¿IMA p’unchaymi aswan kusisqa karanki? Wakin runapaqqa casarakusqanku p’unchaymi, wakinpaqtaq primer wawanku nacesqan p’unchay. Qanpaqqa bautizakusqayki p’unchaychá karan. Iñiqmasiykikunapas kusikurankuchá tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima Diosta munakusqaykimanta (Mar. 12:30).

Bautizakusqayki p’unchaymantapachan kusisqallapuni Diosta serviranki. Wakin cristianokunan ichaqa manaña kusisqachu Diosta servinku, ¿imarayku? ¿Imakunan yanapanman wajmanta kusisqalla kanankupaq? Chaykunamanta yachasun.

Jehová Diospa gobiernonmi kay millay pachata paraisoman tukuchinqa, chaymi anchata kusichiwanchis. Chay p’unchaypaqqa pisillañan faltashan, chaytan Sofonías 1:14 texto nin: “Señor Diospa jatun p’unchayninqa qayllaykamushanñan”, nispa. Chaywanpas yaqapaschá nisunman: “Unayñan suyakushani Diospa phiñakuynin p’unchayta, manataq chayamunchu”, nispa. Chhaynata piensaspaqa manañan Diosta kusisqachu servisunman (Prov. 13:12).

Iñiqmasinchiskunawan kuska kaspaqa kusisqan Diosta servinchis. Chaymantapas yaqapaschá Testigo kapuranchis sumaq runakuna kasqankuta rikuspa (1 Ped. 2:12). Ichaqa juj iñiqmasi Diospa llaqtanmanta qarqosqa kaqtinmi desanimakusunman, chhaynapitaq manaña kusisqachu Diosta servisunman.

Qolqe sonqo kaypas, askha cosasniyoq kayta munaypas kusikuyninchistan chiriyachipunman. Saqran kay pachawan tanqawanchis mana necesitasqanchiskunata rantinanchispaq. Jesusmi niran: “Manan pipas iskay patrontaqa serviyta atinmanchu, jujnintan cheqnikunman, jujnintataq munakunman. Manan Diostawan qhapaq kaytawanqa serviyta atiwaqchischu”, nispa (Mat. 6:24). Sichus qhapaq kayta munasun chayqa, manañan kusisqachu Jehová Diosta servisun.

Jehová Diosta munakuspaqa manan sasachakusunchu payta servispa (1 Juan 5:3). Jesusmi niran: “Noqaman jamuychis llapa sayk’usqakuna q’episapakuna, noqan samachisaykichis. Yugoyman k’umuykukuychis, jinaspa noqamanta yachaqakuychis llamp’ulla, juch’uyaykukuq sonqoyoq kasqayta, chaymi qankunaqa samakuyta tarinkichis. Yugoyqa ch’usallan, q’epiypas manan llasachu”, nispa (Mat. 11:28-30). Cheqaq  cristiano kayqa anchatan kusichiwanchis. Jehová Diosta kusisqalla servinanchispaqqa askha yanapaykuna kashan, kinsamanta yachasun (Hab. 3:18).

Kamaqninchis Diostan servinchis, payqa kusisqa Diosmi (Hech. 17:28; 1 Tim. 1:11, Traducción del Nuevo Mundo). Jehová Diosmi kausayta qowanchis, chaypi piensasun chayqa kusisqallan Diosta servisun unay watakunaña bautizasqa kanchis chaypas.

Hector iñiqmasipi piensasun, payqa 40 watan watukuq umalli karan. Kuraqñan kunanqa kashan. Esposanpas sinchi onqosqan kashan, sasa cuidanataq kanpas chaysi pisillataña Diospaq llank’an. Chaywanpas Jehová Diostaqa kusisqallan servishan (Sal. 92:12-14). ¿Imataq yanapanri? Imapaqchus Diospa kamawasqanchispi piensasqansi (Diosqa kamawaranchis manan onqonanchispaqchu, wañunanchispaqchu nitaq ñak’arispa kausananchispaqchu), chaysi astawan Diosta munakun tukuy sonqowantaq servin. Chaymi kallpachakushallan predicananpaq paraisopipas piensananpaq. Chhaynapin kusisqalla Jehová Diosta servishan.

Churin Jesustan kachamuran noqanchisrayku wañunanpaq. Biblian nin: “Diosqa anchatapunin runakunata munakuran, chaymi sapan churinta kachamuran, pipas paypi iñiqqa ama wañunanpaq, aswanpas wiñay kausayniyoq kananpaq”, nispa (Juan 3:16). Chay sumaq regalopi iñisun chayqa, juchanchiskunatan Dios perdonawasun wiñay kausaytataq qowasun. Chaykunamantan anchata agradecekunchis chhaynapin Jehová Diosta kusisqalla servinchis.

México nacionmanta Jesús iñiqmasinchismi aswan qolqeyoq kananpaq tuta p’unchay llank’aq. Chayllamanmi Jehová Diosta reqsiran, churinta noqanchisrayku kachamusqantapas yacharan, chaymi yanaparan Diosllapaqña kausananpaq. 28 wataña juj empresapi llank’aran chaypas, saqepuranmi. Chhaynapin kusisqa Jehová Diosta servishan.

Ch’uya kausayniyoqmi kanchis. ¿Imaynan kausayniyki karan manaraq Jehová Diosta reqsishaspa? Apóstol Pablon Roma llaqtamanta iñiqmasikunata yuyarichiran, manaraq cristiano kashaspa “juchaq kamachin” kasqankuta, kunantaq “chanin kausaypa” kamachin kashasqankuta. Ch’uya kausayniyoqtaq karanku chayqa, wiñay kausaypaq suyakuyniyoqmi karanku  (Rom. 6:17-22). Noqanchispas ch’uya kausayniyoqmi kanchis, manan qhellipi kausaqkuna jinachu ñak’arinchis, chaykunan anchata kusichiwanchis.

Jaime iñiqmasin manaraq Testigo kashaspa boxeador kasqa, manataq Diospi creeqchu. Juj p’unchaysi juñunakuyman risqa, chaypitaq sumaqta rimayusqaku. Chayta rikuspas decidikuran vidanta cambiananpaq, ichaqa Diospa yanapaynintan necesitaran paypi creenanpaq. Jaimen nin: “Pisi-pisimantan repararani Diosqa munakuq, khuyapayakuq taytanchis kasqanta”, nispa. Diosta kasukusqanraykun mana wakin amigonkuna jinachu wañuran. Jehová Diosta reqsisqanmantapachan ancha kusisqa payta servishan.

¿Imatan ruwashananchis kay millay pachaq tukukunankama? Diospa kamachikuyninkunatan kasukushanallanchis. Biblian nin: “Amayá allinkaqta ruwaspaqa sayk’usunchu, manachus pisi kallpayasun chayqa, tiemponpin cosechasunchis”, nispa (Gál. 6:8, 9). Chhaynaqa Diosman jap’ipakusun, ama sayk’uspa preparakusun “manchay ñak’ariymanta” salvasqa kananchispaq, Jehová Diostapas kusisqalla servisun (Apo. 7:9, 13, 14; Sant. 1:2-4).

Jehová Diosta servishallasun chayqa, premionchistan chaskisun. Payqa yachanmi payrayku tukuy imaymana ruwasqanchista munakusqanchistapas. Sichus Jehová Diosta kusisqalla servisun chayqa, David jinan nisunchis: “Señor Diostaqa yuyashallanipunin, paña ladoypin payqa kashan, manan imapas urmachiwanqachu. Chaymi noqaqa sonqoypi sinchitapuni kusikuni”, nispa (Sal. 16:8, 9).