LLIU runakunan munanku kusisqa kausayta. Ichaqa ‘sinchi sasa tiempokunapi’ kasqanchisraykun mana facilchu (2 Tim. 3:1). Kay tiempopiqa nishu injusticia kasqanwan, imaymana onqoy kasqanwan, llank’anapas pisi kasqanwan, familiankuq wañupusqanwan iman runakunaqa llakisqa kausashanku. Diosta serviqkunapas yaqapaschá chhaynapi tarikuspaqa manaña kusisqachu imatapas ruwasunman. Chayrayku, ¿imatan ruwasunman kusikuyninchis ama pisiyananpaq?

Chaypaqqa allintan entiendenanchis imas kusikuy chayta, imaynatas wakin Diosta serviqkunapas sasachakuykunapiña tarikuspapas kusisqalla kausaranku chaytawan. Chaymantapas yachananchismi imatas ruwasunman aswan kusisqa kausananchispaq chayta.

Kaypi piensasun, pipas machasqa kaspaqa kusisqapas kashanman jinan imaymanamanta asikun ¿riki? Sanoman tukuspari, ¿asikushallanchu? Manañan ¿riki? ¿Imatan chaymanta yachasunman? Paykunaq kusikuyninkuqa juj ratollapaqmi. Sanoman tukuspan ichaqa llakisqalla kashanku ima problemankumantapas (Prov. 14:13).

Bibliapi willasqan kusikuymi ichaqa mana chhaynachu. Chay kusikuyqa sonqomantan lloqsimun. Pipas chhayna kusikuyniyoq runaqa imapas allinña mana allinña kaqtinpas kusisqallan kashan (1 Tes. 1:6). Imaña llakichin chaypas kusisqallan kashan. Chaypaq apostolkunamanta yachasun. Paykunaqa soq’asqaña karanku chaypas “kusisqan ripuranku”, ichaqa manan soq’ata chaskispachu kusisqa karanku, aswanpas “Jesuspa sutinpi p’enqayta ñak’arisqankumanta Diospa allin qhawarisqan kasqankuraykun” (Hech. 5:41).

Manan pipas kusisqachu naceranchis nitaqmi kikillanmantachu kusikuyqa noqanchispi rijurin. Kusikuyqa Diospa espiritunmantan jamun. Chay espiritun lliu runatapas yanapawanchis “mosoq runa kaywan” p’achawan jina churakunanchispaq (Efes. 4:24; Gál. 5:22). Kusisqa kaspaqa allin yuyaywanmi ima sasachakuytapas allichasunchis.

Jehová Dios kay pachata kamashaspaqa tukuy imapas allin kanantan munaran. Ichaqa manan chhaynachu kashan, aswanmi lliu runakuna millayman tukupushanku. Chaywanpas Diosqa kusisqallan kashan. Bibliapin nin: “Wasintaqa atiywan kusikuywanmi junt’aykun”, nispa (1 Crón. 16:27). Chaymantapas Diosqa kusikunmi serviqninkuna allinkunata ruwaqtin (Prov. 27:11).

Noqanchispas Jehová Dios jinan kananchis. Imapas mana munasqanchisman jinachu lloqsiqtinqa manan nishutachu llakikunanchis. Llakisqa kashanamantaqa imanchiskunachá kashan chaypin yuyayta churananchis. Pacienciawantaqmi imatapas suyakunanchis. *

 Ñaupa tiempopi Diosta serviq wakin runakunapas sasachakuykunapiña tarikuspapas kusisqallan karanku. Paykunamanta jujninmi kashan Abrahán. Paytaqa jujkunan imaymanapi llakichiranku (Gén. 12:10-20; 14:8-16; 16:4, 5; 20:1-18; 21:8, 9). Chaywanpas kusisqallan kausaran, ¿imarayku? Payqa allintan yacharan Jesuspa gobiernonpiqa sumaq kausay kananta, chaypin yuyayninta churaran (Gén. 22:15-18; Heb. 11:10). Jesusmi niran: “Taytaykichis Abrahanqa maytan munaran imakunatachus ruwanay karan chayta rikuyta, chaypi piensaspan payqa anchata kusikuran”, nispa. Noqanchispas Abrahán jinan imachus jamuq tiempopi kanqa chaypi piensananchis chhaynapin kusisqa kasun (Rom. 8:21).

Apóstol Pablopas, Silaspas Abrahán jinan Diospa promesankunapi confiaranku. Chaymi imaymanapiña tarikuranku chaypas allintaña waqtaykuranku chaypas kusisqallapuni kasharanku. Biblian nin: “Kuska tutata jinan Pablowan Silaswanqa Diosmanta mañakusharanku, takikunawantaq jatunchasharankupas”, nispa (Hech. 16:23-25). Chaymantapas paykunaqa Cristorayku sufrisqankumantan kusisqa kasharanku. Paykuna jinan noqanchispas kananchis, chaypaqmi ichaqa imakunachus Dios servisqanchismanta kan chaykunapi piensananchis (Filip. 1:12-14).

Kunan tiempopas askha hermanokunan imaymana sasachakuykunapi tarikushanku, ichaqa kusisqallan kashanku. Chaypaq yachasun Filipinas nacionpi George sutiyoq hermanomanta. Payqa Tacloban llaqtamantan. 2013 watapi noviembre killapin llapa chay llaqtakunata sinchi jatun wayra apapuran. 1.000 más hermanokunan mana wasiyoq qhepakapuranku. George hermanon nin: “Mana imayoqña qhepakurayku chaypas hermanokunaqa kusisqan kasharanku. Manan simiypas kanchu kay kusikuyniykuta rimarinaypaq”, nispa. Sichus Jehová Diospa tukuy ima qowasqanchispi piensasun agradecekuqtaq kasunpas chayqa kusisqallan kasun. Ichaqa, ¿imakunan kan kusisqa kananchispaq?

¿Diosta reqsiy kusichisunkichu icha manachu? Kusichiwanchismi ¿riki? Paymi lliu imatapas kamaq Diosqa. ¡Paymi papanchis, Diosninchis, amigonchispas! Chaymi ñaupaq razón kusisqa kananchispaq (Sal. 71:17, 18).

¿Ima niwaqtaq kay vidanchismanta? ¿Manachu kusisqa kanki p’unchay-p’unchay ñawinchis kicharikusqanmanta? (Ecl. 3:12, 13.) Diospa siminmanta yachaypas paypa munayninta ruwaspa puriypas may kusikunapaqmi ¿riki? (Col. 1:9, 10.) Diosta mana reqsiq runakunaqa manan yachankuchu imapaqsi kay vida chayta, noqanchismi ichaqa chaykunatapas allinta yachanchis. Chaymi apóstol Pablopas niran: “Ñawiq mana rikusqankunata, ninriq mana uyarisqankunata, sonqoq mana piensasqankunata iman Diosqa munakuqninkunapaq prepararan. Diosqa noqanchismanmi santo espiritunwan chaykunata rikuchiwanchis”, nispa (1 Cor. 2:9, 10). Chaykunata yachasqanchisraykun kusisqa kausanallanchistaq.

Ichaqa manan chayllachu. Jehová Diospa munayninpin juchanchiskuna perdonasqa karan (1 Juan 2:12). Paypa khuyapayakuq kayninpin kay pachapipas wiñaypaq kausasunchis, chay tiempoqa ñan chayamushanña (Rom. 12:12). Chaymantapas Diospa munayninpin kay pachapi imaymana clase runakuna sumaqta kausashanchis (Sal. 133:1). Paymi llaqtantapas cuidashan Satanasmanta supaykunamantawan (Sal. 91:11). Chaykunan razón kallantaq kusisqa kausananchispaq (Filip. 4:4).

¿Atisunmanchu aswan kusisqa kausayta? Arí, atisunmanmi. Jesuspunin niran:  “Chaykunataqa nishaykichis noqa jina kusikunaykichispaqmi, aswan kusisqaraq kanaykichispaqwanmi”, nispa (Juan 15:11). Kusikuyqa nina jinan. Astawan nina yaurananpaqqa astawanmi llant’ata yapananchis ¿riki? Chhaynan kusikuywanpas. Aswan kusisqa kausananchispaqqa Diospa espirituntan mañakunanchis, chay espiritun llant’a jina kusikuyninchista astawan yapanqa. Chaymantapas Bibliata leesqanchispin allinta piensananchis, chaymi yanapawallasuntaq kusisqalla kausananchispaq (Sal. 1:1, 2; Luc. 11:13).

¿Imatawanmi ruwasunman astawanraq kusikunanchispaq? Jehová Diospa munaynintan ruwananchis (Sal. 35:27; 112:1). Bibliaq nisqan jina chaypaqmi noqanchisqa kamasqa karanchis. Eclesiastés 12:13 nin: “Diosta manchakuy, kamachikuyninkunatapas junt’ay, chaypunin runaq ruwananqa”, nispa. Chayrayku, sichus Diosta servisun chayqa kusisqan kasunchis. *

Ima sasachakuyña kaqtinpas kusisqalla kasun chayqa, manan sonqollanchischu thaj kanqa imaymanakunatawanmi chaskisun. Astawanqa Jehová Diostan kusichisun (Deut. 16:15; 1 Tes. 5:16-18). Chaymantapas kusisqa kasun chayqa, manan qolqe maskhaypichu afanasqa kasun, aswanmi Diospa gobiernonta ñaupaqta maskhasun (Mat. 13:44). Chaykunata ruwasun chayqa astawanraqmi kusikusun, thajmi noqanchispas kasunchis, kusichisunmi jujkunatapas (Hech. 20:35; Filip. 1:3-5).

Chaymantapas kusisqa kasun chayqa qhalin kausasunchis. Bibliapunin nin: “Kusisqa sonqoqa allin jampin”, nispa (Prov. 17:22). Chaypi nisqanta jinan Nebraska llaqtapi Universidadmanta juj doctorpas nillarantaq, paymi niran: “Sichus ima ruwasqaykiwanpas contento kausashanki chayqa, qhalin qhepamanqa kanki”, nispa.

Kaypi yachasqanchis jina sasa tiempopiña kausashanchis chaypas atisunmanmi kusisqa kausayta. Chaypaqmi ichaqa Diospa espiritunta mañakunanchis, Biblia leesqanchispitaq allinta piensananchis. Chaymantapas Diospa tukuy ima qowasqanchispin piensananchis, Diosta serviq runakunaq ejemplontataqmi qatikunanchis chaykunan yanapawasun kusisqa kausananchispaq. Chhaynapin Salmos 64:10 textoq nisqan noqanchispi junt’akunqa, chay texton nin: “Chanin runaqa Señor Dioswanmi kusikunqa, paymanmi jap’ipakunqa”, nispa.