2012 watapin arqueólogo runakuna 3.000 wata ñaupaqmantaraq t’urumanta ruwasqa p’uyñuta tariranku. Chay tarisqankumantan anchata kusikuranku. Ichaqa manan chay p’uyñuta tarisqankumantachu aswanpas imachus chay p’uyñupi qelqasqa kasqanmantan kusikuranku.

Chay arqueólogo runakunan p’uyñuq k’arpankunata juñuspa k’askanachiranku. Chaypin tariranku Canaán runakunaq qelqasqanku simikunata. Chaypin nin: “Esbaal ben Bedá”, nispa, chayqa “Esbaal, Bedapa churin”, ninantan nin. Chay arqueólogo runakunaqa chayraqmi chay sutita tarisharanku.

Bibliapas willanmi Esbaal sutiyoq runamanta. Chay runaqa rey Saulpa jujnin churinmi karan (1 Crón. 8:33; 9:39). Yosef Garfinkel profesorpas yanapakuranmi chay k’arpakuna maskhaypi. Paymi nin: “Chay sutiqa Bibliallapin rijurin rey Davidpa tiemponmantataqmi kanpas. Chay k’arpakuna tarisqaykupas rey Davidpa tiempomantan”, nispa. Wakin arqueólogo runakunapas ninkun: “Chay tiempollapin chay sutiqa rijuriran”, nispa. Chay arqueólogo runakunaq tarisqankun rikuchin Bibliapi willakuyqa cheqaqpuni kasqanta.

Wakin textokunapiqa Esbaal sutiq rantinpin Is-bóset suti rijurin (2 Sam. 2:10). ¿Imaraykun “baal” sutita “bóset” sutiwan cambiaranku? Investigaq runakunan ninku: “2 Samuel libropiqa manan Esbaal sutita churayta munarankuchu ¿imarayku? Yaqapaschá chay sutiwan Israel runakuna Baal diosta yuyariranku, chay diosqa Canaán runakunaq diosninmi karan. 1 Crónicas libropin ichaqa Esbaal suti rijurishallan”, nispa.