LLAPANCHISPAS munanchismi jujkuna allin runapaq qhawariwananchista, ichaqa manan facilchu. ¿Imarayku? Runakuna ‘allin kaqta mana munakusqankurayku’ (2 Tim. 3:3). Munasqankuman jinataqmi paykunaqa mana allintan “allinmi” ninku, allintataq “manan allinchu” ninku (Is. 5:20). Chaymantapas juchayoq kasqanchis imayna uywasqa kasqanchispas manan yanapawanchischu. Unayña Diosta serviq hermanan niran: “Noqaqa manan allin runapaqchu qhawarikuni”, nispa. Wakinqa chay hermana jinapaschá sientekunchis.

Allin sonqoyoq kayqa santo espirituq rurunmi. Chaymi juchayoq runaña kashaspapas, mana kasukuq runakuna ukhupiña kausashaspapas Diospa yanapayninwan allin sonqoyoq kayta atisunman. ¿Imaynan allin sonqoyoq runa? ¿Imaynatan allin sonqoyoq kasqanchista rikuchisunman? Qatimuqpi chaymanta yachasunchis.

Allin sonqoyoq runaqa allin kaqtan ruwan. Chay runaq sonqonpiqa manan ima mana allinpas kanchu. Allin sonqoyoq runaqa sapa kutillanmi jujkunata yanapan, makillataqmi kashan chayta ruwananpaq.

Askha runakunan familianpaq amigonkunapaqpas allinkunata ruwanku. Diospa nisqanman jina allin sonqoyoq runan ichaqa mana chayllatachu ruwan. Jinaspapas noqallanchismantaqa manan atisunmanchu allin sonqoyoq kayta. Biblian nin: “Kay pachapiqa manan allin kaqllatapuni ruwaq runaqa kanchu, mana jayk’aq juchallikuq chanin runapas manan kanchu”, nispa (Ecl. 7:20). Apóstol Pablopas niranmi: “Noqaqa yachanin runalla kasqayta, aychaypiqa manan ima allinpas kanchu”, nispa (Rom. 7:18). Chaymi necesitanchis Diospa yanapayninta. Qatimuqpi yachasun Diosninchis allin sonqoyoq kasqanta.

Jehová Diosllan nin imachus allin kasqanta. Salmos libropi nin: “Qanqa allinmi kanki, allintataq ruwankipas, unanchasqa simiykikunata yachachiway”, nispa (Sal. 119:68). Chay textopi nisqanta qhawarisun.

Jehová Diosqa allinmi.  Payqa tukuypin rikuchin allin sonqoyoq kasqanta. Moisesmanmi niran: ‘Noqan tukuy allin-kayniyta rikuchisqayki ñaupaqeykipi’, nispa. Diospa qhapaq atiynin Moisespa ñaupaqenta pasashaqtinmi, payqa uyariran: “¡Señor Diosmi kani! ¡Señor Diosmi kani! ¡Khuyapayakuq sumaq sonqo Diosmi kani! Manan usqhaylla phiñakuqchu kani, tukuy tiempo munakuqmi cheqaqtaqmi kani. Waranqa miraykaman tukuy tiempo munakushallanipuni, juchallikusqatapas, mana kasukusqatapas, juchatapas pampachanin, juchallikuqtaqa manapunin jinallatachu qhawani”, nispa (Éx. 33:19; 34:6, 7). Rikusqanchis jina Jehová Diosqa allin sonqoyoqpunin. Jesús kay allpapi kashaspaqa allin sonqoyoqmi karan. Chaywanpas niranmi: “Manan pipas allinqa kanchu, aswanpas Diosllan”, nispa (Luc. 18:19).

Jehová Diosqa allintan ruwan. Tukuy ruwasqanpin rikuchin allin sonqoyoq kasqanta. Bibliapin  nin: “Allinmi Señor Diosqa llapapaq, khuyapayaspan llapa ruwasqanta qhawashan”, nispa (Sal. 145:9). Chaymi llapa runaman kausayta qowanchis imachus necesitasqanchistapas (Hech. 14:17). Allin sonqoyoq kasqanraykun juchanchista perdonawanchis. Salmo qelqaqmi niran: “Señor Diosníy, qanqa sumaqmi, jucha pampachaykuqmi kanki”, nispa (Sal. 86:5). Jehová Diosqa “chanin puriqkunataqa munakunmi jatunchanmi, paykunamanqa ima allin kaqtapas qollanpunin” (Sal. 84:11).

Diosqa payman rijch’akuqtan kamawaranchis chaymi atisunman allin sonqoyoq kayta allinkuna ruwaytapas (Gén. 1:27). Chaymi Bibliapi llapa cristianokunata niwanchis: “Allin kaq ruwayta yachaqaychis”, nispa (Is. 1:17). Qhawarisunchis allin sonqoyoq kanapaq kinsa yanapaykunata.

Ñaupaq kaq, Diosmantan santo espiritunta mañakunanchis, chaymi yanapawasun allin sonqoyoq kanapaq (Gál. 5:22). Chhaynapin allin kaqta munakusun, mana allin kaqtataq cheqnikusun (Rom. 12:9). Jinaspapas Jehová Diosqa yanapawasunmi ‘allin ruwaykunapi allin rimaypi qaqata sayananchispaq’ (2 Tes. 2:16, 17).

Iskay kaq, Bibliatan leenanchis. Bibliata leesun chayqa Jehová Diosmi entiendechiwasun imachus allin kasqanta, yanapawasuntaq ‘tukuy allin ruwaykunapaq allin-allin preparasqa kananchispaq’ (Prov. 2:9; 2 Tim. 3:17). Bibliata leespa chay leesqanchispi piensaspan yachanchis Diosmanta munayninmantawan, chaytaq vidanchispi yanapawasun (Luc. 6:45; Efes. 5:9).

Kinsa kaq, ‘allin ruwaqkunaq ejemplontan qatikunanchis’ (3 Juan 11). Bibliapin allin ejemplokunata tarinchis. Jehová Dioswan Jesuswanmi aswan allin ejemplokuna kanku. Kallantaqmi juj ejemplokunapas, paykunamantan kashan Tabita Bernabepiwan (Hech. 9:36; 11:22-24). Paykunamanta estudiaspan tapukunanchis: “¿Imakunatan ruwaranku jujkunata yanapanankupaq? ¿Ima bendicionkunatan chaskiranku?”, nispa. Jinaspa piensananchis imaynatas noqanchispas familianchista hermanonchiskunatapas yanapasunman chaypi.

Chaymantapas qhawarisunmanmi kunan tiempopi allin kaqta ruwaqkunata. Paykunamantan kashanku iñiq t’aqapi umalliqkuna, paykunaqa ‘allin kaqtan munakunku’, kallpachakunkutaqmi hermanokunata yanapanankupaq. Kallantaqmi rimaspa ruwaspa “allin kaqkunata yachachiq” hermanakunapas (Tito 1:8; 2:3). Roslyn  hermananchismi nin: “Amigaymi tukuy atisqanta ruwan iñiq t’aqapi hermanokunata yanapananpaq kallpachananpaqpas. Atisqanman jinan regalokunata qon otaq imallatapas ruwaspa hermanokunata yanapan, payqa allin sonqoyoqmi”, nispa.

Jehová Diosmi serviqninkunata nin: “Allin kaqta maskhaychis”, nispa (Amós 5:14). Chayta ruwasun chayqa, astawanmi allin kaqta munakusun, kallpachakusuntaq allin kaqta ruwananchispaq.

Allin sonqoyoq runa kanapaqqa manan jatun regalokunataraqchu qonanchis. Chayta entiendenapaq juj ejemplota qhawarisun: Juj planta wiñananpaqqa manan juj kutillatachu askha unuta jich’anchis, aswanpas sapa kutin necesitasqanman jina jich’anchis. Chay jinallataqmi sapa kuti imallatapas jujkunapaq ruwaspa rikuchinchis allin sonqoyoq kasqanchista.

Biblian kallpachawanchis allin kaqta ruwanapaq “preparasqa” “listo” kashananchista (2 Tim. 2:21; Tito 3:1). Chaypaqqa jujkuna imaynapi tarikusqankutan reparananchis, chhaynapin allinninkupaq kaqta ruwapusun kallpachasun ima (Rom. 15:2). Yaqapaschá imallatapas qosunman (Prov. 3:27). Wasinchisman invitasunman juj rato paykunawan kananchispaq otaq imallatapas paykunawan mijusunman. Sichus pipas onqosqa kashan chayqa, juj tarjetata apachisunman, telefonopi wajasunman, otaq visitasunman. Rikusqanchis jina imaymanatan ruwasunman jujkunata kallpachanapaq (Efes. 4:29).

Jehová Dios jinan llapa runapaq allin kaqta ruwananchis, chaymi mana pimanpas sayapakunanchischu. Chhayna kasqanchista astawanqa rikuchinchis llapa runakunaman predicaspa. Jesuspa nisqanman jina cheqnikuwaqninchis runakunapaqpas allin kaqta ruwapunanchis (Luc. 6:27). Jujkunapaq allin kaqta ruwasqanchismantaqa manan jayk’aqpas pesapakusunchu. Chay “contraqa manan ima kamachikuypas kanchu” (Gál. 5:22, 23). Mana allinta tratawaqninchis runakunapaq allin kaqta ruwapusun chayqa, Jehová Diosninchistan jatunchasun. Chaymantapas yaqapaschá chayta ruwasqanchisrayku chay runakunamanta wakinqa Diosmanta yachayta munankuman (1 Ped. 3:16, 17).

“Allin runaqa” askha bendicionkunatan chaskin (Prov. 14:14). ¿Mayqenkunan chay bendicionkuna? Sichus runamasinchista allinta tratasun chayqa, paykunapas kaqllatataqmi tratawasun (Prov. 14:22). Manaña chhaynatachu tratawasunman chaypas, allinta tratasqanchisraykun chay runakunaq sonqonqa llamp’uyapunman (Rom. 12:20).

Mana allin ruwaykunata saqespa allin kaqta ruwasqanchisqa allinninchispaqmi. Chaymi Nancywan pasaran, paymi nin: “Diosmanta manaraq yachashaqtiyqa, qhelli kausayniyoq mana respetakuq qellan karani. Bibliapin ichaqa yacharani imayna kausananchis kasqanta, chayman jina ruwaspan kusisqa kashani. Kunanqa sumaq kausayniyoqmi kani”, nispa.

Jehová Diosta kusichinanchispaqmi astawanqa allin sonqoyoq kananchis. Payqa rikumushanmi allin kaq ruwasqanchista piensasqanchistapas (Efes. 6:7, 8). Jinaspapas bendeciwasunmi. Biblian nin: “Allin runataqa Señor Diosmi sumaqta qhawarin”, nispa (Prov. 12:2). Chhaynaqa kallpachakushallasun allin sonqoyoq kanapaq. Jehová Diosmi nin: “Allin kaqta ruwaqkunapaq kachun jatunchaypas, respetaypas, thaj kaypas”, nispa (Rom. 2:10).