DIANAQA 80 más watanpiñan kashan. Qosanqa Alzheimer onqoyniyoqmi karan, manaraq wañupushaqtinmi yuyaqkunata cuidana wasipi tiyaran. Dianapaqqa iskay wawankunan wañukapuranku, jinaspapas ñuñunpi cáncer onqoytan aguantanan karan. Chaykunaña pasaqtinpas paytaqa juñunakuypi predicacionpipas kusisqallatas rikunku hermanokunaqa.

Johnqa 43 más watakunan watukuq umalliq karan. Paymanqa anchatan asignacioninqa gustaq, ichaqa onqosqa pariententa cuidananpaqmi saqeran. Unay tiempomanta reqsiq hermanokunan ninku: “Asambleakunapi tupaqtiykuqa kaqllapunin payqa kusisqa kashan”, nispa.

¿Imaraykun Dianawan Johnwan kusisqalla kashanku? ¿Imaynapin pipas nishu llakipi tarikuspa otaq gustasqan asignacionta saqespa kusisqalla kashanman? Biblian nin: “Chanin runaqa Señor Dioswanmi kusikunqa”, nispa (Sal. 64:10). Chayta yachanapaq estudiasunchis iman cheqaq kusikuyta qowasunman imataq mana chaymantawan.

Kay vidapiqa kanmi imaymanamanta kusikunanchispaq: casarakuy, wawayoq kay otaq Diospa qowasqanchis privilegiokuna. Chaykunataqa Jehová Diosmi qowanchis juj regalota jina. Paymi casarakuytaqa paqarichiran, wawayoq kanapaq atiyta qowaranchis, llaqtanpipas imaymana llank’aykunata qowanchis (Gén. 2:18, 22; Sal. 127:3; 1 Tim. 3:1).

Mayninpin ichaqa juj tiempollapaq kusikuyninchis kanman. Casadokunamantaqa mayqenninkupas wañupunmanmi, otaq jujwanpas engañanman (Ezeq. 24:18; Os. 3:1). Wawakunapas mayninpiqa manan tayta-mamankuta ni Diostapas kasukunkuchu, jinaspa congregacionmanta expulsasqa kapunku. Ejemplopaq, profeta Samuelpa wawankunaqa manan Jehová Diospa munasqanman jinachu serviranku; rey Davidpas juchapin urmaran chayraykutaq imaymana problemakunapi familianpas tarikuran (1 Sam. 8:1-3; 2 Sam. 12:11). Chaykuna pasaqtinmi kusikuyninchisqa nanayman sufrimientoman tukupun.

 Chhaynallataqmi Diospa llaqtanpi privilegiokunawanpas pasanman, mayninpiqa saqepunchis: saludninchisrayku, familianchista atiendenanchispaq otaq Diospa llaqtanpi cambiokuna kasqanrayku. Privilegionkuta saqepuq hermanokunaqa mayninpin yuyarinku asignacionninkupi ancha kusisqa sientekusqankuta.

Yachanchismi mayninpi chay kusikuykunaqa juj tiempollapaq kasqanta. Ichaqa Samuel, David, jujkunapas imaymanapi tarikuranku chaypas juj niray kusikuytan tariranku, chaypin yachanchis noqanchispas juj niray kusikuy tarinanchista.

Jesusqa yacharanmi imachus cheqaq kusikuy kasqanta. Janaq pachapi kashaspaqa “tukuy tiempon Jehová Diospa ladonpi kusisqa karan” (Prov. 8:30, NM). Kay pachata jamuqtinmi ichaqa mana facilchu vidan karan. Chhaynaña kaqtinpas kusisqan papanpa munayninta ruwaran (Juan 4:34). ¿Iman yanaparan manaraq wañupushaqtin nanayta aguantananpaq? Biblia nin: “Payqa qhepaman kusikunanta yachaspan ñak’arina k’aspita aguantaran”, nispa (Heb. 12:2). Jesuspa cheqaq kusikuymanta rimasqanmanta iskay yachachikuyta yachasun.

Juj kutinmi 70 discipulonkunaqa predicaq risqankumanta kusisqa kutimpuranku, paykunaqa milagrokunata ruwamusqaku, supaykunatan runakunamanta qarqosqaku. Chaymi Jesús niran: “Ama espiritukunaq kasukusqasuykichisraykuchu kusikuychis, aswanpas kusikuychis sutiykichis janaq pachapi qelqasqa kasqanrayku”, nispa (Luc. 10:1-9, 17, 20). Asignacionninchispi llank’ayña kusichiwasunman chaypas, aswan importanteqa Jehová Dioswan amigontin kaymi, chay kaqmi cheqaq kusikuytaqa qowanchis.

Juj kutinmi Jesús waranqanpi runakunaman yachachisharan, jinan judía warmi niran: “Kay jina allin yachachikuqpa mamitanqa kusisqachá sientekun”, nispa. Jesusmi ichaqa niran: “Manan, aswanpas Diospa siminta uyarispa waqaychaqkuna kusisqaqa kachunku”, nispa (Luc. 11:27, 28). Juj mamaqa wawan allin kaqtinqa kusisqan sientekun. Ichaqa aswan kusisqan sientekunqa Jehová Diosta kasukuspa amigontin kaspa ima.

Arí, cheqaq kusisqataqa sientechiwanchis Jehová Dioswan amigontin kaymi. Problemakuna  kaqtinqa llakikunchismi ichaqa manan kusikuyninchisqa chinkanchu. Sichus aguantasun Jehová Dioswanpas fiel kasun chayqa, kusikuyninchisqa aswanraqmi kanqa (Rom. 5:3-5). Yuyarinanchismi Jehová Diosqa santo espirituntan qon paypi confiaqkunamanqa, chay espiritunmi noqanchispi ruruchin jujnin cualidadta chayqa kusikuymi (Gál. 5:22). Chayraykuchá Salmos 64:10 textoqa nin: “Chanin runaqa Señor Dioswanmi kusikunqa”, nispa.

Chayraykun qallariypi rimamusqanchis Dianawan Johnwanqa imaymana problemakunapiña tarikuspapas kusisqalla kasharanku. Diana nin: “Jehová Diosmanmi jap’ipakurani, imaynan juj wawaqa papanman jap’ipakun jinata”, nispa. Nillantaq: “Jehová Diosmi yanapawaran kusisqalla predicashanaypaq”, nispa. Johnri, ¿imanintaq? Paymi nin: “1998 watapin nombrawaranku Escuela de Entrenamiento Ministerial nisqa escuelapi profesor kanaypaq, chaypiraqmi yacharani imas estudiay kasqanta; chaypi estudiay yachasqaymi yanapawaran watukuq umalli kasqayta saqepuqtiy kusisqalla kashanaypaq”, nispa. Chayraykun paypaq esposanpaqpas facil-lla karan cambiota aceptay, paykunaqa Jehová Diospa munayninta ruwanankupaqmi listolla kasharanku, nillantaq: “Manan imamantapas arrepientekuykuchu”, nispa.

Askha hermanokunan Salmos 64:10 textoq nisqanqa ciertopuni kasqanta rikuranku. Yachasunchis 30 watakuna Estados Unidos Betelpi llank’aq juj matrimoniomanta, paykunaqa juj congregacionpi precursor especial kanankupaqmi asignasqa karanku. Paykunan ninku: “Gustasqayki llank’ayta saqepuqtiykiqa nishu llakisqan sientekunki. Ichaqa manan chhaynallachu tukuy tiempo kanayki”, nispa. Paykunaqa ratollan congregacionpa ruwayninkunapiña kasharanku. Nillankutaq: “Jehová Diosmantan ima munasqaykuta mañakurayku. Rikuraykun imaynata Jehová Dios kutichimuwasqankuta, chaymi anchata kusichiwaranku animawaranku ima. Pisi tiempollaraq congregacionpi kashaqtiykun juj hermanokunapas precursor kapuranku. Chaymantapas iskay estudiotan qosharaykuña, paykunaqa iñiyninkupin wiñasharanku”, nispa.

Mayninpiqa manan kusisqallapunichu kausanchis, mayninpiqa llakisqan tarikunchis. Ichaqa Jehová Diosmi consolawanchis Salmos 64:10 textoq nisqanwan. Mayninpiqa desanimasqaña kasun chaypas, confiananchismi “chanin runaqa Señor Dioswanmi kusikunqa” nisqa simikunapi. Sichus Jehová Diosllawanpuni kashasun chayqa imapiña tarikuspapas kusisqallapunin kasun. Suyakushanchismi “mosoq janaq pachata mosoq allpa pachatawanmi kamasaq” nispa Dios prometewasqanchista. Chaypin ichaqa Diosta serviqkunaqa perfecto kaspa ‘wiñaypaq kusikunqaku’, Jehová Diosmi kusikunankupaq tukuyta ruwanqa (Is. 65:17, 18).

Jehová Diospa promesanpi piensasun: manañan onqosunñachu, sapa p’unchaymi tukuyta ruwananchispaq kallpanchis kanqa. Sinchi llakiq ñit’isqanña tarikuranchis chaypas qonqasqan kapunqa. Jehová Diosmi prometewanchis “ñaupaq sucedesqankunaqa qonqasqan kapunqa” nispa. Kausarimpuy kasqanwanmi wañupuqninchiskunawan jujmanta tupasunchis. Millón-millón runakunan mana jayk’aq kusikusqankuta kusikunqaku, imaynan Jesuspa kausarichisqan sipaspaq “tayta-mamanqa anchatapuni admirakuspa kusikuranku” jinata (Mar. 5:42). Llapa runakunapaq tukuy imaymanapi ch’uya kapunanku p’unchaymi chayamunqa, chaypin wiñaypaq “chanin runaqa Señor Dioswanmi kusikunqa”.