1, 2. ¿Imanaqtinmi Jonatán Davidwan amigontin kasqan, junt’aq sonqo kasqanpas admirakunapaq?

DAVIDMI waynallaraq kashaspa Goliat-ta wañuchiran, jinan umanta qhoruspa rey Saulman aparan. Payqa Jonatanpa taytanmi karan, Jonatanqa admirasqan Davidpa ruwasqanwan kasharan (1 Sam. 17:57). Jonatanqa allintan yacharan Davidqa Diospa yanapayninwan chayta ruwasqanta, chaymantapachan allin amigontin kapuranku. Iskayninkutaq prometenakuranku imapiña tarikuspapas yanapanakunankupaq (1 Sam. 18:1-3). Chhaynapunitaqmi karan.

² Jonatán Davidwan amigontin kasqan, junt’aq sonqo kasqanpas admirakunapaqmi. ¿Imanaqtin? Jonatanqa reypa churinmi karan, chaymi payqa rey kanan karan. Ichaqa manan paytachu rey kananpaq Dios ajllaran, aswanpas Davidtan ajllaran. Chaywanpas Jonatanqa kaqllan Davidta munakusharan. Davidta wañuchinanpaq rey Saúl maskhashaqtinmi, Jonatanqa ancha llakisqa amigonmanta kasharan. Payqa  yacharanmi Hores ch’inneqpi kashasqanta, jinan chayman rispa kallpacharan Jehová Diospi confiashanallanpaq. Niranmi: “Ama manchakuychu, manan taytay Saulqa tarisunkichu. Qanpunin Israelpi reyqa kanki, noqataq qanman qatiq kamachikuq kasaq”, nispa (1 Sam. 23:16, 17).

3. a) ¿Iman aswan importante Jonatanpaq karan? b) ¿Imaynapin chayta yachanchis? (14 paginapi dibujota qhaway.)

³ Junt’aq sonqo runakunaqa ancha munasqan kanku. Jonatanpas chhayna runan karan, payqa Davidpaqmi junt’aq sonqo karan, ichaqa astawanqa Jehová Diospaqmi. Chaymi Davidtapas munakushallaran, manataqmi rey kananmanta envidiakuranchu. Chaymantapas Davidtan yanaparan Jehová Diospi confiananpaq. Chaymi prometenakuranku: “Señor Diosmi testigonchis, jinallataq mirayniykipaqpas mirayniypaqpas wiñaypaq testigo kanqa”, nispa (1 Sam. 20:42). Iskayninkun prometekusqankuta junt’aranku.

4. a) ¿Iman astawan kusichiwanchis? b) ¿Imatan kay estudiopi yachasun?

⁴ Noqanchispas tukuy tiempon munakushanallanchis familianchista, amigonchiskunata, iñiqmasinchiskunatapas (1 Tes. 2:10, 11). Ichaqa astawanqa Jehová Diostan munakunanchis pay kamawasqanchisrayku (Apo. 4:11). Imapiña tarikuspapas Jehová Diostan munakushanallanchis, chhaynapin kusisqa kausasunchis. Ichaqa, ¿imaynatan Diospaq junt’aq sonqo kasunman autoridadniyoq runa mana respetanapaq kaqtin? ¿Imatan ruwasunman pimanchus junt’aq sonqo kananchispaq decidinanchis kaqtin? ¿Imaynatan Diospaq junt’aq sonqo kasunman autoridadniyoq iñiqmasi mana chaninta ruwawaqtinchis? ¿Imaynatan Diospaq junt’aq sonqo kasunman prometekusqanchis sasa junt’ana kaqtin? Kay estudiopin chay tapuykunata kutichisun. Chaymi yanapawasun Jonatán jina junt’aq sonqo kananchispaq.

5. ¿Imanaqtinmi Israel runakunapaq sasa karan Diospaq junt’aq sonqo kay?

⁵ Jonatanpaqpas wakin Israel runakunapaqpas Diospaq junt’aq sonqo kayqa sasan karan. ¿Imanaqtin? Saulmi Jehová Diosta mana kasukusharanchu. Payqa ‘Diospa kamachikuy tiyananpin’ rey tiyaykuran, ichaqa mana allinkunatan ruwasharan (1 Crón. 29:23). Chaymi Diosqa manaña munaranchu rey kananta (1 Sam. 15:17-23). Chaywanpas dejallaranmi askha watakuna Israel llaqtapi kamachikunanta.

6. ¿Imaynapin yachanchis Jonatán Diospaq junt’aq sonqo kasqanta?

⁶ Rey Saulqa manan Diosta kasukuranchu, chaywanpas Jonatanqa Diospaq junt’aq sonqollan karan. ¿Imaynapin chayta yachanchis? (1 Sam. 13:13, 14.) Chay tiempopaqqa Filistea llaqtamanta soldadokunan 30.000 carretakunantin Israel llaqtawan maqanakuq riranku. Israel llaqtapin ichaqa 600 soldadokunalla karanku, jinaspapas Saulwan Jonatanllawanmi espadayoq lanzayoq karanku. Chaywanpas Jonatanqa manan manchakuranchu, yuyariranmi profeta Samuelpa nisqanta. Chay profetan niran: “Diosmi Israeltaqa llaqtachakapuran, chaymi payqa mana saqerparinqachu qhapaq sutin ama sarunchasqa  kananpaq”, nispa (1 Sam. 12:22). Chayraykun Jonatanqa yanapaqninta niran: “Señor Diospaqqa manan sasachu, askhawanpas pisiwanpas atipachiyqa”, nispa. Chay qhepamanmi yanapaqninwan kuska wañuchiranku 20 enemigonkunata. Chayllamanmi Diosqa pachata chhafchiran, chaywanmi llapa enemigonkuna mancharikuspa paykunapura wañuchinakuranku. Chhaynapin Diosqa Jonatanta bendeciran allin iñiyniyoq kasqanrayku (1 Sam. 13:5, 15, 22; 14:1, 2, 6, 14, 15, 20).

7. ¿Imata ruwaspan Jonatán taytanta respetaran?

⁷ Saulqa kaqllan Jehová Diosta mana kasukusharanchu, chaywanpas Jonatanqa Diospa munayninman jina kaqtinqa taytantan kasukushallaran. Chaytan ruwaran taytanwan kuska guerraman rispa, chaypin Diospa llaqtanta enemigonkunamanta defienderanku (1 Sam. 31:1, 2).

8, 9. ¿Imaraykun respetananchis autoridadniyoq runakunata?

⁸ Noqanchisri, ¿imaynatan Jonatán jina Diospaq junt’aq sonqo kasunman? Tiyasqanchis llaqtapi gobiernota kasukuspan. Jehová Diosmi munan paypa kamachiwasqanchista mana jark’akuqtinkuqa ‘kamachikuqkunata’ kasukunanchista respetananchistapas (leey Romanos 13:1, 2). Chaymi gobiernopi llank’aqkunata kasukunchis manaña honradochu kanku otaq mana respetanapaq jinaña kankuman  chaypas. Jinaspapas Diosqa munan iñiq t’aqapipas, familiapipas umalliqkunata kasukunanchistan (1 Cor. 11:3; Heb. 13:17).

⁹ Sudamérica ladomanta Olga cristianamanta yachasun. ^[1] Qosanmi mana Testigochu jinan millayta trataq Olgata. Mayninqa manan rimayoqchu otaq Testigo kasqanmanta millayta k’amiq. Wawankunata aparikuspa t’aqakunanpaqmi amenazaq, Olgan ichaqa kaqlla respetasharan manataqmi vengakuqchu. Aswanpas allin esposa kananpaqmi kallpachakuq. Chaymi wayk’upuq, p’achanta t’aqsapuq, wawakunatapas atiendeq (Rom. 12:17). Atispaqa qosantan compañaq familianta otaq amigonkunata watukuq riqtin. Qosanpa taytan wañupuqtinpas, Olgan q’epikunata alistaran maypichus qosanpa taytan misachisqa kanan karan chayman viajanankupaq. Ichaqa jawallapin qosanta suyaran misa tukunankama. Tiempoq pasasqanmanmi qosanqa manaña millaytañachu trataran. ¿Imarayku? Tukuy tiempo respetasqanrayku pacienciakusqanraykupiwan. Kunanqa qosanpunin juñunakuykunaman apan manataqmi munanchu faltakunanta, mayninpiqa kuskan juñunakuyman rinku (1 Ped. 3:1).

10. ¿Iman Jonatanta yanaparan pimanchus junt’aq sonqo kananpaq?

¹⁰ Davidta wañuchinanpaq Saúl niqtinmi, Jonatanqa decidinan karan pimanchus junt’aq sonqo kananta. Jonatanqa iskayninkupaqchá junt’aq sonqo kayta munaran. ¿Iman yanaparan pimanchus junt’aq sonqo kananpaq? Payqa yacharanmi Davidta Diospa yanapashasqanta manataq taytan Saultachu. Chaymi Davidpaq junt’aq sonqo karan. ¿Imatan ruwaran junt’aq sonqo kananpaq? Davidtan niran allinta pakakunanpaq, taytantataq niran Davidta ama wañuchinanpaq (leey 1 Samuel 19:1-6).

11, 12. ¿Imatan ruwananchis Diosta munakuspa?

¹¹ Diosta munakuspaqa paymanmi junt’aq sonqo kasun chaymantañan runakunaman otaq familianchismanpas. Ejemplopaq, Australia nacionmanta Alicen Bibliata estudiayta qallarishaspa decidinan karan pimanchus junt’aq sonqo kananta. Payqa Bibliamanta yachashasqantan familianman willaq. Juj kutinmi willaran navidadta manaña festejananpaq, chaymi familianqa anchata phiñakuspa piensaranku paykunata manaña munakunanpaq. Willaranña imarayku mana festejananta chaypas manan entienderankuchu, mamanmi niran manaña rikuytapas munasqanta. Alicen nin: “Familiaytaqa munakunin chayraykun mayta llakikurani chhaynata niwasqankuwan. Chaywanpas decidisqan kasharani Jehová Diosta Jesustawan kasukunaypaq. Chaymi asamblea kaqtin bautizakurani”, nispa (Mat. 10:37).

¹² Jinaspapas Diosta munakuspaqa imamantapas astawanqa paypaqmi junt’aq sonqo kasunchis. Manan escuelanchismanchu, nacionninchismanchu nitaq equiponchismanchu. Henry waynamanta yachasunchis, payqa allintan ajedrezta pujllaq chaymi escuelanta ganachiyta munaran. Ichaqa sapa semana  pujllasqanraykun manaña atiranchu predicaq riyta nitaq juñunakuymanpas. Chaymi repararan astawanqa escuelanpaq junt’aq sonqo kashasqanta, manataq Jehová Diospaqchu. Chaymi ajedrez pujllayta saqepuran (Mat. 6:33).

13. ¿Imatan ruwananchis familiapi problema kaqtin Diospaq junt’aq sonqo kanapaq?

¹³ Familiapi mayqenmanchus primerta junt’aq sonqo kaypas sasan. Chhaynapin tarikuran Ken iñiqmasinchis. Paymi willakun: “Mamayqa kurajñan karan, chaymi sapa semanan visitayta munarani wakin p’unchaykunataq noqaykuwan qhepakunanta. Esposaywan mamaywanmi ichaqa mana entiendenakuqkuchu, chaymi mana yacharanichu mayqenmanchus primerta junt’aq sonqo kayta. Ichaqa Bibliaq nisqanpi piensaspan repararani esposaymanraq primerta junt’aq sonqo kanayta. Chhaynapin Diospaq junt’aq sonqo kasharani”, nispa. Kenqa esposanwanmi rimaran imarayku sumaq sonqo mamanwan kananta, mamantataq entiendechiran esposanta respetananpaq (leey Génesis 2:24; 1 Corintios 13:4, 5).

14. ¿Imaynatan Jonatanta Saúl trataran?

¹⁴ Chaymantapas junt’aq sonqo kasqanchistan rikuchisun autoridadniyoq iñiqmasi mana allinta entiendespa mana chaninta ruwawaqtinchis. Saultaqa Diosmi  reyta churaran, chaywanpas churintan millayta trataran. ¿Imaynapi? Saulqa manan entienderanchu imaraykus Jonatán Davidta yanapayta munasqanta, chaymi sinchita phiñakuspa askha runakunaq ñaupanpi pisicharan. Chaytaña ruwashaqtinpas Jonatanqa taytantan respetashallaran, Davidpaqpas junt’aq sonqollan kasharan, chhaynapin Jehová Diosmanpas junt’aq sonqo karan (1 Sam. 20:30-41).

15. ¿Imatan ruwananchis autoridadniyoq iñiqmasi mana chaninta ruwawaqtinchis?

¹⁵ Umallikunaqa chaninta ruwanankupaqmi kallpachakunku ichaqa pantaq runa kasqankuraykun, imatapas mana allinta entiendespa mana chaninta ruwawasunman (1 Sam. 1:13-17). Jayk’aqllapas chhaynapi tarikuspaqa, junt’aq sonqollan Diospaq kananchis.

16. ¿Imakunapin Diospaq junt’aq sonqolla kananchis manataq noqallanchispichu piensananchis?

¹⁶ Diosmi decidiran Saulpa rantinta David rey kananpaq, Saulmi ichaqa mana munaranchu aswanpas churin Jonatán rey kanantan munaran (1 Sam. 20:31). Reypa churin kasqanraykun Jonatanqa rey kananpaq imaymanata ruwanman karan. Ichaqa Jehová Diosta munakusqanraykun pichus rey kananpaq decidisqanta respetaran, chaymi amigon Davidman prometekusqanta junt’aran. Jehová Diospaq junt’aq sonqo kaqkunaqa sinchi sasaña kaqtinpas junt’ankupunin promesankuta (Sal. 15:4). Chaymi kanman negociopi contratota ruwaspa, rimasqanchistan junt’ananchis sasaña kaqtinpas. Casarakuy kausaypi problemakuna kaqtinpas, Jehová Diosta munakusqanchisraykun esposanchispaq otaq qosanchispaq junt’aq sonqollapuni kananchis (leey Malaquías 2:13-16).

17. ¿Imakunatan kay estudiopi yacharanchis?

¹⁷ Jonatán jinan sasaña kaqtinpas Diospaq junt’aq sonqo kananchis. Jinaspapas pantaq runaña iñiqmasinchiskuna kanku chaypas, junt’aq sonqon paykunapaq kananchis. Chhaynapin Jehová Diosta kusichisun noqanchispas kusikullasuntaq (Prov. 27:11). Segurotaqmi kasunchis Diospa cuidawananchispi. Davidpa tiemponpiqa kallarantaqmi Diosta serviq juj runakunapas. Wakinmi junt’aq sonqo karanku wakintaq mana. ¿Imatan paykunamanta yachasunman? Qatimuq estudiopi yachasun.