MANARAQ janaq pachaman Jesucristo kutipushaspan, discipulonkunata kamachiran “kay pachaq k’uchunkunakamaraq” predicanankupaq (Hech. 1:8). ¿Imaynatan chayta ruwaranku?

Universidadmanta profesormi niran, Roma llaqtaq kamachisqan tiempopi cristianokuna llapa religionkunamanta judío religionmantapas jujniray kasqankuta. ¿Imaynapi? Cristianokunaqa llapa runakunamanmi predicaqku imaynan Jesuspas predicaran jinata. Tukuy llaqtakunapin Diospa gobiernonmanta ‘allin willakuykunata’ willaqku. Maypiña runakuna Diosmanta astawan yachayta munaqtinkupas yachachiqkun (Luc. 4:43). Chayraykun Biblia willan wakin cristianokuna Diosmanta allin willakuykunata willanankupaq kachasqa kasqankuta, paykunatan nikuran ‘apostolkuna’ nispa (Mar. 3:14). Paykunatan Jesús kamachiran: “Chayrayku, rispa llapa suyu runakunata yachachimuychis, yachachisqaykuna kanankupaq”, nispa (Mat. 28:18-20).

Jesuspa 12 apostolninkuna manaña kay pachapichu kashanku chaypas, Diospa askha siervonkunan paykunaq ejemplonta qatikushanku. ¿Imaynapi? Necesitakusqan llaqtakunaman predicaq rispa, chhaynapin paykunapas profeta Isaías jina ninku: “Noqan kaypi kashani, noqata kachaway”, nispa (Is. 6:8). Chaytan askha iñiqmasikuna ruwashanku. Wakinmi Galaad escuelamanta lloqsispa karu nacionkunaman rinku predicanankupaq, wakintaq maypichus astawan  predicaqkunaq necesitakusqanman astakunku, wakintaq juj simita yachanku iñiq t’aqapi otaq grupokunapi yanapakunankupaq. Chaykuna ruwayqa sasan, ichaqa Diosta runamasinkunatapas tukuy sonqonwan munakusqankuraykun ruwanku. Chay iñiqmasikunaqa allinta yuyaykuspan decidikuranku astawan predicanankupaq. Chaymi tiemponkuta, qolqenkuta kallpankutapas allinta utilizaranku (Luc. 14:28-30). Ancha valorniyoqmi chay ruwasqanku.

Ichaqa manan llapanchischu juj simita yachasunman otaq karu llaqtakunaman astakusunman allin willakuykunata willanapaq. Ichaqa llapanchismi iñiq t’aqanchispi misionero kasunman. ¿Imaynapi?

Ñaupa tiempopiqa manan llapa cristianokunachu misionero karanku, chaywanpas tiyasqanku llaqtapin ganaswan kusisqa predicaqku. Chayta ruwaspan kasukuranku apóstol Pabloq kay nisqanta: “Diospa qosqan llank’anaykita allinta junt’ay”, nispa (2 Tim. 4:5). Noqanchispas chaytan kasukunallanchistaq, chhaynapin tukuy sonqowan predicasun jujkunatapas Diosmanta yachachisun. Chaykunata ruwaspataq iñiq t’aqanchispi misionero jina kasun.

Juj misionero karu llaqtaman rispaqa chay llaqtamanmi yachakunan. Yaqapaschá noqanchisqa mana atisunmanchu karu llaqtaman astakuyta, ichaqa yachasunmanmi imaymana formapi predicayta. 1940 watapin iñiqmasikunata nikuran juj p’unchayllapas callekunapi predicanankupaq. Noqanchisri, ¿predicasunmanchu callekunapi otaq tanqakachana carretakunawan?

Ancha allinpaq qhawarisun predicasqanchista chayqa, kusisqallapunin predicasunchis. Juj simita yachaq iñiqmasikuna otaq predicaqkunaq necesitakusqanman astakuqkunaqa, iñiq t’aqapin anchatapuni yanapakunku. Ejemplopaq, tukuy tiempon predicacionpi kashanku. Misionerokunaqa iñiq t’aqapin juñunakuykunata aparinku, chay llaqtamanta iñiqmasikuna yachanankukama.  Bautizasqa qhari kanki chayqa, ¿kallpachakushankichu umalli otaq yanapakuq qhari kanaykipaq? (1 Tim. 3:1.)

Imaymanakunata ruwaspan iñiq t’aqapi yanapakusunman. Qhariña, warmiña, waynaña, kuraqña kasunman chaypas iñiqmasikunatan yanapasunman (Col. 4:11).

Iñiqmasikunata yanapanapaqqa allintan paykunata reqsinanchis. Biblian niwanchis juñunakuyman rispaqa iñiqmasikunaq necesitasqankupi piensananchista (Heb. 10:24). Ichaqa manan vidankupichu chapukunanchis, aswanpas reparananchismi imapichus tarikusqankuta jinaspa yanapananchis. Yaqapaschá imachus necesitasqankupi yanapasunman otaq Bibliawan consolasunman. Mayninpin ichaqa umallikuna otaq yanapakuq qharikunalla yanapayta atinqaku (Gál. 6:1). Chaywanpas llapanchismi yanapasunman kuraq iñiqmasikunata otaq sasachakuypi tarikuq familiakunatapas.

Salvatore iñiqmasinchismi sinchi sasachakuypi tarikuran, chaymi wasinta, negocionta, lliu kaqninkunatawan vendepuran. Sinchi llakisqan kasharan familianta imayna uywananmanta. Jinan iñiq t’aqanmanta juj familia yacharusqa imayna tarikusqanta, chaymi qolqeta qoyranku llank’anatapas maskhapuranku paypaqpas esposanpaqpas. Yanapaq familiaqa askha kutipin Salvatore iñiqmasiq llakikuyninta uyariranku, Bibliawantaq paytapas familiantapas consolaranku. Chhaynapin aswan amigontin kapuranku. Unay watakuna qhepamanmi yuyarinku chay familiaq yanapasqanta, chaymi mayta munakunku.

Cheqaq cristianokunaqa predicanapaqmi listo kashanchis. Jesús jinan llapa runakunaman Diospa sumaq willakuyninta willamunanchis. Manaña llapanchischu waj llaqtakunaman astakuyta atinchis chaypas, kallpachakunanchismi iñiq t’aqanchispi iñiqmasikunata yanapanapaq (Gál. 6:10). Chayta ruwasun chayqa aswan kusisqan kasunchis, ‘llapa allin ruwaykunapitaq aswan-aswanta’ yanapakusunchis (Col. 1:10; Hech. 20:35).