1-3. a) ¿Jayk’aqmi Salmos 147 capitulota qelqakunman karan? b) ¿Imatan yachasunman chay capitulomanta?

PIPAS allin cristiano otaq allinta imatapas ruwan chayqa allintan chay iñiqmasimanta rimanchis, ¿riki? Ichaqa Jehová Diostan pimantapas mastaqa jatunchananchis. ¿Imarayku? Pay tukuy imata kamasqanrayku, noqanchisrayku wawanta kachamusqanrayku ima.

² Salmos 147 capitulota qelqaq runaqa tukuy sonqowanmi Jehová Diosta jatunchaq. Chaymi jujkunatapas kallpacharan chayta ruwanankupaq (leey Salmos 147:1, 7, 12).

³ Manan yachakunchu pichus Salmos 147 capitulota qelqaran chayta. Ichaqa yaqachus jina qelqakunman karan Jehová Dios Israel llaqtata Babiloniamanta kacharichishaqtin (Sal. 147:2). Chay capitulota qelqaqqa Diostan jatuncharan llaqtanta jujmanta Jerusalenman kutichipusqanmanta. Ichaqa manan chayraykullachu jatuncharan. Chhaynaqa,  ¿imaraykupiwanmi jatunchanman karan? ¿Imaraykun noqanchispas Jehová Diosta jatunchananchis? (Sal. 147:1).

4. ¿Imaynan kasharanku Israel runakuna? ¿Imaynan tarikunkuman karan Ciro paykunata libraqtin?

⁴ Babilonia llaqta runakunan Israel runakunamanta burlakuqku: “¡Sión llaqta takikunata takiykapuwayku!”, nispa. Chaywanqa maytachá Israel runakunaq sonqonqa nanaq. Paykunaq llaqtankuqa thunisqan kasharan, manañan imapas kusikunankupaq karanchu (Sal. 137:1-3, 6). May llakisqapunichá paykunaqa kasharanku; kallpachanatan munasharanku. Chayllamanmi, Jehová Diospa willasqanman jina, Persia llaqtamanta Ciro Babilonia llaqtata thunichipuran, chhaynapin Israel llaqtaqa libre kapuranku. Ciroq nisqan jina, Jehová Diosmi paytaqa kamachiran ‘Jerusalén llaqtapi yupaychana wasita sayarichipunanpaq’, chaymi niran: “Jayk’an Diospa llaqtanmanta kaypi kashaqkuna Jerusalén llaqtaman puririchunku, Diosninku Señor Diostaq paykunawan kachun”, nispa (2 Crón. 36:23). Chaywanqa maytachá kusikuranku Israel runakunaqa.

5. Salmos 147:3 textoq nisqa jina, ¿imatan Jehová Dios ruwan llakipi tarikuqtinchis?

⁵ Jehová Diosqa manan Israel llaqtallatachu kallpacharan, aswanpas sapankankutan kallpacharan. Kaqtan kunanpas payqa ruwashan. Salmos 147 capitulota qelqaq runan niran: “Paymi llakiq ñit’isqan sonqoyoqkunata qhaliyachin, k’irinkunatapas wataykun”, nispa (Sal. 147:3). Chaymi noqanchisqa onqosqa otaq llakiq ñit’isqan kashanchis chayqa, Diospi confiananchis, paymi sonqochawasun k’irinchiskunatapas jampiwasun (Sal. 34:18; Is. 57:15). Chaymantapas allin yuyayta kallpata iman qowasun ima problematapas allin yuyaywan allichananchispaq (Sant. 1:5).

6. ¿Imatan yachasunman Salmos 147:4 textomanta? (15 paginapi dibujota qhaway.)

⁶ Chaymantataq chay Salmosta qelqaq runaqa cielota qhawarispa Jehová Diosmanta niran: “Paymi jayk’achus ch’askakuna kasqanta yupan, sapankatan sutinmantakama wajan”, nispa (Sal. 147:4). Chay runa rikusharanña ch’askakunata chaypas manan yacharanchu jayk’achus kasqanta. Kunan tiempopi científico runakunapas yachankun askha ch’askakuna kasqanta ichaqa manan yupaytapas atinkuchu. Jehová Diosmi ichaqa yachan jayk’achus kasqankuta. Arí, sapankatan allinta reqsin, sapankamantaqmi sutitapas churan (1 Cor. 15:41). ¿Imatan chaymanta yachasunman? Imaynan Diosqa sapanka ch’askata allinta reqsin chhaynatan payqa sapankanchista allinta reqsiwanchis. Chaymantapas allintan yachan maypis kashanchis, imaynas sonqonchis kashan, imatas munashanchis chaytapas.

7, 8. a) ¿Imatan Jehová Dios allinta yachan noqanchismanta? b) ¿Ima ejemplon rikuchin entiendewasqanchista?

 ⁷ Jehová Diosqa allintan yachan imapis sapankanchispas tarikushanchis chayta, kantaqmi atiyninpas yanapawananchispaq (leey Salmos 147:5). Mayninpiqa yaqapaschá ima ruwasqanchismantapas sinchita llakikunchis; “manañan atiymanchu” ninchispaschá. Jehová Diosqa allintan yachan chayta, ‘yuyarintaqmi ñut’u allpa kasqanchistapas’ (Sal. 103:14). Juchasapa runakunataq kanchis chayqa yaqapaschá mayninpiqa sapa kutillan imapipas pantashanchis. Yaqapaschá imatapas mana piensaspa rimaruranchis; mayninpiqa mana allin piensaykunapaschá umanchisman jamuwanchis; mayninpiqa jujkunatapaschá envidiakuranchis; maytachá chaykunamantaqa llakikuranchis. Diosqa manaña chaykunata pasanchu chaypas payqa allintan entiendewanchis (Is. 40:28).

⁸ Yachasqanchis jina Jehová Diosqa tukuy atiyniyoqmi, yaqapaschá jayk’aqllapas chayta repararanki (Is. 41:10, 13). Yachasun Kyoko sutiyoq hermanamanta. Payqa juj llaqtatan risqa yanapakuq, ichaqa sinchi llakisqan chaypi kasharan. ¿Imaynapin reparakuran Jehová Dios paywan kashasqanta? Iñiqmasikuna imayna kallpachasqanpin. Paymi nin: “Jehová Diospas ‘munakuykin wawallay, ichaqa manan precursora kasqaykiraykullachu aswanpas noqaman vidaykita qowasqaykiraykun. Kusisqa serviwanaykitan munani’ nispa niwashanman jinan kasharani”, nispa. Rikusqanchis jina Diosqa allintan yachan imaynapi tarikusqanchistapas.

9, 10. ¿Imaynatan Jehová Dios yanapawanchis? Juj ejemplota willay.

⁹ Mayninpiqa yaqapaschá mijunamanta ima llakikusun. Ichaqa Jehová Diosqa manan imatapas faltachiwasunchu. Chaymantapas paymi kay pachataqa kamaran mijuyta qowananchispaq. Paymi “waqashaq alqamari chiuchikunamanpas mijuchin” (leey Salmos 147:8, 9). Chay animalkunamanpas mijuchintaq chayqa, noqanchistapas allintan uywawasun (Sal. 37:25).

¹⁰ Astawanqa Diosqa yanapawanchis, iñiypi qaqata sayananchispaqmi. Chaymantapas ‘runaq mana entiendey atisqan thaj kaytan’ payqa qowallanchistaq (Filip. 4:6, 7). Chaypaq yachasun Mutsuo sutiyoq hermanomanta esposanmantawan. Paykunan rikuranku Jehová Diospa yanapayninta 2011 watapi Japonpi terremoto pasashaqtin. ¿Imaynapi? Terremoto pasaruqtinsi lamar-qocha phoqchirimusqa, jinaspas llapa wasikunata thunipusqa, wasinkutapas lliutas apapusqa. Paykunaqa techoman seqaspallañas salvakusqaku. Chay tutaqa thunisqa altos wasillapiñas puñusqaku. Paqaristintaq qelqakunata maskhasqaku chaywan kallpachakunankupaq. Chaypiqa Anuario de los testigos de Jehová 2006 nisqa librollatas tarisqaku. Chaypis paykunaqa “Los tsunamis más mortíferos de la historia” nisqa parteta leeyta qallarisqaku, leesqankuman jinas weqenku phawarimusqa. Chaypiqa  2004 watapi Sumatra islapi terremoto pasasqanmantan willasharan. Jehová Diospas munakuywan sumaqta kallpachashanman jinas sientekusqaku. Diospa munakuynintan rikullarankutaq hermanokuna p’achata mijunata ima qoqtinku. Mutsuo hermanon nin: “Jehová Diospas ladoykupi kashanman; pay kikinpas kallpachawashankuman jinan kasharayku”, nispa. Rikusqanchis jina Jehová Diosqa iñiypi kallpachasqa kananchispaqmi astawanqa yanapawanchis, yanapawallanchistaqmi mana imapas faltawananchispaq.

11. ¿Imatan ruwananchis Jehová Dios yanapawananchispaq?

¹¹ Jehová Diosqa liston kashan ‘juch’uyyaykukuqkunata aysarinanpaq’ (Sal. 147:6a). Ichaqa, ¿imatan ruwananchis yanapawananchispaq? Paywanmi allin amigontin  kananchis, paypa amigon kanapaqmi ichaqa llamp’u sonqo kananchis (Sof. 2:3). Llamp’u sonqo runakunaqa manan paykunallamantachu imatapas ruwanku, aswanmi Jehová Diospi confianku, paypa allichanantataqmi suyakunkupas. Chhayna runakunatan Diosqa munakun.

12, 13. a) ¿Imatan mana ruwananchischu Jehová Diospa yanapayninta chaskinanchispaq? b) ¿Imatan ruwananchis Jehová Diosta kusichinanchispaq?

¹² Mana kasukuqkunawanri, ¿imatataq ruwanqa? Bibliaq nisqan jina ‘millaykunataqa pampakama k’umuykachinqa’ (Sal. 147:6b). Chaymi noqanchisqa cheqnikunanchis mana allin ruwaykunata, mana chayqa Diosmi chinkachiwasunman (Sal. 97:10). Arí, cheqnikunanchismi qhelli jucha ruwaytapas, chaypaqmi ichaqa manapuni qhawananchischu “pornografía” nisqata (Sal. 119:37; Mat. 5:28). Manapaschá facilchu chay kanqa, ichaqa chayta ruwasun chayqa Jehová Diostan kusichisun chhaynapin payqa bendeciwasun.

¹³ Chaymantapas chaykunata vencenapaqqa Jehová Diospa yanapaynintan mañakunanchis. Manan ‘caballoq kallpanpichu’ ni ‘runaq kallpanpipaschu’ confiananchis (Sal. 147:10). ¿Ima ninantaq chayri? Manan juj runakunapi ni noqallanchispichu confiakunanchis. Aswanpas Diospa yanapaynintan mañakunanchis. Jinaspapas Diosqa manan runakuna jinachu sayk’un, payqa ima ratopas uyariwashallanchismi. Salmos 147:11 textopi nisqan jina, Jehová Diosqa “payta manchakuqkunawanmi kusikun, munakuyninman sonqollikuqkunawanmi kusikun”. Chhaynaqa Diospa yanapayninwanqa mana allin munapayaykunatapas vencesunmi.

14. ¿Iman Salmos 147 capitulota qelqaq runata kusichiran?

¹⁴ Jehová Diosqa imapiña tarikuqtinchispas yanapawasunpunin. Israel runakuna Jerusalenman kutimpushaqtinkupas yanaparanmi paykunata, chay yanapasqanpi piensaspan Salmos 147 capitulota qelqaq runaqa niran: “Paymi punkuykikunaq p’utinta mat’iykuran, llaqta ukhupi kaq  wawaykikunatapas samincharan. Paymi suyuykita thaj-nisqata jap’in”, nispa (Sal. 147:13, 14). Rikusqanchis jina chay runaqa kusisqan kasharan Dios llaqtanta allinta cuidasqanmanta, punkunkunatapas allinta sayachisqanmantawan.

15-17. a) ¿Imaynan mayninpi tarikusunman? ¿Imaynatan Dios siminwan yanapawanchis? b) ¿Imaynatan Jehová Dios siminwan juj hermanata yanaparan?

¹⁵ Mayninpiqa yaqapaschá ima problemapas sinchita llakichiwasunman. Chaykunapin Diosqa yanapawallasuntaq. Arí, allin yuyaytan qowasun chay problemakunata allichananchispaq. ¿Imaynatan chayta ruwanman? Chay Salmos librota qelqaq runan niran: “Kay pachamanmi payqa siminta willachimun, usqhayllan siminqa ch’eqerin”, nispa. Chaymantan nillarantaq: “Millmata jinan rit’ita rit’ichimun, usphata jinan qhopatapas qhopachimun. Chijchitan khullu rumita jinaraq chayachimun”, nispa. Chaymantataq tapukuran: “Chirichimuqtinri, ¿pitaq aguantanman?”, nispa. Ultimotataq niran: “Rimarimuqtinmi chaykuna chullurin”, nispa (Sal. 147:15-18). ¿Imatan chaymanta yachasunman? Jehová Diospaqqa manan imapas mana atikuqqa kanchu. Chhaynataq chayqa, yanapawasunpunin payqa.

¹⁶ Chaymantapas Diosqa siminwanmi yanapawanchis. “Usqhayllan siminqa ch’eqerin” ¿Imaynan chay? Payqa munashasqanchis raton yanapayninta chayachimuwanchis. Chaypaq piensasun imaymanakuna qowasqanchispi. Chaykunan kashan Biblia, ‘allin yuyayniyoq junt’aq kamachiq’ orqomusqan qelqakuna, JW Broadcasting nisqa, jw.org nisqa página, umalliqkuna, iñiqmasinchiskuna ima (Mat. 24:45). ¿Manachu chaykunawan reparanki Jehová Diosqa ‘usqhaylla siminta’ chayachimusqanta?

¹⁷ Simona sutiyoq hermanan mana valeqpaq jina qhawarikuq. “Dios noqata munakuwanmanchus” nispan niqpas. Chhaynaña kasharan chaypas rimashallaqmi Dioswanqa, estudiashallaqmi Bibliatapas. Chay hermanan nin: “Imaynapiña tarikurani chaypas, manan jayk’aqpas Jehová Diosqa saqewaranchu, yanapawashallaranmi payqa”, nispa. Chaywanmi payqa kusisqa kaq.

18. ¿Imaraykun niwaq “Jehová Diosqa noqawanmi kashan” nispa? ¿Ima razonkunan kan payllata jatunchananchispaq?

¹⁸ Salmos 147 capitulota qelqaq runaqa allintan yacharan Israel llaqtallata Dios bendecisqanta, paykunallamanmi “siminta” “kamachikusqankunatapas” qoran (leey Salmos 147:19, 20). Noqanchispas Diospa bendecisqanmi kashanchis. Noqallanchistan ajllawaranchis sutinta apananchispaq. Chaymantapas maytachá Diostaqa “gracias” ninchis siminta reqsichiwasqanchismanta, paywan amigontin kasqanchismantapas. Chaymi Salmos 147 capitulota qelqaq runa jina noqanchispas Jehová Diosllata jatunchananchis. Jujkunatapas kallpachananchismi chayta ruwanankupaq.