1. ¿Ima bendicionkunatan chaskisunman Jesuspa sacrificakusqanwan?

JESUSPA sacrificakusqanwanmi askha bendicionkunata chaskisunman. ¿Ima bendicionkunatan chaskisunman? Chanin kaqta ruwaqkunan Diospa familianmanta kapunkuman (qhaway “Astawan yachanapaq” nisqa recuadrota). Chaymantapas wiñay kausaytan chaskisunman, kusisqataqmi kausasunman. Ichaqa, ¿imaraykun Jesús astawanqa kausayninta sacrificiopi jaywaran? (Heb. 1:8, 9.)

2. a) ¿Imakunamantan yayayku mañakuypi Jesús rimaran? (Kay paginapi dibujota qhaway.) b) ¿Imamantan kay estudiopi yachasun?

² Jesusqa manaraq wañupushaspan discipulonkunata yachachiran khaynata mañakunankupaq: “Yayayku janaq pachapi kaq, sutiyki ch’uyapaq jap’isqa kachun. Gobiernoyki jamuchun. Munayniyki kay pachapi ruwakuchun imaynan janaq pachapipas ruwakun jinata”, nispa (Mat. 6:9, 10). Kay estudiopin yachasun imaynatan Jesuspa sacrificakusqan: 1) Jehová Diospa sutinta ch’uyanchanqa, 2) Diospa gobiernonta apamunqa, 3) Diospa munayninpas junt’akunqa.

3. a) ¿Imata rikuchiwanchis Diospa sutin? b) ¿Imaynatan Satanás Diospa sutinta saruncharan?

³ Yayayku mañakuypin Jesús Diospa sutin ch’uyanchasqa kananpaq mañakuran. Chaywanmi nisharan Diospa sutin respetana kasqanta. ¿Imarayku? Diospa sutinmi rikuchiwanchis paylla tukuy atiyniyoq ch’uya Dios kasqanta. Chaymi Jesús niran: “Yayáy, qanqa ch’uyan kanki”, nispa (Juan 17:11). Diosqa ch’uyan, chaymi tukuy ima ruwasqanpas kamachikuyninkunapas ch’uyallataq. Satanasmi ichaqa Diospa kamachikuyninkunamanta Edén huertapi mana allinta rimaran. Chayta ruwaspan Satanasqa Diospa ch’uya sutinta saruncharan (Gén. 3:1-5).

4. ¿Imaynatan Jesús Diospa sutinta ch’uyancharan?

⁴ Jesusmi ichaqa Diospa sutinta anchata respetaran, chaymi tukuy ruwasqanpi Diospa sutinta ch’uyancharan (Juan 17:25, 26). ¿Imaynatan ch’uyancharan? Ruwasqanwan yachachisqanwan iman. Arí, ejemplonwanmi jujkunaman yachachiran Diospa kamachikuyninkuna chanin kasqanta, allinninchispaq kasqantawan (leey Salmo 40:8-10). Wañuchirankuña chaypas Jesusqa tukuy sonqowanmi Diosta kasukuran. Chaywanmi rikuchiran ch’uya runaqa tukuypi Diosta kasukuy atisqanta.

5. ¿Imaynatan Diospa sutinta respetanchis?

⁵ Noqanchisri, ¿imaynatan rikuchisunman Jehová Diospa sutinta respetasqanchista? Imayna kausasqanchiswanmi. Jehová Diosqa munanmi ch’uya kananchista (leey 1 Pedro 1:15, 16). Chaymi payllata jatunchananchis tukuy sonqowantaq kasukunanchis. Qatikachasqaña kasunman chaypas, Diospa kamachikusqanman jinan kausananchis. Payta kasukuspan sutinta jatunchasun (Mat. 5:14-16). Diospa kamachikuyninkunaman jina kausaspan rikuchinchis Satanás llulla kasqanta. Juchasapa runakuna kasqanchisraykun mayninpi pantanchis, chaywanpas sonqomanta pesapakuspan kallpachakunchis millay ruwaykunata saqenanchispaq. Chhaynapin Diospa sutinta ch’uyanchanchis (Sal. 79:9).

6. ¿Imaraykun Jehová Dios chaninpaq qhawariwanchis?

⁶ Jesuspa sacrificakusqanpi iñisun chayqa, Jehová Diosmi juchanchista pampachawasun. Diosqa paypaq jina kausaqkunatan sumaqta chaskin. Chaymi janaq pachapaq ajllasqa cristianokunata wawankunata jina chaskin, ‘waj ovejakunatataq’ amigonkunata jina chaskin (Juan 10:16; Rom. 5:1, 2; Sant. 2:21-25). Jesuspa sacrificakusqanraykun kunanpas chaninpaq qhawarisqa kashanchis, Diospa sutintapas jatunchashanchis.

7. ¿Ima bendicionkunatan apamunqa Diospa gobiernon?

⁷ Yayayku mañakuypin Jesús niran: “Gobiernoyki jamuchun”, nispa. ¿Imaynapin Jesuspa sacrificakusqan tupan Diospa gobiernonwan? Diospa gobiernonpiqa Jesuswan 144.000 ajllasqa cristianokunawan iman kamachimunqaku. Jesuspa sacrificakusqanraykun chay runakuna janaq pachaman rinankupaq kausarichisqa kanqaku (Apo. 5:9, 10; 14:1). Paykunan reykuna sacerdotekuna ima kanqaku, waranqa watataqmi Jesuswan kuska kamachimunqaku. Chay tiempopin kay pachantinta sumaq paraisoman tukuchinqaku, llapa runakunapas ch’uyan kapunqaku; chhaynapin janaq pachapi kay pachapipas Diosta llapa serviqkuna  juj familia jinalla kapusun (Apo. 5:13; 20:6). Chay qhepamanmi Jesusqa Saqrata wañuchinqa, kay pachapi imaymana sasachakuykuna paqarichisqantapas chinkachipunqa (Gén. 3:15).

8. a) ¿Imaynatan Jesús discipulonkunata yachachiran Diospa gobiernon importante kasqanta? b) ¿Imaynatan Diospa gobiernonta yanapasunman?

⁸ Jesusmi discipulonkunata yachachiran Diospa gobiernon ancha importante kasqanta. ¿Imaynatan chayta ruwaran? Ejemplonwanmi yachachiran, bautizakusqan qhepallatan tukuy tiemponwan predicaran ‘Diospa gobiernonmanta allin willakuykunata’ (Luc. 4:43). Chay qhepamanmi discipulonkunata kamachiran “kay pachaq k’uchunkunakamaraq” Diospa gobiernonmanta predicanankupaq (Hech. 1:6-8). Predicasqanchiswanmi runakuna yachankuman Jesuspa sacrificakusqanmanta, bendicionkunatapas chaskinkuman. Chay llank’aypi tukuy sonqowan yanapakusun chayqa, Jesuspa wayqenkunatan yanapakushasun (Mat. 24:14; 25:40).

9. ¿Imaynapin yachanchis Diospa munaynin junt’akunanta?

⁹ Yayayku mañakuypin Jesús nillarantaq: “Munayniyki kay pachapi ruwakuchun”, nispa. Chaypin Jesús rikuchisharan Jehová Diospa ima rimasqanpas junt’akunanta (Is. 55:11). Satanasña Diospa contranpi jatariran chaypas, Diospa munasqanqa manan cambiaranchu. Payqa munashallaranmi Adán Evaq wawankuna kay pachaman junt’anankuta (Gén. 1:28). Sichus Adanwan Evawan mana wawayoq kashaspa wañupunkuman karan chayri, ¿junt’akunmanchu karan Diospa munaynin? Manan. Chaymi Diosqa dejallaran wawakunayoq kanankuta, chhaynapi munaynin junt’akunanpaq. Jesuspa sacrificakusqanpi iñiqkunaqa jamuq tiempopin ch’uya runakuna kapunkuman, paraisopipas wiñaypaq kausankuman. Diosqa anchatan munakuwanchis, chaymi qallariypi runakunapaq munasqanta junt’ayta munan.

10. ¿Imaynatan Jesuspa sacrificakusqan wañupuqkunata yanapanqa?

¹⁰ Millonninpi runakunan Jehová Diosta mana reqsispa wañupuranku. ¿Iman pasanqa paykunawan? Diosqa llapa runakunaq kausanantan munan, chaymi Jesuspa sacrificakusqanta chaskispa paykunata kausarichimpunqa. Paykunaqa kausarimuspan Jehová Diosta reqsinqaku, kasukuqkunataq wiñaypaq kausanqaku (Hech. 24:15). Chhaynapin Dios paykunaman kausayta qonqa, taytankutaqmi kapunqa (Sal. 36:9). Jesuspas yayayku mañakuypin Diosta niran: “Yayayku janaq pachapi kaq”, nispa (Mat. 6:9). Jehová Diosqa Jesustan encargaran runakunata kausarichinanpaq, chayraykun Jesús niran: “Noqan kani kausarimpuypas kausaypas”, nispa (Juan 6:40, 44; 11:25).

11. ¿Imatan Dios munan ‘ancha askha runakunapaq’?

¹¹ Jesusmi niran: “Pipas Diospa munayninta ruwaqmi wayqeypas, panaypas, mamaypas”, nispa (Mar. 3:35). Jehová Diosqa munanmi lliu nacionkunamanta, llaqtakunamanta, rimaykunamanta runakuna adoranankuta. Chay runakunatan Biblia nin: ‘Mana piqpa yupay atinan ancha askha runakuna’, nispa. Paykunaqa iñinkun Jesuspa sacrificakusqanpi, Diostan kasukuyta munankupas. Chaymi ninku: “Salvacionninchisqa tronopi tiyaq Diosmanta  corderomantawanmi jamun, nispanku”, nispa (Apo. 7:9, 10).

12. ¿Imatan yachanchis yayayku mañakuymanta?

¹² Yayayku mañakuyqa imaymanatan yachachiwanchis Diosmanta, runakunapaq munasqanmantapas. Ñaupaqpi: Tukuy imaymanatan ruwananchis sutinta ch’uyanchanapaq respetanapaq ima (Is. 8:13). Jesuspa sacrificakusqanraykun Diospa sutin respetasqa kanqa, llapa runataq salvasqa kayta atisunman. Jesuspa sutinpas hebreo simipiqa “Jehová Diosqa salvaqmi” ninantan nin. Iskaypi: Jesuspa sacrificakusqanraykun imaymana bendicionkunata Diospa gobiernon apamunqa. Kinsapi: Imaña kaqtinpas Diospa munayninqa junt’akunqapunin (Sal. 135:6; Is. 46:9, 10).

13. ¿Imaraykun bautizakunchis?

¹³ ¿Imaynata rikuchisunman agradecido kasqanchista? Diosta servinapaq prometekuspa bautizakuspa ima. Chaypin rikuchisun Jesuspa sacrificakusqanpi iñisqanchista, ‘Jehová Diospaq kapusqanchista’ ima (Rom. 14:8). Bautizakusqanchiswanmi Jehová Diosta valekunchis “allin concienciata” qowananchispaq (1 Ped. 3:21). ¿Imaynatan Jehová Dios kutichimuwanchis? Churinpa yawarninwan ch’uyanchawaspanchis. Chaymi rikuchiwanchis Jehová Diosqa tukuy ima prometesqantapas junt’ananta (Rom. 8:32).

14. ¿Imaraykun Jehová Dios kamachiwanchis runamasinchista munakunanchista?

¹⁴ Diosqa munakuwasqanchisraykun tukuy imatapas ruwan, chaymi munan pay jina munakuq kananchista jujkunata munakunanchista ima (1 Juan 4:8-11). Chayta ruwaspan rikuchisun ‘janaq pachapi kaq Yayanchispa’ wawankuna kay munasqanchista (Mat. 5:43-48). Biblian nin: “Jehová Diosniykitan munakunki [...] Chaymi ñaupaq kaq aswan jatun kamachikuyqa. Chay kamachikuy jina iskay kaq kamachikuytaq kay: ‘Runamasiykitan munakunki qan kikiykita jina’”, nispa (Mat. 22:37-40). ¿Imaynatan rikuchisunman runamasinchista munakusqanchista? Diospa gobiernonmanta willaspan. Sichus runamasinchista munakusun chayqa, Diosta ‘munakuyninchismi  junt’asqa noqanchispi kanqa’ (1 Juan 4:12, 20).

15. a) ¿Ima bendicionkunatan kay tiempopi chaskishanchis? b) ¿Ima bendicionkunatan jamuq tiempopi chaskisun?

¹⁵ Jesuspa sacrificakusqanpi iñisun chayqa, Jehová Diosmi llapa juchanchiskunata ‘pichapunqa’ (leey Hechos 3:19-21). Jinan wakin cristianokunata wawankunata jina adoptaspa janaq pachaman apapunqa (Rom. 8:15-17). Chaymantapas ‘waj ovejakunan’ kay pachapi familianmanta kapunqaku. Chaypaqmi ichaqa ch’uya runakunaman tukupuspa juj pruebapi tarikunqaku, Diospaq junt’aq sonqo kanqaku chayqa Diospa wawankunan kapunqaku (Rom. 8:20, 21; Apo. 20:7-9). Diosqa llapa wawankunatan munakuwasun, wiñay-wiñaypaqtaqmi bendeciwasun (Heb. 9:12). ¡Jesuspa sacrificakusqanqa ancha jatun regalon!

16. ¿Imaynatan Jesuspa sacrificio ruwasqan kacharichiwanchis?

¹⁶ Juchanchismanta pesapakusun chayqa, manan Satanás jark’ayta atiwasunchu Diospa familianmanta kananchista. Jesusqa ‘juj kutillatan’ jujpaqkama kausayninta qoran, chaymi manaña necesitakunqachu jujtawan sacrificakunanta (Heb. 9:24-26). Adanqa wañuytan apamuwaranchis, Jesusmi ichaqa wiñay kausayta qowasun. Sacrificio ruwasqanwanmi wañuymanta kay millay pachamantawan kacharichisqa kasunman (Heb. 2:14, 15).

17. ¿Imaynan sientekunchis Diospa munakuwasqanchista yachaspa?

¹⁷ Diospa prometesqanqa junt’akunqapunin. Diosqa manan jayk’aqpas cambianqachu imaynan tukuy kamasqanpaq leykuna mana cambianchu jinata (Mal. 3:6). Jehová Diosqa juj regalota jinan kausayta qowaranchis, anchatataqmi munakuwanchis, Biblian nin: “Noqanchisqa allintamá riki yachanchis Diosqa munakuwasqanchista, manataqmi chaymantaqa iskayananchischu. Diosqa munakuymi”, nispa (1 Juan 4:16). Pisi tiempomantan Dios kay pachata sumaq paraisoman tukuchinqa, llapa runakunataqmi pay jina munakuq kasun. Chaypin janaq pachapi kay pachapi Diosta serviqkuna juj nisqalla nisun: “Alabaypas, qhapaq kaypas, yachaypas, graciasta qoypas, jatunchaypas, atiypas, kallpapas Diosninchispaq wiñay-wiñaypaq kachun. Amén”, nispa (Apo. 7:12).