1, 2. a) ¿Ima ninkun wakin tayta-mamakuna wawanku bautizakuyta munaqtin? b) ¿Imaraykun bautizakuy munaqkunata tapunku ñachus Diosman entregakurankuña icha manaraqchus chayta? (Kay paginapi fotota qhaway.)

MARÍA sutiyoq hermanamanta juj chikanta rimasun. Payqa sipasllaraq kashaspas bautizakusqa. Llapa bautizakuqkuna jinas paypas bautizopaq discurso qoqpa tapusqanman fuerteta nisqa “¡arí!” nispa.

² Mariaq tayta-mamanqa maytachá kusikuran ususinkuq Jehová Diosman entregakuspa bautizakusqanwanqa. Manaraq María bautizakushaqtinqa sapa kutillansi maman llakisqa nikuq: “Nishu wawallaraqsunamá kashan kay ususiyqa; manaraqsunamá allintachu entiendeshan imas bautizakuy chaytapas; amaraqchu bautizakunqapas”, nispa. Yaqa llapa tayta-mamakunan chhaynata piensanku wawanku bautizakuyta munaqtinku (Ecl. 5:5). Chaytaqa manan “maltan  piensashanku” nisunmanchu. Yachasqanchis jina bautizakuyqa manan común ruwaychu. (“ ¿Ñachu Diosman entregakurankiña?” nisqa recuadrota qhaway.)

3, 4. a) ¿Imawanmi Pedro compararan bautizakuyta? b) ¿Imaraykun bautizakuyta comparakun arca ruwaywan?

³ Noepa ruwasqan arcamanta rimashaspan apóstol Pedroqa niran: “Chay pasasqanqa bautismowanmi tupan. Bautismon kunanqa qankunatapas [...] salvashasunkichis”, nispa (leey 1 Pedro 3:20, 21). Arcata ruwasqanwanmi Noeqa lliuman rikuchiran Diosman entregasqa kasqanta. Chaymantapas payqa Diospa kamachisqanman jinan llapa imatapas ruwaran, chhaynapin familianqa salvasqa karan. Ichaqa, ¿imatan chaywan yachachiyta munasharan Pedro?

⁴ Noeqa arca ruwasqanwanmi rikuchiran Diospi confiasqanta. Kunan tiempopi bautizakuq runakunapas bautizakusqankuwanmi rikuchinku Diosman entregakusqankuta Cristopi iñisqankutawan. Chaymantapas Noé jinan bautizasqa runakunaqa Diospa kamachisqanta junt’ashanku. Imaynan Noeqa kay mundota unu millp’ushaqtin salvasqa karan, chhaynatan bautizasqa runakunapas kay millay kausay tukuqtin salvasqa kanqaku (Mar. 13:10; Apo. 7:9, 10). Chhaynaqa llapanchismi Diosman entregakuspa bautizakunanchis. Manan yanqapas qasiqa bautizakuyninchista achhuchinanchischu, mana chayqa paqtapas wiñay kausayta pierdesunman.

5. ¿Imakunamantan kaypi yachasun?

⁵ Nimusqanchis jina bautizakuyqa manan común ruwaychu. Chayrayku, ¿ima  ninmi Biblia bautizakuymanta? ¿Imakunatan ruwana manaraq bautizakushaspa? Wawanchismanpas juj runakunamanpas Bibliamanta yachachishanchis chayqa, ¿imaraykun allinta yachachinanchis bautizakuy allin kasqanta? Chaykunamantan kaypi yachasun.

6, 7. a) ¿Imaraykun Juan runakunata bautizaq? b) ¿Pitan Juan bautizallarantaq? ¿Imaraykun chay bautizo jujniray karan?

⁶ Bibliapi Bautismomanta rimaspaqa Juanpa bautizasqanmantan primera vezta rimashan (Mat. 3:1-6). Moisespa chaskisqan kamachikuykunata mana kasukuq runakunatan payqa bautizaq. Bautizakusqankuwanmi chay runakunaqa rikuchiqku juchankumanta arrepientesqa kasqankuta. Juanqa bautizaranmi juj runatapas, chay runaqa manan juchanmanta arrepientekunanpaqchu bautizakuran. ¿Pin karan chay runa? Payqa karan Diospa wawan Jesusmi (Mat. 3:13-17). Payqa ch’uya runataq karan chayqa manan ima juchanmantapas arrepientekunanchu karan (1 Ped. 2:22). Chhaynaqa, ¿imapaqtaq bautizakuranri? Diosman entregakuspa paypa munayninta ruwananpaqmi (Heb. 10:7).

⁷ Jesuspa discipulonkunapas runakunataqa bautizaqkun (Juan 3:22; 4:1, 2). ¿Ima razonwantaq paykunari bautizaqku? Juan jinan paykunapas juchankumanta arrepientekuqkunata bautizaqku. Jesuspa wañusqan qhepamanmi ichaqa manaña chaychu razón karan bautizakunapaq, ñan chayqa cambiapuranña.

8. a) ¿Ima nispan Jesús kamachiran discipulonkunata? b) ¿Imatan juj runa rikuchishan bautizakusqanwan?

⁸ 33 watapin Jesusqa, kausarimpusqan qhepaman 500 más runakunaman rijuriran, chaypiqa kasharanpaschá wawakunapas. Chay kutipipaschá niran: “Llapa nacionmanta runakunaman riychis, jinaspa yachachimuychis discipuloykuna kanankupaq, jinaspa Yayaq, Churiq, santo espirituq sutinpi paykunata bautizamuychis. Qankunaman llapa kamachisqaykunata paykunaman yachachimuychis kasukunankupaq”, nispa (Mat. 28:19, 20; 1 Cor. 15:6). Chaypi rikusqanchis jina Jesusqa “yachachimuychis discipuloykuna kanankupaq” nispan qatikuqninkunata kamachiran. Chaymantapas pipas Jesuspa discipulon kananpaqqa yugonta apananpaqpas bautizakunanmi karan (Mat. 11:29, 30). Bautizakunanpaqmi ichaqa Jesusta chaskinan karan Diospa churasqan autoridadta jina. Manachus chayta ruwanman karan chayqa manan atinmanchu karan bautizakuyta ni Diosta serviytapas. Chaymantapas ñaupa tiempopi Jesuspa discipulonkunaqa allintan yachaqku imaraykus bautizakunanku karan chayta, manataqmi yanqapas qasiqa achhuchiqkuchu (Hech. 2:41; 9:18; 16:14, 15, 32, 33).

9, 10. ¿Imatan yachasunman Etiopía llaqtayoq runamanta apóstol Pablomantapas?

⁹ (Leey Hechos 8:35, 36). Etiopía llaqtayoq runamanta yachasun. Chay runaqa judiomanmi tukupusqa jinan payqa juj kutin Jerusalén llaqtata risqa Diosta adoraq.  Chaymanta llaqtanman kutipushaqtinmi Felipeqa juj angelta kasukuspa chay runaman “Jesusmanta allin willakuykunata” willasqa. Chhaynapin chay runaqa yacharan Jesusqa Diospa churasqan autoridad kasqanta. Chayta yachaspa jinan payqa Bautizakapuran.

¹⁰ Juj runamantawan yachasun. Chay runaqa nishutan Jesuspa discipulonkunata qatikachaq. Payqa Judío runan karan. Ñaupaqqa Diospa llaqtanmi judiokunaqa karanku. Chaymantan ichaqa Dios paykunata saqepuran mana kasukuq kasqankurayku. Chay runan ichaqa nishuta k’askakuq judiokunaq costumbrenman. Juj kutinmi ichaqa Jesús kikin cielomantapacha payta rimapayaran. Chaymantataq Ananías yanaparan imachus pasaran chayta entiendenanpaq. Chayta entiendespa jinan chay runaqa ‘sayarispa bautizakapuran’ (Hech. 9:17, 18; Gál. 1:14). Paymi karan apóstol Pablo. Rikusqanchis jina, Jesusqa Diospa churasqan autoridad kasqanta yachaspa jinan Pabloqa bautizakapuran (leey Hechos 22:12-16).

11. a) ¿Imaraykun Bibliata estudiaqkuna bautizakushanku? b) ¿Imaynan sientekunki pipas bautizakuqta rikuspa?

¹¹ Chhaynan pasashallantaq kay tiempopi Bibliata estudiaq runakunawanpas. Paykunaqa Diosmanta cheqaq yachachikuyta yachaspankun sonqonkuq kallpachasqan kaspa, Diosman entregakuspa bautizakushanku. Sapa asambleapin Bibliata estudiaqkunaqa askha bautizakushanku. ¡May kusikunapaqmi paykunaq chay ruwasqankuqa! ¡Diosta serviq tayta-mamakunapas maytachá kusikunku wawankuq bautizakusqanta rikuspaqa! 2017 watapipas 284.000 masmi bautizakuranku. Bautizakusqankuwanmi paykunapas rikuchiranku Diosman entregakusqankuta (Hech. 13:48). Chaymantapas allintachá paykunaqa entienderanku Jesuspa discipulon kanapaqqa bautizakuna kasqanta. Ichaqa, ¿imakunatan ruwana bautizakunapaq?

12. ¿Imakunatan Biblia estudiaq ruwanan manaraq bautizakushaspa?

¹² Bibliata estudiaqkunaqa manaraq bautizakushaspan allinta reqsinanku Jehová Diosta, imatachus kay pachapaq munashan chayta, imatachus salvasqa kananchispaq ruwaran chaytawan (1 Tim. 2:3-6). Chayta yachasqanmi paytaqa yanapanqa Diospi confiananpaq, mana allin ruwaykunata saqenanpaq, Diosllata kasukunanpaqwan (Hech. 3:19). Diosqa manan munanchu mana allin kausaqkunataqa (1 Cor. 6:9, 10). Chaymantapas Biblia estudiaqqa manan faltakunanchu juñunakuykunaman; sapa kutillanmi predicaqpas lloqsinan; jujkunamanpas yachachinanmi Diosmanta. Arí, pipas Jesuspa discipulon kayta munaqqa chaykunatan ruwanan (Hech. 1:8). Pipas chaykunata ruwashanña chayqa ñan atinmaña bautizakuyta.  Ñaupaqtan ichaqa Dioswan parlaspa chaypi willakunan payman entregakuy munasqanta.

13. ¿Imatan allinta entiendechinanchis Bibliamanta yachachisqanchis runakunaman?

¹³ Wawanchistapas o pitapas Bibliamanta yachachishanchis chayqa willananchismi bautizakuymanta. Allintan entiendechinanchis Jesuspa discipulon kanapaqqa bautizakuna kasqanta. Atikusqanman jinan paykunawanqa rimananchis Diosman entregakuymanta bautizakuymanta ima. May kusikunapaqmi kanman paykuna bautizakunkuman chayqa ¿riki? Chhaynaqa rimashallasun paykunawan chaymanta.

14. ¿Imaraykun mana pitapas mat’ipayananchischu bautizakunanpaq?

¹⁴ Manan pipas estudiantetaqa mat’ipayananchu bautizakunanpaq. Manan ni tayta-mamapas ni pi hermanopas chaytaqa ruwananchu. Manan ni Diospas chaytaqa ruwanchu (1 Juan 4:8). Aswanmi allinta entiendechinanchis imaraykus Diospa amigon kanan chayta. Chhaynapin Biblia estudiaqqa pay kikillan sonqonmanta munanqa Diospa munaynin ruwayta bautizakuyta ima (2 Cor. 5:14, 15).

15, 16. a) ¿Jayk’a watayoq kashaspan bautizakuna? Explicay. b) Juj estudiante bautizakuranña juj religionpi chaypas, ¿imaraykun Testigo jina bautizakunan?

¹⁵ ¿Jayk’a watapi kashaspan bautizakuna? Manan pimanpas juj watataqa churasunmanchu. ¿Imarayku? Runakunaqa manan igualchu kanchis. Wakinqa ratollan allin iñiyniyoq kanku wakintaq unaymanta. Chaymantapas wakinqa jovenllaraq kashaspan bautizakuranku chaywanpas kunankaman tukuy sonqonkuwan Diosta  servishanku. Wakin estudiantekunan ichaqa kuraq kaspaña bautizakuranku. Paykunamanta wakinqa 100 watankupi jinañan bautizakurankupas.

¹⁶ Pipas juj religionpiña bautizakuran chaypas Testigokunawan Bibliata estudiaspaqa jujmantan bautizakunan. Jehová Diosqa cheqaq yachachikuyta allinta yachaspa bautizakuqkunallatan chaskin. Chaymi pasaran 80 watayoq señorawanpas. Payqa askha religionkunamansi jaykusqa, sapankapis bautizakusqapas. Chaysi estudiachiqnin hermanata tapusqa “¿jujmantachu bautizakunay?” nispa. Jinas chay hermanaqa imaymana textokunata qhawachisqa. Chhaynapis chay señoraqa allinta entiendesqa imatas Biblia yachachin chayta. Jinas Testigo jina bautizakapusqa (leey Hechos 19:3-5).

17. ¿Imapin allinta piensanan bautizakuq runa?

¹⁷ Bautizakuyqa ancha kusikunapaqmi, manan chay p’unchay jinaqa ima p’unchaypas kanmanchu. Ichaqa, bautizakuq runaqa allintan piensanan imaynatas Diosman entregakusqanwan junt’anqa chaypi. Yachasqanchis jina pipas bautizakuspa Jesusta qatikuqqa ‘manañan paypa munayninta ruwananpaqchu kausan, aswanpas Cristollapaqñan kausan’ (2 Cor. 5:15; Mat. 16:24).

18. ¿Imakunamantan yachasun qatimuq estudiopi?

¹⁸ Kaypi yachasqanchis jina, bautizakuyqa manan común ruwaychu. Chaychá qallariypi rimamusqanchis Mariaq mamanpas imaymanakunapi piensaran. Wawayki kan chayqa yaqapaschá nishanki: “¿Listoñachu kashan bautizakunanpaq? ¿Allintañachu yachan imas Diospa munaynin chayta? ¿Imallatapas estudiaspa llank’anataraq maskhakunman chayri? Bautizakunqaña chaypas, ¿ima juchamanpas urmanqa chayri?”, nispa. Chaykunamantan qatimuq estudiopi yachasunchis. Yachallasuntaqmi imaynatas tayta-mamakuna allin yuyaywan bautizakuyta qhawarinanku chaytapas.