1. ¿Imatan juj runa ruwanan manaraq wasita sayarichishaspa?

JUJ runan wasita sayarichinanpaq piensaykun. Paymi ichaqa mana kaqpachachu phawan materialkunata rantiq. Aswanmi ñaupaqtaqa allintaraq tanteakun jayk’atachus gastananta. Chayta ruwaspallan yachanqa qolqen aypanqachus manachus chayta, jinaspa wasita tukunankama ruwayta atinqa.

2. Lucas 14:27-30 textopi nisqanman jina, ¿imakunapin piensanayki manaraq bautizakushaspa?

² Yaqapaschá bautizakuyta munashanki Jehová Diosta munakusqaykirayku. Chhayna kaqtinqa wasita sayarichiyta munaq runa jinan allinta tanteakunayki. Chaytan señorninchis Jesús Lucas 14:27-30 (leey) textopi niran. Chay kutipin Jesusqa rimaran discipulon kayta munaqqa imatapas aguantananpaq listo kashananta imaymanata saqenanpaqpas (Luc. 9:23-26; 12:51-53). Chaymi manaraq bautizakushaspa allinta tanteakunayki listochus kashanki chaykunata ruwanaykipaq manachus chayta. Jinan tukuy sonqowan Jehová Diosta servinki bautizakusqayki qhepaman.

3. ¿Imamantan kaypi yachasun?

³ Bautizakuqqa imaymanapin tarikunqa imaymanatataqmi saqenanpas kanqa. Chhaynaña kaqtinpas bautizakuspaqa askha bendicionkunatan chaskinqa kunanpas jamuq tiempopipas. Kaypin yachasun bautizakuymanta importante tapuykunata. Chaykunamanta yachaymi yanapasunki listoñachus kashanki bautizakunaykipaq manachus chayta.

4. a) ¿Imataq Diosman prometekuyri? b) Mateo 16:24 textopi nisqanman jina, ¿imaynatan kausanku kikinkuta negakuqkuna?

⁴ ¿Imataq Diosman prometekuyri? Chaytaqa ruwanchis Jehová Diosmanta mañakuspan, chaypin sonqomanta payta ninchis: “Kunanmantaqa qanllata servinaypaqmi kausasaq”, nispa. Chaytaqa ninanchis manaraq bautizakushaspan. Chayta ruwaspan kikinchista negakushanchis (leey Mateo 16:24). Chaymantapachan Jehová Diospaña kanchis, chayqa may allinpunin (Rom. 14:8). Diosman prometekuspaqa payta servinallanchispaqñan kausanchis, manañan munasqanchista ruwananchispaqchu. Chay promesa ruwasqaykitaqa Jehová Diosmi rikumushan. Payqa manan obligawanchischu chayta ruwananchispaq, prometekusqanchis qhepamanmi ichaqa munan rimasqanchiswan junt’ananchista (Sal. 116:12, 14).

5. ¿Imapin jujniray Diosman prometekuy bautizakuymanta?

⁵ ¿Imapin jujniray Diosman prometekuy bautizakuymanta? Diosmanqa sapallanchis kashaspan prometekunchis. Runakunaq qayllanpin ichaqa bautizakunchis, chaytaqa astawanqa ruwakun asambleakunapin. Bautizakuspan jujkunaman rikuchishanki Jehová Diosta servinaykipaq prometekusqaykita. * Chayta ruwaspan jujkunaman willashanki tukuy sonqoykiwan, tukuy almaykiwan, tukuy yuyayniykiwan, tukuy kallpaykipiwan Jehová Diosta munakusqaykita, wiñaypaq serviy munasqaykitapas (Mar. 12:30).

6, 7. 1 Pedro 3:18-22 textopi nisqanman jina, ¿imaraykun bautizakunanchispuni?

⁶ ¿Bautizakunanchispunichu? Chayta yachananchispaq 1 Pedro 3:18-22 (leey) textoq nisqanta qhawarisun. Arcata ruwaspan Noeqa runakunaman rikuchiran Diospi iñisqanta, chay jinallataqmi bautizakuspayki jujkunaman rikuchishanki Diosta servinaykipaq prometekusqaykita. Jinaspapas apóstol Pedron niran: ‘Bautismon salvasunkichis’, nispa. Bautizakusqanchis qhepamanqa kausayninchispin rikuchinanchis Jesuspi iñisqanchista, noqanchisrayku wañusqanta, kausarimpuspa janaq pachaman ripusqanta, Diospa paña ladonpi tiyashasqantapas, chayta ruwaspan salvakusun.

⁷ Chaymantapas bautizakuspan ‘allin concienciayoq’ kapunchis. ¿Imarayku? Diosman prometekuspa bautizakuspan Diospa sonqonpaq jinaña kausanchis. Jinaspapas juchanchismantan pesapakunchis, iñinchistaq Jesuspa wañusqanpi, chaymi Diosqa juchanchismanta perdonawanchis. Chaykunata ruwasqanchisraykun Diospa ñaupaqenpi allin concienciayoq kapunchis.

8. ¿Imaraykun astawanqa bautizakunayki?

⁸ ¿Imaraykun astawanqa bautizakunayki? Bibliata estudiaspan yacharanki Jehová Dios imaynachus kasqanta, imakuna ruwasqantapas. Chaykuna yachasqaykin sonqoykiman chayaran, jinan Jehová Diosta anchata munakuranki. Chay jinaqa Jehová Diosta munakusqaykiraykun astawanqa bautizakunayki.

9. Mateo 28:19, 20 textopi nisqanman jina, ¿imatan ruwanayki Yayaq, Churiq, santo espirituq sutinpi bautizakunaykipaq?

⁹ Chaymantapas bautizakunaykipaqqa Bibliaq yachachisqanpin iñinayki. Yuyarisun  imatachus Jesús discipulonkunaman kamachisqanta (leey Mateo 28:19, 20). Jesusmi niran: “Yayaq, Churiq, santo espirituq sutinpi paykunata bautizamuychis”, nispa. Chaypaqqa sonqomantan creenayki imatachus Biblia yachachin Jehová Diosmanta, churin Jesusmanta, santo espiritumantawan. Chaykunamanta yachayqa allintan vidanchispi yanapawasun (Heb. 4:12). Wakinta yuyarisun.

10, 11. ¿Yayanchismanta ima yachasqaykitan sonqoykipi jap’inayki?

¹⁰ ¿Yuyashankichu Yayanchismanta cheqaqta yachaspa vidayki cambiasqanta? Yacharankin sutin Jehová kasqanta, ‘teqsimuyuntinpi ancha jatun Dios’ kasqanta, sapallanpuni cheqaq Dios kasqantapas (Sal. 83:18; Is. 37:16; Rom. 10:13). Paymi kamawaranchis, paytaqmi salvaqninchispas (Sal. 3:8; 36:9). Churintan kachamuran juchamanta wañuymantawan salvawananchispaq, imaymanatataq ruwaranña wiñay kausayta suyakunanchispaq (Juan 17:3). Diosman prometekuspa bautizakuspan jujkunaman rikuchinki Jehová Diospa testigon kasqaykita (Is. 43:10-12). Chayta ruwaspan Diosta serviqkunaman juñukushanki, paykunaqa kusisqan Diospa sutinta apanku jujkunamanpas reqsichinku (Sal. 86:12).

¹¹ Anchatan kusikunchis Yayanchismanta Bibliaq yachachisqanta yachaspa. Sichus chay yachasqaykita sonqoykipi jap’inki chayqa, munankin Jehová Diosta servinaykipaq prometekuyta bautizakuytapas.

12, 13. ¿Diospa churinmanta ima yachasqaykitan sonqoykipi jap’inayki?

¹² ¿Yuyashankichu Churimanta cheqaqta yachaspa kusikusqaykita? Yacharankin Diosman qatiq kasqanta. Paymi noqanchisrayku wañuran. Kausayninchispin rikuchinanchis Jesús noqanchisrayku wañusqanpi iñisqanchista, chayta ruwaqtinchismi Diosqa juchanchismanta perdonawasun, munakuwasun, wiñay kausaytapas qowasun (Juan 3:16). Jesusqa uma sacerdotenchismi, payqa yanapawasunmi Diosman achhuykunanchispaq salvasqa kananchispaqpas (Heb. 4:15; 7:24, 25). Diospa gobiernonpiqa Jesusmi rey kashan, paywanmi Jehová Diosqa sutinta ch’uyanchanqa, mana allin kausayta chinkachinqa, sumaq kausaytapas apamunqa (Mat. 6:9, 10; Apo. 11:15). Jinaspapas Jesuspa ruwasqantan qatikunanchis (1 Ped. 2:21). Payqa Diospa munayninta ruwananpaqmi kausaran, chaytan noqanchispas ruwananchis (Juan 4:34).

¹³ Jesusmanta Bibliaq yachachisqanta sonqoykipi jap’inki chayqa, Jesustan astawan munakunki. Jinaspa pay jina Diospa munayninta ruwanaykipaq Diosman prometekunki bautizakunkipas.

14, 15. ¿Santo espiritumanta ima yachasqaykitan sonqoykipi jap’inayki?

¹⁴ ¿Imaynatan yanaparasunki santo espiritumanta cheqaqta yachasqayki? Yacharankin santo espirituqa mana juj dioschu kasqanta, aswanpas Diospa kallpan kasqanta. Diosmi santo espiritunwan runakunata yuyaycharan Bibliata qelqanankupaq, Diospa espiritullantaqmi yanapawanchis Bibliaq yachachisqanta entiendenanchispaq kasukunanchispaqpas (Juan 14:26; 2 Ped. 1:21). Santo espiritunta chaskispan ‘runakunaq mana aypay atisqan atiyniyoq’ kanchis (2 Cor. 4:7). Chaymi kallpanchis kan Diosmanta willananchispaq, juchaman  ama urmananchispaq, ama pisikallpayananchispaq, imatapas aguantananchispaq. Yanapawanchistaq allin runa kananchispaq (Gál. 5:22). Diosqa llapa mañakuqninkunamanmi espiritunta qon (Luc. 11:13).

¹⁵ Diospa espiritunmi yanapawasun Jehová Diosta servinanchispaq, maytan kusikunchis chayta yachaspa. Santo espiritumanta yachasqaykita sonqoykipi jap’inki chayqa, Diosman prometekuspan bautizakunki.

16. ¿Imatan kaykama yacharunchis?

¹⁶ Diosman prometekuypas bautizakuypas ancha importante ruwaymi. Liston kashanayki imatapas aguantanaykipaq. Chhaynaña kaqtinpas bautizakuspaqa askha bendicionkunatan chaskinki. Chaymi yanapasunki salvakunaykipaq, Diospa ñaupaqenpi allin concienciayoq kanaykipaqpas. Jehová Diosta munakusqaykiraykun astawanqa bautizakunayki. Sonqoykipitaq jap’inayki Yayamanta, Churimanta, santo espiritumantawan yachasqaykita. Kaykama yachaspa, qhawarikusqaykiman jina, ¿listoñachu kashawaq bautizakunaykipaq?

17. ¿Imakunatan ruwashanaykiña manaraq bautizakushaspa?

¹⁷ Sichus bautizakunaykipaq jinaña qhawarikushanki chayqa imaymanatañachá ruwaranki Diosman qayllaykunaypipaq. * Bibliata estudiaspan Jehová Diosmanta Jesusmantawan yacharanki, iñiyniykitaq yapakuran (Heb. 11:6). Manataq iskayankichu Diospa promesankunamanta, Jesuspa wañusqanrayku juchamanta wañuymantawan salvasqa kanaykipipas. Juchaykimanta pesapakuspachá Diosmanta perdonta mañakuranki. Mana allinkuna ruwasqaykita saqespataq Diospa munayninta ruwaranki (Hech. 3:19). Diosmanta yachasqaykitachá jujkunaman willayta munanki, jinaspa hermanokunawan kuskaña Diosmanta willaq purishanki (Mat. 24:14). Jehová Diosqa kusisqan kashan chaykunata ruwasqaykimanta (Prov. 27:11).

18. ¿Imatawanmi ruwanayki manaraq bautizakushaspa?

¹⁸ Ñaupaqpi yachasqanchis jina manaraq bautizakushaspan Diosman prometekunayki servinaykipaq. Chaytaqa ruwanayki sapallaykipi mañakushaspan, chaypin Diosta ninki: “Munayniykita ruwanaypaqmi kausasaq”, nispa (1 Ped. 4:2). Chay qhepamanmi umallikunaq llank’ayninta yanapaq umalliqman willanayki bautizakuy munasqaykita. Paymi juj umalliqkunata ninqa qanwan rimanankupaq. Chay umalliqkunaqa reqsisunkikuñan munakusunkikutaqmi, chaymi mana manchakunaykichu paykunawan  rimaytaqa. Paykunan Bibliamanta imachus yachasqaykita tapusunkiku, entiendeshankichus manachus chayta yachanankupaq. Jinaspa yanapasunkiku imarayku bautizakuy munasqaykita yachanaykipaq. Sichus reparanqaku bautizakunaykipaq listo kashasqaykita chayqa, willasunkikun jamuq asambleapi bautizakunaykipaq.

19, 20. ¿Imatan bautizakusqayki qhepaman ruwanayki? ¿Iman yanapasunki chayta ruwanaykipaq?

¹⁹ ¿Imatan ruwanayki bautizakusqayki qhepaman? * Jehová Diosqa munanmi payta servinaykipaq prometekusqaykita junt’anaykita. Chaymi bautizakusqayki qhepaman prometekusqaykiman jinapuni kausanayki. ¿Iman chaypaq yanapasunki?

²⁰ Iñiq t’aqaykipi juñukushallay. Bautizakuspaqa Diospa llaqtanpiñan kashanki (1 Ped. 2:17). Iñiq t’aqapi hermanokunaqa familiayki jinan kanku. Sichus juñunakuykunaman mana faltayta rinki chayqa paykunawanmi amigontin kapunki. Sapa p’unchaymi Bibliata leenayki imachus yachasqaykipitaq piensanayki (Sal. 1:1, 2). Chayta ruwallaqtiykin imachus yachasqayki sonqoykipi kanqa. Chaymantapas Jesuspa nisqan jina Diosmantan ‘mañakushanallayki’ (Mat. 26:41). Sonqomanta mañakuspaqa Diostan astawan munakunki. ‘Diospa gobiernontataq ñaupaqta maskhashanallayki’ (Mat. 6:33). Chaypaqqa Diosmanta willaytan ñaupaqman churanayki. Sichus sapa kutilla Diosmanta willanki, allin iñiyniyoqtaq kankipas chayqa jujkunatan yanapawaq wiñay kausayta suyakunankupaq (1 Tim. 4:16).

21. ¿Ima bendicionkunatan chaskinki bautizakuspa?

²¹ Diosman prometekuypas bautizakuypas ancha importante ruwaymi. Bautizakuspaqa sasachakuykunapin tarikunki, ichaqa askha bendicionkunatan chaskinki. Sasachakuykunapi tarikusqanchisqa “juj tiempollan, aguantay atiyllataqmi kanpas” (2 Cor. 4:17). Bautizakuspan ichaqa kusisqa kausanki, jamuq tiempopitaq ‘cheqaq kausayta chaskinki’ (1 Tim. 6:19). Chay jinaqa allinta piensaykuy, Jehová Diosmanta mañakuspataq tapukuy: “¿Listoñachu kashani bautizakunaypaq?”, nispa.