1, 2. a) ¿Imatan Jehová Dios qelqachiran tiemponchispi junt’akunanpaq? b) ¿Imakunamantan kay estudiopi yachasun? (Kay paginapi dibujota qhaway.)

KAY tiemponchispi junt’akunanpaqmi Jehová Dios qelqachiran kay profeciata, ninmi: “Chay p’unchaykunapin suyukunapi kaq imaymana rimay rimaqkunamanta chunka runa juj judío runata capanmanta qaqata jap’iykuspa ninqa: ‘Noqaykun uyariyku qankunawan Dios kashasqanta, chayrayku pusakapuwayku’, nispanku”, nispa (Zac. 8:23). ‘Judío runan’ representan ajllasqa cristianokunata, Biblian paykunata sutichan “Diospa cheqaq Israel llaqtan” nispa (Gál. 6:16). ‘Chunka runakunataq’ representan kay pachapi tiyanankupaq suyakuyniyoqkunata. ¿Imaraykun ajllasqa cristianokunawan riyta munanku? Jehová Dios paykunawan kasqanraykun, paykunawan kuska Diosta adorayta munasqankuraykupiwan.

² Zacarías jinan Jesuspas yachachiran Diospa llaqtanqa juj nisqalla kananta. Jesusmi suticharan janaq pachapi  tiyanankupaq suyakuyniyoqkunata ‘pisi t’aqa ovejakuna’ nispa, kay pachapi tiyanankupaq suyakuyniyoqkunatataq ‘waj ovejaykuna’ nispa niran. Chaymantapas niranmi llapallanku ‘ch’ulla t’aqalla’, ‘juj michiqnillayoq’ kanankuta (Luc. 12:32; Juan 10:16). Yaqapaschá ichaqa tapukusunman: “¿Yachananchischu kay tiempopi janaq pachaman ripuqkunaq sutinta? ¿Imaynatan ajllasqa cristianokuna portakunanku? Jesuspa wañupusqanta yuyarina p’unchaypi pi iñiqmasipas t’antata mijuqtin vinotapas ujaqtin, ¿imaynatan qhawarina? ¿Imanaqtinmi mana llakikunachu ajllasqa cristianokunaq yapakusqanmanta?”, nispa. Chaykunatan kay estudiopi yachasun.

3. ¿Imanaqtinmi mana yachayta atisunmanchu janaq pachaman pikunachus rinankuta?

³ ¿Yachananchischu kay tiempopi janaq pachaman ripuqkunaq sutinta? Manan. ¿Imanaqtin? Manan yachanchischu pikunatachus janaq pachaman rinankupaq jujpaqkama Dios sellanqa chayta. [1] Chay sellonkutan chaskinqaku wañupunankupaq pisillaña faltashaqtin otaq ‘manchay ñak’ariy’ tiempo qallarinanpaqña kashaqtin (Apo. 2:10; 7:3, 14). Saqrapas chaytaqa yachanmi, chaymi paykunata ‘llulla profetakunawan’ engañayta munan (Mat. 24:24). Chayraykun ajllasqakunaqa Diospaq junt’aq sonqo kananku.

4. ¿Imanaqtinmi waj ovejakuna ajllasqa cristianokunata ninku “pusakapuwayku” nispa sutinkuta mana yachashaspa?

⁴ ¿Imanaqtinmi waj ovejakuna ajllasqa cristianokunata ninku “pusakapuwayku” nispa sutinkuta mana yachashaspa? Biblian willan chunka runakuna judío runaq capanmanta jap’ipakuspa kay nisqankuta: “Noqaykun uyariyku qankunawan Dios kashasqanta, chayrayku pusakapuwayku”, nispa. Ichaqa, ¿imaraykun ch’ulla judío runamanta rimashaspa ‘qankuna’ nispa nin? Llapa ajllasqa cristianokunata judío runa representasqanraykun. Kay pachapi tiyanankupaq suyakuyniyoq runakunaqa yachankun chhayna kasqanta, chaymi ajllasqa cristianokunawan rinku. Chayqa Jehová Diosta paykunawan kuska adorasqankun; manan sapanka ajllasqa cristianowanchu adoranku aswanpas grupontinwanmi. Chayraykun mana necesitankuchu ajllasqa cristianokunaq sutintaraq yachayta, runakunatapas qatikushankuman jina. Biblian nin Jesusllata qatikunanchista, manan runatachu (Mat. 23:10).

5. a) ¿Bibliaq ima nisqantan ajllasqa cristianokuna kasukunanku? b) ¿Imaraykun kasukunankupuni?

⁵ Jesuspa wañupusqanta yuyarina p’unchaypi t’antamanta vinomantawan participaqkunaqa kasukunankun 1 Corintios  11:27-29 textopi nisqanta (leey). Sichus juchapi kausashaspa participanku chayqa, Diostan mana respetashankuchu (Heb. 6:4-6; 10:26-29). Ajllasqakunaqa Diospaqmi junt’aq sonqo kananku, mana jinaqa premionkutan mana chaskinqakuchu (Filip. 3:13-16).

6. ¿Imaynatan ajllasqa cristianokuna portakunanku?

⁶ Apóstol Pablon ajllasqa cristianokunata niran: “Valekuykichis Diospa wajasqankuna jinapuni allinta kausanaykichispaq. Chaypaqmi Diosqa wajarasunkichis”, nispa. Chaymantataq willaran imaynata chayta ruwanankuta, niranmi: “Qankunaqa juch’uyyaykukuywan, llamp’u sonqo kaywan, pacienciawan, munakuypi muchunakuspaykichis kausaychis”, nispa. Jinaspapas niranmi juj nisqalla thajpi kausanankuta (Efes. 4:1-3). Santo espiritun yanapan juch’uyyaykukuq kanankupaq (Col. 3:12). Chaymi ajllasqa cristianokunaqa mana jujkunamanta aswan allinpaqchu qhawarikunku. Manataqmi aswan askha santo espirituyoq kanankupaqchu creekunku, nitaqmi jujkunamanta aswan allinta Bibliata entiendenankupaqchu piensanku. Jinaspapas manan pitapas ninkuchu “ajllasqan kanki” nispaqa. Aswanpas humilde kaspan entiendenku Jehová Dioslla janaq pachaman riqkunata ajllasqanta.

7, 8. ¿Imakunatan ajllasqa cristianokuna mana ruwankuchu, imarayku?

⁷ Anchataña kusikunku ajllasqa cristianokuna janaq pachapi tiyanankupaq invitasqa kasqankumanta chaypas, manan chayraykuchu munanku aswan allinpaq qhawarisqa kayta (Efes. 1:18, 19; leey Filipenses 2:2, 3). Jehová Diosqa pitapas ajllaspaqa manan lliu runamanraqchu willan, chaymi ajllasqa cristianoqa mana phiñakunchu pipas ajllasqa kasqanta mana creeqtin. Payqa yachanmi runakunaq nisqanta mana creenapachachu kasqanta (Apo. 2:2). Chaymantapas juj cristianota reqsispaqa manan willanpachachu ajllasqa kasqanta. ¿Imarayku? Admiranankuta mana munasqanrayku. Yaqapaschá mana pimanpas willanmanchu ajllasqa kasqanta. Jinaspapas manan alabakunchu janaq pachapi sumaq ruwanankunamanta (1 Cor. 1:28, 29; leey 1 Corintios 4:6-8).

⁸ Chaymantapas manan sapaq t’aqamantapas kankuman jinachu ajllasqapuralla juñukuspa sumaqta pasarinku. Manan juj ajllasqakunatachu maskhanku paykunawan parlarinankupaq otaq Bibliata estudianankupaq (Gál. 1:15-17). Sichus chaykunata ruwankuman chayqa, Diospa llaqtanpin t’aqakuna sayarinman. Manataqmi thaj kayta, juj nisqalla kausayta qoq santo espirituq nisqanman jinachu ruwashankuman (leey Romanos 16:17, 18).

9. ¿Imaraykun ajllasqa cristianokunata mana jatunchanachu? (Qhaway “ Munakuqqa ‘manan mana ruwanakunatachu ruwan’” nisqa recuadrota.)

⁹ Jesusmi qatikuqninkunata niran: “Llapaykichismi wayqellantin kankichis”, nispa. Jinamantaq niran: “Pipas jatunchakuqqa juch’uyyachisqan kanqa, pipas juch’uyyaykukuqtaq  jatunchasqa kanqa”, nispa (Mat. 23:8-12). Chaymi mana allinchu kanman ajllasqa cristianokunata alabayqa. Bibliaña niwanchis iñiq t’aqapi umallikunaq ruwasqankuta jina ruwananchista chaypas, manan chaywanqa niwashanchischu runakunata qatikunanchistachu (Heb. 13:7). Biblian nillantaq ajllasqaña otaq mana ajllasqaña kankuman chaypas, sichus predicaypi yachachiypiwan sinchita llank’anku chayqa, astawan respetananchis munakunanchis kasqanta, ichaqa manan ajllasqa cristiano kasqankuraykuchu chaytaqa ruwananchis (1 Tim. 5:17). Sichus alabasun chayqa, p’enqachisunmanmi otaq jatunchakuqman tukuchisunman (Rom. 12:3). Chayqa mana allinninkupaqmi kanman. Manapunin munanchischu juchaman urmaspa premionkuta pierdenankutaqa (Luc. 17:2).

10. ¿Imaynatan rikuchisunman ajllasqa cristianokuna respetasqanchista?

¹⁰ ¿Imaynatan rikuchisunman ajllasqa cristianokuna respetasqanchista? Manan tapunanchischu ajllasqa kasqanta imaynapi yachan chayta (1 Tes. 4:11; 2 Tes. 3:11). Jinaspapas manan piensanchischu tayta-mamanpas, esposanpas otaq qosanpas juj parientenkunapas ajllasqa kanankupaqqa. Ajllasqa kayqa manan herenciachu (1 Tes. 2:12). Chaymantapas manan tapunanchischu p’enqachiq otaq llakichiq tapuykunataqa. Ejemplopaq, yaqapaschá ajllasqa cristianoq esposanta tapuyta munasunman: “¿Imaynan sientekunki paraisopi qosaykiwan mana tiyanaykimanta?”, nispa. Yaqapaschá chayta tapuqtinchisqa llakikunman. Aswanpas confianchismi paraisopiqa Jehová Dios lliu necesitasqanchista qowananchispi (Sal. 145:16).

11. ¿Imaraykun mana runakunatachu admiraspa qatikunanchis?

¹¹ Ajllasqa cristianokunata llapa iñiqmasinchiskunata jina qhawariyqa allinninchispaqmi kanqa. ¿Imanaqtin? Biblian willan iñiq t’aqaman ‘llulla wayqekuna’ jaykumunankuta, yaqapaschá ninkuman ajllasqan kani nispa (Gál. 2:4, 5; 1 Juan 2:19). Jinaspapas yaqapaschá wakin ajllasqa cristianokunaqa mana junt’aq sonqochu Diospaq kapunkuman (Mat. 25:10-12; 2 Ped. 2:20, 21). Chayraykun mana paykunata ni pitapas admirananchischu, chayta ruwaspaqa Diospa llaqtanta saqeqtinkun iñiyninchispi pisipapusunman (Jud. 16).

12, 13. ¿Imaraykun mana llakikunanchischu t’antamanta vinomantawan participaqkunaq yapakusqanwan?

¹² Ñaupa watakunapiqa pisiyapusharanmi t’antamanta vinomantawan participaqkuna. Kay watakunapin ichaqa astawan yapakushan. ¿Llakikunanchischu chaymanta? Manan. ¿Imarayku?

¹³ Jehová Diosqa “reqsinmi paypa kaqkunataqa” (2 Tim. 2:19). Paymi yachan pikunapunichus janaq pachaman rinankuta. Jesuspa wañupusqanta yuyarina p’unchaypi t’antamanta vinomantawan participaqkunata yupaqkunaqa, manan  yachankuchu cheqaqpaqchu ajllasqa chay cristianokuna icha manachus chayta. Paykunaqa yupallankun. Ejemplopaq, wakinqa tiempowanmi reparanku mana ajllasqachu kasqankuta, wakintaq umankumanta mal kaspa ajllasqa kanankupaq piensanku. Chayraykun manapuni sut’itaqa yachasunmanchu jayk’a ajllasqakunaraqsi kay pachapi kashanku chayta.

14. ¿Ima ninmi Biblia manchay ñak’ariy qallariqtin jayk’a ajllasqa cristianokunachus kay pachapi kanankumanta?

¹⁴ Ajllasqa cristianokunata janaq pachaman apakapunanpaq Jesús jamuqtinqa, pachantinpin ajllasqakunaqa kashanqaku. Biblian nin: “Angelninkunata kachamunqa trompetata sinchita tocaqtinku teqsimuyuntinmanta ajllakusqankunata juñumunankupaq”, nispa (Mat. 24:31). Bibliaqa willallantaqmi tukukuy p’unchaykunapiqa pisillaña kay pachapi ajllasqakunaq kananta (Apo. 12:17). Ichaqa manan willanchu manchay ñak’ariy qallariqtin jayk’achus kay pachapi qhepanankuta.

15, 16. ¿Imakunatan entiendenanchis ajllasqa cristianokunamanta?

¹⁵ Jehová Diosmi yachan ima ratopi ajllayta (Rom. 8:28-30). Jesuspa kausarimpusqan qhepamanmi Jehová Diosqa janaq pachaman riqkunata santo espiritunwan ajllayta qallariran. Chay tiempopiqa llapa cristianokunachus jina ajllasqa karanku. Tiempowanmi ichaqa askha cristianokuna mana cheqaq cristianokunachu karanku, chaywanpas Diosqa  cheqaq cristianokunataqa ajllashallaranmi. Paykunan karanku mana allin qora ukhupi trigo jina (Mat. 13:24-30). Tukukuy p’unchaykunapipas Jehová Diosqa kaqllan ajllashan janaq pachaman rinankupaq. [2] Sichus manchay ñak’ariy qallarinanña kashaqtin pitapas Dios ajllanqa chayqa, confianchismi allinta ruwashasqanpi (Is. 45:9; Dan. 4:35; leey Romanos 9:11, 16). [3] Manan munanchischu willakuypi Jesuspa nisqan llank’aqkuna jina kaytachu. Paykunaqa patronninkumantan rimapakuranku chayllaraq llank’aq jamuqkunata igualta pagasqanmanta (leey Mateo 20:8-15).

¹⁶ Manan llapa ajllasqa cristianokunachu allin yuyayniyoq junt’aq kamachi t’aqamanta kanku (Mat. 24:45-47). Ñaupa tiempopiqa wakin ajllasqa cristianokunallawanmi Jehová Diospas Jesuspas runakunata yachachiranku. Ejemplopaq, wakin cristianokunallan Bibliata griego simipi qelqaranku. Chay jinallataqmi kunanpas, Diosqa pisi ajllasqakunallawanmi llaqtanta yachachishan. Paykunatan nikun allin yuyayniyoq junt’aq kamachi nispa.

17. ¿Imatan kay estudiopi yacharanchis?

¹⁷ ¿Imatan kay estudiopi yacharanchis? Jehová Diosmi decidiran yaqa llapa siervonkuna kay pachapi wiñaypaq tiyanankuta, Jesuswan kuska reykunataq janaq pachapi tiyanankuta. Jehová Diosqa llapa siervonkunatan bendicen, jinaspapas llapa siervonkuna junt’aq sonqo humilde kanankutan munan, juj nisqalla servinankuta, thaj kay kananpaq kallpachakunankutapas. Chhaynaqa, janaq pachapiña kay pachapiña tiyasun chaypas, llapanchismi Jehová Diosta servinanchis Jesustapas qatikunanchis.