BROOKINGS llaqtapin (Dakota del Sur) chiri tiempo qallarisharanña. Juj tutamantanmi nishuta chirimusharan, noqaykutaq juj iñiqmasikunawan khatatasharayku chirimanta. Ñaupaykupin juj jatun tina chiri unuwan junt’a kasharan. ¿Imaraykun chaypi kasharayku? Chaymanta astawan willasaykichis.

Tayta-mamayqa 1934 watapin bautizakusqaku Jehová Diospa testigonkuna kanankupaq. Chaymantapachan paykunapaqqa Diospa munaynin ruway aswan importante karan. Papaypa sutinmi karan Clarence, paymi ñaupaqtaqa Conde iñiq t’aqapi siervo de compañia karan (kunanqa umallikunaq llank’ayninpi yanapakuq umalli nikunmi), chaymantataq tioy Alfred. Noqaqa 1936 wata 7 marzo killapin nacerani. Tawan karayku noqataq sullk’a kaq karani. Noqaykuqa campopin tiyarayku, anchatataqmi gustawaqku chajrapi llank’ay. Chaywanpas Diosmanta willaymi noqaykupaqqa aswan importante karan.

Familiayqa sapa kutillanmi juñunakuykunaman riqku, wasin-wasintan Diosmanta sumaq promesankunamantapas willaqku. Tayta-mamaypa ejemplon, Diosmanta yachachiwasqanku iman yanapawaranku Jehová Diosta munakunaykupaq. Chaymi Dorothy panay noqapiwan soqta watallaykupi publicador karayku. Chay qhepamanmi 1943 watapi matriculakurayku Bibliamanta allin yachachiq kanapaq escuelapi, chay escuelaqa chayraqmi qallarisharan.

Familiaypaqqa asambleakunan ancha importante karan. 1949 watapin Sioux Falls  (Dakota del Sur) llaqtapi asamblea aparikusqanman rirayku, chaypin Grant Suiter iñiqmasi discursota qomuran, “¡Chay p’unchayqa chayamushanñan!”, nisqa temamanta. Chaypin llapa cristianokunata kallpachawaranku Diosmanta allin willakuykunata willanaykupaq. Chay watallapitaqmi 12 noviembre killapi Brookings llaqtapi juj asamblea karan, chaypin bautizakurani. Ñaupaqpi nisqay jina, chaypin tawa kasharayku bautizakunaykupaq.

Chay qhepamanmi precursor kayta munarani, chaymi 1952 watapi 1 enero killapi, 15 wataypi kashaspa precursor kapurani. Biblian nin: “Yachayniyoqkunawan puriqqa yachayniyoqmi kapunqa”, nispa (Prov. 13:20). Familiaypiqa askhan yachayniyoqkunaqa kaqku, paykunan yanapawaranku tukuy tiempoywan Diosta servinaypaq. Sapa kutinmi Julius tioywan predicaq kani, payqa imaymanatan Jehová Diosmanta yachachiwaran. 60 watanpiña kasharan chaypas, kusisqan paywan predicaq kayku. Chay qhepallamanmi Dorothy panaypas precursora kapuran.

Juch’uyllaraq kashaqtiymi tayta-mamay sapa kutilla watukuq umallikunata esposankutawan alojaqku. Jesse Cantwell watukuq umallin Lynn esposanpiwan anchata kallpachawaranku. Juj iñiq t’aqakunata visitaspan mayninpi invitawaqku paykunawan predicanaypaq. Anchatan kusikuq kani paykunawan kaspa. Noqapas paykuna jinan tukuy tiempoywan Diosta serviyta munarani.

Chay qhepamanmi Bud Miller watukuq iñiqmasi Joan esposanwan visitamuwaranku. 18 wataypin kasharani paykuna chayamushaqtinku. Chay tiempopin juj oficinaman presentakurani, chaypin autoridadkuna decidinanku karan cuartelman rinayta otaq mana rinayta. Paykunaqa politicapi chaqrukunaytan munaranku, ichaqa chay ruwaykunaqa Diospa contranpin karan, chaymi mana munaranichu (Juan 15:19). Noqaqa Diospa gobiernonmanta allin willakuykunatan willayta munarani, chaymi solicitarani ministro religioso jina kanaypaq.

Maytan kusikurani Miller iñiqmasi “noqawan risun” niwaqtin. Payqa allintan Bibliamanta  yachaq, manataqmi manchakuqchu pi runakunawanpas rimayta. Paypa ladonpiqa manan manchakuranichu rimayta. Chay qhepamanmi 1954 watapi manaña obligawarankuchu ejercitopi servinaypaq. Chaymantapachan Diosta astawan servirani.

Chay qhepamanmi Betelman invitawaranku, Staten Island llaqtapi tarikuq Hacienda Watchtower nisqapi llank’anaypaq. Chaypin kinsa wata jina llank’arani. Chaypiqa imaymanatan yacharani “yachayniyoq runakunawan” llank’aspa.

Chay haciendapin WBBR nisqa radio kasharan. Chayqa 1924 watamanta 1957 watakaman funcionaran. Chaypin llank’arayku 15 maynintaq 20 iñiqmasikuna, yaqa llapaykutaqmi waynakunalla karayku. Ichaqa noqaykuwanmi llank’aran Eldon Woodworth, payqa janaq pachapaq ajllasqa cristianon karan. Paymi taytayku jina llapaykutapas yanapawaranku. Mayninpi noqayku ukhupi sasachakuykuna kaqtinmi niwaqku: “Pantaq runakunaña kanchis chaypas, Diosqa chhayna runakunawanmi admirana ruwaykunata ruwashan”, nispa.

Frederick Franz iñiqmasipas noqaykuwanmi llank’aran. Paypas allintan Bibliamanta yachaq, allin yuyayniyoq iñiqmasitaqmi karan. Chaymi paypas anchata yanapawaranku. Chaymantapas Harry Peterson iñiqmasin mijunata wayk’uq, paypas janaq pachapaq ajllasqan karan. Apellidonqa Papargyropoulos nisqan karan, ichaqa “Peterson” nispan niq kayku aswan fácil kasqanrayku. Paymanqa anchatan gustaq predicay, chaywanpas allintan Betelpi llank’ayninta junt’aq, ¡allin ejemplon karan! Sapa killan pachajninpi revistakunata runakunaman saqemuq, allintan Bibliamanta yachaq, kusatataqmi ima tapukusqaykutapas kutichiwaqku.

Betelpi llank’aq iñiqmasikunapaqmi frutakunata verdurakunata latapi envasaq kayku. Sapa watan 45.000 latakunata envasaq kayku, sapanka latan juj litro jina karan. Noqaqa  Etta Huth hermanawanmi llank’arani, payqa allin yachayniyoq cristianan karan, paymi yachachiwaranku chay mijuykuna envasaytapas. Sapa kutillanmi sipas iñiqmasikuna jamuqku yanapakuq, Etta iñiqmasitaqmi paykunata yachachiq. Allintaña pay yacharan chay llank’aymanta chaypas, haciendapi umallikunaq nisqanman jinan imatapas ruwaq, ¡allin ejemplon karan!

Chay sipaskunawan kuskan jamullarantaq Angela Romano (Angie) iñiqmasi. Paytaqa Etta iñiqmasin Diosmanta yachachisqa. 1958 watapin Angie iñiqmasiwan casarakurayku, 58 watataqmi kuska tukuy sonqowan Diosta servirayku. Payqa Diostan tukuy sonqowan munakun, chaymi yanapawaranku casado kausayniykupipas sumaqta kausanaykupaq. Paypas allin yachaywanmi imatapas ruwan, imaña pasaqtinpas manan paymantaqa jayk’aqpas iskayaymanchu.

1957 watapin WBBR radiota vendepuranku. Chay qhepamanmi Brooklyn llaqtapi Betel wasipi llank’arani. Ichaqa casarakusqay qhepamanmi Betelmanta lloqsipurani jinaspa Staten Island llaqtapi kinsa wata precursor jina Diosta servirayku. Precursor kashaspan radiota rantikuq dueñokunawan llank’arani, chay radiotan suticharanku WPOW nispa.

Noqaykuqa maypichus yanapana necesitakusqanpin yanapakuyta munarayku, chaymi imachus necesitasqallaykuwan kausaq kayku. 1961 watapin invitawaranku Falls City llaqtapi precursor especial kanaykupaq. Chaypi kashaqtiykun invitawaranku South Lansing llaqtapi nombrasqa qharikunapaq escuelaman, chaypin imaymanata yachachiwaranku. Noqaykuqa “kaqtachá kutipusun” nisharaykun. Ichaqa chay escuela tukuytan Camboya nacionman rinaykupaq niwaranku. Ancha kusisqan kasharayku chay nacionpi predicanaykuta yachaspa. Chay nacionman chayaspaqa mana rikusqaykutan rikurayku, mana uyarisqaykutan uyarirayku, mana mallisqaykutataqmi mallirayku.

Chay qhepamanmi Camboya nacionpi sasachakuykuna karan, chaymi Vietnam del Sur nisqa nacionman ripurayku. Chaypi iskay wata kashaqtiykun nishuta onqopurani jinan Estados Unidos nacionman kutipurayku. Sasatan qhaliyarani. Ichaqa qhaliyapuspa jinan yapamanta precursor kapurayku.

1965 wata marzo killapin invitawaranku iñiq t’aqakunata watukuq kanaypaq. 33 watan esposaywan kuska iñiq t’aqakunata watukurayku, asambleakunapipas yanapakurayku. Noqapaqqa ancha importanten karan asambleakuna, chaymi tukuy sonqoywan asamblea ruwakunanpaq yanapakuq kani. Unaymi Nueva York llaqtapi iñiq t’aqakunata watukurayku, askha kutitaqmi Yankees estadiopi asambleakunata aparirayku.

Noqaykuqa askha privilegiokunatan chaskirayku. 1995 watapin invitawaranku Escuela de Entrenamiento Ministerial nisqapi  yachachiq kanaypaq. Kinsa wata qhepamanmi Betelpi llank’anaykupaq yapamanta invitawaranku. May kusisqan kasharani 40 watamanta yapamanta Betelman invitawasqankumanta. Juj tiempon yanapakurani predicacionta qhawariq t’aqapi, escuelakuna aparikusqanpitaq yachachiq karani. 2007 watapin umalliq t’aqa qallarichiran escuelakunamanta encargakuqkuna nisqa departamentota, chaypin juj tiempo umalli karani.

Kay tiempopi escuelakunaqa manañan ñaupa tiempopi jinañachu. 2008 watapin iñiq t’aqapi umalliqkunapaq escuela qallariran. Patterson, Brooklyn llaqtakunapi kaq escuelakunamanmi iskay watallapi 12.000 más umalliqkuna riranku. Kunanpas askha nacionkunapin chay escuela aparikushan. 2010 watapin Escuela de Entrenamiento Ministerial nisqa cambiapuran soltero qharikunapaq escuela nisqaman. Chaywan kuskan casarasqa cristianokunapaq escuela qallarillarantaq.

2014 watapi setiembre killapin chay iskay escuelakuna jujllaman tukupuran, sutinmi: Diospa gobiernonmanta willaqkunapaq escuela. Chay escuelamanmi rinkuman casarasqa cristianokuna, solterokuna, solterakunapas. Kunanqa askha nacionkunapin chay escuela aparikushan, chaymantan iñiqmasikunaqa ancha kusisqa kashanku. Anchatan kusikuni chay escuelakunaman jamuq iñiqmasikunata reqsisqaymanta, chay escuelaman jamunankurayku imaymana cambiokuna ruwasqankumantapas.

Chiri p’unchaypi bautizakunaypaq suyakusqay p’unchaymantapachan yachayniyoq askha iñiqmasikunata reqsirani, chaymantan anchata Jehová Diosta agradecekuni. Wakinqa noqamanta aswan waynallaraqmi karanku, wakintaq kuraqña karanku. Jujkunaqa juj nacionkunamantan karanku, chaywanpas kausayninkupin rikuchiranku Diosta tukuy sonqowan munakusqankuta. Paykunan yanapawaranku Diosta allinta servinaypaq. Ancha kusisqan kashani Diospa llaqtanpi chhayna yachayniyoq amigokunata reqsisqaymanta.