1. a) ¿Imatan wayna-sipaskuna ñaupaqmantapacha ruwananku? b) ¿Imaraykun mana manchakunankuchu? (Kay paginapi fotokunata qhaway.)

WAYNA-SIPAS, maytapas viajanapaqqa ñaupaqmantapachan allinta preparakuna, ¿riki? Kay vidapas juj viaje jinan, chaymi wayna kashaspallaraq allinta qhawarinanchis imatas vidanchiswan ruwasun chayta. Ichaqa yaqapaschá sasa kanman chaypi piensay. Heather sutiyoq sipas hermanan nin: “Noqaqa manan piensallanipaschu imatas qhepaman ruwasaq chaytaqa; manchakunin chaykunapi piensayta”, nispa. Chhaynapi qanpas tarikushanki chayqa, yuyariy Diospa nisqanta, paymi nin: “Ama manchakuychu, qanwanmi noqaqa kashani, ama pisipaychu, noqaqa Diosniykin kani, noqan kallpachasqaykipas yanapasqaykipas”, nispa (Is. 41:10).

2. Wayna-sipas, ¿imaynapin yachanki Jehová Dios kusisqa kausanaykita munasqanta?

² Wayna-sipas, kunanmantapachan allinta qhawarinayki imatas vidaykiwan ruwanki chayta. Chay ruwanaykitan Jehová Diospas munan (Ecl. 12:1; Mat. 6:20). Chaymantapas  payqa munan kusisqa kausanaykitan. Chayta reparanaykipaq allinta piensay tukuy ima kamasqanpi. Piensallaytaq cuidanasuykipaq, sumaqta kausanaykipaqpas tukuy ima qosqasuykipi. Consejonkunata mana chaskikuqkunatan nin: ‘Millakusqaytan ajllakurankichis’, nispa. Chaymantapas nillantaqmi: “Kamachiykunan kusisqa sonqontin takinqa, qankunataq llakisqa sonqontin waqankichis, llakiq ñit’isqan sonqontin qaparinkichis”, nispa (Is. 65:12-14). Chhaynaqa allinta piensaspa imatapas decidiy chhaynapin Diospa sonqonta kusichinki (Prov. 27:11).

3. ¿Ima ruwanaykitan Jehová Dios munan?

³ Bibliaq nisqan jina, kusisqa kausanaykipaqqa Jehová Diostan reqsinayki, paytataqmi servinaykipas. Chaypaqmi Diosqa kamawaranchis (Sal. 128:1; Mat. 5:3). Animalkunan ichaqa mijuspa, ujaspa, uñakunayoq kaspa kusisqa kanku. Noqanchisqa manan chhaynapaqchu kamasqa karanchis. Diosqa munan imapas ruwasqanchiswan kusisqa kananchistan. Chaymantapas Bibliaq nisqan jina, Diosqa “ancha munakuq Diosmi” ‘kusisqa Diosmi’. Payman “rijch’akuqtan” kamawaranchispas (2 Cor. 13:11; 1 Tim. 1:11; Gén. 1:27). Chaymi kusisqa kausanapaqqa pay jina kananchis. Chaymantapas Bibliapin nin: “Qoypin aswan kusikuyqa kan, manan chaskiypichu”, nispa (Hech. 20:35). ¿Jayk’aqllapas chay pasarasunki? Yachasqanchis jina kay vidapiqa yachanapunin qoykukuq kayta. Chaymi ima ruwaytaña munashanki chaypas piensanaykipuni Jehová Diospi runamasiykipi ima (leey Mateo 22:36-39).

4, 5. ¿Imata ruwaspan Jesús kusisqa kausaq?

⁴ Jesuspas allin ejemplon qankunapaqqa kanman. Wawa kashaspaqa, kusirikuq pujllakuq imachá. Bibliapas ninmi, ‘kanmi asikuna tiempo [...] tusuna tiempopas’, nispa (Ecl. 3:4). Ichaqa manan chayllamanchu Jesusqa qokuq, aswanpas allintan estudiaq Diospa siminta. Chaymi 12 watallanpiraq kashaqtinqa Templopi umalliqkuna ‘anchata admirakuranku imatapas allinta entiendesqanmanta’ (Luc. 2:42, 46, 47).

⁵ Jesusqa kuraqña kaspapas Jehová Diospa munayninta ruwaspan kusisqa kausaran. Diosmi payta kachamusqa “allin willakuykunata wajchakunaman willananpaq” “ñausakunamanpas qhawarinankumanta willananpaq” ima (Luc. 4:18). Chaymantapas Salmos 40:8 textopi nisqan jina, ‘Diospa munaynin ruwaytapunin payqa munaran’, chaymi lliu runakunaman Diosmanta yachachiran (leey Lucas 10:21). Juj kutinmi Jesusqa juj warmiman Diosmanta yachachiyta tukuspa discipulonkunata niran: “Mijunayqa kachamuwaqniypa munayninta ruwaymi, qowasqan llank’aytapas tukunaykama junt’aymi”, nispa (Juan 4:31-34). Rikusqanchis jina Jesusqa Diospa munayninta ruwaspa, jujkunata yanapaspa iman kusisqa kausaq. Qanpas pay jina kanki chayqa kusisqan kausanki.

6. ¿Imaraykun allin kanman imachus ruway munasqaykita kuraq iñiqmasikunaman willay?

 ⁶ Wakin cristianokunaqa wayna-sipasllaraq kashaspankun precursor karanku, chaywanmi paykunaqa kusisqa kausaranku. Paykunaman willay ima ruwaytas munashanki chayta. Proverbios 15:22 textopin nin: “Yuyaychaq mana kaqtinqa, imachus yuyaykusqakunan qollupun”, nispa. Chayrayku chay kuraq iñiqmasikunawan parlariy, paykunan allin yuyayta qosunkiku. Yaqapaschá paykunaqa willasunkiku imaynas precursor kayqa allinpuni chayta. Jesuspas imaymanatan Jehová Diosmantaqa yacharan. Kay pachaman jamuspapas yachashallaranmi. Kay pachapin yacharan jujkunata yanapaspa kusikuyta, imaña kaqtinpas Diospaq junt’aq sonqo kayta ima (leey Isaías 50:4; Heb. 5:8; 12:2). Diosta tukuy tiempo servispaqa kusisqan kausanki, ¿imaraykun chayta ninchis? Chayta kunan yachasun.

7. ¿Imaraykun wakin wayna-sipaskunaman gustan precursor kay?

⁷ Jesusmi niran: “Llapa nacionmanta runakunaman riychis, jinaspa yachachimuychis”, nispa (Mat. 28:19, 20). Chayta ruwaspan kusisqa kausanki, chaymantapas Diostan kusichinki. Ichaqa manapaschá facilchu chay kanqa, tiempowanmi ichaqa allin yachachiq kanki. Chaymi pasaran hermano Timoteowanpas, payqa waynallaraq kashaspan precursor kasqa. Paymi nin: “Noqamanqa gustawanmi precursor kay. Qallarishaspayqa manan juj estudiotapas qoqchu kani. Juj ladoman yanapakuq rispayñan killapi jinalla askha estudiokunata qallarirani. Paykunamanta jujninqa ñan juñunakuykunaman jamusharanña. Chayllamanmi invitawaranku soltero qharikunapaq escuelaman, * chay escuelamantan juj ladoman kachawaranku. Chaypipas tawa runakunamanmi estudio qoyta qallarirani. Maytapunin gustawan jujkunaman Diosmanta yachachiyqa; gustawanmi runakuna Diospa yanapayninwan vidankuta cambiasqankuta rikuy”, nispa (1 Tes. 2:19).

8. ¿Imatan wakin wayna-sipaskuna ruwanku juj runakunaman Diosmanta yachachinankupaq?

⁸ Wakin wayna-sipaskunaqa juj simi rimaytan yachanku jujkunata yanapanankupaq. Yachasunchis Estados Unidospi Jacobmanta, paymi willakun: “Escuelapi wakin compañeroykunaqa Vietnanmantan karanku. Paykunamanmi Diosmanta yachachiyta munasharani chaymi paykunaq rimasqanku simita yachayta qallarirani. Chaypaqqa inglespi Qhawaq revistatan Vietnan rimaypi Qhawaq revistawan comparaq kani. Chaymantapas Vietnan rimaypi congregacionmanta hermanokunawanmi amigontin karayku, 18 wataypi kashaspataq precursor kapurani. Chaymantataq soltero qharikunapaq escuelaman invitawaranku. Chay escuelapiqa allintan preparamuwaranku, chayman jinan Vietnan simi rimaq grupopi yanapakushani, sapallaymi umalliqpas kani. Vietnanmanta wakin runakunaqa admirasqan kanku rimasqanku simita rimasqaymanta. Wakinqa wasinkuman imaraqmi  invitawanku, chaypin mayninpiqa Biblia estudiayta qallariyku. Paykunamanta wakinqa ñan bautizakunkuña”, nispa (tupachiy Hechos 2:7, 8 textowan).

9. ¿Imakunatan yachanki Diosmanta jujkunaman yachachispa?

⁹ Diosmanta jujkunaman yachachispaqa imaymanatan yachanki. Yachankin allin llank’aq kayta, jujkunawan imayna rimayta, imatapas confianzawan ruwayta, jujkunatapas respetowan rimapayayta ima (Prov. 21:5; 2 Tim. 2:24). Chay ruwayqa yanapallasunkitaqmi Bibliaq yachachisqanpi astawan confianaykipaq, Diospa llaqtanta tukuy sonqowan yanapanaykipaqpas (1 Cor. 3:9).

10. ¿Imaynapin kusisqa kawaq tiyasqayki llaqtapi manaña uyarikunkuchu chaypas?

¹⁰ ¿Predicasqayki llaqtapi mana pipas uyarikuyta munanmanchu chayri? Chaywanpas Diosmanta willaspaqa kusisqan kawaq, ¿imarayku? Llapa hermanokunawan kuska llank’asqaykichisrayku. Jujnillaykichis estudiay munaq runata tarirankichis chaypas, llapaykichismi chaypaqqa kallpachakurankichis, ¿riki? Chaymi pasaran Brandon sutiyoq hermanowanpas, paypa predicasqan llaqtapiqa pisillan runakunaqa uyarikuqku, chaypin payqa isqon wata precursor karan. Paymi nin: “Noqaqa colegioyta tukuspa jinan precursor karani. Diostaq kamachiwan jujkunata yachachinaypaq chayqa kusisqan chayta ruwani. Gustawanmi wayna-sipaskunata yanapaypas, may kusisqan kani Diospa ladonpi wiñasqankuta rikuspay. Soltero qharikunapaq escuelaman riqtiyqa juj ladomanmi kachawaranku. Manaña jujtapas bautizakunankama yanaparanichu chaypas, kusisqan kashani tukuy tiempoywan Diosta servispay”, nispa (Ecl. 11:6).

11. ¿Ima ruwaypin wakin wayna-sipaskuna yanapakushanku?

¹¹ Diospa llaqtanpiqa imaymanakunan ruwana kashan. Lliu mundontinpin askhan faltashan juñunakunapaq wasikuna. Chaykuna ruwaypin wakin wayna-sipaskunaqa yanapakushanku. Qanpas chaypi yanapakunki chayqa Diospaqmi llank’anki, chhaynapin kusisqa kanki. Chaymantapas juj iñiqmasikunawanmi reqsinakunki. Juñunakuna wasikunata ruwaypi yanapakuspaqa yachankin, imayna llank’ayta, allin llank’aq kayta, jujkunata kasukuspa llank’ayta ima.

12. ¿Imakunan kanqa precursor kaqtiyki?

¹² Hermano Kevinmi nin: “Juch’uychaymantapachan tukuy tiempoywan Diosta serviyta munarani. Chaymi 19 wataypi kashaspa precursor karani. Gastoykunapaqtaq kuskan p’unchaylla juj hermanowan llank’arayku. Chaypin yacharani wasi techayta, punkukuna ventanakuna churayta ima. Chaymantataq iskay wata yanapakurani jatun wayraq thunisqan juñunakuna wasikunata allichaypi. Chay ruwaypi  kashaqtiymi willawaranku: ‘Sudáfrica ladopin juñunakuna wasi ruwaypi yanapakuqkunata munashanku’ nispa, jinan juj solicitudta junt’arani; invitawarankun chayman rinaypaq. Kay África ladopiqa juj semanakunan juj ladopi kashayku, jujnin semanakunataq juj ladopiñataq. Chaypi llank’aqkunaqa juj familia jinan kayku, kuskan tiyayku, kuskan Bibliatapas estudiayku, kuskataqmi llank’aykupas. Gustawanmi chay llaqtayoq hermanokunawan predicaypas. Manan piensaranipaschu khayna kusisqa kausanaytaqa”, nispa.

13. ¿Imaraykun wakin wayna-sipaskuna kusisqa Betelpi llank’ashanku?

¹³ Wakin precursorkunaqa Betelpin llank’ashanku. Betelpi llank’ayqa may kusikunapaqmi, chaypiqa Diospaqmi llank’anki. Chaymantapas chaypi llank’aqkunaqa imaymana formapin yanapakunku qelqakuna lliuman chayananpaq. Betelpi llank’aq Dustin sutiyoq hermanon nin: “Isqon wataypi kashallaspayraqmi noqaqa munasharaniña tukuy tiempoywan Diosta serviyta. Jinan colegioyta tukuspa jina precursor karani. Wata kuskanta jina precursor kashaqtiymi invitamuwaranku Betelpi llank’anaypaq. Kaypin yacharani qelqakunata orqomuq maquinakunawan llank’ayta, computadorakuna allichayta ima. Kaypiqa sapa kutillanmi willakun imaynatas Diospa llaqtanpi llank’ay aparikushan  chayta, chaymi noqamanqa gustawan. ¡May kusisqan kaypiqa kashani!”, nispa.

14. ¿Imaynatan preparakuwaq tukuy tiempo Diosta servinaykipaq?

¹⁴ ¿Imaynatan preparakuwaq tukuy tiempo Diosta servinaykipaq? Chaypaqqa allin cristianon kanayki, Diospa siminpi imachus yachasqaykiman jinataqmi kausanaykipas. Chayrayku allinta estudiay Bibliata, chaypi piensay. Juñunakuykunapaqpas allinta preparakuy, tapuykunamanpas kutichiy. Colegiollapiraq kashanki chayqa, kallpachakuy Diosmanta jujkunaman willanaykipaq. Ichaqa respetowanmi piwanpas rimanayki. Qanllamanta yanapakuy juñunakuna wasi limpiaypipas allichaypipas. Chhayna yanapakuq humilde runakunatan Jehová Diosqa munakun (leey Isaías 6:8; Hech. 6:1-3). Timoteopas allin cristiano kasqanraykun misionero kananpaq nombrasqa karan (Hech. 16:1-5).

15. ¿Imatan ruwawaq gastoykikunapaq?

¹⁵ Precursor kanki chayqa llank’apakunaykin kanqa gastoykikunapaq (Hech. 18:2, 3). Chaypaqqa yaqapaschá imallatapas estudiawaq “escuela técnica” nisqapi. Watukuq umalliqta juj precursorkunatawan tapurikuy imatas estudiawaq chaypaq. Chaymantataq “lliu ruwanaykikunata Señor Diosman jap’iykachiy, jinan yuyaykusqaykikuna junt’akunqa” (Prov. 16:3; 20:18).

16. ¿Imapaqmi allin preparasqa kanki sapallaykiraq kashaspa precursor kaspa?

¹⁶ Jehová Diosqa kusisqa kausanaykitan munan (leey 1 Timoteo 6:18, 19). Chayrayku kallpachakuy tukuy tiempoykiwan Diosta servinaykipaq. Chayta ruwanki chayqa juj hermanokunawanmi reqsinakunki. Paykunan yanapasunkiku allin yuyaywan imatapas ruwanaykipaq. Chhaynapin allin preparasqa kanki casarakunaykipaqpas. Chaymantapas soltero kashaspa precursor kaqkunaqa yaqa llapankun casarakuspapas precursorlla kanku (Rom. 16:3, 4).

17, 18. ¿Imatan ruwanayki Jehová Dios sonqoykiq munasqankunata qonasuykipaq?

¹⁷ Salmos 20:4 textopin Jehová Diosta nishan: “Imapas munasqanta qoykuy, tukuy yuyaykusqantapas junt’ay”, nispa. Chaypi nisqan jina imachus ruway munasqaykiman jinan Diosqa imatapas qosunki. Chayrayku allinta piensay imatapunis vidaykiwan ruwayta munanki chaypi. Imatas Jehová Dios kunan tiempo ruwashan chaypipas, chayman jinataq decidikuy.

¹⁸ Jehová Diosta tukuy tiempoykiwan servinki chayqa kusisqan kausanki, chayta ruwaspan payta jatunchanki. Chhaynaqa “Dioswan anchata kusikuy, paytaq sonqoykiq munasqankunata qosunki” (Sal. 37:4).