Cristianokunaqa Bibliapi kasqan consejokunaman jinan pimantapas defiendekunanchis. Chay consejokunaq nisqanman jinaqa manan allinchu kanman ima armawanpas defiendekuyqa. Chaymantan astawan kaypi yachasunchis, chhaynapin allin yuyaywan imatapas ruwasun.

Jehová Diospaqqa ancha chaninmi runaq vidanqa. ¿Imarayku? Salmos 36:9 textoq nisqan jina, Diosmantan “kausayqa paqarimun”. Chaymi juj cristianoqa pay kikintaña otaq imantaña cuidayta munan chaypas, tukuy atisqanta ruwanan ama pitapas wañuchinanpaq (Deut. 22:8; Sal. 51:14).

Pipas defiendekuyta munaspaqa yaqapaschá imawanpas runamasinta wañurachinman. Armawanmi ichaqa ratolla pitapas wañurachisunman. * Chaymantapas juj suwa suwayta munawasunman chayqa, armata qhawaykuspaqa astawanpaschá loco jina imatapas ruwanqa, chhaynapitaq mayqenpas wañuq rijurisunman.

Manaraq wañupushaspan Jesusqa discipulonkunata niran espadakunata apanankupaq (Luc. 22:36, 38). Ichaqa, ¿imapaqmi Jesús chayta kamachisharan? ¿Espadawan defiendekunankutachu munasharan? Manan. Aswanmi chayta kamachisharan juj allin yachachikuyta paykunaman yachachinanpaq. ¿Imata? Manan piwanpas maqanakunankuchu karan, askhamantaña paykunaman phawaykunkuman karan chaypas (Luc. 22:52). Chaymi Pedrotapas niran: “Espadaykita waqaychay”, nispa. Chaymantataq llapa discipulonkunata niran: “Pipas espadata jujpa contranpi oqariqqa espadallawantaqmi wañuchisqa kanqa”, nispa (Mat. 26:51, 52). Chaytan llapa cristianokunapas kasukunanchis.

Miqueas 4:3 textopin Diosta serviqkunamanta nishan: “Espadankumantan yapuna rejakunata ruwakapunqaku, lanzankumantapas ichhunakunatan ruwakapunqaku”, nispa. ¿Ima ninantan chaywan nishan? Cristianokunaqa manan piwanpas maqanakunanchischu. Apóstol Pabloq nisqan jina, manan ‘pimanpas mana allinmantaqa mana allinllawantaq kutichinanchischu’ aswanmi ‘tukuy atisqanchista ruwananchis lliu runawan sumaqta kausananchispaq’ (Rom. 12:17, 18). Pablopas imaymana peligrokunapiña tarikuran chaypas manan Bibliaq contranpichu imatapas ruwaran (2 Cor. 11:26). Aswanmi Diospi Bibliapi ima confiaran, manan ‘maqanakuna armakunapichu’ (Ecl. 9:18).

Cristianokunapaqqa runaq vidanmi imamantapas astawanqa valen. Bibliaq nisqan jina, askha imaymanayoqña kasunman chaypas, manan chaychu kausaytaqa qowasun (Luc. 12:15). Chaymi pi suwapas suwayta munawanchis chayqa munayllata paywan rimananchis. Mana uyarikuspachus suwaytapuni munawanchis chayqa manan ‘churapakunanchischu chay millay runawanqa’. Aswanmi dejanallanchis imanchistapas  apananta (Mat. 5:39, 40; Luc. 6:29). * Ichaqa chaykuna mana pasananpaqqa manan alayritachu imanchistapas jap’inanchis. Chaymantapas vecinokunawan thajpi kausasun chayqa paykunapas sumaqtan qhawariwasun (Prov. 18:10; 1 Juan 2:16).

Jujkunaq concienciantan respetananchis (Rom. 14:21). Sichus iñiqmasikuna yacharunman pi hermanopas armayoq kasqanta chayqa, yaqapaschá chaywan mancharikunkuman, wakinqa misk’anman imapaschá. Manaña autoridadkuna jark’akunkumanchu armayoq kayta chaypas iñiqmasinchiskunapin piensananchis. Paykunata munakunchis chayqa manan imatapas ruwananchischu conciencianku contraqa (1 Cor. 10:32, 33; 13:4, 5).

Cristianokunaqa ejemplon kananchis (2 Cor. 4:2; 1 Ped. 5:2, 3). Juj cristiano armayoq kanman, paytaq imaymana consejotaña chaskishaspapas mana cambianmanchu chayri, ¿ejemplochu kashanman Diospa llaqtanpi ima privilegiotapas chaskinanpaq? Manan. Chaymi pasallanmantaq armayoq llank’aq hermanowanpas; chaymi paypaqqa allin kanman waj llank’anata maskhakuy. *

Chhaynaqa sapanka cristianon allinta qhawarinan imaynatas familianta cuidanqa, imaynatas kaqninkunata cuidanqa, ima llank’anatas chaskinqa chaytapas. Ichaqa Bibliaq nisqanman jinan imatapas ruwanan; chaypin willashan imatas Dios piensan chayta. Chaymantapas allin yuyayniyoq cristianokunaqa respetankun Bibliaq nisqanta chaymi mana ima armatapas jap’inkuchu. Paykunaqa Diospin confianku; payllan kay pachamanqa cheqaq thaj kausayta apamunqa (Sal. 97:10; Prov. 1:33; 2:6, 7).