1, 2. a) ¿Imaraykun bautizakunapaq allintaraq piensana? b) ¿Imamantan seguro kashanayki manaraq bautizakushaspa?

WAYNA-SIPAS, ¿bautizakuytachu munashanki? Bautizakuyqa ima ruwaymantapas aswan valorniyoqmi. Ñaupa estudiopi yachasqanchis jina, bautizakunapaqqa allintan piensana. Bautizakuqtiykin jujkuna yachanqaku Diosman prometekusqaykita. Diosmanmi prometekunki wiñaypaq paypa munayninta ruwanaykipaq, ima ruwaymantapas paypa munaynintaraq ñaupaqta ruwanaykipaq. Chaymi manaraq bautizakushaspa qhawarikunayki yuyayniyoqñachus kasqaykita, imarayku bautizakuy munasqaykita, yachanaykitaqmi imachus Diosman prometekuy kasqanta.

² Chhaynaqa, ¿bautizakunaykipaq jinañachu kashanki? Yaqapaschá ninki “manaraqchus jina” nispa otaq “arí” nispa; tayta-mamaykitaq ichaqa nisunkiku chikantawanraq suyakunaykita, jinaspa astawanraq Diosta reqsinaykita. Ama chaywanqa desanimakuychu. Aswanpas kallpachakushallay listo kanaykipaq. Kay estudion yanapasunki imachus creesqaykimanta convencido kanaykipaq, Diospa nisqanman  jina kausanaykipaq, Diosta astawan munakunaykipaqpas.

3, 4. ¿Imatan wayna-sipaskunapas Timoteomanta yachankuman?

³ Kaykunata tapukuy: “¿Imaraykun Diospi creeni? ¿Segurochu kashani Biblia Diospa yuyaychasqan kasqanmanta? ¿Imaraykun Diospa kamachikuyninkunata kasukuni manataq kay pachaq kamachisqantachu?”, nispa. Chaykunata yachaymi yanapasunki apóstol Pabloq nisqanta kasukunaykipaq. Paymi niran: “Ajinapin mayqenchus Diospa munaynin kasqanta reparankichis, paypa munayninqa allinmi, sumaqmi, junt’asqapunin”, nispa (Rom. 12:2). Apóstol Pabloq nisqan jina qan kikiykimantan reparanayki Diospa nisqanta kasukuyqa aswan allin kasqanta. ¿Imaraykun qanllamanta reparanayki?

⁴ Chaypaq wayna Timoteopi piensay. Payqa allintan Diospa siminmanta yacharan, mamitanpas abuelanpas wawamantapacha yachachisqankurayku. Chaywanpas apóstol Pablon niran: “Qaqata sayay imatachus allinta yachachirasunkiku, iñinaykipaqpas convencerasunkiku chaypi”, nispa (2 Tim. 3:14, 15, Traducción del Nuevo Mundo [NM]). Arí, Timoteoqa convencesqan kasharan cheqaq kaqqa Diospa siminpi tarikusqanmanta. Ichaqa manan mamitanpa abuelanpa sapa rato “cheqaqmi chayqa” nisqankuraykullachu convencekuran. Aswanpas Timoteoqa ‘yuyaynintan’ allinta llank’achiran. ¿Imaynataq chayri? Timoteoqa imakunachus yachasqanpin pay kikin allinta piensaran jinamantaq convencekuran yachashasqanqa cheqaq kasqanta (leey Hebreos 5:14). Wayna-sipaskunapas Timoteomantan yachankuman.

5, 6. ¿Imaraykun kunanmantapacha kikiykimanta allinta piensanayki?

⁵ ¿Imatan yachawaq Timoteoq ruwasqanmanta? Yaqapaschá wawa kasqaykimantapacha Bibliamanta yachachirasunkiku. Chhayna kaqtinqa Timoteoq ruwasqanta jina ruway. Piensay: “¿Imakunapin creeni? ¿Imaraykun chaykunapi creeni?”, nispa. Chaymi yanapasunkiman creesqaykimanta convencido kanaykipaq, chhaynapin allin iñiyniyoq kanki. Atipankitaqmi compañeroykikuna imatapas ruwanaykipaq mat’ipayasuqtiykiku, kay millay pacha imatapas munapayachisuqtiyki otaq sonqoykiq mana allin munapayasqantapas.

⁶ Chayraykun kunanmantapacha kikiykimanta allinta piensanayki. Chhaynapin compañeroykikunaq ima tapukusqankutapas allinta kutichinki. Tapusunkikumanmi: “¿Imaynapin seguro kashanki Diospa kasqanmanta? ¿Imaraykun munakuq Dios mana allinkunata permiten? Diosmi lliuta kamaran ichaqa, ¿pin payta kamaran?”, nispa. Sichus qan kikiykimanta allinta piensanaykipaq kallpachakunki chayqa, chay tapuykunaqa manan iskayachisunkichu. Aswanpas Bibliamanta astawan yachanaykipaqmi yanapasunki.

7-9. ¿Imaynatan jw.org dirección yanapasunkiman iñiyniykipi allin kanaykipaq?

⁷ Sichus Bibliata allinta estudianki chayqa ima tapuytapas kutichinkin, manan imamantapas iskayankichu, allin iñiyniyoqtaq kankipas (Hech. 17:11). Diospa  llaqtanpiqa askha qelqanchiskunan kan Bibliata allinta estudianaykipaq, chaykunatan orqowaq internetpi jw.org direccionmanta. Chaypin tarinki librokunata, folletokunata, videokunata juj yanapaykunatapas. Tukuy chaykunan ruwasqa kashan imachus creesqaykipi convencekunaykipaq, allin iñiyniyoq kanaykipaqpas.

⁸ Estudiashankiñataq Bibliata chayqa, yaqapaschá Bibliamanta wakin tapuykunata allintaña kutichinki. Ichaqa, ¿convencesqachu kashanki? Internetpi jw.org direccionpi kaq qelqakunan yanapasunki Bibliaq nisqanpi allinta piensanaykipaq, chaykunata qelqanaykipaqpas. Chaymantapas yanapasunkin yachasqaykita jujkunaman explicanaykipaq. Internetniyoq kaspaqa Bibliata estudianaykipaq utilizay, chhaynapin allin iñiyniyoq kanki.

⁹ Bibliaq yachachikuyninkuna cheqaqpuni kasqanmanta convencesqa kayqa, ancha importanten. Chhaynapin bautizakunaykipaq jinaña kanki. Juj Testigo sipasmi nin: “Manaraq bautizakunaypaq decidikuspaqa allintan Bibliata estudiarani Testigokuna cheqaq religión kasqanmanta convencekunaykama”, nispa. P’unchaykuna pasasqanman jinataq payqa astawan convencekun.

10. ¿Imaynatan iñiyniykita rikuchiwaq?

¹⁰ Biblian nin allin kaqkunata mana ruwaqtinchisqa iñiyninchis wañusqa kashasqanta (Sant. 2:17). Chayraykun ruwasqaykikunawan rikuchinayki iñiyniyoq kasqaykita, imakunapichus creesqaykimanta convencesqa kasqaykitapas. Bibliaq nisqanman jinan ‘Dios sonqo purispa Diosllapaqña kausanayki’ (leey 2 Pedro 3:11).

11. ¿Iman ‘Dios sonqo puriy’?

¹¹ ¿Iman ‘Dios sonqo puriy’? Chayqa ch’uyata kausaymi. ¿Imaynan kausayniyki? Piensay kay killakunapi imakuna ruwasqaykipi: Ima tentacionpipas tarikuspa,  ¿repararankichu imachus allin imataqchus mana allin kasqanta? (Heb. 5:14.) ¿Imatan ruwaranki wakin wayna-sipaskuna mana allinkunata ruwanaykipaq tanqasuqtiykiku? ¿Jehová Diospa nisqantachu ruwaranki icha mana burlakunankuraykuchu compañeroykikunaq nisqankuta ruwaranki? ¿Allintachu escuelaykipi comportakuranki? (1 Ped. 4:3, 4.) Llapanchismi pantaq runakuna kanchis, chaymi askha watakunaña Diosta serviqkunapas mayninqa p’enqakunku “Testigon kani” niyta. Ichaqa Diosman prometekuq cristianoqa Jehová Diospa testigon kasqanmantan kusisqa kanan, chaytataq rikuchinan ch’uyata kausaspa.

12. a) ¿Imakunatan ruwan Diosllapaqña kausaq? b) ¿Imaynatan qhawarinayki chay ruwaykunata?

¹² ¿Iman ‘Diosllapaqña kausay’? Chayqa Diospaq tukuy imaymanakuna ruwasqaykin. Wakinmi juñunakuykunaman risqayki, predicasqayki. Ichaqa sapallayki ruwasqaykikunapiwanmi, wakinmi Diosman oracionta ruwasqayki, Biblia estudiasqayki. Chay ruwaykunatan Jehová Diosta munakuqqa kusisqa ruwan, manan obligasqachu. Rey David jinan ninku, paymi niran: “Diosníy, munayniykitapunin ruwayta munani, yachachikuy simiykitan sonqoy ukhupi jap’ini”, nispa (Sal. 40:8).

13, 14. a) ¿Iman yanapasunkiman ‘Diosllapaqña kausanaykipaq’? b) ¿Imaynatan wakin wayna-sipaskunata yanaparan?

¹³ Diospaq imakunatachus ruway munasqaykita anotay, piensaytaq kay jina tapuykunapi: “¿Sonqomantachu Diosman orakuni? ¿Diosta munakusqaytachu rikuchin rimasqaykuna? ¿Imakunatan sapallay kaspa estudiani? ¿Rinichu predicaq manaña tayta-mamay riqtinpas?”, nispa. ^[1] Chay tapuykunata kutichispa qelqay. Chaymi yanapasunki Diospaq ruway munasqaykikunata junt’anaykipaq, oracionniykikunapi mejoranaykipaq, sapallaykipi allinta estudianaykipaq, sumaqta predicanaykipaqpas.

¹⁴ Askha wayna-sipaskunatan yanaparan chay tapuykunaq kutichiyninta qelqasqanku. Tilda sipaspas chaytas ruwasqa. Chaysi yanapasqa Diospaq astawan llank’ananpaq. Chaykunata junt’asqanman jinas juj watallapi bautizakunanpaq listoña kasharan. Patrik waynapas nillantaq: “Yacharaniñan imakunatachus Diospaq ruwanayta, ichaqa chaykunata qelqaymi yanapawaran junt’anaypaq”, nispa.

15. ¿Imaraykun qan kikillaykimanta Diosman prometekunayki?

¹⁵ Jinaspapas tapukuwaqmi: “¿Servishallaymanchu Diosta tayta-mamayña amigoykunaña Diosta saqepuqtinkupas?”, nispa. Diosman prometekuspaqa qan sapallaykin prometekuranki. Chayraykun prometekuspa bautizakuspaykiqa qanpas Dioswan amigontin kanki, paymanmi ima ruwasqaykimantapas cuentata qonki. Chhaynaqa manan tayta-mamaykimantachu  nitaq amigoykikunamantachu kanqa Diospaq llank’asqaykiqa. Sichus kunanmantapacha ‘Dios sonqo purispa Diosllapaqña kausanki’ chayqa, imapichus creesqaykimantan convencesqa kanki, Diospa kamachikuyninkunaman jina kausay munasqaykitataq rikuchinki. Chhaynaqa listoñan kashanki bautizakunaykipaq.

16, 17. a) ¿Imaraykun bautizakuna? b) ¿Iman yanapasunki Jesuspa sacrificionta valoranaykipaq? Ejemplowan willay.

¹⁶ Kamachikuy simimanta allinta yachaq runan Jesusta tapuran mayqen kamachikuychus aswan importante kasqanta. Jesustaq kutichiran: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan”, nispa (Mat. 22:35-37). Chaymi pipas bautizakuyta munaspaqa, Jehová Diosta munakusqanrayku bautizakunan. Ichaqa, ¿iman yanapasunkiman Jehová Diosta astawan munakunaykipaq? Jesuspa sacrificionpi piensaymi (leey 2 Corintios 5:14, 15; 1 Juan 4:9, 19). Chayta ruwanki chayqa, sapa p’unchaymi qanrayku Diospa ruwasqanta valoranki.

 ¹⁷ Ejemplopaq, ¿imatan ruwawaq mayu apashasuqtiyki juj runa salvasuqtiyki? ¿Mana agradecekuspachu wasiykiman pasapuwaq api p’achaykita cambiakuq? ¿Manan riki? Aswanpas wañunaykikamachá chay runawan agradecesqa kawaq. Noqanchispas mayuq apasqan jinan kashanchis jucharayku wañuyraykupiwan. Jehová Dioswan Jesuswanmi ichaqa sinchita munakuwasqanchisrayku salvawaranchis. Chayraykun kay pacha paraíso kapuqtin wiñaypaq kausasun. ¡Maytan paykunata agradecekunchis!

18, 19. a) ¿Imanaqtinmi Diosman prometekuyta mana manchakunaykichu? b) ¿Imaraykun Diosta servispa aswan allinta kausanki?

¹⁸ ¿Agradecesqachu Jehová Diospaq kashanki? Chhayna kaqtinqa, payman prometekuspan bautizakunayki. Yachamusqayki jina Diosman prometekuspaqa paypa munayninman jina wiñaypaq kausanaykipaqmi nishanki. Ichaqa Diosman prometekuytaqa manan manchakunaykichu. ¿Imanaqtin? Payqa allinllaykitan munan, prometesunkitaqmi kasukuqtiykiqa yanapanasuykipaq (Heb. 11:6). Jehová Diosman prometekuspa bautizakuqtiykiqa manan mana allinpichu tarikunki, aswanpas kusisqan kausanki. 24 watayoq Testigon waynallaraq kashaspa bautizakuran, paymi nin: “Qhepakunamanña bautizakuyman karan chayqa astawanmi entiendeyman karan imachus bautizakuy kasqanta. Ichaqa antestan bautizakurani, chaymi yanapawaran kay pachaq trampankunapi mana urmanaypaq”, nispa.

¹⁹ Yachasqayki jina, Jehová Diosqa allinkunatan qanpaq munan. Saqramanmi ichaqa mana imapas qokunkichu, payqa egoistan. Sichus paypa munasqanta ruwanki chayqa, manan ima allintapas qosunkichu. Imatayá qosunkiman mana imanpas kashaqtin. Manan runakunaman allin willakuykunata willananpaq kanchu nitaq ima suyakuytapas qonchu. Payqa wañuy patapiñan tarikushan, chaymi qhepa tiempopaq mana imatapas prometesunkimanchu (Apo. 20:10).

20. ¿Imatan ruwanayki Diosman prometekuspa bautizakunaykipaq? (Qhaway “Dioswan amigontin kanaykipaq yanapaykuna” nisqa recuadrota.)

²⁰ Jehová Diosman prometekuyqa manan imawanpas tupanmanchu. Qanri wayna-sipas, ¿bautizakunaykipaq jinañachu kashanki? Sichus listoña kashanki chayqa, ama manchakuychu. Ichaqa manaraq listochu kashanki chayqa kay estudiopi nisqanmi yanapasunki mejoranaykipaq. Pablon Filipos iñiq t’aqapi cristianokunata niran iñiyninkupi astawan wiñanankupaq (Filip. 3:16). Sichus Pabloq nisqanta qanpas kasukunki chayqa, pisi tiempollapin Diosman prometekunaykipaq bautizakunaykipaqpas listo kanki.