1. ¿Imaraykun nisunman “Jehová Diospan tukuy imapas” nispa? (Kay paginapi fotota qhaway.)

JEHOVÁ DIOSPAN tukuy imapas. Arí, “Diospa kaqninmi lliu janaq pachapas, kay pachapas, tukuy chaypi kaqkunapas” (Deut. 10:14; Apo. 4:11). Runatapas paytaq kamaran chayqa paypan noqanchispas kanchis (Sal. 100:3). Ichaqa llapa runaña Diospa chaypas, qallariymantapachan payqa wakin runakunallata ajllakuran payta servinankupaq.

2. Bibliaq willasqan jina, ¿pikunan kanku Diospa ajllakusqankuna?

² Ñaupa tiempo Israel runakunapi piensasun. Salmos 135 capitulopi willasqan jina paykunatan Diosqa “kaqnin kananpaq ajllakuran” (Sal. 135:4). Chaymantapas Oseas libropi willasqan jina wakin waj llaqtayoq runakunapas Diospa llaqtanmanmi jaykunanku karan (Os. 2:23). Chaymi pasaran 36 watapi, chay watapin wakin runakuna manaña judiochu karanku chaypas Jesuswan gobiernamunankupaq  ajllasqa karanku (Hech. 10:45; Rom. 9:23-26). Chay ajllasqa runakunatan nikun “ch’uya nacionmanta kaqkuna, Diospa ajllakusqan llaqta” nispa (1 Ped. 2:9, 10). ¿Kay pachapi tiyanankupaq suyakuq runakunari? Paykunapas Diospa ‘llaqtanmi’ kanku; arí, ‘ajllakusqankunan’ kanku (Is. 65:22).

3. a) ¿Pikunan kunan tiempopi Diosta servishanku? b) ¿Imamantan kay estudiopi yachasun?

³ Kunan tiempopas ‘pisi t’aqa ovejakunawan’ ‘waj ovejakunawanqa’ juj nisqallan Diosta servishanku (Luc. 12:32; Juan 10:16). ¿Manachu chhayna jujlla kasqanchis kusichiwanchis? Kusichiwanchismi ¿riki? Chaymi Diostaqa tukuy sonqo “gracias” ninanchis. Ichaqa, ¿imaynatan chayta ruwasunman? Imaymana formapin, chaykunamantan kunan astawan yachasun.

4. a) ¿Imaynatan rikuchinchis Dioswan agradecido kasqanchista? b) ¿Imaynatan Jesús rikuchiran Dioswan agradecido kasqanta?

⁴ Diosman entregakuspa bautizakuranchisña chayqa, chaywanmi rikuchiranchis Dioswan agradecido kasqanchista, payllata kasukuy munasqanchistawan (Heb. 12:9). Jesuspas chaytan ruwaran, bautizakuspan payqa Diosta nisharan “munayniykitapunin ruwayta munani, yachachikuy simiykitan sonqoy ukhupi jap’ini” nispa (Sal. 40:7, 8). Diosman entregasqa llaqtapiña naceran chaypas Diospa munayninta ruwananpaqmi entregakuran.

5, 6. a) ¿Imaynan Dios sientekuran Jesuspa entregakusqanwan? b) ¿Imaynan Dios sientekun payman entregakuqtinchis? Juj ejemplota willay.

⁵ ¿Imaynan Dios sientekuran Jesuspa entregakusqanwan? Bibliaq nisqa jina ‘Jesús bautizakushaspa unumanta lloqsimuqtin jinan cielo kicharikamuran, jinan Juanqa Diospa espiritunta rikuran paloma jina Jesús pataman uraykamushaqta’. Chaymantataq cielomanta juj kunka nimuran: “Kaymi Churiyqa, paytan munakuni, payqa sonqoypaq jinan”, nispa (Mat. 3:16, 17). Chaypi rikusqanchis jina Diosqa kusisqan kasharan Jesús payman entregakusqanwan. Chhaynatan payqa kusikun noqanchispas payman entregakuqtinchisqa (Sal. 149:4).

⁶ Chayta entiendenapaq kaypi piensasun. Juj runas imaymana clase t’ikakunata huertanpi plantanman. Chay t’ikakunamanta jujninta orqoruspas ususichan payman chay t’ikachata qoykunman. ¿Imaynan sientekunqa chay tayta? Ususichantaq munakuywan apamushan chayqa, paypa plantasqanña chay t’ika karan chaypas, may kusikuywanchá chaytaqa chaskikunqa, uyankunaraqchá k’ancharinqa. Chhaynan papanchis Jehová Diospas, paypa kamasqankunaña kanchis chaypas, kusikunmi vidanchista payman entregasqanchismanta (Éx. 34:14).

7. Malaquías libropi willasqan jina, ¿imaynatan Dios qhawarin payman entregakuqkunata?

⁷ (Leey Malaquías 3:16). Ñaupaqpi yachamusqanchis jina llapa runapas nacesqanchismantapachan Diospa kanchis. Chaywanpas entregakunanchismi paymanqa, gobiernaqninchista jinan rikunanchispas,  chaywanmi payta kusichisun (Prov. 23:15). Chhaynapin sutinchispas libronpi qelqasqa kanqa.

8, 9. ¿Imatan ruwana sutinchis Diospa libronmanta mana borrasqa kananpaq?

⁸ Diospa libronmanta sutinchis mana borrasqa kananpaqqa imaymanatan ruwananchis. Malaquiaspa nisqan jina Diospa sutinpin piensananchis. Chaymantapas Diosllatan adorananchis, manachus payllata adorasun chayqa libronmantan sutinchis borrasqa kanqa (Éx. 32:33; Sal. 69:28).

⁹ Chaymantapas Diosman entregakuyqa manan “munayniykitan ruwasaq” niyllachu nitaq bautizakuyllachu. Chaykunata ruwayqa chay ratollapaqmi. Chhaynaqa, ¿imatataq ruwananchisri? Sapa p’unchaymi Diospa munayninman jina kausananchis, paypa munayninman jinan tukuy imatapas ruwananchis (1 Ped. 4:1, 2).

10. ¿Imaynan kananku Diosta serviq runakuna?

¹⁰ Ñaupaq estudiopi yachasqanchis jina Cainpas, Salomonpas, israelitakunapas adorarankun Diostaqa. Ichaqa manan tukuy sonqonkuwanchu adoraranku. ¿Imatan chay ejemplokunamanta yachasunman? Diosta serviqkunaqa manapunin ima mana allintapas ruwananchischu (Rom. 12:9). Diosqa kay pacha runakunamanta jujniray kananchistan munan. Malaquías. 3:18 textopin pay kikin nishan: “Jinaqtinmi qankunaqa wajmanta reparankichis allin runaq millay runaq imaynachus kasqanta, pichus noqata serviq, pitaqchus noqata mana serviq kasqantapas”, nispa.

11. ¿Imaraykun jujkuna rikunankupuni Dios sonqo kasqanchista?

¹¹ ¿Imaynan kashanchis iñiyninchispi? ¿Diospaq junt’aq sonqo runakuna jinachu kausanchis? ¿Maypiña kaspapas Testigo jinachu presentakunchis? Chaykunapin rikuchillasuntaq Dioswan agradecido kasqanchista. Jujkunaqa rikunankupunin allin yuyayniyoq o allin poqosqa cristiano kasqanchista (1 Tim. 4:15; Mat. 5:16). Sichus manchakusunman Testigo jina presentakuyta chayqa maytachá Diosninchisqa llakikunman (Sal. 119:46; leey Marcos 8:38).

12, 13. ¿Imaynatan portakushanku wakin Testigokuna?

¹² Llakikunapaqmi kay, ichaqa manan pakasunmanchu. Wakin hermanokunaqa kay mundo runakuna jinan kashanchu, chaymi manaña reparakunchu Diosta serviqchus kanku icha manachus chaytapas (1 Cor. 2:12). ‘Kay pachaq espiritunman’ jina puriq runakunaqa paykunaq gustollankupin piensanku (Efes. 2:3). Chay piensayniyoq hermanokuna imaymana consejokunataña chaskinku chaypas mana kasukuspan gustonkuman jina comunta p’achakunku allichakunku ima.  Paykunaqa mana p’enqarikuspan llafsa p’achakunawan, saqsa p’achakunawan, t’eqe p’achakunawan, juch’uy p’achakunawan ima churakunku. Chujchankutapas kay mundo runakuna jinan rutuchikunku (1 Tim. 2:9, 10). Chhayna kasqankuwanmi mayninpiqa manaña reparakunchu Testigochus chay runa icha manachus chaytapas (Sant. 4:4).

¹³ Wakin Testigokunaqa, manan imayna p’achakuyllapichu ni imayna allichakuyllapichu kay mundo runakuna jina kanku. Fiestakunaman rispapas manapas cristianochu kankuman jinan mana allin musicakunapi tusunku, rimaspapas comuntan rimanku. Internetmanpas mana allin fotokunatan churanku, mana allin mensajekunatataqmi churankupas. Chay cristianokunaqa manapaschá jatun juchatachu ruwashanku, ichaqa malograsqa manzana jinan kanku allin cristianokunapaq (leey 1 Pedro 2:11, 12).

14. ¿Imatan ruwananchis Jehová Diosmanta ama t’aqakunanchispaq?

¹⁴ Watakunaq pasasqanman jinan kay mundopi runakunaqa astawanraq purishanku ‘aychaq munapayayninkunapi, ñawiq rikusqan munapayaykunapi’ ima (1 Juan 2:16). Noqanchisri, ¿chhaynachu kananchis? Manan. Diosman entregasqataq kanchis chayqa ‘allin yuyaywan, chaninta, Dios sonqo jinan kausananchis’ cheqnikunanchistaqmi “imachus Diospa munaynin contrapi kaqta, kay pachaq millay munapayayninkunatawan” (Tito 2:12). Imata rimaspapas, mijuspapas, tomaspapas Diosta serviq jinan ruwananchis. P’achanchispas, allichakuyninchispas,  llank’ananchispas Diospa munayninman jinan kanan. Lliumi rikuwananchis Diosta serviq runata jina (leey 1 Corintios 10:31, 32).

15. ¿Imaraykun hermanonchiskunata munakunanchis respetananchis ima?

¹⁵ Hermanonchiskunapas Diospan kanku, chaymi paykunataqa munakunanchis respetananchis ima. Chhaynapin rikuchillasuntaq Dioswan agradecido kasqanchista (1 Tes. 5:15). Jesuspunin niran: “Qankunapura munanakusqaykichispin lliupas yachanqaku discipuloykuna kasqaykichista”, nispa (Juan 13:35).

16. ¿Imaynatan Dios qhawarin serviqninkunata? Juj ejemplota willay.

¹⁶ Iñiqmasipurapi imaynachus trato kananmanta allinta yachanapaq rimasun Diospa jujnin kamachikuyninmanta. Templopi serviciokunaqa Jehová Diospan karan, chaykunataqa manan pipas comuntachu jap’inan karan. Pipas chay kamachikuyta mana kasukuqqa wañuchisqan kanan karan (Núm. 1:50, 51). Chhaynatataq Diosqa cuidaq wasinpi cosaskunata chayqa, aswan razonwanraqchá riki cuidan payman entregasqa serviqninkunataqa. Juj kutinmi llaqtanmanta niran: “Pipas qankunata tupaykuqqa ñawi ruruytan tupaykun”, nispa (Zac. 2:8).

17. ¿Imakunatan Dios qhawamushan?

¹⁷ Profeta Malaquiaspa nisqan jina Diosqa uyarishanmi imaynatachus serviqninkuna tratanakushanku chayta (Mal. 3:16). Chhaynataq chayqa “Jehová Diosqa reqsinmi paypa kaqkunataqa” (2 Tim. 2:19). Allintataqmi qhawamushan imaynatachus  noqanchispura kausashanchis chaytapas (Heb. 4:13). Sichus iñiqmasinchista sumaqta chaskisun munakusuntaq chayqa kusikunqan Diosninchisqa. Manachus sumaqta qhawarisun chayqa llakikunqan (Heb. 13:16; 1 Ped. 4:8, 9).

18. ¿Imaynatan rikuchisunman Dioswan agradecido kasqanchista?

¹⁸ Maytachá agradecekunchis Diospa llaqtanpi kasqanchismantaqa. Kusisqachá paymanqa vidanchistapas entregaranchis. Chaymi “q’ewisqa millay runakuna” ukhupiña kausashanchis chaypas kallpachakushanallanchis “mana juchachana, mana ima juchayoq” kananchispaq, k’anchay jina k’anchananchispaqwan (Filip. 2:15). Manapunin mana allin ruwaykunataqa ruwananchischu (Sant. 4:7). Munakunanchismi iñiqmasinchiskunatapas, paykunapas Diospan kanku (Rom. 12:10).

19. ¿Imaynatan Dios bendecinqa serviqninkunata?

¹⁹ Biblian nin: “Diosqa manan llaqtan runakunataqa wijch’urparinqachu”, nispa (Sal. 94:14). Chaypi nisqan jina Diosqa manapunin jayk’aqpas qonqawasunchu. Wañusunña chaypas payqa yuyashallawasunmi (Rom. 8:38, 39). Romanos 14:8 textopi nisqan jina “kausanchisña chaypas, Jehová Diospaqmi kausanchis; wañunchisña chaypas, Jehová Diospaqmi wañunchis. Chhaynaqa kausashaspapas wañupuspapas Jehová Diospan kanchis”. Chaymantapas Diosninchisqa pisi tiempollamantan llapa amigonkunata kausarichimpunqa. Kunan tiempopas imaymana formapin Diosqa serviqninkunata bendecishan. Bibliaq nisqan jina “kusisamiyoqmi Señor Diosniyoq suyuqa, kaqnin kananpaq ajllakusqan llaqtaqa” (Sal. 33:12).