1, 2. ¿Imaraykun yachananchis wañupuqniyoqkunata imayna consolayta? (Kay paginapi fotota qhaway.)

HERMANA Susin nin: “May sonqo nanaymi noqaykupaqqa karan wawaykuq wañupusqan; yaqa juj wata jinan chhayna karayku”, nispa. Juj hermanon willakullantaq: “Esposay wañupuqtinqa sinchitapunin lliu cuerpoy nanaykuwaran, mana aguantaytapunin nanaykuwaq”, nispa. Askhan chhayna llakikunapi tarikushanku. Wakin iñiqmasikunaqa manapaschá ni piensarankupaschu Armagedón manaraq chayamushaqtin familianku wañupunanta. Chayrayku familiayki o pi reqsisqaykiq familianpas wañupuran chayqa, ¿imaynatan payta yanapawaq?

² Yaqapaschá uyariranchis “tiempowanqa qonqapullankin” nispa niqta. Ichaqa, ¿chhaynapunichu chay? Juj viuda hermanan nin: “Noqaq piensasqayman jinaqa tiempoykiwan imachus ruwasqaykin imatapas thanichin”, nispa. Imaynan cuerpopi k’iritaqa munayllata jampikun chhaynatan ruwananchis sonqonchis k’iri kaqtinpas. Chhaynaqa, ¿imaynatan wañupuqniyoqkunaq sonqonta jampisunman?

3, 4. ¿Imaraykun nisunman “Jehová Diosqa entiendewanchismi pininchispas wañupuqtin” nispa?

³ Bibliaq nisqan jina, Jehová Diosmi tukuy ima llakipipas kallpachakuq Diosqa (leey 2 Corintios 1:3, 4). Chaymantapas pay kikinmi nin: “Noqapunin sonqochaqniykiqa kani”, nispa (Is. 51:12; Sal. 119:50, 52, 76). Chhaynapin payqa allin ejemplo noqanchispaq.

⁴ Papanchis Jehová Diospa munakusqan runakunapas wañupurankun. Paykunan karanku Abrahán, Isaac, Jacob, Moisés, David ima (Núm. 12:6-8; Mat. 22:31, 32; Hech. 13:22). Bibliaq willasqan jina, payqa maytapunin munashan paykunaq kausarimpunan p’unchay chayamunanta (Job 14:14, 15). Chay tiempo chayamuqtinqa mana onqospachá paykunaqa kusisqa kausanqaku. Diospa ancha ‘munakusqan’ wawan Jesuspas wañupuranmi (Mat. 3:17). Chayqa may sonqo nanaychá paypaqqa karan (Juan 5:20; 10:17).

5, 6. ¿Imaynatan Jehová Dios kallpachawanchis?

⁵ Jehová Diosqa yanapawasunpunin, chaymi tukuy llakikuyninchiskunata payman willakunanchis. Chhaynapin sonqonchis thaj kanqa, manañataqmi sinchi llakisqachu kasunchis. Ichaqa, ¿imaynatan pay kallpachawanchis?

⁶ Jehová Diosqa imaymanawanmi kallpachawanchis, jujninmi kashan “santo espíritu” (Hech. 9:31). Jesuspa nisqan jina, chay santo espiritutan Diosqa qon “mañakuqninkunaman” (Luc. 11:13). Qallariypi rimamusqanchis hermana Susin nillantaq: “Mayninpiqa qonqoriykukuspa imaraqmi Diosmanta kallpata mañakuq kayku. Chaykunata ruwaqtiykun umaykupas sonqoykupas thaj niykuq”, nispa (leey Filipenses 4:6, 7).

7, 8. ¿Imaraykun nisunman “Jesusqa yanapawasunmi” nispa?

⁷ Jesusqa tukuy ima ruwasqanpi rimasqanpi iman rikuchiran Papan jina munakuq khuyapayakuq kasqanta (Juan 5:19). Papanmi paytaqa kay pachamanpas kachamuran “llakisqa sonqoyoqkunata” “lutopi [otaq llakikuypi] kaqkunata” sonqochananpaq (Is. 61:1, 2; Luc. 4:17-21). Runakunapas repararankun Jesusqa khuyapayakuq sumaq sonqo kasqanta (Heb. 2:17).

⁸ Jesús wayna kashaqtinpas pikunaraqchá familianmantaqa wañukapuranku, wañukapuranpaschá mayqen amigonpas. Uywaqnin Josepas yaqapaschá wañukapuran Jesús 20 watanpi jina kashallaqtinraq. * Chaywanqa maytachá Jesusqa llakikuran,  paychá kallpachanan karan mamantapas sullk’ankunatapas.

9. ¿Imaynatan Jesús rikuchiran khuyapayakuq kasqanta?

⁹ Jesusqa khuyapayakuqmi karan. Juj kutinmi amigon Lázaro wañupusqa, chaymi Lazaroq panankunaqa khuyayta waqasharanku. Jesusqa yacharanña Lazarota kausarichinanta chaypas, panankunaq waqasqanta rikuspan paypas waqallarantaq (Juan 11:33-36).

10. ¿Imaraykun nisunman: “Jesusqa khuyapayashallanmi runakunata”, nispa?

¹⁰ ¿Yanapawasunmanchu kunan tiempo Jesuspa ñaupa tiempopi rimasqankuna? Bibliaq nisqan jina Jesusqa manan cambianchu “kaqllapunin ñaupaqpas, kunanpas, wiñay-wiñaypaqpas” (Heb. 13:8). Payqa yachanmi ima nanaykunapis, ima llakikuykunapis runakuna tarikushanchis chayta. Chayman jinataqmi ‘pruebaman churasqa kaqkunataqa’ yanapashanpas (Hech. 3:15; Heb. 2:10, 18). Kaypi yachasqanchis jina, Jesusqa manan cambianchu llakikushallanmi noqanchismanta. Yachanmi imakunapichus tarikusqanchistapas, chayman jinataqmi yanapawasunpas (leey Hebreos 4:15, 16).

11. ¿Ima textokunan qanta kallpachasunki?

¹¹ Kaypi yachasqanchis jina, may llakin karan Jesuspaqqa Lazaroq wañupusqan. Ichaqa manan Bibliaqa chayllamantachu willan, chaypiqa kashanmi juj sumaq consejokunapas. Arí, “ñaupaqpi qelqasqa kaqkunaqa yachachiwananchispaqmi qelqasqa karan; chaymantapas Diospa simin qelqan kallpachawanchis aguantananchispaqpas yanapawanchis, chaymi suyakuyniyoqpas kanchis” (Rom. 15:4). ¿Jayk’aqllapas wañupuranchu pi munakusqayki runapas? Chhayna kaqtinqa kay textokunapi piensay, chaykunan yanapasunki.

• “Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin” (Sal. 34:18, 19).

• “Sonqoyta llakikuna ñit’iykushaqtinmi, qanqa sonqochaykuwanki kusirichiwanki” (Sal. 94:19).

• “Yayanchis Diosqa munakuwanchismi, paymi ancha sumaq sonqo kayninpi mana tukukuq consuelota sumaq suyakuyta ima qowanchis. Paymantan mañakuyku Señorninchis Jesucristowan kuska sonqoykichispi kallpachanasuykichispaq” (2 Tes. 2:16, 17). *

12. ¿Imaynatan jujkunata kallpachasunman?

¹² Mayqen iñiqmasinchispa familianpas wañupun chayqa noqanchismi paykunata kallpachananchis (leey 1 Tesalonicenses 5:11). Ichaqa, ¿imaynatan ‘llakisqa sonqoyoqkunata’ kallpachasunman? (Prov. 17:22). Yachasqanchis jina “kanmi upallakuna tiempo, rimana tiempopas”, chaytan ñaupaqtaqa allinta  umanchisman churananchis (Ecl. 3:7). Chaypaq yachasun iskay hermanakunamanta. Dalene sutiyoq viuda hermanan nin: “Wañuqniyoqkunaqa uyarinatan munanku. Chaymi ch’inlla uyarina imachus willakusqankuta”, nispa. Junia sutiyoq hermanaq turanmi wañupusqa, paymi nillantaq: “Manapaschá allintachu entiendesun sonqonkuq nanasqanta, ichaqa kallpachakunanchismi imayna sientekusqanta entiendenapaq”, nispa.

13. ¿Imaynan runakuna kanchis?

¹³ Chaymantapas, runakunaqa manan igualchu kanchis, manataqmi igualtachu imatapas qhawarinchis. Mayninpiqa sonqollanchispipaschá imatapas waqaychakunchis; manapaschá facilchu llakikuyninchista jujkunaman willaypas. Bibliapipunin nin: “Sonqoq jayasqanqa payllapaqmi jayan, kusikusqanpipas manataqmi waj runaqa kusiysikunchu”, nispa (Prov. 14:10). Willakusunña sonqonchis imayna kasqanta chaypas manapaschá wakinqa lliutachu entiendewasun.

14. ¿Imatawanmi ruwasunman llakisqakunata kallpachananchispaq?

¹⁴ Chhaynataq chayqa, manapaschá facilchu kanqa nanasqa sonqoyoqkunata kallpachay. Chaywanpas ‘yachayniyoqkunaq rimasqanqa jampin’ (Prov. 12:18). Wakin cristianokunaqa “Cuando muere un ser querido” nisqa folletoq yanapayninwanmi wañupuqniyoqkunata kallpachanku. * Chaytaña ruwasunman chaypas mayninpiqa yaqapaschá ‘waqaqkunawan waqananchis’ kanqa (Rom. 12:15). Gaby sutiyoq viuda hermanan nin: “Waqallaqtiymi noqaq sonqoyqa tiyaykun. Chaymi noqaqa munani amigoykuna waqaysiwananta. Chaywanmi mana sapaychu sientekuni”, nispa.

15. Mana facilchu llakisqata kallpachay kanman chayqa, ¿imatan ruwasunman? (Qhaway “ ¿Imaynatan jujkunata kallpachasunman?” nisqa recuadrota.)

¹⁵ Manapaschá facilchu kanqa llakisqakunata imatapas niy. Chhayna kaqtinqa yaqapaschá qosunman juj tarjetachata otaq cartata. Chaymantapas yaqapaschá apachisuman juj mensajeta. Yaqapaschá willasunman wañupuqpa ima ejemplontapas yuyarisqanchista. Hermana Junian nillantaq: “Mayninpiqa juj mensajeta, tarjetata iman hermanokunaqa apachimuwanku, mayninpitaq invitawanku paykunawan kuska pasarinaykupaq, chaykunan anchatapuni kallpachawan. Chaymantapas munasqan chaykunawanqa sientekuni”, nispa.

16. ¿Imata ruwaspan kallpachallasunmantaq llakisqakunata?

¹⁶ ¿Imatawanmi ruwasunman wañupuqniyoqkunata kallpachananchispaq? Paykunapaqmi Diosmanta mañapunanchis. Chaymantapas mayninpiqa yaqapaschá paykunawan kuska mañakusunman. Manapaschá  facilchu chay ruway kanqa, waqanaywasun imapaschá, ichaqa chaywanmi llakipi tarikuq iñiqmasinchis kallpachasqa kanqa. Ñaupaqpi rimamusqanchis Dalene sutiyoq hermanan nin: “Visitamuwaqniy hermanakunatan mayninpi nini Diosmanta mañaripuwanankupaq. Sasatan rimayta qallarinku, rimasqankuman jinan ichaqa confianzawan rimanku, chhaynapin sonqoman chayaqta mañakunku. Munakuq khuyapayakuq ima kasqankuta rikuspan noqapas kallpachakuni”, nispa.

17-19. ¿Imaraykun kallpachashanallanchis wañupuqniyoq iñiqmasinchiskunata?

¹⁷ Yachamusqanchis jina sapankanchismi jujniray kanchis. Wakin wañupuqniyoqkunaqa pisi tiempollapin thajña kashanku; wakinpan ichaqa unaymanta sonqonku tiyaykun. Chaymi noqanchisqa unayña familiankuq wañupusqan pasarun chaypas kallpachashanallanchis paykunata. Biblian nin: “Tukuy tiempon amigoqa munakun, llaki-phutiy tiempopipas wayqe jinan khuyapayakun”, nispa (Prov. 17:17). Chhaynaqa kallpachashallasun llakisqakunata (leey 1 Tesalonicenses 3:7).

¹⁸ Llakikuyqa imay ratopas kutimullanmanmi. Yaqapaschá ima takipas, fotopas, q’apaypas, ima ruwaypas, aniversarionchis p’unchaypas yuyarichiwasunman wañupuq familianchista. Wakin viudopaqpas otaq viudapaqpas sasapaschá kanqa sapallan asambleaman riy Jesuspa  wañupusqanta yuyariyman riypas. Juj viudo hermanon nin: “Noqaqa yacharaniñan aniversarioy p’unchay sonqo nanay kananta, chhaynataqmi karanpas. Ichaqa wakin iñiqmasikunan organizasqaku juj juñunakuyta chaypi allin reqsisqa amigoykunawan pasarinaypaq”, nispa.

¹⁹ Wañupuqniyoqkunataqa manan casarakusqanku aniversario p’unchay chayamullaqtinchu ni ima p’unchaypas chayamullaqtinchu kallpachananchis. Hermana Junian nin: “Jujkunata kallpachanapaqqa manan aniversario chayamunantaraqchu ni ima jatun p’unchaytaraqchu suyananchis; imay ratopas paykunataqa kallpachallasunmanmi”, nispa. Manapaschá llakikuyninkunata chinkachisunchu ichaqa atisunmanmi paykuna kallpachayta (1 Juan 3:18). Hermana Gaby nin: “Maytan Jehová Diosta ‘gracias’ nini umalliqkunata churamuwasqanmanta, paykunan sumaqta yanapawaranku. Diospas makinwan abrazaykuwashanman jinaraqmi tarikurani”, nispa.

20. ¿Imatan Jehová Dios ruwanqa pisi tiempollamanta?

²⁰ Pisi tiempomantan “sepulturakunapi llapa kaqkunaqa runaq Churinpa kunkanta uyarispa” kausarimpunqaku, chaywanmi Jehová Diosqa tukuy ima nanayta chinkachinqa (Juan 5:28, 29). Chaymantapas Diosqa “wiñaypaqmi wañuytapas chinkachinqa, llapaq ñawinmantan waqaytapas ch’akichinqa” (Is. 25:8). Chay p’unchay chayamuqtinqa ‘waqaqkunawan waqananchismantaqa’, ‘kusikuqkunawanmi kusikusunchis’. May munaymi kay pachapi kausayqa kanqa (Rom. 12:15).