaq (2 Cor. 1:19, 20).

17. ¿Iman kanqa Jesuspa sacrificakusqanwan?

¹⁷ Jehová Diosqa churinpa ancha valorniyoq yawarninwanmi pagaran juchamanta wañuymantawan librawananchispaq (1 Ped. 1:19). Arí, Jehová Diosqa ancha valorniyoqpaqmi qhawariwanchis, chaymi wawanta kachamuran noqanchisrayku wañunanpaq (1 Juan 4:9, 10). Chhaynapin Jesusqa Adanpa rantinpi taytanchis jina kapuran (1 Cor. 15:45). Jesuspa sacrificakusqanwanmi yapamanta Diospa wawankuna kapusunman. Arí, Diosmi  kamachikuykuna churasqanman jina, Jesuspa sacrificio ruwasqanta chaskispa wawankunata jina qhawariwasunman. ¡May kusikunapaqchá kanqa llapa runakuna ch’uyaman tukupuqtinku! Chay tiempopiqa janaq pachapi kay pachapi Diosta llapa serviqkunan juj familia jinalla kapusun, wiñaypaqtaqmi kausasunpas (Rom. 8:21).

18. ¿Jayk’aqmi ‘Dioslla lliupa kamachiqnin kapunqa’?

¹⁸ Adán Eva Diosta qhepancharankuña chaypas Diosqa munakushallaranmi runakunata, chaymi wawanta kachamuran. Juchasapaña kanchis chaypas Satanasqa manan obligawasunmanchu Jehová Diospa contranpi jatarinanchispaq. Diosmi Jesuspa wañupusqanwan yanapawasun chanin runa kananchispaq. Ima munaychá kanqa llapa runakuna Jesuspi iñispanku wiñay kausayta aypaqtinku (Juan 6:40). Jehová Diosqa ancha munakuq yachayniyoq kayninpin junt’anqapuni munasqanta, yanapawasuntaqmi ch’uya runakuna kapunanchispaq. Chhaynapin ‘Dioslla lliupa kamachiqnin kapunqa’ (1 Cor. 15:28).

19. a) ¿Imatan ruwasun Jesuspa sacrificakusqanmanta agradecido kasqanchista rikuchinapaq? (Qhaway “ Maskhashallasun Dios sonqo runakunata” nisqa recuadrota.) b) ¿Imamantan qatimuq estudiopi yachasun?

¹⁹ Jesuspa sacrificakusqanmanta agradecido kasqanchista rikuchinapaqqa, llapa runakunamanmi willamunanchis chay sumaq regalomanta. Chhaynapin yachanqaku Jesuspa wañupusqanwan paykunaman Jehová Dios wiñay kausayta munachisqanta. ¿Chayllachu kanqa? Manan, aswanpas Satanaspa Edén huertapi Jehová Diosta tumpasqanmanta sut’iman orqonqa. Chaymantan qatimuq estudiopi yachasun.