1. ¿Imaraykun kusisqa kashananchis?

DIOSPA llaqtanqa watakunaq pasasqanman jinan jatunman tukushan. Chhaynataq kashan chayqa sapankanchischá k’anchashallanchis. Qayna watapas 10.000.000 más runakunamanmi estudiota qoranchis. Jesuspa wañusqanta yuyariqpas askha runakunan jamuranku. Paykunaqa allintachá entienderanku imaynatas Diosqa munakuyninta rikuchiwaranchis chayta (1 Juan 4:9).

2, 3. a) ¿Iman mana jark’awananchischu k’anchananchista? b) ¿Imakunamantan kaypi yachasun?

² Diospa llaqtanpiqa lliu llaqtakunamantataq kanchis chayqa imaymana simikunatan rimakun. Chaywanpas jujllachasqallan Diostaqa servishanchis (Apo. 7:9). Chaymi ima simitaña rimanchis chaypas, maymantaña kanchis chaypas k’anchashanallanchis (Filip. 2:15).

³ Chaymantapas predicaspa, jujllachasqalla kaspa, makilla kaspa iman Diosta jatunchanchis. Chhaynataq chayqa,  ¿imakunatawanmi ruwasunman chaykunapi astawan k’ancharinanchispaq? (leey Mateo 5:14-16). Chaykunamantan kaypi yachasun.

4, 5. a) Predicaspaña k’ancharinchis chaypas, ¿imata ruwaspan k’ancharillasunmantaq? b) ¿Imakunan kanqa runakunaman sumaq tratota qoqtinchis? (21 paginapi fotota qhaway.)

⁴ 1925 watapi 1 junio killapi lloqsimuq Qhawaq revistapi “laqhayaqpi k’anchay” nisqa temapin niran: “Kay tiempopiqa pipas Señorta qatikuqqa k’ancharinanmi [...] maypiña kaspapas k’anchashanallanmi”, nispa. Nillarantaqmi: “Chaytaqa ruwanan Diosmanta lliu llaqtakunaman willaspa k’anchaypi puriq jina kausaspa iman”, nispa. Chhaynaqa, chay revistaq nisqan jina, predicaspa estudiota qospa iman rikuchisun k’anchasqanchista (Mat. 28:19, 20). Ichaqa manan chayllapichu k’anchananchis. Jujkuna k’anchasqanchista rikunankupaqqa allintan portakunanchis. Runakunaqa imaynachus kasqanchistan mastaqa qhawashanku. Chaymi kusisqa uyantin respetowan ima paykunataqa napaykunanchis. Chhaynapin Diosqa jatunchasqa kanqa.

⁵ Jesusmi discipulonkunata niran: “Wasiman jaykuspaqa napaykunkichismi chaypi kaqkunata”, nispa (Mat. 10:12). Chay tiempopi runakunaqa llapa visitaqninkutan, mana reqsisqaña kanman chaypas, wasinkuman pasaykachiqku. Noqanchispa tiyasqanchis llaqtapiqa manapaschá chhaynachu. Wakinqa yaqapaschá manchakunku mana reqsisqawan rimayta, wakinqa phiñakunku imapaschá. Ichaqa sichus sumaqta, respetowan paykunata rimapayasun chayqa faciltan uyarikunqaku. Mayninpiqa kusisqa uyawan napaykuymi runakunaq sonqonta kicharin. Chaytan ruwana carretachakunawan predicaspapas. Chhaynapin runakunaqa confianzawan achhuykamunqaku. Confianzawanmi noqanchiswanpas rimanqaku, revistakunatapas apakunqaku.

6. ¿Imatan juj casado warmi-qhari ruwaran luzninku k’anchashanallanpaq?

⁶ Inglaterra nacionpi juj casado warmi-qharimanta yachasun. Paykunaqa kuraqkunañan kanku, manataqmi qhalichu kanku. Chaymi manaña wasin-wasinta puriyta atinkuchu. Ichaqa k’anchashallayta munaspan paykunaqa wasinku chimpapi predicashanku. ¿Imaynata? Wawakunaq escuelamanta lloqsimunan horapaqsi paykunaqa juj mesapi imaymana qelqakunata churanku. Wakin tayta-mamakunaqa yachayta munaspas Los jóvenes preguntan nisqa librota apakunku, wakinqa folletokunata imas apakunku. Chaymantaqa juj precursoras paykunata yanapayta munaspa paykunawan kuska predicayta qallarisqa. Paypa yanapayninwan imas juj wawaq papan Biblia estudiayta qallarisqa.

7. ¿Imaynatan yanapasunman juj llaqtakunamanta jampuqkunata?

⁷ Kay tiempokunapiqa askha runakunan llaqtankuta saqespa juj llaqtakunaman ripushanku. Tiyasqanchis llaqtaman paykuna chayamushanku chayqa, ¿imaynatan paykunata yanapasunman? Ñaupaqtaqa yaqapaschá yachasunman rimasqanku simipi napaykuyta. Chaypaqqa yaqapaschá yanapachikusunman JW Language nisqa  aplicacionwan. Chaymantapas yaqapaschá rimasqanku simipi imallatapas yachasunman. Qhawachisunmanmi rimasqanku simipi jw.org paginatapas, chaypi videokunatapas qelqakunatapas (Deut. 10:19).

8, 9. a) ¿Ima yanapaykunan kan chaupi semana juñunakuykunapi? b) ¿Imaynatan tayta-mamakuna wawankuta yanapankuman juñunakuykunapi comentanankupaq?

⁸ Jehová Diospa munayninpin sapa chaupi semanan apakushan Diospaq kausasunchis nisqa juñunakuy. Chaypi yachasqanchis llapa yanapaykunata kasukusun chayqa, manan sasachu kanqa munaqkunaman jujmanta kutiy, Bibliamanta estudiota qoypas.

⁹ Juñunakuykunaman chayraq jamuqkunaqa admirasqan qhepanku wawakunaq imaynachus comentasqankuta rikuspa. Chaymi tayta-mamakunaqa allinta wawankuta yanapananku umallankumanta ima tapuytapas kutichinankupaq, chhaynapin paykunapas luzninkuta k’ancharichinqaku. Chaymantapas wawakunaq siminmi mayninpiqa allinta chayan wakin runakunaq sonqonman (1 Cor. 14:25).

10. ¿Iman familiakunata yanapanqa jujllachasqalla kanankupaq?

¹⁰ ¿Imatawanmi ruwananchis luzninchis k’ancharinanpaq? Jujllachasqallan kananchis. Manan t’aqanakuy kananchu familiapipas ni iñiqmasipurapipas. Familiapi jujlla kanapaqqa mana faltaytan aparinanchis familiapi estudiota. Tayta-mamakunan chaypiqa primero kananku. Wakin familiakunaqa JW Broadcasting nisqa programata  iman qhawanku. Chaymantataq rimanku imakunapis chaywan yanapachikunkuman chayta. Wawakunapas wayna-sipaskunapas manataq igualtachu piensanku chayqa paykunapaq jinan tayta-mamakunaqa imatapas rimananku, chhaynapin llapanku kallpachasqa kanqaku (Sal. 148:12, 13).

11-13. ¿Imaynatan yanapakusunman iñiqpurapi jujlla kananchispaq?

¹¹ Lliumi kallpachakunanchis Diospa llaqtanpi jujlla kausay kananpaq. Chayta ruwasun chayqa allintan k’ancharisunchis. Wayna-sipaskunaqa yaqapaschá kuraq hermanokunata yanapankuman. Yaqapaschá tapurinkuman imaynatas Diosta reqsiranku, maykunapis serviranku chaykunata. Chayta ruwanqaku chayqa kallpachasqan kanqaku. Kuraq hermanokunapas kusisqan kanqaku. Chaymantapas llapanchismi kallpachakunanchis juñunakuykunaman chayraq jamuqkunata sumaqta chaskinanchispaq. Yaqapaschá juj hermanokunata reqsichisunman, maypichus tiyanankutapas maskhapusunman. Chhaynapin paykunapas wasinkupi jina sientekunqaku.

¹² Predicacionpi umalliqkunaqa yanapanankun kuraq hermanokunata luzninku k’anchashanallanpaq. Manan comuntachu kachananku sasa purinakunaman. Mayninpiqa yaqapaschá juj joven hermanotawan o sipas hermanatawan tupachinkuman. Wakinqa yaqapaschá kuraq kasqankurayku, mana qhali kasqankurayku ima mana unaytachu predicanqaku, chhayna kaqtinqa yachanan paykuna khuyapayayta. Munakuq kasun chayqa sumaqtan yanapasun kuraqtapas, joventapas, mosoqtapas, experienciayoq hermanotapas (Lev. 19:32).

¹³ Israel llaqta runakunaqa juj nisqallan Diostaqa serviqku. Chaychá Salmos takita qelqaq runapas niran: “¡Mayna allinmi, ancha sumaqmi wayqe-panakunaq juj nisqalla kausayninkuqa!”, nispa (leey Salmos 133:1, 2). Chhayna jujlla kasqankutan chay runaqa compararan sumaq q’apaq llamp’u aceitewan. Chay aceitewan jawisqakunaqa thajmi sientekuqku. Noqanchispas chay jawina aceite jinan kananchis. Arí, sumaq simiwanmi hermanonchiskunata rimapayananchis, chhaynapin juj nisqalla kausasunchis. Chayta ruwashankiña chayqa kallpachakushallay chhayna kanaykipaq (2 Cor. 6:11-13).

14. ¿Imatan ruwasunman wasinchispipas luzninchis k’anchashanallanpaq?

¹⁴ Maypiña kaqtinchispas luzninchisqa k’anchashanallanmi. Vecinokunapas rikunankun chaytaqa. Chaymi tapukunanchis: “¿Ima ninkun vecinoykuna noqamanta? ¿Limpiochu allin allichasqachu wasiy kashan? ¿Munaychu rikukun wasi qayllay? ¿Yanapakuqmantachu vecinokuna reqsiwanku?”, nispa. Hermanokunawan rimaspapas tapurisun imaynatachus vecinonkuna rikuranku ima ruwasqankutapas chayta. Wakinqa escuelankupi llank’anankupi iman imaymana experienciakunata tariranku (Efes. 5:9).

15. ¿Imaraykun makilla kashananchis?

¹⁵ Sichus munanchis luzninchis k’anchashanallanta chayqa, allintan yuyayninchispi jap’inanchis ima tiempopichus kausashanchis chayta. Jesuspunin askha kutita niran “makilla kashaychis”, nispa (Mat. 24:42; 25:13; 26:41). Ichaqa, sonqonchispichus nisunman: “Jayk’aqraqchá Diospa p’unchayninqa chayamunqa, manapaschá rikusaqñachu”, nispa chayqa, manañan ganasninchis kanqachu predicananchispaq (Mat. 24:21). Luzninchispas manañan fuertetachu k’anchanqa; wañupunqa imapaschá.

16, 17. ¿Imatan ruwasunman makilla kashananchispaq?

¹⁶ Tiempoq pasasqanman jinan aswan millaymanraq kay pachapi kausayqa tukupunqa, chaymi astawanraq cuidakunanchis kanqa. Yachasqanchis jina Diosninchis Jehová Diosqa tiempollanpin ruwananta ruwanqa (Mat. 24:42-44). Chaykaman ichaqa makilla kashananchis. Sapa p’unchaymi Diospa simintapas leenanchis. Mana p’itiytan Dioswanpas rimashananchis (1 Ped. 4:7). Chaymantapas tukukuykama  luzninkuta k’anchachiq hermanokunapin piensananchis, paykunaq ejemplontan qatikunanchis. Chay hermanokunamanta jujninpa willakusqanmi kashan 2012 watapi 15 abril killapi lloqsimuq Qhawaq revistapi. Chaymi tarikun 18-21 paginakunapi. Titulon nin: “Askha watañan judío runaq capanmanta jap’ipakushani”, nispa.

¹⁷ Kallpachakusun Diospa munayninta ruwananchispaq, jujkunata yanapananchispaq, hermanokunawan tiempota pasananchispaqpas. Chaykunapi ocupasqa kasun chayqa, kusisqan kasunchis; manan reparasunchu tiempoq pasasqantapas (Efes. 5:16). 100 watakuna ñaupaqtaqa imaymanakunatan Diospa llaqtanpi ruwakuq, kunan tiempokunaqa astawanraqmi ruwakushan. Luzninchisqa astawanraqmi k’ancharishan.

18, 19. ¿Imaynatan umalliqkuna yanapakunkuman llapa hermanokuna rijch’asqalla kashanankupaq? Juj experienciata willay.

¹⁸ Juchasapa runakunataq kanchis chayqa, yaqapaschá mayninqa imapipas pantasun. Chhaynaña kaqtinpas Diosqa sumaqtan yanapakun. Chaypaqmi payqa umalliqkunata regalokunata jina qowanchis (leey Efesios 4:8, 11, 12). Chaymi paykunaq consejontaqa sumaqta chaskikunanchis.

¹⁹ Inglaterra nacionpi juj casado warmi-qharimanta rimasun. Paykunaqa sasachakuypis tarikushasqaku, chaysi umalliqkunaq yanapayninta maskhasqaku. Hermanaq willakusqanman jinaqa manas qosan allintachu umallishasqa. Qosaq willakusqanman jinapas manas allintachu payqa umallishasqa. Manas familiapi estudionkutapas aparishasqakuchu. Jinas umalliqkunaqa Jesuspa ejemplonta willasqaku. Qosatas kallpachasqaku imaynan Jesuspas discipulonkunata cuidaran, chhaynata familianta cuidananpaq. Esposatataq nisqaku qosanwan pacienciakunanpaq. Kallpachasqakus familiapi Diosta adoraypi qosanta iskaynin wawankunatawan yanapananpaqpas (Efes. 5:21-29). Tiempoq pasasqanman jinaqa allintas chayta ruwasqaku, chaysi umalliqkuna felicitasqaku qosata. Kallpachasqakus ama jayk’aqpas chay ruwayta saqenanpaqpas. Chhaynatan umalliqkunaqa yanapakuranku chay familia k’anchashanallanpaq.

20. ¿Imakunan kanqa luzninchista k’ancharichiqtinchis?

²⁰ Salmos 128:1 textopin nishan: “Kusisamiyoqmi pipas Señor Diosta manchakuqqa, Señor Diospa ñanninkunapipas puriqqa”, nispa. Chhaynaqa kallpachakusun Diospa llaqtanman lliuta invitamunanchispaq, jujllachasqalla kausananchispaq, makilla kashananchispaqpas. Chayta ruwasun chayqa kusisqan kasunchis, lliumi luzninchistapas rikunqa. Jujkunapas noqanchiswan kaytan munanqaku, jatunchanqakun papanchis Jehová Diostapas (Mat. 5:16).