1-3. a) ¿Imaynapin yachanchis juñunakuykuna llapa cristianokunapaq ancha importante kasqanta? (Kay paginapi dibujota qhaway.) b) ¿Imakunamantan kay estudiopi yachasun?

CORINNA sipas 17 watayoq kashaqtinmi guardiakuna mamanta jap’ispa sasa llank’ana campoman aparanku. Chay qhepamanmi paytañataq Siberia llaqtaman aparanku, chay llaqtaqa karun karan. Chaypin esclavata jina llank’achiranku. Sinchi chiri tiempopin pisi p’achallayoqta campopi llank’achiqku. Chhayna sasachakuypiña tarikushaspapas, payqa juj iñiqmasiwan kuskan kallpachakuranku juñunakuyman rinankupaq.

² Tiyasqanku wasimanta tardeyaykuyta lloqsispan 25 kilometrota chakillapi estacionkama riranku. Corinna nin: “Las 2 tutamantantan tren puririran, soqta horataqmi viajarayku. Trenmanta uraykuspan 10 kilometrota chakillapi rirayku juñunakuna wasikama”, nispa. Corinnaqa mana pesapakuranchu chhayna karuta viajasqanmanta. Paymi  nillantaq: “Chay juñunakuypin Qhawaq revistata estudiarayku takirayku ima. Chay juñunakuyqa anchatan kallpachawaranku iñiyniykupi”, nispa. Paykunaqa kinsa p’unchaymantan kutipuranku; chay campomanta encargadoqa manan jayk’aqpas yacharanchu paykunaq lloqsisqanta.

³ Juñunakuykunaqa ancha importanten Diosta serviqkunapaq. Ñaupa tiempopi cristianokunapas Jehová Diosta adoranankupaq paymanta yachanankupaq iman juñukuqku (Hech. 2:42). Kay tiempopipas anchatan kusikunchis juñunakuykunaman rispa. Wakinkunapaqmi ichaqa sasa kanman juñunakuyman riy, yaqapaschá ch’isiyaqta llank’asqankurayku, askha ruwanayoq kasqankurayku otaq sinchi sayk’usqa kasqankurayku. ¿Iman yanapawasun juñunakuyman mana faltakunapaq? ^[1] ¿Imaynatan kallpachasunman estudiantekunata juj runakunatapas juñunakuyman rinankupaq? Kay estudiopin kay kinsa tapuykunata kutichisun: ¿Imaraykun allinpuni juñunakuykunaman riy? ¿Imaynatan juñunakuypi jujkunata yanapasunman? ¿Imaraykun Jehová Dios kusikun juñunakuyman riqtinchis? ^[2]

4. ¿Imaynapin juñunakuykuna yanapawanchis Diosninchista astawan reqsinapaq?

⁴ Allin yachachikuyta chaskisqanchisrayku. Juñunakuykunapiqa Jehová Diostan astawan reqsinchis. Qaynallan “Biblia estudianapaq juñunakuy” nisqapi Acerquémonos a Jehová nisqa librota askha iñiq t’aqakunapi estudiaranku. Diosninchis imayna kasqanmanta yachasqanku, iñiqmasikuna sonqomanta comentasqanku iman llapa iñiqmasikunata kallpacharan Diosta astawan munakunankupaq. Jinaspapas discursokunata uyarispa, demostracionkunata allinta qhawaspa, Bibliaq leekusqanta makilla uyarispan Diosmanta astawan yachanchis (Neh. 8:8). Chaymantapas sapa semanapaq Bibliata leesqanchis, chay textokunamanta comentasqanchis iman Diosman astawan achhuykachiwanchis.

5. ¿Imaynatan juñunakuykuna yanaparasunki kausayniykipi predicasqaykipipas?

⁵ Chaymantapas juñunakuykunan yanapawanchis Bibliaq nisqanman jina imatapas ruwanapaq (1 Tes. 4:9, 10). “Qhawaq revistata estudianapaq juñunakuy” nisqan yanapawanchis Diosta astawan servinapaq, aswan allinta mañakunapaq otaq juj iñiqmasiwan phiñachinakusqanchista allichapunapaq. Jinaspapas chaupi semanapi juñunakuyninchismi yanapawanchis allin predicaq, allin yachachiq kanapaq (Mat. 28:19, 20).

6. ¿Imakunan juñunakuykunapi kallpachawanchis?

⁶ Kallpachawasqanchisrayku. Satanasqa  imaymanawanmi iñiyninchista pisiyachiyta munan. Juñunakuykunan ichaqa kallpachawanchis Diosta servishanallapaq (leey Hechos 15:30-32). Mayninqa profeciakunaq junt’akusqanmantan yachanchis. Chaymi yanapawanchis Jehová Diospa promesanpi confiashanallapaq. Jinaspapas iñiqmasikunaq discurso qosqanku, demostracionkuna ruwasqanku, comentasqanku, takisqankupas anchatan sonqonchista kusirichin (1 Cor. 14:26). Juñunakuykunapi iñiqmasinchiskunawan parlarispan reparanchis munakuwasqanchista, chaytaqmi anchata kallpachawanchis (1 Cor. 16:17, 18).

7. ¿Imaraykun mana faltakunachu juñunakuykunaman?

⁷ Jehová Dios santo espiritunwan yanapawasqanchisrayku. Juñunakuykunapiqa Jesusmi Diospa santo espiritunwan yanapawashanchis. Chaymi niwanchis: ‘Santo espirituq nisqanta uyariychis’, nispa (Apo. 2:7). Diosmi santo espiritunwan yanapawanchis tentacionkunaman mana urmanapaq, mana manchakuspa predicanapaq, imatapas allinta decidinapaq ima. Chay yanapayta chaskikuyta munaspaqa, manapunin juñunakuykunaman faltakunanchischu.

8. ¿Imaynatan iñiqmasinchiskunata kallpachasunman? (Qhaway ‘ Ancha kusisqan wasiyman kutipuni’ nisqa recuadrota.)

⁸ Munakusqanchista rikuchispa. Apóstol Pablon niran: ‘Jujkuna jujkunawan kallpachanakusunchis’, nispa (Heb. 10:24, 25). Chaypin Pablo niwashanchis llapa iñiqmasinchiskunata munakunanchista. Kay tiempopiqa askha iñiqmasinchiskunan sinchi sasachakuykunapi kashanku. Chaymi paykunata kallpachananchis. Juñunakuykunapi kaspan iñiqmasinchiskunawan parlarinchis, tapuykunaman kutichinchis, paykunawan kuskataq tukuy sonqowan takinchis. Chaykunawanmi paykunata kallpachanchis (Col. 3:16).

9, 10. a) ¿Imaraykun Juan 10:16 texto kallpachawanchis juñunakuyman rishanallapaq? b) ¿Imaynatan kallpachasunman mana iñiq familiayoqkunata?

 ⁹ Juj jinalla kausanapaq yanapakuspa (leey Juan 10:16). Jesusmi niran ch’ulla t’aqalla juj michiqnillayoq kasqanchista. Juj t’aqallamanta ovejakunaqa michiqninku maymanchus apasqanmanmi kuskalla rinku. Sichus wakin ovejakuna orqopi kanman, wakintaq wayq’opi, wakintaq juj ladopi chayri, nisunmanchu: ¿“Juj t’aqallamantan kanku”, nispa? Manan ¿riki? Noqanchispas juj t’aqallamanta kasqanchista rikuchinapaqqa iñiqmasinchiskunawan kuskan juñunakuykunapi kananchis.

¹⁰ Juñunakuykunapi kaspaqa astawanmi jujllachakunchis, juj familia jinallan kausanchis (Sal. 133:1). Wakin iñiqmasinchiskunaqa Diospi iñipusqankuraykun tayta-mamankuq, wayqe-panankuq otaq wawankuq cheqnisqan kapunku. Paykunatan Jesús prometeran Diospa llaqtanpi munakuq, khuyapayakuq familiayoq kanankuta (Mar. 10:29, 30). Juñunakuyman rishallasun chayqa, chay iñiqmasinchiskunan taytanta, mamanta, wayqe-pananta jina qhawariwasun. Chayrayku amapuni juj juñunakuymanpas faltakusunchu.

11. ¿Imaynatan juñunakuykunapi Diosta adoranchis?

¹¹ Juñunakuykunapi payta adorasqanchisrayku. Jehová Diosmi kamawaranchis, chaymi payllata agradecekunanchis, jatunchananchis, adorananchispas  (leey Apocalipsis 7:12). Chaytan sapa semana juñunakuykunapi ruwanchis takispa, mañakuspa, paymanta rimaspa ima.

12. ¿Imaynan Dios sientekun kamachikusqanta kasukuqtinchis?

¹² Jinaspapas Diosta kasukuspan juñunakuykunaman rinchis. Simin qelqapin kamachiwanchis llapa juñunakuykunaman rinanchista. Chay kamachikusqanta kasukusun chayqa sonqontan kusichisun (1 Juan 3:22). Jehová Diosqa yachanmi juñunakuykunaman riy wakinpaq sasa kasqanta, chaymi anchata kusikun kallpachakusqanchista rikuspa (Heb. 6:10).

13, 14. ¿Imaynapin juñunakuykuna Jehová Diosman Jesusmanpas achhuykachiwanchis?

¹³ Payman wawanmanwan astawan achhuykusqanchisrayku. Juñunakuykunapi Bibliata estudiaspan Diospa kamachikusqanta yachanchis (Is. 30:20, 21). Askha runakunan juñunakuyninchisman jamuspa reparanku Jehová Diospuni yachachiwasqanchista (1 Cor. 14:23-25). Arí, Diosqa santo espiritunwanmi juñunakuykunapi yanapawanchis, chaymi tukuy yachasqanchispas paymanta jamun. Juñunakuyman rispaqa paytan uyarinchis, munakuyninta reparanchis, astawantaq payman achhuykunchis.

¹⁴ Jesusmi niran: ‘Maypichus iskaypas kinsapas sutiypi juñukunku chayqa, chaypin chaupinkupi kashani’, nispa (Mat. 18:20). Jesusqa llapa iñiq t’aqatan umallishan, paykunaq ‘chaupinpin purishanpas’ (Apo. 1:20–2:1). Arí, Jehová Diospas Jesuspas juñunakuykunapin noqanchiswan kashanku, chaypin astawanqa kallpachawanchis. ¡Maytachá Jehová Diospas Jesuspas kusikunku paykunaman achhuykusqanchismanta!

15. ¿Imatan rikuchinchis tukuy sonqomanta juñunakuykunaman rispa?

¹⁵ Kasukuy munasqanchista rikuchisqanchisrayku. Diosqa manan pitapas obliganchu kamachikusqanta kasukunanpaq (Is. 43:23). Paypa munan sonqomanta kasukunanchistan. Chaymi tukuy sonqowan juñunakuyman rispa rikuchinchis pay munakusqanchista, kamachiqninchista jina qhawarisqanchistapas (Rom. 6:17). Kaypi piensasun: ¿Imatan ruwasun jefenchis tutakama llank’ananchista munaqtin? ¿Imatan ruwasun mayqen autoridadpas juñunakusqanchisrayku carcelman apayta munawaqtinchis, multawaqtinchis otaq castigayta munawaqtinchis? ¿Imatan ruwasun juñunakunanchis p’unchay ima ruwananchispas karuqtin? Sapankanchismi chaykunapi tarikuspa decidinanchis kanqa (Hech. 5:29). Sichus Diostaraq ñaupaqta  kasukusun chayqa, sonqontan kusichisun (Prov. 27:11).

16, 17. a) ¿Imaynapin yachanchis ñaupa tiempopi cristianokunapaq juñunakuykuna ancha importante kasqanta? b) ¿Ima niranmi George Gangas iñiqmasi juñunakuykunamanta?

¹⁶ 33 wata pentecostés fiestapi juñunakusqanku qhepamanpas, cristianokunaqa ‘apostolkunaq yachachikuyninpin allinta sayaranku, juj sonqollataqmi kausaranku’ (Hech. 2:42). Arí, paykunaqa juñukushallaqkun Diosta adoranankupaq. Autoridadkunaña, religionpi umalliqkunaña jark’aranku chaypas, paykunaqa juñukushallaqkun.

¹⁷ Kunanpas llapa cristianokunan anchata kusikunchis juñunakuykunapi kaspa. George Gangas iñiqmasin 22 wata jina umalliq t’aqapi karan. Paymi niran: “Juñunakuykunapi iñiqmasikunawan kaspan anchata kusikuni, anchatataqmi kallpachawanpas. Chaymi tempranotapuni chayani qhepatataq lloqsimpunipas. Kusikunin iñiqmasiykunawan Diosmanta rimaspa. Paykunawan kaspaqa familiaywanpas kashayman jinan sientekuni”, nispa. Payqa juñunakuypi iñiqmasikunawan kaspan anchata kusikuq.

18. a) ¿Imaynan sientekunki juñunakuypi kaspa? b) ¿Imata ruwanaykipaqmi decidisqa kashanki?

¹⁸ ¿Gangas iñiqmasi jinachu sientekunki juñunakuykunapi kaspa? Chhaynaqa, ima sasachakuyña kaqtinpas, kallpachakushallay juñunakuyman rinaykipaq. Chayta ruwaspan rey David jina Diosta ninki: “Señor Diosníy, tiyasqayki wasitan munakuni”, nispa (Sal. 26:8).