1. ¿Imatan Jehová Dios ruwan tukuy atiyniyoqña kashaspapas?

TUKUY atiyniyoq Jehová Diosmi tukuy imatapas kamaran, manan pay jinaqa pipas kanmanchu. Chaymi Jobqa niran Diosqa tukuy ima munasqanta ruway atisqanta (Job 42:2). Jinaspapas Diosqa manan necesitanchu jujpa yanapayninta, chaywanpas jujkunaq llank’aysinantan munan. ¿Imarayku? Sinchita paykunata munakusqanrayku.

2. ¿Ima llank’aytan Jehová Dios Jesusman qoran?

² Manaraq imatapas kamashaspan Jehová Diosqa Jesusta kamaran. Chaymantataq paywan kuska tukuy imaymanata kamaranku (Juan 1:1-3, 18). Apóstol Pablon Jesusmanta niran: “Paywanmi Diosqa kamaran janaq pachapi tukuy ima kaqkunatapas, kay pachapi kaqkunatapas, rikusqa kaqkunatapas, mana rikusqa kaqkunatapas [...] Cristowanmi, Cristopaqmi tukuy imapas kamasqa karan”, nispa (Col. 1:15-17). Chay llank’aytan Jehová Diosqa Jesusman qoran,  llapa runaq yachananpaqtaq Bibliapi qelqachiran.

3. a) ¿Imata ruwananpaqmi Jehová Dios Adanta kamachiran? b) ¿Imaraykun chay llank’anata qoran?

³ Jehová Diosqa runakunaq llank’aysinantan munallantaq. Ejemplopaq, Adantan kamachiran animalkunaman sutita churananpaq (Gén. 2:19, 20). Chaypaqqa sapanka animalpa imayna kasqantachá makilla qhawaran. Anchatachá chayta ruwaspa kusikuran. Chaytaqa Jehová Dios kikinmi ruwanman karan, ichaqa Adanta munakusqanraykun chay llank’anata qoran. Jinaspapas kay pachata paraisoman tukuchinanpaqmi kamachiran (Gén. 1:27, 28). Tiempowanmi Adanqa manaña Jehová Dioswan llank’ayta munaranñachu, chayraykun llapa runakuna sinchita ñak’arinchis (Gén. 3:17-19, 23).

4. ¿Pikunan Jehová Diosta llank’aysiranku paypa munaynin ruwakunanpaq?

⁴ Watakuna qhepamanmi Jehová Diosqa juj runakunawanñataq llank’aran. Ejemplopaq: Noemi arcata ruwaran paypas familianpas jatun paramanta salvakunankupaq. Moisesmi Israel llaqtata Egiptomanta orqomuran. Josuemi Israel llaqtata prometesqa allpaman pusaran. Salomonmi Jerusalenpi Dios yupaychana wasita ruwaran. Mariataq Jesuspa maman karan. Paykunapas juj junt’aq sonqo runakunapas Jehová Diostan llank’aysiranku munaynin ruwakunanpaq.

5. a) ¿Ima llank’aytan llapallanchis ruwasunman? b) ¿Necesitanchu Jehová Dios llank’aysinanchista? (27 paginapi dibujota qhaway.)

⁵ Kunanpas Jehová Diosqa invitawanchismi gobiernonta apoyananchispaq. Chaymi imaymana llank’aykuna kashan. Manaña llapanpichu llank’asun chaypas, llapanchismi allin willakuykunata predicasunman. ¿Necesitanchu Jehová Dios llank’aysinanchista? Manan. Munaspaqa pay kikinmi janaq pachamanta runakunaman willamunman. Jesuspa nisqan jina, allin willakuykunata runakuna yachanankupaqqa rumikunataraqsi Diosqa rimachinman (Luc. 19:37-40). Jehová Diosmi ichaqa ‘llank’aysiq-masinkuna’ kananchista munan (1 Cor. 3:9). Apóstol Pablon nin: “Diospa llank’ananpi llank’aysikuq kaspayku, qankunata valekuykiku Diospa sumaq sonqo-kayninta ama pisichanaykichispaq”, nispa (2 Cor. 6:1). Jehová Dioswan llank’ayqa ancha sumaqpunin kusichiwanchistaqmi. ¿Imaynapi? Chayta yachasun.

6. ¿Imaynan Jesús sientekuran taytanwan llank’aspa?

⁶ Jehová Diospa siervonkunaqa anchatan kusikunchis payta llank’aysispa. Chhaynatan Jesuspas sientekuran janaq pachapi Dioswan llank’aspa. Jinaspapas yacharanmi Diospa ancha munakusqanta, chaymi niran: ‘Tukuy tiempo ñaupaqenpi kusisqa kasharani’, nispa (Prov. 8:22, 30, Traducción del Nuevo Mundo). Payqa ancha kusisqan karan imaymanapi llank’asqanmanta, Jehová Diospa munakusqanmantapas. ¿Noqanchisri? ¿Pay jinachu kusisqa kanchis?

7. ¿Imaraykun predicaspa kusisqa kanchis?

⁷ Jesuspa nisqan jina kusikunchismi jujkunaman  imatapas qospa, ichaqa kusikullanchistaqmi chaskispapas (Hech. 20:35). Bibliamanta yachashaspaqa anchatan kusikuranchis. Jujkunata yachachispapas anchatan kusikunchis. ¿Imanaqtin? Kausayninkuta cambiaqtinku, kusisqa kaqtinku ima. Yachallanchistaqmi Dioswan amigo kaspaqa wiñay kausayta chaskinankuta (2 Cor. 5:20). Predicayqa ancha sumaq llank’aymi anchatataqmi kusichiwasunmanpas.

8. ¿Ima ninkun wakin testigokuna Jehová Dioswan llank’asqankumanta?

⁸ Jujkunata Bibliamanta yachachiqtinchisqa Jehová Diosmi kusikun sumaqtataqmi qhawarinpas; chayta yachayqa anchatan kusichiwanchis (leey 1 Corintios 15:58). Italia nacionmanta Marco iñiqmasin nin: “Anchatan kusikuni Jehová Diosta tukuy sonqoywan servisqaymanta, payqa manan qonqanqachu ruwasqayta”, nispa. Italia nacionmanta Franco iñiqmasitaq nin: “Jehová Diosqa sapa p’unchaymi yuyarichiwanchis Bibliawan, qelqanchiskunawan juñunakuykunawanpas anchata munakuwasqanchista. Ruwasqanchista pisipaqña qhawarinchis chaypas, payqa anchatan valoran. Chayraykun Jehová Diospaq llank’ayqa anchata kusichiwan”, nispa.

9. a) ¿Imaynatan Jesús taytanwan kausaran? b) ¿Iman Jesusta taytanwan jujllacharan?

⁹ Munakusqanchis runawan llank’aspaqa astawanmi jujllachakunchis. Chhaynapin astawan payta reqsinchis, yachanchismi imachus ruway munasqanta imakunatas chaykunaman aypananpaq ruwashan chaytapas. Jesuspas chhaynatan waranqa-waranqa watakuna Jehová  Dioswan llank’aran kay pachaman manaraq jamushaspa. Chhaytukuy tiempo kuska llank’asqankuraykun astawan munanakuranku, astawantaq jujllachakuranku. Chaymi Jesusqa taytanwan imayna kausasqankumanta niran: “Noqawan Yayawanqa jujllan kayku”, nispa (Juan 10:30). Ari, paykunaqa kuskan llank’aqku sumaqtataqmi yanapanakuqku; chhaynapin astawan jujllachakuranku.

10. ¿Imaraykun predicasqanchis Jehová Diosman iñiqmasinchiskunamanpas jujllachawanchis?

¹⁰ Jesusmi Jehová Diosmanta mañakuran qatikuqninkunata cuidananpaq, chhaynapi paykunapas “jujllapuni kanankupaq” (Juan 17:11). Sichus Diospa kamachikuyninkunata kasukusun predicasunpas chayqa, astawanmi payta reqsisunchis. Chhaynapitaqmi entiendesunchis payllata kasukunanchis kasqanta, paypi confiananchis kasqantapas. Chaymantapas payta astawan reqsispaqa amigontinmi kasunchis (leey Santiago 4:8). Predicayqa iñiqmasinchiskunamanmi jujllachawallanchistaq. Llapallanchismi Jehová Diosta kusichiyta munanchis, chaymi kuska llank’anchis, kusikunchis, sasachakuykunatapas aguantanchis. Gran Bretaña llaqtamanta Octavia iñiqmasin niran: “Jehová Diospaq llank’ayqa jujllachawanmi payman, iñiqmasiykunamanpas”, nispa. ¿Imaraykun chayta niran? Amigonkunapas Diosta serviyta munasqankuraykun. Noqanchisri, ¿Octavia jinachu sientekunchis?

11. ¿Imaynapin paraisopi astawanraq jujllachakusun Jehová Diosman iñiqmasinchiskunamanpas?

¹¹ Rikusqanchis jina Jehová Diostapas iñiqmasinchiskunatapas munakunchismi. Ichaqa paraisopin astawanraq munakusun. Chaypiqa iñiqmasinchiskunawanmi kuska llank’asun, kausarimpuqkunatan chaskisun Jehová Diosmantapas yachachillasuntaq. Chaymantapas allpantintan paraisoman tukuchisun. ¡Ima munaychá Cristoq gobiernonpi kuska llank’ayqa kanqa! Pisi-pisimantan perfecto runaman tukupusunchis. Sapa p’unchaytaqmi Jehová Dioswan iñiqmasinchiskunawanpas astawan jujllachakusunchis, payqa tukuy munasqanchistan qowasun (Sal. 145:16).

12. ¿Imakunamantan predicay cuidawanchis?

¹² Saqraq kamachisqan pachapin kausanchis pantaq runataqmi kanchispas, chaymi mana allinkunata piensasunman otaq Diosta mana kasukuq runakuna jina imatapas ruwasunman. Chayraykun cuidananchis Jehová Dioswan amigo kasqanchista, chaypaqmi ichaqa kallpachakunanchis. Chay kallpachakuymi rijch’akun mayuq contranpi nadayman, chayqa sinchi sasan. Predicaspan ichaqa Jehová Dioswan amigontin kasqanchista  cuidanchis, ¿imaynata? Jujkunaman Diosmanta rimaspaqa allinkunapin piensanchis, manataqmi iñiyninchista pisipachiq ruwaykunapichu (Filip. 4:8). Predicaspaqa aswan allin iñiyniyoqmi kanchis, Diospa promesankunatan, kamachikuyninkunatan yuyarinchis. Chaymantapas Saqramanta mana allin runakunamantawan cuidakunanchispaqmi yanapawanchis (leey Efesios 6:14-17).

13. ¿Imaraykun Australia nacionmanta iñiqmasi predicacionta valoran?

¹³ Jinaspapas predicaspa, estudiaspa iñiqmasikunatapas yanapaspan mana nishutachu problemanchiskunamanta llakikunchis. Australia nacionmanta Joel iñiqmasin willakun anchatapuni predicacionta valorasqanta, predicaspas sut’ita rikun llapa runakuna sinchi problemakunapi tarikusqankuta, paytaqsi Diospa kamachikuyninkunata kasukusqanrayku kusisqa kausan. Paymi nin: “Predicacionmi yanapawan humilde kanaypaq, Jehová Diospi iñiqmasiykunapipas confianaypaq”, nispa.

14. ¿Imaynapin yachanchis santo espiritunwan Diospa yanapawasqanchista?

¹⁴ Chaymantapas predicacionmi rikuchiwanchis Jehová Dios santo espiritunwan yanapawasqanchista. Chaypaq kay ejemplopi piensasun. T’antata rakispa llank’anaykipaq contratasunkikuman, manataq llank’asqaykimanta pagasunkikumanchu, rakisqayki t’antatataq runakuna mana munankumanchu, aswanpas phiñakunkuman, cheqnikusunkikuman manataq rikuytapas munasunkikumanchu, ¿llank’ashallawaqchu? Manachá. Noqanchispas chhaynapin tarikunchis Diospa siminmanta predicaspa. Runakunaña mana uyarikunkuchu chaypas tiemponchista qolqenchista gastaspan sapa watan predicashallanchis. ¿Manachu chay rikuchiwanchis santo espiritunwan Diospa yanapawasqanchista?

15. ¿Imaraykun predicación ancha importante?

¹⁵ Predicacionqa ancha importanten, chaywanmi runakunapaq Diospa munaynin junt’akunqa. Jehová Diosmi munaran runakuna kay pachapi wiñaypaq kausanankuta, Adán juchallikuranña chaypas Diosqa manan munayninta cambiaranchu (Is. 55:11). Chaypaqmi Jehová Dios churin Jesucristota kay pachaman kachamuran noqanchisrayku wañunanpaq, chhaynapi juchamanta wañuymantapas salvawananchispaq. Sichus beneficiakuyta munanchis Jesuspa sacrificionmanta chayqa, Diostan kasukunanchis. Chaypaqmi yachananchis imakunachus kamachikusqanta. Jesusqa kay pachapi  kashaspan Diospa kamachikuyninkunata yachachiran, kamachirantaqmi discipulonkunata jujkunaman yachachinankupaq. Noqanchispas predicaspan runakunaman yachachinchis Diospa kamachikuyninkunata, chhaynapi salvakunankupaq Dioswan amigontin kanankupaqpas.

16. ¿Imatan predicaspa rikuchinchis?

¹⁶ Juj religioso umallin Jesusta tapuran mayqensi aswan jatun kamachikuy kasqanta. Jesustaq kutichiran: “‘[Jehová] Diosniykitan munakunki tukuy sonqoykiwan, tukuy almaykiwan, tukuy yuyayniykipiwan’. Chaymi aswan chaniyoq ñaupaqkaq kamachikuyqa. Iskaykaq aswan chaniyoqqa kaymi: ‘Runamasiykitan qan kikiykita jina munakunki’”, nispa (Mat. 22:37-39). Sichus predicasun yachachisun chayqa, Jehová Diosta runamasinchiskunatapas munakusqanchistan rikuchisunchis (leey Hechos 10:42). Jehová Diosmi munan “llapa runakuna qespichisqa kanankuta, cheqaq-kayta reqsinankutapas” (1 Tim. 2:4).

17. ¿Ima niwaqmi Jehová Diospa llank’aysiqmasin kasqaykimanta?

¹⁷ Jehová Diospa llank’aysiqmasin kayqa anchatan kusichiwanchis. Predicaspaqa kusikunchismi, astawanmi Diosman iñiqmasinchiskunamanpas jujllachawanchis, cuidawanchistaqmi mana allinkunamantapas. Chaymantapas Jehová Diosta runamasinchista munakusqanchistan rikuchinchis. Kuraqña, wayna-sipasña, wajchaña otaq qhapaqña kanchis chaypas, llapanchismi tukuy atisqanchista kallpachakunanchis predicananchispaq. Francia nacionmanta iñiqmasinchis jinan sientekunchis, paymi nin: “Noqaqa sientekuni tukuy atiyniyoq Diospas kay jinata niwashanman jinan: ‘Phaway, noqamanta tukuy sonqoykiwan predicamuy, noqan kallpachasayki, simiy qelqata qosayki, angelkunawan yanapachisayki, compañerokunatapas qosayki, yachachisaykitaqmi imayna predicaytapas’, nispa. ¡May sumaqmi Jehová Diospa munayninta ruwayqa llank’aysiqmasin kaypas!”, nispa.