1, 2. a) ¿Imapin juj hermano mana allinchu kasharan? b) ¿Imatan ruwaran chayta allichananpaq?

HERMANO Robertoqa waynallaraq kashaspas bautizakusqa, ichaqa manas paypaqqa importantechu Diosta serviy kasqa. Paymi nin: “Manan jayk’aqpas ima mana allintapas ruwaranichu. Noqamantaqa allin iñiyniyoqpas kayman jinan kasharani. Mana faltakuspan juñunakuykunamanpas riq kani, sapa kutillanmi precursor auxiliartapas jap’iq kani. Ichaqa manan contentochu kasharani”, nispa.

² Payqa casarakunan p’unchaykamas mana yachasqachu imas faltasharan chayta. Casarakusqan qhepamansi payqa esposanwan kuska Bibliamanta imaymanakunata tapunakuq kasqaku. Esposanqa allintas Bibliata reqsisqa, chaysi payqa apuraylla imatapas niq, hermano Robertos ichaqa mana ima niytapas atiqchu, chaysi p’enqaypi qhepapuq. Paymi nillantaq: “Manapas imatapas yachaymanchu jinan kasharani, chaymi nisharani: ‘Familiaytataq umallisaq chayqa astawanchá  estudianay kanqa’, nispa. Jinan Biblia estudiayta qallarirani. Chayraqmi imaymanata allinta entienderani. Astawanqa Jehová Dioswanmi allin amigontin kapurani”, nispa.

3. a) ¿Imatan yachasunman hermano Robertoq experiencianmanta? b) ¿Ima kinsa tapuykunamantan kay estudiopi yachasun?

³ ¿Imakunatan yachasunman hermano Robertowan imachus pasasqanmanta? Yaqapaschá noqanchispas Bibliamanta imallatapas yachanchis, juñunakuykunamanpas manapaschá faltakunchischu, predicaqpas sapa kutillapaschá lloqsinchis. Chaykunataña ruwashanchis chaypas allinta qhawayukuqtinchisqa manapaschá allinchu kashanchis (Filip. 3:16). ¿Imatan ruwasunman Dios serviypi allin kananchispaq? Chaytan kay estudiopi yachasun, chaypaqmi kay kinsa tapuykunamanta yachasun. Chay tapuykunan nin: “¿Iman yanapawasunman Diospa espiritunwanchus pusachikushanchis icha manachus chayta yachananchispaq? ¿Imatan ruwasunman Dios serviypi fuerte kananchispaq? ¿Imaynatan vidanchispi yanapawasunman Diospa espiritunwan pusachikuy?”, nispa.

4. ¿Pikunan kasukunanku Efesios 4:23, 24 textopi nisqanta?

⁴ Diospa kamachin kanapaqqa imaymanapichá cambiaranchis. Bautizakusqanchis qhepamanpas cambiashallaranchischá. Bibliapipunin nin: “Mosoqyachishallaychis imaynachus piensasqaykichista”, nispa (Efes. 4:23, 24). Juchasapa runakunataq kanchis chayqa imallapipas cambiashanallanchismi kanqa. Unayña Diosta servishanchis chaypas kallpachakushanallanchismi kanqa Dioswan allinpi kananchispaq (Filip. 3:12, 13).

5. ¿Ima tapuykunan yanapawasunman imaynachus kashanchis chayta allinta yachananchispaq?

⁵ Jovenña kuraqña kanchis chaypas allintan qhawarikunanchis imaynachus kashanchis chayta. Sapankanchismi tapukunanchis: “¿Diospa espiritunwanchu pusachikushani? ¿Cristo jinachu imatapas ruwashani? ¿Imaynatan qhawarini juñunakuykunata? ¿Imamantan masta rimani? ¿Imamanmi masta yuyayta churashani? ¿Imaynan p’achakuyniy kashan? ¿Imaynatan chaskikuni consejokuna qowasqankuta? ¿Imatan ruwani ima tentacionpipas tarikuspa? ¿Allin yuyayniyoq cristianochu kani?”, nispa (Efes. 4:13). Chay tapuykunan allinta reparachiwasun imaynas kashanchis chayta.

6. ¿Imatawanmi ruwananchis Diospa espiritunwanchus pusachikushanchis icha manachus chayta yachanapaq?

⁶ Mayninpiqa yaqapaschá jujkuna yanapawananchis kanqa. Apóstol Pabloq  nisqan jina aychaq munayninman jina kausaq runaqa manan yachanchu imas Diosta kusichinman chayta. Espirituwan pusachikuq runan ichaqa allinta yachan imaynatas Dios imatapas qhawarin chayta. Yachantaqmi imaynatas Dios qhawarin aychaq munayninman jina puriqkunata chaytapas (1 Cor. 2:14-16; 3:1-3). Umalliqkunaqa Cristoq yuyaynin jina yuyayniyoqtaq kanku chayqa, apuraymi imatapas cuentata qokunku chayman jinataqmi aychaq munayninman jina purishaq hermanokunatapas yanapanku. Mayqen umalliqpas yanapayta munawasun chayqa chaskikunanchismi yanapayninta, kasukunanchistaqmi ima niwasqanchistapas. Chhaynapin rikuchisun Diospa espiritunwan pusachikusqanchista (Ecl. 7:5, 9).

7. ¿Imaraykun nisunman “allin iñiyniyoq kanapaqqa manan yachayllachu Bibliamanta yachananchis” nispa?

⁷ Diospa espiritunwan pusachikunapaqqa manan yachayllachu yachananchis Bibliamanta. Rey Salomonpas imaymanatan Diosmantaqa yacharan. Wakin rimasqankunapas Bibliapin kashan, ichaqa Diostan traicionaran (1 Rey. 4:29, 30; 11:4-6). Chhaynaqa manan leeyllachu leenanchis Bibliataqa, aswanpas fuerten iñiyninchis kanan (Col. 2:6, 7). ¿Imatan chaypaq ruwasunman?

8, 9. a) ¿Iman yanapawasun iñiypi allin poqosqa kananchispaq? b) ¿Ima yuyaywanmi Bibliatapas qelqakunatapas estudiananchis?

⁸ Apóstol Pablon niran: “Kallpachakusunyá iñiypi allin poqosqa kayman chayananchispaq”, nispa (Heb. 6:1). Chay consejotan kasukunanchis. Chaypaqmi ichaqa allinta estudiananchis “Diospa munakuyninpi allinta takyaychis” nisqa librota. Chay libron yanapawasun Diospa munayninman jina kausananchispaq. Sichus tukurankiña chay libro estudiayta chayqa, yaqapaschá juj qelqakunata estudiawaq (Col. 1:23). Chaymantapas Diospa yanapaynintan mañakunanchis imachus yachasqanchisman jina kausananchispaq.

⁹ Bibliatapas ima qelqatapas estudiaspaqa Diospa munayninta ruwanapaqmi estudiananchis  (Sal. 40:8; 119:97). Chay estudiasqanchismi yanapawasun Diospa munaynin contrapi kaqkunata ama ruwananchispaq (Tito 2:11, 12).

10. ¿Imatan wayna-sipaskuna ruwananku Dios serviypi fuerte kanankupaq?

¹⁰ Waynapas sipaspas kanki chayqa, ¿yachankiñachu imatas Diospaq ruwanki chayta? Betelpi llank’aq juj hermanos asamblea chayamuqtinqa rimallanpuni bautizakuy munaq wayna-sipaskunawan, chaypis payqa sapankata tapun: “¿Ima ruwaytan Diospaq munashanki?”, nispa. Wakinqa “tukuy tiempoywanmi Diosta serviyta munashani” nispas ninku, wakintaqsi ninku “maypichus yanapanata munashanku chayman risaq nishanin” nispa. Wakinsi ichaqa mana ima niytapas atinkuchu. Chhaynataq chayqa, manapaschá paykunaqa allintaraqchu piensaranku imatas Diospaq ruwanqaku chaypi. Chayrayku waynapas sipaspas kanki chayqa tapukuy: “¿Imaraykun juñunakuykunaman predicacionmanpas rini? ¿Tayta-mamay rillaqtinchu icha noqa kikiymantachu?”, nispa. Ichaqa manan wayna-sipaskunallachu chaypiqa piensananku, kuraqkunapas piensananchismi chaypiqa. Chhaynapin Dios serviypi fuerte kasunchis (Ecl. 12:1, 13).

11. a) ¿Imatan ruwananchis Dios serviypi aswan fuerte kanapaq? b) ¿Piqpa ejemplontan qatikunanchis?

¹¹ Imapipas cambiananchisraq kashan chayqa, cambiananchismi chayta. Chaymantan kanqa kausayta chaskisunchus  icha manachus chayqa (Rom. 8:6-8). Diosqa yachanmi juchasapa runakuna kasqanchista, chaywanpas kallpachakunanchismi sonqonpaq jina kausananchispaq. Juj kutinmi John Barr sutiyoq hermanonchis Lucas 13:24 textomanta rimashaspa niran: “Wakinqa mana kallpachakusqankuraykun mana atinkuchu k’illku punkunta jaykuyta”, nispa. Chayqa cheqaqmi, chaymi Jacob jina kallpachakunanchis. Jacobqa bendicionta chaskinankaman juj angelwan jap’inakuran (Gén. 32:26-28). Yaqapaschá gustawanchis Bibliata leey. Ichaqa manan común librota jinallachu Bibliataqa leenanchis aswanmi kallpachakunanchis chaypi allin yachachikuykunata tarinanchispaq.

12, 13. a) ¿Iman yanapawasunman ‘Cristoq yuyaynin yuyayniyoq kananchispaq’? b) ¿Imatan yachasunman Pedroq ejemplonmanta? ¿Ima consejotan qoran? c) ¿Imatan ruwananchis Diospa espiritunman jina kausananchispaq? (“¿Imatan ruwasunman iñiypi allin poqosqa kayman chayananchispaq?” nisqa recuadrota qhaway.)

¹² Sichus kallpachakusun Diospa espiritunman jina kausananchispaq chayqa, chay espiritun yanapawasun ima piensayninchistapas cambiananchispaq. Chhaynapin pisi-pisimanta Cristoq yuyaynin yuyayniyoq kasunchis (Rom. 15:5). Chay espiritun yanapawallasuntaq ima mana allin munapayaytapas chinkachinanchispaq Diospa munayninman jina kausananchispaqwan (Gál. 5:16, 22, 23). Chayrayku, sichus imatapas munapayashanchis aychaq munayninman jinataq imatapas ruwashanchis chayqa, Diospa espiritunta mañakusun. Chay espiritun kallpata qowasun allin yuyaywan imatapas ruwananchispaq (Luc. 11:13). Apóstol Pedropas mana allin yuyayniyoq jinan mayninpiqa imatapas ruwaran (Mat. 16:22, 23; Luc. 22:34, 54-62; Gál. 2:11-14). Diospa yanapayninwanmi ichaqa pisi-pisimanta Cristoq yuyaynin yuyayniyoq kapuran. Noqanchistapas Diosqa yanapawasunpunin.

¹³ Pedroq nisqan jina sapankanchismi yachananchis cuerpo kamachiq kayta, aguantaq kayta, wayqe-panantin jina munanakuytawan (leey 2 Pedro 1:5-8). Chhayna kananchispaq kallpachakusun chayqa allin cristianon kasunchis. Yaqapaschá sapa p’unchay tapukusunman: “¿Imatan kunan p’unchay ruwayman Diospa espiritunman jina kausanaypaq?”, nispa.

14. ¿Imakunapin yanapawasun Cristoq yuyaynin yuyayniyoq kay?

¹⁴ Cristoq yuyaynin yuyayniyoq kasun chayqa, allin yuyaywanmi imatapas ruwasun llank’anapipas escuelapipas. Manan comuntachu rimasun manataqmi comuntachu ima decisiontapas ruwasun. Chhaynapin rikuchisun Cristoq cheqaq qatikuqninkuna kasqanchista. Kallpachakusunmi Dioswan allinpi kananchispaqpas. Chaymantapas Cristo jina piensaspaqa ima tentacionpiña tarikuspapas aguantasunmi chayta. Allinta piensarispataq tapukusun: “¿Ima texton yanapawanman? ¿Imatan Cristo ruwanman karan? ¿Iman Diosman gustanman?”, nispa. Sapa kutillanmi chhaynata tapukunanchis. Chayta allinta entiendenapaq churasun ejemplokunata. Sapankapaqtaq ajllasun juj textota chhaynapi  allin yuyaywan imatapas ajllakunanchispaq.

15, 16. a) Cristo jina piensasun chayqa, ¿imatan ruwasun casarakuyta munaspa? b) Cristo jina piensasun chayqa, ¿imatan ruwasun amigokunata ajllakuspa?

¹⁵ Piwanpas casarakuyta munaspaqa yaqapaschá leesunman 2 Corintios 6:14, 15 textota (leey). Chaypi nisqan jina Diospa espiritunwan pusachikuq runaqa manan casarakunmanchu Diosta mana munakuq runawanqa. ¿Imaynatan chay yanapawasunman allin parejata ajllakunapaq?

¹⁶ Piwanchus amigota ruwasun chayta qhawarispaqa yaqapaschá leesunman 1 Corintios 15:33 textota (leey). Chaypi nisqan jina Diospa espiritunwan pusachikuq runaqa manan comuntachu piwanpas amigota ruwanqa. Chay textoqa juj ruwaykunapipas yanapawasunmanmi. Chaypaq kaypi piensay, ¿pikunawanmi redes sociales nisqapi rimashanki? ¿Imayna clase runakunawanmi internetpi pujllashanki?

17-19. Diospa espiritunwan pusachikusun chayqa, a) ¿Imakunatan mana ruwasunchu? b) ¿Imatan ñaupaqman churasun? c) ¿Imatan ruwasun piwanpas phiñachinakuspanchis?

¹⁷ ¿Imakunan jark’awashasunman Diospa llaqtanpi wiñananchista? Chaypaqqa yaqapaschá leesunman Hebreos 6:1 textota (leey). Chaypi Pabloq nisqan jina ‘yanqa ruwaykunaqa’ manan jayk’aqpas yanapawasunchu Diospa llaqtanpi wiñananchispaq. Chaymi sapankanchis tapukunanchis: “¿Kay ruwasqay valewanqachu imallapipas icha yanqapaqchu kashan? ¿Kanqachu tiempoy kay llank’anaman jaykuqtiy icha manachu? ¿Imaraykun mana juñukuymanchu kay mundota cambiay munaq runakunawan?”, nispa.

¹⁸ ¿Imatan ñaupaqman churashanchis? Chaypaqqa yaqapaschá leesunman Mateo 6:33 textota. Chaypin Jesusqa rimashan imaynas espirituwan pusachikuq runaqa Diospa munaynin ruwayta ñaupaqman churanan chayta. Chaytan allinta umanchispi jap’inanchis, chhaynapin mana comuntachu jaykusun universidadmanpas ni ima llank’anamanpas. Aswanmi allinta piensaspa imatapas ruwasun.

¹⁹ ¿Imatan ruwasunman phiñachinakuy kaqtin? Chaypiqa yaqapaschá yanapawasunman Romanos 12:18 texto. Chay textopin willashan Cristota qatikuqkunaqa ‘lliu runawan sumaqta kausananchispaq’ kallpachakunanchis kasqanmanta. Chaymi sapankanchis tapukunanchis: “¿Imatan ruwani pipas ofendewaqtin? ¿Apuraychu pitapas perdonani icha rogachikuniraqchu?”, nispa (Sant. 3:18).

20. ¿Imaraykun kallpachakushanallanchis Diospa espiritunwan pusachikunanchispaq?

²⁰ Chay ejemplokunapi yachasqanchis jina, Bibliaq nisqanman jina imatapas ruwasun chayqa Diospa espiritunwan pusachikusqanchistan rikuchisun. Ñaupaqpi rimamusqanchis hermano Roberton nillantaq: “Dioswan allin amigontin kasqaymi yanapawaran allin qosa kanaypaq allin tayta kanaypaqwan, chaywanmi noqaqa kusisqa kashani”, nispa. Sichus noqanchispas kallpachakusun Diospa espiritunwan pusachikunanchispaq chayqa imaymana bendicionkunatan chaskisun. Kusisqan kausasun kunanpas wiñay-wiñaypaqpas (1 Tim. 6:19).