1, 2. ¿Imaraykun kanqapuni wajcha runakuna?

KAY tiempopiqa sasan imapas kashan. Manan facilchu llank’ana tariypas, chaymi wakin runakunaqa juj lado nacionkunamanraq ripushanku imallatapas tariq. Ichaqa chay nacionkuna qhapaqña chaypas kanmi wajchakunaqa. Chaymantapas kunan tiempoqa qhapaqkunan astawan qhapaqyashanku wajchakunataq astawan wajchayashanku. Yupasqallan qhapaqkunaqa kankupas ichaqa paykunaq qolqenkuqa manan comparakunchu lliu mundontinpi runakunaq qolqenmanpas. Paykunaqa, nietonkupas nietonkunaq nietonkupas mantenikunankupaq jinaraqmi qolqeta juñushanku; wajchakunaqtaq ichaqa mana ni mijunankupaqpas kanchu. Jesuspas yacharanñan chaykuna kanantaqa, chaymi niran: “Wajchakunaqa tukuy tiempon qankunawan kashan”, nispa (Mar. 14:7). ¿Imaraykun chhayna “desigualdad” nisqa kan?

² Kay mundotaqa Satanasmi gobiernashan chaywanmi desigualdad kan. Chaymantapas Satanaspa gobiernonpi ‘negocio ruwaqkunaqa’ nishu egoistakunan kanku, paykunallapin piensanku (Apo. 18:3). Politicapas falso religionkunapas Satanaspan. Chaymi Diospa gobiernonqa llapa chaykunata  chinkachinqa. Chayraykun noqanchisqa t’aqakunanchispuni politicamanta falso religionmantapas. ¿Negocio ruwaymantari? Chaymantapas t’aqakunanchismi, ichaqa wakinpaqqa manapaschá facilchu chayta ruway.

3. ¿Imakunamantan kaypi yachasun?

³ Noqanchis cristianokunaqa allin yuyaywanmi qhawarinanchis negociokuna ruwayta, mana chayqa chayllapiñan yuyayninchis kanman. Chaymi tapukunanchis: “¿Imaynatan kaqniykunawan Diosta serviyman? ¿Imatan ruwayman ama nishuta negociokuna ruwayllaman qokunaypaq? ¿Imaynatan rikuchiyman Diospi confiasqayta?”, nispa. Chaykunamantan kaypi yachasun.

4, 5. a) ¿Imapin tarikuran Jesuspa willasqan mayordomo? b) ¿Ima consejotan Jesús qoran discipulonkunaman?

⁴ (Leey Lucas 16:1-9). Jesusmi willaran juj mana allin mayordomomanta. Chay mayordomoqa llank’ananmantan qarqosqa kanan kasharan. * Jinan payqa ‘yachaysapa’ kayninpi juj runakunawan amigota armayta qallariran, chhaynapi qarqosqa kaqtinqa paykuna yanaparinankupaq. ¿Discipulonkuna chay runa jina mana allin kanankupaqchu Jesús chayta willanman karan? Manan. Paypa nisqan jina ‘kay pacha runakunan’ chaykunataqa ruwanku. Chhaynaqa, ¿imapaqmi chayta willanman karan? Discipulonkuna yachaywan imatapas ruwanankupaqmi willaran.

⁵ Jesusqa yacharanmi chay mayordomo jina discipulonkunapas sasachakuykunapi tarikunankuta. Arí, yacharanmi kay mundopiqa may sasawan imatapas tarinankuta. Chaymi niran: “Mana allin qhapaq kaykunawan amigokunata ruwaychis”, nispa. Ichaqa, ¿pikunamantan chaypi rimasharan? Pay kikinmanta Jehová Diosmantawan. Paykunamanmi ‘qhapaq kayninchiskunata’ qonanchis, chhaynapin paykunawan amigota ruwasunchis, jinan “chay qhapaq kaykuna” tukukapuqtinqa ‘wiñay tiyana cheqaskunapi chaskiwasunchis’.

6. ¿Imaraykun nisunman: “Negociokuna ruwaypas empresakunapas manan Diospa munayninpichu karan”, nispa?

⁶ ¿Imaraykun Jesús niran “mana allin” nispa qhapaq kaykunata? Bibliaqa manan willanchu chaytaqa, ichaqa allintan yachakun negociokunapas empresakunapas mana Diospa munayninpichu kasqanta. ¿Imaraykun chayta ninchis? Adán Evata kamashaspaqa llapa ima necesitasqantan Diosqa paykunaman qoran (Gén. 2:15, 16). Ñaupa tiempopi discipulokunaman Dios espiritunta qoshaqtinpas “manan mayqenninkupas imachus kapuqninkumantaqa ‘noqaqmi kayqa’ niqkuchu, aswanpas tukuy imankupas llapankupaqmi kaq” (Hech. 4:32). Profeta Isaiaspas willaranmi qhepa tiempopiqa llapa runapas kay pachapi mijuykunawan sajsa kanankuta (Is. 25:6-9; 65:21, 22). Chay tiempo chayamunankaman ichaqa, vidata pasananchispaq “yachaywan” otaq allin yuyaywan  ‘mana allin qhapaq kaykunata’ tarinanchis. Chaymantapas tukuy atisqanchistan kallpachakunanchis Diospa munasqanman jina imatapas ruwananchispaq.

7. ¿Imatan yachasunman Lucas 16:10-13 textomanta?

⁷ (Leey Lucas 16:10-13). Jesuspa willasqanpi mayordomoqa interesraykullan amigokunata ruwaran. Jehová Dioswan Jesuswan amigota ruwaq cristianokunan ichaqa mana interesraykuchu paykunawan amigota ruwananchis. Aswanmi noqanchisqa, Jesuspa willasqan jina, ‘mana allin qhapaq kaykunawan’ rikuchinanchis Diospa amigon kay munasqanchista, paypaq junt’aq sonqo kay munasqanchistapas. ¿Imaynatan chayta ruwasunman?

8, 9. ¿Imaynatan wakin hermanokuna usashanku ‘mana allin qhapaq kayninkuta’?

⁸ Kay pachapi Diospaq llank’aypin yanapakunanchis (Mat. 24:14). Chaypaq yachasun wakin hermanokunamanta. India nacionpis juj chicacha cajachapi qolqechanta juñukuq kasqa. Manas pujllanatapas rantikusqachu cajachan junt’anankama. Junt’arachispas payqa predicacionta apariypi yanapakunanpaq donapusqa. Chay nacionllapitaqmi coco chajrayoq hermanopas “yachayniyoq” kasqanta rikuchiran, ¿imaynata? Diospaq llank’aypi qolqewan yanapakunanmantaqa askhatan cocota aparan qelqakunata t’ijrakusqan oficinaman. Grecia nacionpi hermanokunapas chhaynatan ruwallankutaq. Paykunaqa sapa kutillanmi olivo aceiteta, quesota ima Betelman apanku.

⁹ Sri Lanka nación llaqtayoq juj hermanomantawan yachasun. Payqa juj ladopin tiyan ichaqa kanmi llaqtanpi wasinpas allpanpas. Chaypin hermanokunaqa juñunakunku asambleakunatapas ruwanku, wasinpitaq tukuy tiempo Diosta serviq hermanokuna alojakunku. Gastoña paypaq chaypas manan chaypichu piensan. Chaymantapas wakin nacionkunapiqa prohibisqan kashanchis, chaypipas wakin hermanokunaqa wasinkutan qonku chaypi juñunakuykuna aparikunanpaq. Chhaynapin hermanokunaqa manaña gastankuchu alquilerpi.

10. ¿Imaynapin allinninchispaq kanman qoykukuq kay?

¹⁰ Chay ejemplokunan rikuchin Diosta serviqkunaqa ‘pisillapipas junt’aq’ sonqo kasqankuta (Luc. 16:10). Arí, paykunaqa jujkunapaqmi usanku lliu imankutapas. ¿Imaynan sientekunku chaykunata ruwaq hermanokuna? Anchatan kusikunku. Paykunaq nisqanku jina, chaykunata ruwaspan cheqaq qhapaq kaykunata tarishanku  (Luc. 16:11). Donacionkunata churaq juj hermanan willakun kay tiempokama paywan imachus pasasqanta. Paymi nin: “Reparakusqayman jinaqa, qoykukuq kaspaymi astawan yachashani perdonaq kayta pacienciakuyta ima. Chaymantapas faciltan chaskikuni ima consejotapas”, nispa. Wakinqa qoykukuq kaspankun chaskishanku imaymana bendicionkunata (Sal. 112:5; Prov. 22:9).

11. a) ¿Imaynatan rikuchisunman “yachaywan” ruwaq kasqanchista? b) ¿Imatan Diospa llaqtanpi ruwakushan? (3 paginapi fotota qhaway.)

¹¹ ¿Imatawanmi ruwasunman “yachaywan” ruwaqkuna kasqanchista rikuchinanchispaq? Kaqninchiskunawanmi yanapakunanchis, ¿imaynata? Manaña juj ladokunata yanapakuq riyta atisunchu chaypas yaqapaschá atisqanchisman jina ima kaqninchistapas donasunman (Prov. 19:17). Chayta ruwaspaqa qelqanchiskuna ruwakunanpaqmi yanapakusun; yanapakusuntaqmi juj nacionkunapi predicación aparikunanpaqpas. Congo, Madagascar, Ruanda nacionkunapi hermanokunaqa Biblia rantiyta otaq mijuna rantiytan ajllakunanku kaq, ¿imarayku? Chay nacionkunapiqa juj semana otaq juj killa pagon Bibliaqa valeq. Ichaqa hermanokunaq donacionkuna churasqanwanmi paykunapaq Bibliakunata orqokamuran, chaytataq llapa familiakunaman estudiantekunaman ima gratislla rakikuran (leey 2 Corintios 8:13-15). Chhaynapin qoqkunapas chaskiqkunapas Diospa amigonkuna karanku.

12. ¿Imaynatan Abrahán rikuchiran Diospi confiasqanta?

¹² ¿Imatawanmi ruwasunman Diospa amigon kananchispaq? Manan negocio ruwaykunapichu afanakunanchis, aswanmi tukuy atisqanchista kallpachakunanchis cheqaq qhapaq kaykunata tarinanchispaq. Chaytan Abrahanpas ruwaran. Payqa Diospa amigon kayta munaspan qhapaq Ur llaqtanta saqeran, jinaspa karpakunapi tiyaspa puriran (Heb. 11:8-10). Chaymantapas payqa tukuy sonqon Diospi confiaran (Gén. 14:22, 23). Jesuspas munaranmi qatikuqninkuna chayta ruwanankuta, chaymi juj waynata niran: “Dios serviyniykita allintapuni junt’ayta munanki chayqa, phaway kaqniykikunata vendemuy, chaytataq wajchakunaman qomuy, chhaynapin janaq pachapi qhapaq kayniyki kanqa; jinaspa qatikamuway”, nispa (Mat. 19:21). Chay waynaqa manan Abrahán jinachu karan. Jujkunan ichaqa Abrahán jina Diospi confiaranku.

13. a) ¿Ima niranmi apóstol Pablo Timoteota? b) ¿Imaynatan noqanchispas rikuchisunman chay consejo kasukusqanchista?

¹³ Timoteopas Diospi confiaq runan karan. Paytan apóstol Pablo niran: “Cristo Jesuspa allin soldadon”, nispa. Chaymantan nillarantaq: “Yachasqayki jinapas, manan pipas soldado kashaspaqa negocio ruwaykunaman jaykunmanchu, mana chayqa  soldado kananpaq wajaqninchá mana allinpaq qhawarinman”, nispa (2 Tim. 2:3, 4). Kay tiempopi Jesuspa discipulonkunapas chay consejotan kasukushanku, chaymi juj millón masña kashanku tukuy tiemponkuwan Diosta serviqkuna. Chaymantapas paykunaqa manan engañachikunkuchu propagandakunawan, aswanpas allintan yachanku manukuqqa manuqninpa kamachin kasqanta (Prov. 22:7). Chaywanpas Satanasqa maytan munashan negociokuna ruwaypi afanasqa kananchista. Chayman urmaspan wakinqa prestamokunata orqoshanku wasipaq, carropaq, universidadpi estudianankupaq, casarakuspa jatun fiestata ruwanankupaq ima. Chhaynapin watan-watan manullankuta pagashanku. Chaymi noqanchisqa allin yuyaywan imatapas ruwananchis. Chhaynapin mana kay pachaq esclavonchu kasunchis, aswanpas Diospa esclavonmi kasunchis (1 Tim. 6:10).

14. ¿Imata ruwaspan rikuchinanchis Diosta ñaupaqman churasqanchista? Experienciakunata willay.

¹⁴ Kapuqnillanchiswan kausanapaqqa Diospa munaynin ruwaytan ñaupaqman churananchis. Chaytan ruwaranku juj casado hermanokunapas. Paykunaqa jatun negocioyoqmi karanku jinan Diosta jujmanta tukuy tiempo serviyta munaspa vendepuranku chay negocionkuta. Chaymantataq Nueva York llaqtapi kaq Warwick llaqtapi construccionpi yanapakunankupaq presentakuranku. Chaypin paykunaqa askha semanakuna hermanoq tayta-mamanwan kuska llank’aranku. Chaymantapas Betelpi llank’aq jujnin ususinkuwan qatayninkuwan iman llank’aranku. Estados Unidospi Colorado llaqtapi juj precursorapas yaqa chhaynatan ruwallasqataq. Payqa juj bancopis llank’asqa kuskan p’unchaylla, ichaqa jefenkunas reparasqaku allin llank’aq kasqanta jinas nisqaku ch’isiyaqta llank’ananpaq, pagontapas kinsa kuti mastaraqsi pagapunanku kasqa, chay hermanas ichaqa “imaynatataq precursora kayniytari junt’ayman” nispa mana munasqachu. Paykuna jinan askha hermanokuna imaymanata ruwashanku Jehová Diosta servinankurayku. Chhaynapin rikuchishanku Diosta ñaupaqman churasqankuta, Diosmanta jamuq qhapaq kaykunata imamantapas masta munakusqankutawan.

15. ¿Ima ruwaymi noqanchispaq qori tariy jina kanman?

¹⁵ Diosqa yanapan ‘allin ruwaykunapi qhapaq’ kaqkunatan, manan kay pachapi qhapaq kaqkunatachu (leey 1 Timoteo 6:17-19). Chaypaq yachasun Italia nacionpi hermana Luciamanta. * Payqa Albania nacionpi predicaqkuna munakusqanta yachaspan 1993 watapi chay nacionman astakusqa. Manaña imayna mantenekunanpaq karanchu chaypas Jehová Diospin confiaran. Payqa ñan 60 runakunataña yanapashan Diospa testigon kanankupaq. Predicasqanchis ladokunapiqa manapaschá llapa runakunachu Diosmanta uyarikunku. Ichaqa tukuy atisqanchistan kallpachakunanchis runakunata  yanapananchispaq, chayta ruwasun chayqa qoritapas tarishasunman jinan noqanchispaq kanqa (Mat. 6:20).

16. a) ¿Iman pasanqa kay mundopi tukuy ima kaqkunawan? b) ¿Imaynatan qhawarinanchis kay pacha qhapaq kaykunata?

¹⁶ Lucas 16:9 textopi qhapaq kaykunamanta rimaspaqa manan Jesusqa yaqapaschá tukukapunqa niranchu, aswanpas tukukapunqan niranmi. Chaykunaqa ñan kunan tiempopipas pasashanña, wakin ladokunapiqa bancokuna iman fracasapushan, wakin nacionkunapas wajchayapushankun. Jamuq tiempopiqa imaymanakunaraqmi pasanqa; kay mundopi política, falso religionkuna, imaymana negocio ruwaykuna iman chinkapunqa. Profeta Ezequielpas Sofoniaspas willarankuñan chay tiempopiqa qoripas qolqepas mana valenanta (Ezeq. 7:19; Sof. 1:18). Chaymi allinta piensaspa imatapas ruwananchis. ¿Allinchu kanman kay pacha qhapaq kaykunarayku Diosmanta jamuq qhapaq kaykunata qonqapuy? Manan. ¿Imarayku? Tukukuy p’unchay chayamuqtinqa manan imanchispas valenqachu. Imaymanakunata juñuqkunapas engañasqa jina kanqaku (Prov. 18:11). Nisqanchis jina, kay pacha qhapaq kaykunaqa tukukapunqapunin. Chaymi kaqninchiskunata usananchis Jehová Diospa munayninta ruwananchispaq chhaynapin paywan Jesuswan ima amigontin kasunchis. Chayta ruwasun chayqa kusisqan kausasunchis.   

17, 18. ¿Imaynan kausay kanqa Diospa amigonkunapaq?

¹⁷ Kay pachata Dios gobiernapuqtinqa manan alquilerpaqpas bancopaqpas doctorkunapaqpas ni jampikunapaqpas qolqeta juñunanchischu kanqa. Manan mijuykunatapas rantisunchu aswanmi kay pachaq mijuy qosqanta gratis mijukusunchis. Manan qoritapas ni qolqetapas juñusunchu aswanmi chaykunawan churakunanchispaq alajakunata ruwakusun. Amigonchiskunapas manan qolqeraykuchu yanapawasun aswanmi yanapayta munaspa sonqomanta yanapawasun. Wasikunatapas maderamanta rumimanta imaymana materialmantan munayta ruwakusun. Kay pachapiqa llapanchismi sumaqta kausasunchis.

¹⁸ Manan chaykunallatachu Jehová Diospa Jesuspa amigonkunaqa chaskinqaku, juj regalokunatawanmi chaskinqaku. Pisi tiempollamantan Diosta kasukuqkunata Jesús ninqa: “Jamuychis, Yayaypa sumaq qhawarisqan kaqkuna, jinaspa runakunaq qallariyninmantapacha qankunapaq preparasqa gobiernota herenciapaq chaskiychis”, nispa (Mat. 25:34).