KAY vidapiqa manan facilchu thaj kausay. Mayninpi thajña kayrushanchis chaypas karunpunin ima llakipas. Chayrayku, ¿Bibliapi ima consejokunan yanapawasunman thaj kausananchispaq? ¿Imaynatan jujkunata yanapasunman thaj kayta tarinankupaq?

Cheqaq thaj kayta tarinapaqqa allin cuidasqan kananchis, amigonchiskunapas allin amigokunan kananku, astawanqa papanchis Jehová Dioswanmi allin amigontin kananchis. ¿Imaynatan chayta ruwasunman? Chaytan kaypi yachasun.

Yachasqanchis jina Diospa consejonkunaqa allinninchispaqmi, chaymi kasunanchis chaytaqa. Chhaynapin rikuchisun Diospi confiasqanchista paywan amigontin kasqanchistawan (Jer. 17:7, 8; Sant. 2:22, 23). Chaymantapas Diosqa thaj kaytan qowasun. Isaías 32:17 textopin nishan: “Chanin kayta ruwaqtinkun thaj kay kanqa, chanin kaypi kausaqtinkun mana ima sasachaypas kanqachu, Señor Diospitaq suyakullanqakupuni”, nispa. Chhaynaqa, sichus Diosninchista kasukusun chayqa thajmi kausasunchis (Is. 48:18, 19).

Diosqa munan wiñaypaq thaj kausananchistan manan juj ratolla thaj kausananchistachu. Chaymi juj sumaq regalota qowanchis. ¿Iman chay? Santo espiritun (Hech. 9:31).

Apóstol Pabloq nisqan jina ‘thaj kayqa’ santo espirituq rurunmi (Gál. 5:22, 23). Chhaynataq chayqa, thaj kausananchispaqqa Diospa espiritunwanmi pusachikunanchis. ¿Imaynata? Iskay formapin; chaytañataq kunanqa yachasun.

Ñaupaqta. Sapa p’unchaymi Bibliata leenanchis. Chay leesqanchispitaqmi allinta piensananchis (Sal. 1:2, 3). Chayta ruwasun chayqa santo  espiritun yanapawasun imatachus Dios piensan chayta allinta entiendenanchispaq. Yachasunmi imaynapis payqa tukuy tiempopas thajlla kashan chayta, imaraykus allinpuni thaj kausay chaytapas. Chaypi yachasqanchisman jinataqchus kausasun chayqa thajmi kasunchis (Prov. 3:1, 2).

Iskaypi. Sapa p‘unchaymi Dioswan parlananchis. Mañakunanchismi espirituntapas (Luc. 11:13). Diosta maskhaqkunatan Biblia nin: “Diosqa runaq mana entiendey atisqan thaj kayta qosunkichis, chhaynapin sonqoykichista yuyayniykichista ima Cristo Jesuswan waqaychanqa”, nispa (Filip. 4:6, 7). Chhaynaqa, sapa kutillachus Diospa espiritunta mañakusun chayqa, paymi cheqaq thaj kayta qowasun (Rom. 15:13).

Bibliaq yanapayninwan vidankuta cambiaspan askha runakunaña thajpi kausashanku. Arí, thajpin kashanku Jehová Dioswan, paykuna kikinkuwan, jujkunawan ima. Wakinmanta juj chikanta yachasun.

Wakin hermanokunaqa, manaraq Testigo kashaspaqa, apurayllas imawanpas renegakuqku, manas paciencianku kaqchu. Kunanmi ichaqa llamp’u sonqo, sumaq sonqo paciencioso ima kanku * (Prov. 29:22). Chaymi kunan hermanonchis Davidmanta, hermananchis Rachelmantawan yachasunchis.

Hermanonchis Davidqa manaraq Testigo kashaspaqa apuraysi imawanpas renegaq, millaytas jujkunamantapas rimaq. Manas taytantapas mamantapas ni sullk’ankunatapas respetaqchu. Chaymantas ichaqa piensaykapusqa jinaspa cambiasqa. ¿Iman payta yanapanman karan? Paymi nin: “Bibliapi consejokunata kasukuymi yanapawaran. Pisi-pisimantan familiayta respetayta qallaripurani”, nispa.

 Hermananchis Rachelqa nishu maqanakuypi uywasqas kasqa. Paymi nin: “Wasiypiqa sapa p’unchaymi discuteqku, qapariyllan imapas kaq. Kallpachakushaniraqmi chaykunata llapanta qonqanaypaq”, nispa. ¿Iman payta yanapanman karan thaj kausananpaq? Paymi nillantaq: “Sapa kutillanmi Diospa yanapayninta mañakuni”, nispa.

Rikusqanchis jina Davidpas Rachelpas tarirankun thaj kausayta. Arí, santo espirituq yanapayninwanmi paykunaqa cambiaranku vidankuta. Millaymanña kay mundo tukushan chaypas, atisunmanmi familiapipas hermanokunawanpas thajpi kausayta. Chaytan Diosninchispas munan, chaymi Bibliapipas nin: “Tukuy atisqaykichista ruwaychis lliu runawan sumaqta kausanaykichispaq”, nispa (Rom. 12:18). ¿Imaynatan chayta ruwasunman? ¿Imakunan kanqa thajpi kausanapaq kallpachakusqanchismanta? Chaytañataq yachasun.

Maytachá kusikunchis runakuna predicasqanchista uyariqtinqa (Is. 9:6, 7; Mat. 24:14). Chayta uyarikuspan wakinqa Diosmanta astawan yachanku. Manataqmi nishu llakisqañachu ni phiñasqañachu kausanku. Aswanmi paykunaqa Diospa gobiernonta kusisqa suyakushanku. Salmos 34:14 textoq nisqantataqmi kasukushankupas, chaypin nin: “Runamasiykikunawan thaj kaypi kausay”, nispa.

Ichaqa, manan llapa runakunachu yachanku sumaq chaskikuyta (Juan 3:19). Chaywanpas sumaq simikunawan respetowan iman paykunataqa rimapayananchis. Chhaynapin Jesuspa kamachisqanta kasukusun. Paymi niran: “Wasiman jaykuspaqa napaykunkichismi chaypi kaqkunata. Paykunachus uyarikunankupaq jina kanqaku chayqa, thaj kay paykunapaq kachun; mana chayqa, thaj kay qankunaman kutimpuchun”, nispa (Mat. 10:11-13). Chhaynaqa juj wasipi manaña sumaqtachu chaskiwasun chaypas thajpin paykunawan qhepananchis. Jujkunapi kutiqtinchisqa yaqapaschá allinta chaskiwasun.

Noqanchisqa autoridadkunatapas respetowanmi rimapayananchis contranchispiña kankuman chaypas. Chhaynapin lliuwanpas thajpi kausasun. Yachasun África ladopi kaq juj llaqtapi imachus pasaran chayta. Chay llaqtapi autoridadkunaqa manas munasqakuchu hermanokuna salonta ruwanankupaq permiso qoyta. Chaymi Inglaterra nacionpi chay llaqtata representaq embajadorman juj hermanota kamachikuran chay asuntomanta rimamunanpaq. Chay hermanoqa chay llaqtapin ñaupaqqa misionero karan. ¿Imaynatan chayta allichanman karan?

Chay hermanon willakun: “Embajadorpa oficinanman chayanaypaqmi runakunata chaskiqqa ñaupaq misionero kasqay llaqtapi runakunaq p’achakusqan jina p’achayoq kashasqa. Chaymi noqaqa paykunaq rimasqanku simipi napaykurani. Jinan payqa ancha admirasqa niwan ‘imapin yanapaykiman’ nispa. Noqataq respetowan nirani ‘wiraqocha embajadorwami rimayta munashani’ nispa. Jinan wajarun, chay wiraqochaqa rimasqan simipin napaykuwan. Chaypin noqaqa explicarani imatachus Testigokuna ruwanchis chayta, payqa tukuy atencionwanmi uyariwan”, nispa.

Chay hermano respetowan sumaq sonqowan explicasqanmantan manaña chay runaqa maltachu piensaran Testigokunamanta. Chaymantaqa llaqtanpi autoridadkunapas qorankun hermanokunaman permisota salonkunata ruwanankupaq. Chay llaqtapi hermanokunaqa maytachá kusikuranku chaywanqa. ¡May allinpunin lliuwanpas respetowan rimayqa!

Manan maypipas Diospa llaqtanpi jina thaj kausayqa kanchu. Chaymi kallpachakushanallanchis chay munay llaqtapi thaj kausay mana pisiyananpaq. Diospa gobiernonpiqa wiñaypaqmi thajpi kausasun. Chaymantapas kay kausaymanta aswan munaymi chay kausayqa kanqa (2 Ped. 3:13, 14).