1, 2. a) ¿Iman kusichiwanchis Dios serviqkunata? b) ¿Imatan tayta-mamakuna, umallikunapas wayna-sipaskunaman entiendechinanku?

CHRISTOPHER waynachas 12 watanpi kashaspa bautizakuyta munasqa, chaysi iñiq t’aqanpi umalli nisqa: “Wawa kasqaykimantapachan reqsiyki. Anchatan kusikuni bautizakuyta munasqaykimanta. Ichaqa, ¿imaraykun bautizakuyta munanki?”, nispa. Diosta serviqkunaqa anchatan kusikunchis sapa watan askha wayna-sipaskuna bautizakusqankumanta (Ecl. 12:1). Ichaqa tayta-mamakunapas iñiq t’aqapi umallikunapas yachanankun imarayku wayna-sipaskuna bautizakuy munasqankuta, entiendechinankutaq bautizakuyqa mana yanqallachu kasqanta.

² Jehová Diosman prometekuspa bautizakuspaqa paypa bendicionninkunatan chaskisun, ichaqa Saqrapas qatikachawasunmi (Prov. 10:22; 1 Ped. 5:8). Chaytan Testigo  tayta-mamakunaqa wawankuman entiendechinanku. Sichus tayta-maman mana Testigochu chayqa, iñiq t’aqapi umallikunan sumaqta entiendechinanku (leey Lucas 14:27-30). Pipas wasita ruwayta munaspaqa ñaupaqmantan allinta qhawarin tukuy necesitasqanta, chhaynatan bautizakuyta munaqpas ñaupaqmanta allinta preparakunan. Chhaynapin Jehová Diospaq tukukuykama junt’aq sonqo kanqa (Mat. 24:13). ¿Iman wayna-sipaskunata yanapanqa wiñaypaq Jehová Diosta servinankupaq?

3. a) ¿Ima nirankun Jesuswan Pedrowan bautizakuymanta? (Mat. 28:19, 20; 1 Ped. 3:21.) b) ¿Ima tapuykunamantan kay estudiopi yachasun? c) ¿Imanaqtinmi wayna-sipaskuna chaykunata tapukunanku?

³ Wayna-sipas, ¿bautizakuytachu munashanki? ¡Ancha allinmá chayqa! Bautizakuspa Jehová Diospa Testigon kayqa, imamantapas aswan munaymi. Jesusmi kamachiran llapa cristianokuna bautizakunankupaq, apóstol Pedropas niranmi bautizakuspaqa manchay ñak’ariy tiempomanta salvakunanchista (Mat. 28:19, 20; 1 Ped. 3:21). Wayna-sipas, ¿bautizakunaykipaq jinañachu kashanki? Kaykunapi piensay: ¿Yuyayniyoqñachu kanki? ¿Imaraykun bautizakuyta munanki? ¿Entiendenkichu imachus Diosman prometekuy kasqanta? Chay tapuykunaqa ancha allinpunin. ¿Imanaqtin? Bautizakuqtiykin jujkuna yachanqaku Jehová Diosta servinaykipaq prometekusqaykita. Jinaspapas chay tapuykunaqa yanapasunkin prometekusqaykita junt’anaykipaq.

4, 5. a) ¿Imaraykun mana kuraq runaraqchu kanayki bautizakunapaq? b) ¿Imataq yuyayniyoqña kayri?

⁴ Bibliaqa manan ninchu jayk’a watanchispichus bautizakunanchista. Aswanpas ninmi: “Waynapas ruwasqankunawanmi reqsisqa kanqa, kausayninpin rikukun ch’uyachus cheqanchus kasqanqa”, nispa (Prov. 20:11). Chay textoq nisqan jina, juj waynachaqa yachanmanmi imachus allin imataqchus mana allin kasqanta, entiendenmantaqmi imachus Diosman prometekuy kasqanta. Chhaynaqa, sichus yuyayniyoqña Diosmantaq prometekuranña chayqa, bautizakunanmi. Manan pipas jark’ananchu (Prov. 20:7).

⁵ ¿Imataq yuyayniyoqña kayri? Chayqa manan kuraq runa kaychu, aswanpas ‘allinkaqta mana allinkaqta reparaymi’ (Heb. 5:14). Allin kaqta yachaspa chayman jina ruwaymi. Yuyayniyoqña kaspaqa kallpachakunqan tentacionkunapi mana urmananpaq, manataqmi  jujkunaraqchu ninanku allin kaqta ruwananpaq. Wayna-sipas, bautizakunaykipaqqa allintaraqmi tanteakunayki sapallayki kashaspa allin kaqta ruwayta atinkichus icha manachus chayta (tupachiy Filipenses 2:12 textowan).

6, 7. a) ¿Ima tentacionkunapin Daniel tarikuran? b) ¿Imaynatan Babiloniapi kashaspa Daniel rikuchiran yuyayniyoqña kasqanta?

⁶ ¿Atinmanchu juj wayna otaq juj sipas allin kaqta yachasqanman jina ruwayta? Arí. Ejemplopaq, waynallaraq kashaqtinmi Danielta Babilonia llaqtaman apapuranku. Chaypiqa manan tayta-mamanwanchu kasharan. Imaymana tentacionkunapitaq tarikuran. Diosta mana kasukuq runakuna ukhupin tiyaran, jinaspapas sumaq qhawarisqan karan. Reyta servinanpaqmi ajllasqa karan (Dan. 1:3-5, 13). Danielqa atinmanmi karan Babilonia llaqtapi allin reqsisqa kayta, qhapaq kaytapas.

⁷ Danielmi ichaqa chay tentacionkunata allin yuyaywan atiparan. Babilonia runakunaqa manan iñiyninta cambiachirankuchu, nitaq Jehová Dios contra juchallichirankuchu. Danielqa sonqonpin decidikuran allin kaqllatapuni ruwananpaq, pantasqa religionkunapi manapuni participananpaq (Dan. 1:8). Chhaynapin rikuchiran yuyayniyoq runa kasqanta.

8. ¿Imatan Danielpa ruwasqanmanta yachawaq?

⁸ ¿Imatan Danielpa ruwasqanmanta yachawaq? Imapiña tarikuspapas Jehová Dios kasukuytan, chhaynapin rikuchinki yuyayniyoqña kasqaykita. Manan camaleón  jinaqa kanaykichu, chay qalaywaqa imachus ladonpi kasqanman jinan colorninta cambian. Sichus juñunakuypi Diospa amigon jina rikuchikunki, colegioykipitaq Diosta mana reqsiq runakunaq amigon kanki chayqa, chay qalaywa jinan cambiashanki. Manan chhaynaqa kanaykichu, aswanpas ima tentacionpiña tarikuspapas Diospaqmi junt’aq sonqo kanayki (leey Efesios 4:14, 15).

9, 10. a) ¿Imaraykun piensanayki tentacionpi tarikuspa imatachus ruwasqaykipi? b) ¿Imataq bautizakuyri?

⁹ Llapanchismi imallapipas pantanchis (Ecl. 7:20). Bautizakuyta munaspan ichaqa kaykunapi piensanayki: “¿Cheqaqpaqpunichu Diospa munasqanta ruwasaq? ¿Diosta kasukuspañachu kausashani? ¿Imatan ruwarani tentacionpi tarikuspa? ¿Atiranichu allin kaq ruwayta?”, nispa. Yaqapaschá Danielpa tarikusqanpi jina tarikushanki. Nirasunkikupaschá: “Yuyaysapa inteligente kasqaykiwanqa qhapaqmanmi tukupuwaq”, nispa. Chhayna tentacionkunapi tarikuspa, ¿yachankichu imatachus ruwanaykita Dios munasqanta? (Efes. 5:17.)

¹⁰ Chay tapuykunapi piensasqaykin yanapasunki bautizakuyqa mana yanqallachu kasqanta entiendenaykipaq. Ichaqa, ¿imataq bautizakuyri? Jehová Diosta munakusqaykita, payllata tukuy sonqoykiwan servinaykipaq prometekusqaykita jujkunaman rikuchiymi (Mar. 12:30). Llapa bautizakuqmi decidisqa kashanan Diosman prometekusqanta junt’ananpaq (leey Eclesiastés 5:4, 5).

11, 12. a) ¿Imamantan seguro kashanayki bautizakuyta munaspa? b) ¿Iman yanapasunki bautizakuyta Jehová Dios jina qhawarinaykipaq?

¹¹ Biblian willan Diosta llapa serviqkuna “kikillankumanta” payta servinankuta, paykuna ukhupin wayna-sipaskunapas kashanku (Sal. 110:3). Chaymi bautizakuyta munaspaqa seguro kashanayki kikillaykimanta bautizakuy munasqaykita. Astawanqa Testigo familiapi uywasqa kasqaykirayku.

¹² Wiñasqaykiman jinaqa rikurankichá askha iñiqmasikunaq bautizakusqankuta, wakinqa amigoykikuna otaq familiaykikunachá karan. Ichaqa manan paykunaq bautizakusqankuraykuchu qanpas bautizakunayki nitaqmi askha watayoqña kasqaykiraykuchu. ¿Iman yanapasunkiman bautizakuyta Jehová Diospa qhawarisqanta jina qhawarinaykipaq? Bautizakuy imarayku importante kasqanpi piensaymi. Kay estudiopi qatimuq estudiopiwanmi chaykunata yachanki.

13. ¿Imaynapin yachawaq imaraykuchus bautizakuy munasqaykita?

¹³ Wayna-sipas, ¿imaynapin yachawaq  bautizakuy munasqaykita? Oracionniykikunapi imatachus nisqaykita reparaspan. Chaymi kaykunapi piensanayki: “¿Askha kutitachu Diosman orakuni icha pisillatachu? ¿Sonqomantachu orakuni icha yanqa-yanqallatachu?”, nispa. Chaykunapi piensaymi yanapasunki allin amigontinchus Dioswan kashanki chayta yachanaykipaq (Sal. 25:4). Chaymantapas qhawarinaykin imaynatachus Bibliata estudiasqaykita (Jos. 1:8). Jehová Diosqa sapa kutillanmi Bibliawan oracionninchiskunaman kutichimun. Chaymi piensanayki: “¿Sapa semanachu Bibliata estudiani? ¿Gustawanchu familiantin Bibliata estudiay?”, nispa. Chaykunapi piensaymi yanapasunki imarayku bautizakuy munasqaykita yachanaykipaq. Bautizakunaykiqa Diospa amigon kayta munasqaykiraykun, tukuy sonqoykiwan serviyta munasqaykiraykupiwan.

14. ¿Kaqllachu prometekuywan bautizakuywan?

¹⁴ Wakin wayna-sipaskunan ninku: “Jehová Diosmanqa prometekuniñan ichaqa manaraqmi bautizakunaypaq jinaraqchu kani”, nispa. Chhaynata niq wayna-sipaskunaqa manan entiendenkuchu imachus prometekuy imataqchus bautizakuy kasqanta. Prometekuspaqa oracionpin Diosta ninki payllata wiñaypaq servinaykita. Bautizakuspaykitaq chay prometekusqaykita jujkunaman rikuchinki. Bautizakuyta munaspaqa allintan entiendenayki imachus Diosman prometekuy kasqanta.

15. ¿Imataq Diosman prometekuyri?

¹⁵ Chhaynaqa, ¿imataq prometekuyri? Chayqa Jehová Diosman payllapaqña kausanaykipaq nisqaykin. Chaypaqmi sapallaykipi juj oracionta ruwanayki. Chay oracionpin prometeshanki imamantapas aswan importanteqa payta serviyraq kasqanta (leey Mateo 16:24). Chaymi Diosman prometekunaykipaqqa allintaraq piensanayki (Mat. 5:33). Chhaynaqa, ¿imaynatan reparawaq Diosllapaqñachus kausashanki icha manachus chayta? (Rom. 14:8.)

16, 17. a) ¿Imaynapin mana junt’ashawaqchu Diosman prometekusqaykita? Ejemplota willay. b) ¿Ima nishanchismi Diosman prometekuspa?

¹⁶ ¿Imaynatan reparawaq Diosllapaqñachus kausashanki icha manachus chayta? Chaypaq kay ejemplopi piensay: Amigoykin juj carrota regalasunki, carroq llapa documentonkunatapas qosunkin, llaventan ichaqa mana qosunkichu, payllataq manejaytapas munan. ¿Cheqaqpaqchu chay carrota regalarasunki? ¿Manan riki?

¹⁷ Diosllapaqña kausanaykipaq prometekuspaqa nishankin: “Qanpa munayniykita ruwaspallañan kausasaq”, nispa. Jehová Diostaq munan chay promesaykiwan junt’anaykita. Ichaqa mana Testigo runawan pakallapi reqsinakushawaq chayqa, otaq tukuy tiempoykiwan llank’anaykipaq juj llank’anata aceptawaq chayqa, manan junt’ashankichu Diosman promesa ruwasqaykiwan. Chayta ruwaspaqa mana llaveyoq carrota regalaq amigo jinan kawaq. Chhaynaqa Diosman prometekuspaqa paypa munasqanman  jinapunin ruwananchis manaña noqanchispa munasqanchisman jinachu kaqtinpas. Jesús jinan kananchis, paymi niran: “Janaq pachamantaqa uraykamuni, manan munayniyta ruwanaypaqchu, aswanpas kachamuwaqniypa munayninta ruwanaypaqmi”, nispa (Juan 6:38).

18, 19. a) ¿Ima ninkun Rosewan Christopherwan? b) ¿Imaynatan bautismota qhawarinki?

¹⁸ Chhaynaqa, bautizakunaykipaqqa allintan piensanayki. Jehová Diosman prometekuypas bautizakuypas imamantapas ancha valorniyoqmi. Sichus Jehová Diosta munakunki entiendenkitaq imas prometekuy kasqanta chayqa, mana iskayaspan bautizakunki. Manataqmi jayk’aqpas chay ruwasqaykimanta pesapakunkichu. Rose sutiyoq sipasmi nin: “Anchatan Jehová Diosta munakuni anchatataqmi kusikuni payta servispa. Bautizakunaypaqqa manan iskayaranichu, yacharanin chayta ruwayqa ima ruwaymantapas aswan allin kasqanta”, nispa.

¹⁹ Kay estudioq qallariyninpin Christopher waynamanta yacharanchis. Payqa 12 watanpin bautizakuran. ¿Imaynan kunan kashan? Paymi nin sinchi kusisqa kashasqanta. 17 watanpin precursor regular karan, 18 watanpitaq yanapakuq qhari, kunantaq Betelpi llank’ashan. Paymi nin: “Kusapunin bautizakusqayqa, chhaynapin Jehová Diospaq llaqtanpaqpas llank’ashani, chaytaqmi anchata kusichiwan”, nispa. Qanri wayna-sipas, ¿bautizakuytachu munashanki? Chhayna kaqtinqa preparakunaykin, ¿imaynata? Qatimuq estudiopi yachasun.