1, 2. a) ¿Imaraykun nisunman “manan imapas kanchu Diospa ladonpi kay jinaqa” nispa? b) ¿Imamantan kay estudiopi yachasun?

MANAN pipas Jehová Diosninchis jinaqa kanmanchu. Payllan ancha munakuq, tukuy atiyniyoq, yachayniyoq Diosqa. Chhayna munay Diostaq chayqa, ¿pin paymanta t’aqakuyta munanman? Manan pipas ¿riki? (Sal. 96:4-6.) Chhaynaña chaypas wakin siervonkunaqa t’aqakunkun paymanta.

² Kay estudiopin yachasun Diospa wakin serviqkunamanta. Paykunaqa Diostaña servishaspapas mana allinkunatan ruwaranku. Paykunamanta yachayqa maytachá yanapawasun Diospa ladollanpi kananchispaq.

3. ¿Imaraykun Dios Cainta anyaran? ¿Ima nispan niran?

³ Cainmanta yachasun. Cainqa manan ima diostapas adoraranchu, Jehová Diosllan paypa Diosninqa karan, chaywanpas manan Diosqa allinpaqchu payta qhawarisharan. ¿Imarayku? Mana allin ruwaykunan sonqonpi kasharan (1 Juan 3:12). Chaymi Diosqa Cainta niran: “Allinkaqta ruwaqtiykiqa, chaskisqan kanki”, nispa. Chaymantan  nillarantaq: “Manachus allinkaqta ruwanki chayqa, juchan suyapashasunki jap’irunasuykipaq, chaypas qanmi juchataqa atipanayki”, nispa (Gén. 4:6, 7). Chhaynaqa, Caín chaskisqa kananpaqqa mana allinkunatan sonqonmanta wijch’unan karan.

4. ¿Imatan Caín ruwaran Diosña yanapayta munashaqtinpas?

⁴ Kasukunmanchus karan Diosta chayqa, allin amigontinmi Cainqa Dioswan kankuman karan. Ichaqa manan kasukuranchu aswanmi sonqonpi mana allin piensaykunawan vencechikuran (Sant. 1:14, 15). ¿Jayk’aqllapas Caín piensanmanchu karan Dios contra kananpi? Manapaschá. Ichaqa Diospa contranpi jatarispan wayqen Abelta wañuchiran.

5. ¿Imakunan Jehová Diosmanta t’aqawasunman?

⁵ Yaqapaschá pipas Caín jina Jehová Diosllata adorashanman, vidanpitaq mana allin ruwaykunata ruwashanman (Jud. 11). Yaqapaschá mana faltakunmanchu juñunakuykunamanpas, predicaqpas sapa kutillanpaschá lloqsin, ichaqa qhelli ruwaykunapipaschá yuyaynin kashan, qolqe maskhaypi imallapaschá piensashan, iñiqmasinta imapaschá cheqnikushan (1 Juan 2:15-17; 3:15). Chaykunallapi yuyaynin kanman chayqa juchamanmi urmanman. Manaña pipas sonqonchista ni ima ruwasqanchistapas rikunmanchu chaypas, Jehová Diosqa lliutan rikumushan (leey Jeremías 17:9, 10).

6. ¿Imaynatan Jehová Dios yanapawanchis juchata vencenanchispaq?

⁶ Imapiña pantashanchis chaypas manan Jehová Diosqa qonqawanchispachachu, aswanmi niwanchis: “Kutirikamuwaychis, noqapas kutirimullasqaykichistaqmi”, nispa (Mal. 3:7). Payqa allintan yachan juchata vencenanchispaq kallpachakusqanchista. Chaywanpas ladollanpi kananchistan munan (Is. 55:7). Chayrayku kallpachakushallasun juchawan ama vencechikunanchispaq, Diosninchisqa yanapawasunmi, manataqmi kallpatapas faltachiwasunchu (Gén. 4:7).

7. ¿Imakunata ruwaspan Salomón Dios contra jatariran?

⁷ Rey Salomonmanta yachasun. Wayna kashaspaqa Diospa yanapaynintan maskhaq chaymi Diosqa yachayta qoran. Chaymantapas Jerusalén templota jatarichinanpaqmi kamachiran. Chaywanpas Salomonqa Dios contran jatariran (1 Rey. 3:12; 11:1, 2). ¿Imatan ruwanman karan? Chaypaq yuyarisun imatachus Dios reykunapaq kamachiran chayta. Diospa nisqanman jinaqa manan Israelpi reykunaqa askha warmikunayoqchu kananku karan, chhaynapi Diosta mana saqenankupaq (Deut. 17:17). Salomonqa manan chay kamachikuyta kasukuranchu, aswanmi payqa 700 warmikunawan casarakuran; tiyaqmasin warmikunapas 300 karan (1 Rey. 11:3). Chay warmikunamanta wakinqa waj nacionkunamantan karanku, waj dioskunatan adoraqkupas. Diosqa prohibiranmi chay warmikunawan casarakunankuta, chaytapas manan Salomonqa kasukuranchu (Deut. 7:3, 4).

8. ¿Ima juchakunatawanmi Salomón ruwaran Diospa contranpi?

⁸ Pisi-pisimantan Salomonqa manaña  munakuranchu Diosta ni kamachikuyninkunatapas. Chhaynapin mana allin ruwaykunata ruwaran. Astoret diosapaq Kemós diospaq iman altarkunata ruwapuran. Chaypin esposankunawan kuska chay falso dioskunata adoraran. Chaymantapas mana p’enqarikuspan Salomonqa chay altarkunata Jerusalén temploq chimpanpi ruwaran (1 Rey. 11:5-8; 2 Rey. 23:13). ¿Manachu Salomón reparakunman karan mana allinkuna ruwasqanta? Reparakuranpaschá, ichaqa yaqapaschá piensaran: “Jerusalén templopi sacrificiokunata jaywashallasaq chayqa manan Diosqa ima niwanqapaschu”, nispa.

9. ¿Imakunan pasaran Salomón Diosta mana kasukusqanmanta?

⁹ Diosqa manan jinallatachu qhawaran Salomonpa mana allinkuna ruwasqanta. Biblian nin: “Jinan Israelpa Diosnin Señorqa Salomonpaq phiñakuran, paymanta sonqonpi t’aqarikusqanrayku. Señor Diosqa iskay kutitan rijurisqa, jinaspa kamachisqa: Aman waj dioskunata yupaychankichu, nispa. Salomontaq ichaqa mana kasukuranchu Señor Diospa kamachisqanta”, nispa. Chaypi nisqan jina Diosqa manañan Salomonta munakuranchu, Israel nacionpas iskaymanmi t’aqakapuran. Chaymi Salomonpa mirayninkunapas manaña llapa Israel naciontachu kamachipuran, imaymanakunapin ñak’arirankupas (1 Rey. 11:9-13).

10. ¿Pikunan Diosmanta karunchawasunman?

¹⁰ Yaqapaschá noqanchispas Salomón jina Diosmanta karunchakusunman.  ¿Imaynapi? Diosta mana kasukuq amigokunan chayman apawasunman. Chay mana allin amigokunan kankuman yanqalla Diosta serviq Testigokuna, familianchiskuna, vecinonchiskuna, llank’aqmasinchiskuna, escuelapi compañerokuna ima. Paykunamantan allinta cuidakunanchis mana chayqa Diosmantan karunchawasunman.

11. ¿Imakunapin piensananchis amigokunata ajllakunanchispaq?

¹¹ (Leey 1 Corintios 15:33). Yachasqanchis jina manan llapa runakunachu millay kanku, wakinqa manaña Testigochu kanku chaypas allin sonqon kanku. Chhaynataq chayqa yaqapaschá pipas ninman: “Normalchá kanman paykunawan amigota ruwayqa”, nispa. Ichaqa, ¿imapin paykunaq sonqon kashan? ¿Yanapawasunmanchu allin cristiano kananchispaq? Wakin runakunaqa p’acha rantiymanta, qolqemanta, pujllaymanta, peliculakuna qhawaymanta, celularkuna tabletkuna rantiymanta iman masta rimanku. ¿Chhaynachu amigonchiskuna? Chansakunata rimaspapas, ¿qhelli cosaskunatachu rimanku? Señorninchis Jesuspa nisqan jina “simiqa riman imachus sonqopi kashan chaytan” (Mat. 12:34). Amigonchiskunachus Diosmanta t’aqawasunman chayqa, cuidakunanchismi paykunamanta. Mayninpiqa yaqapaschá paykunamanta t’aqakunanchis kanqa (Prov. 13:20).

12. a) ¿Ima niranmi Dios israelitakunata? b) ¿Ima nispan israelitakuna niranku?

¹² Israelitakuna Egipto llaqtamanta lloqsisqanku qhepaman imachus pasasqanmantapas imaymanakunatan yachasunman. Chaypin Diosqa, israelitakuna Sinaí orqo qayllapi kashaqtinku, manchakuy phuyu ukhupi, llifllikiypi, manchay rayo t’ojaypi ima presentakuran (Éx. 19:16-19). Chaypin israelitakunata niran: “Noqa Señor Diosniykiqa sienteq Diosmi kani”, nispa. Chaymantan nillarantaq: ‘Munakuwaqniykunata, kamachikuyniykunata junt’aqkunataqa waranqa miraykaman munakushallasaqpuni’, nispa (leey Éxodo 20:1-6). Chhaynaqa pipas Diosta munakuqqa, Diospa ladollanpi kaqqa munasqallataqmi kanan karan. Chaypi noqanchis kasunman karan chayri, ¿ima nisunmanmi karan? Yaqapaschá israelitakuna jina nisunman karan: “¡Señor Diospa llapa kamachikusqantan junt’asaqku!”, nispa (Éx. 24:3). Israelitakunaqa chay nisqanku qhepallamanmi juj jatun pruebapi tarikuranku.

13. ¿Imaraykun israelitakuna iñiyninkupi pisiparanku?

¹³ Israelitakunaqa sinchitan mancharikuranku yana phuyuta, llifllikamuyta rikuspanku, pututuq waqasqanta uyarispanku ima. Chaymi Moisesta valekuranku paylla Dioswan rimamunanpaq (Éx. 20:18-21). Jinan Moisesqa Sinaí orqoman wicharan, chaypin payqa askha p’unchaykuna qhepakamuran. Moisés mana rijurimuqtinmi israelitakunaqa iñiyninkupi pisipapuranku. Yaqachus jina paykunaqa Moisesta rikuspalla Diospi iñiqku. Chaymi Aaronta niranku: “Pusawaqniyku dioskunata [diosta] ruwapuwayku, manan yachaykuchu Egipto suyumanta pusamuwaqniyku Moisesta imachus sucedesqanta”, nispa (Éx. 32:1, 2).

14. a) ¿Ima nispan israelitakuna engañakunkuman karan? b) ¿Imaynan Dios sientekuran israelitakunaq mana allin ruwasqanmanta?

 ¹⁴ Israelitakunaqa yacharankun ídolo ruwayqa jatun jucha kasqanta (Éx. 20:3-5). Chaywanpas juj qori torillotan ruwakuranku. Yaqapaschá paykunaqa allin ruwanankupaq piensaranku. Chaypaschá Aaronpas niran: “¡Paqarinmi Señor Diospaq fiestata ruwasunchis!”, nispa. Chaykunata rikuspaqa maytachá Diospa sonqonqa nanaran. Chaychá Moisestapas niran: “Usqhayllan t’aqakunku kamachisqay purinanku ñanmanta”, nispa. Diosqa sinchitapunin paykunawan phiñakuran chaymi chinkachiytaraq munaranpas (Éx. 32:5-10).

15, 16. ¿Imaynatan Aaronpas Moisespas rikuchiranku Diospa partenmanta kasqankuta? (15 paginapi dibujota qhaway.)

¹⁵ Diosmi ichaqa khuyapayakuq kayninpi mana chinkachiranchu israelitakunata. Aswanmi allin sonqo kaqkunaman juj oportunidadta qoran (Éx. 32:14). Moisespas sinchitan phiñakuran israelitakuna qori torilloq muyuriqninpi tusushaqta, takishaqta, qaparqachashaqta ima rikuspa. Chaymi chay torillota polvomanraq tukuchiran. Chaymantataq llaqtata niran: “¿Pikunataq Señor Dioswan kashan? ¡Noqawan juñukuchun!”, nispa. Chayta niqtinmi ‘Leví ayllu runakunaqa llapallanku payman juñukuranku’ (Éx. 32:17-20, 26).

¹⁶ Aaronña chay idolota ruwaran chaypas, juchanmanta arrepientekuspan payqa Leví ayllu runakunawan Diosman kutirikuran. Jinaspapas, chay allin sonqo runakunaqa, llapa juchasapa runakunamanta t’aqakuspan Diospa partenmanta churakuranku. ¡May allinmi karan chay ruwasqankuqa! ¿Imarayku? Chay kikin p’unchaymi Jehová Diosqa llapa mana kasukuq israelitakunata wañuchiran. Diospa partenmanta churakuq israelitakunan ichaqa sumaq bendicionkunata chaskinanku karan (Éx. 32:27-29).

17. ¿Imatan yachasunman apóstol Pabloq nisqanmanta?

¹⁷ ¿Imatan yachasunman chaymanta? Apóstol Pabloq nisqan jina “chaykunaqa noqanchis yachananchispaqmi karan” chhaynapi ama ídolo adoraqkuna kananchispaq. Pabloqa nillarantaqmi: “Chaykuna pasasqanqa noqanchis yachananchispaqmi qelqasqa karan, chhaynapi kay tiempoq tukukuyninpi kausaqkunaqa manaña paykuna jinachu kananchispaq”, nispa. Chaymantataq niran: “Pipas ‘qaqatan sayashani’ niqqa allinta cuidakuchun, paqtataq urmanman”, nispa (1 Cor. 10:6, 7, 11, 12). Chaypi Pabloq nisqan jina pipas Diostaña servishanman chaypas yaqapaschá mana allinkunata ruwashanman. Diosqa allinpaqpas qhawarishanman jinapaschá piensakushanmanpas. Ichaqa chhaynataña pay piensanman chaypas Diosqa manan allinpaqchu chay runata qhawarishanman (1 Cor. 10:1-5).

18. ¿Ima piensaykunan Diosmanta t’aqawasunman? ¿Imakunan pasanman Diosmanta t’aqakuqtinchis?

 ¹⁸ Ñaupaqpi yachamusqanchis jina, israelitakunaqa Moisés Sinaí orqomanta mana usqhaylla kutiyamuqtinmi iñiyninkupi pisiparanku. Noqanchispas yaqapaschá paykuna jina pisipasunman. Yaqapaschá nisunman: “Manaraqchus jina Diospa p’unchayninqa chayamunmanraqchu. Paraisopaq promesakunapas manaraqchus jina junt’akunmanraqchu”, nispa. Mayninpiqa manapas cheqaqchu kanman chay promesakuna jinatapaschá piensasunman. Manachus cuidakusun chhayna piensaykunamanta chayqa, munayninchistapaschá ruwayta qallarisunman. Chhaynapitaq pisi-pisimanta Diosmanta t’aqakuspa mana munasqanchiskunata imaraq ruwasunman.

19. ¿Imatan mana jayk’aqpas qonqananchischu? ¿Imarayku?

¹⁹ Jehová Diosqa payllata kasukunanchista, payllata servinanchista iman munan, chaytaqa manan jayk’aqpas qonqananchischu (Éx. 20:5). Manachus Diospa munayninta ruwasunman chayqa, Satanaspa munaynintan ruwashasunman. Satanaspa munayninta ruwaspaqa imaymana ñak’ariykunapin tarikusun. Chaymi apóstol Pablopas niwanchis: “Manan Jehová Diospa copanmanta supaykunaq copanmantawanqa ujayta atiwaqchischu, manallataqmi ‘Jehová Diospa mesanmanta’ supaykunaq mesanmantawanqa mijuyta atiwaqchischu”, nispa (1 Cor. 10:21).

20. ¿Yanapawasunmanchu Dios ima juchamanña urmaqtinchispas? ¿Imaynatan chayta ruwan?

²⁰ Kaypi yachasqanchis jina Cainpas, Salomonpas israelitakunapas atinkumanmi karan Diosman kutirikuyta ichaqa manan chaytachu ruwaranku (Hech. 3:19). Chaymantapas Diosninchisqa manan juchallikuq runataqa jinallatachu saqerparin, Aarontapas perdonaranmi. Chaypaqmi ichaqa consejonkunata kasukuna. Diosqa Bibliawan, qelqakunawan, hermanokunawan iman consejokunata qowanchis. Chay consejokunata kasukusun chayqa, khuyapayawasunpunin payqa.

21. ¿Imatan ruwananchis pruebakunapi tarikuspa?

²¹ Diosqa sapa ratotaq rikuchiwanchis sumaq sonqo kasqanta chayqa, ¿imatan noqanchis ruwananchis? (2 Cor. 6:1.) Cheqnikunanchismi “imachus Diospa munaynin contrapi kaqta, kay pachaq millay munapayayninkunatawan” (leey Tito 2:11-14). Tukukuy tiempopitaq kausashanchis chayqa astawanraqmi Diospaq junt’aq sonqo kayninchis pruebaman churasqa kanqa. Chayrayku kallpachakusun imaña kaqtinpas Diospa ladollanpi kananchispaq, amapuni paytaqa saqesunchu. Payllatan manchakunanchis, payllapaqtaqmi kausananchispas (Deut. 10:20).