1, 2. a) ¿Pikunapin ñaupaqta junt’akuran Mateo 24:12 textopi willasqan? b) ¿Imaynatan ñaupa tiempo cristianokuna rikuchiranku munakuyninku mana chiriyapusqanta? (Kay paginapi dibujota qhaway.)

JESUSMI willaran kay ‘tukukuy p’unchaykunapi’ imachus pasananta; niranmi: “Yaqa llapa runakunaq munakuyninmi chiriyapunqa”, nispa (Mat. 24:3, 12) (qhaway “Astawan yachanapaq” nisqa recuadrota). Jesuspa chay willasqanqa judío runakunawanmi ñaupaqtaqa junt’akuran. Paykunaqa Diospa llaqtanña karanku chaypas manan Diostaqa ñaupaqpi jinañachu munakuranku.

² Chay tiempopi cristianokunan ichaqa yaqa llapanku mana chhaynachu karanku, aswanmi paykunaqa “Cristo Jesusmanta allin willakuykunata” willaspa kasharanku. Chaymantapas tukuy ima ruwasqankupin rikuchisharanku Diosta munakusqankuta, iñiqmasinkuta munakusqankuta, runamasinkuta munakusqankutawan (Hech. 2:44-47; 5:42). Wakin cristianokunan ichaqa mana ñaupaqpi jinañachu Diosta munakusharanku.

3. ¿Imaraykun Éfeso llaqtapi cristianokunaq munakuynin chiriyapunman karan?

 ³ Éfeso llaqtapi cristianokunaq munakuyninmi chiriyapusharan, chaymi Jesusqa paykunata niran: “Munakuyniykiqa manañan qallariypi jinañachu kashan”, nispa (Apo. 2:4). ¿Imaraykun paykunawan chay pasanman karan? Yaqapaschá Éfeso llaqtapi runakunaq imaynachus kausasqanwan samaykachikuranku (Efes. 2:2, 3). Chay llaqtaqa kunan tiempopi wakin llaqtakuna jinan qhapaq llaqta karan. Chaymantapas chay llaqtapiqa nishun millay kausay karan. Runakunapas qolqe maskhaypi, aychankuta kusirichiypi imallan puriqku. Manan reparaqkupaschu runamasinkutapas ni Diostapas.

4. a) ¿Imaraykun munakuy chiriyapushan? b) ¿Imakunamantan kaypi yachasun?

⁴ Kay tiempopipas munakuyqa chiriyapushanmi Jesuspa nisqanman jina. Runakunaqa manañan Diostaqa munakunkuchu ni respetankupaschu. Diospi confianankumantaqa runakunaq jatarichisqan organizacionkunapin confianku. Chaymi munakuyninkuqa astawanraq chiriyapushan. Chhaynataq kay mundo kashan chayqa, yaqapaschá wakin cristianokunaq munakuyninpas Éfeso llaqtapi cristianokunaq munakuynin jina chiriyapushanman. Chaymi kunan yachasun imatas ruwasunman, Jehová Diosta, cheqaq kaqta, iñiqmasinchiskunatapas munakuyninchis ama chiriyapunanpaq chayta.

5. ¿Imaraykun Jehová Diosta munakunanchis?

⁵ ¿Pitan imamantapas masta munakunanchis? Jesusmi niran: “Jehová Diosniykitan munakunki tukuy sonqoykiwan, tukuy almaykiwan, tukuy yuyayniykipiwan. Chaymi ñaupaq kaq aswan jatun kamachikuyqa”, nispa (Mat. 22:37, 38). Jehová Diosta munakusun chayqa tukuy imapin payta kasukusun, sasachakuytan aguantasun, cheqnikusunmi mana allin ruwaykunatapas (leey Salmos 97:10). Satanaswan kay pacha runakunawanmi ichaqa mana munankuchu Diosta munakunanchista.

6. ¿Imakunapin tarikushanku Diosta mana munakuq runakuna?

⁶ Kay tiempo runakunaqa Diosta munakunankumantaqa ‘paykuna kikinkutan munakunku’ (2 Tim. 3:2). Chaymantapas ‘aychaq munapayayninkuna ruwaypi, ñawiq rikusqan munapayaykuna ruwaypi iman’ mastaqa kashanku (1 Juan 2:16). Chaymi noqanchisqa chaykunamanta cuidakunanchis. Apóstol Pabloq nisqan jina, aychaq munaynin ruwaymanchus yuyayta churasunman chayqa wañuymanmi chayasunman. Ichaqa, ¿imaynapin chay kanman? Pablon niran: “Aychaq munayninman yuyayta churaqkunaqa Diospa enemigonmi kapunku”, nispa (Rom. 8:6, 7). Qolqe maskhaypi, aychankuq munaynin qhelli ruwaykunapi puriqkunaqa imaymana ñak’ariykunapin tarikushanku (1 Cor. 6:18; 1 Tim. 6:9, 10).

7. ¿Imakunan Dios munakuyninchista pisiyachinman?

⁷ Wakin ateo nisqakuna, evolución nisqapi creeq runakunapas manan munankuchu runakuna Diospi creenankuta. Paykunaq nisqankuman jinaqa sonsokunallas Diospiqa creenku. Chaymi imaymana cuentokunata runakunaman yachachinku. Wakin runakunaqa kay pachata kamaq  Diosta respetanankutaqa “científico” nisqa runakunatan masta respetanku (Rom. 1:25). Sichus noqanchispas chay runakuna jina piensasunman chayqa manapaschá tukuy sonqochu Diosta munakusunman (Heb. 3:12).

8. a) ¿Imakunan kallpanchista pisiyachishanman? b) ¿Imaynatan kallpachawasunman Salmos 136:23 texto?

⁸ Satanaspa gobiernasqan millay pachapiqa imaymanakunan runakunata llakichiwashanchis (1 Juan 5:19). Wakinqa yaqapaschá onqosqa kashanchis; manapaschá qolqechanchispas aypawanchischu; nishu kuraqñapaschá kashanchis. Wakinpaqqa manapaschá ima ruwasqanchispas munasqanchisman jinachu lloqsiwanchis; ñaupaqpi imapas ruwasqanchisraykupaschá sonqonchis nanawashanchis. Chaykunaraykupaschá munakuyninchis pisiyapushan. Ichaqa manan jayk’aqpas Diosmantaqa t’aqakunanchischu, manapunin payqa saqewasunchu. Salmos 136:23 textopin paymanta nishan: “Paymi llakiq ñit’isqan kashaqtinchis yuyarikuwaranchis, khuyapayakuyninqa wiñaypaqmi”, nispa. Chhaynaqa confiasun papanchis Jehová Diospi, payqa wajarikuqtinchispas uyarimuwasunmi (Sal. 116:1; 136:24-26).

9. ¿Iman apóstol Pablota yanaparan Diosta munakushanallanpaq?

⁹ Apóstol Pabloqa imaynatachus Dios yanapashan chaypin mastaqa piensaq, chaymi niran: “Jehová Diosmi yanapawaqniyqa, manan manchakusaqchu. ¿Imanawanmantaq runari?”, nispa (Heb. 13:6). Chaypi rikusqanchis jina Pabloqa ‘tukuy imapi sonqochakuq Diospin’ confiaran (2 Cor. 1:3, 4). Chaymi imaymana llakipiña tarikuran chaypas manapuni pisiparanchu. Carcelpiña kashaspapas cartakunatan apachiran iñiqmasikunata kallpachananpaq (Efes. 4:1; Filip. 1:7; Filem. 1). Chhaynapin rikuchiran Diosta mayta munakusqanta. ¿Imaynatan qatikusunman Pabloq ejemplonta?

10. ¿Imatan ruwananchis Jehová Diosta munakuyninchis mana chiriyapunanpaq?

 ¹⁰ Apóstol Pablon cristianokunata niran: “Tukuy tiempo Diosmantaqa mañakushallaychispuni”, nispa (1 Tes. 5:17; Rom. 12:12). Chaytan noqanchispas ruwananchis (Sal. 86:3). Sonqonchispi tukuy ima piensasqanchista, tukuy ima llakikuyninchistan Diosman willakunanchis (Sal. 65:2). Chayta ruwasun chayqa allin amigontinmi paywan kasun. Ichaqa allintan reparakunanchis imaynatas mañakusqanchisman Dios kutichimuwashanchis chayta. Chayta reparakusun chayqa allintan yachasun ‘Diosqa llapa wajakuqninkunaq sispallanpi [otaq cercallanpi] kasqanta’ chhaynapin astawan payta munakusun (Sal. 145:18). Chhaynaqa imaña kaqtinpas tukuy sonqo Diospi confiasun, chayta ruwasun chayqa manan jayk’aqpas munakuyninchis chiriyapunqachu.

11, 12. ¿Imatan ruwananchis cheqaq yachachikuykunata astawan munakunanchispaq?

¹¹ Diosta serviqkunaqa munakunanchismi Diospa siminta, chaypin kashan cheqaq yachachikuyqa. Jesús kikinmi Diosta niran: “Simiykin cheqaq kaqqa”, nispa (Juan 17:17). Chaymi noqanchisqa Diospa palabranta allinta estudiananchis chhaynapin allinta yachasun imatas Dios munan chayta (Col. 1:10). Ichaqa manan yachayllachu-yachananchis aswanmi imachus leesqanchispi sapa p’unchay piensananchis, chaytan nishan Salmos 119 capitulopi (leey Salmos 119:97-100). Diospa palabranpi piensashallasun chayman jinataq kausasun chayqa, astawanmi cheqaq yachachikuykunata munakusunchis.

¹² Salmos 119 capitulota qelqaqmi nillarantaq: “Simiykikunaqa ancha misk’in [sumaqmi] simiypaq, miel misk’imantapas aswan misk’in”, nispa (Sal. 119:103). Diospa llaqtanpi Bibliamanta imaymana qelqakuna ruwakamusqanqa sumaq mijuna jinan. Imaynan sumaq mijunata mijuspaqa misk’itaraq mijunchis, chhaynatan chay leesqanchis qelqakunapipas allinta piensananchis, sumaq mijunatapas mijushasunman jinataraq. Chhaynapin ‘sumaq simikunata tarisunchis’ chaytaq yanapawasun jujkunata yanapananchispaq (Ecl. 12:10).

13. ¿Iman Jeremiasta yanaparan Diospa palabranta munakunanpaq? ¿Imata ruwananpaqmi chay munakusqan yanaparan?

¹³ Jeremiasqa anchatan munakuq Diospa palabranta, chaymi niran: “Simiykikunatan llapachallanta uyarirani. Chaykunan sonqoyman chayaqpuni karan, anchatapunin kusikurani. Tukuy-atiyniyoq Señor Diosníy, qanpa wawaykin kani”, nispa (Jer. 15:16). Chaypi rikusqanchis jina Jeremiasqa munakuqpunin Diospa simintaqa, chaypin payqa piensaq. Chaymi tukuy sonqo Diosmantapas rimaq. Pay jinan noqanchispas munakunanchis Diospa siminta. Kusisqan kananchis Diospa testigonkuna kasqanchismanta, tukuy sonqowantaqmi jujkunaman willamunanchis Diospa gobiernonmanta willakuykunata.

14. ¿Imatawanmi ruwananchis Bibliapi cheqaq yachachikuykunata astawan munakunanchispaq?

¹⁴ ¿Imatawanmi ruwananchis Bibliapi cheqaq yachachikuykunata astawan munakunanchispaq? Juñunakuykunamanmi  mana faltakunanchischu. Chaypin Jehová Diosqa Qhawaq revistaq yanapayninwan palabranmanta astawan yachachiwasun. Chaymi chay revistataqa allinta estudiananchis, chaypi kaq textokunatapas llapantan leenanchis. Kunan tiempoqa imaymana formapin chay revista lloqsimushan. Munaqkunaqa atinkumanmi jw.org nisqa paginamanta tabletninkuman otaq celularninkuman urayachiyta. Kashanmi JW Library nisqa aplicacionpipas, chaykunapiqa facilmi textokunata maskhaypas. Papelpiña celularpiña chay revistata jap’inchis chaypas tukuy yuyaywanmi textokunataqa leenanchis, chhaynapin astawan munakusun Bibliapi cheqaq yachachikuykunata (leey Salmos 1:2).

15, 16. a) ¿Imatan niran Jesús Juan 13:34, 35 textokunapi? b) ¿Imaynapin kaqlla Jehová Diosta, Bibliatapas munakuy iñiqmasikunata munakuywan?

¹⁵ Señor Jesusmi discipulonkunata niran: “Juj mosoq kamachikuytan qoykichis: Jujkuna-jujkunawanmi munanakunkichis; imaynan noqapas munakuykichis, chhaynallatataqmi qankunapas jujkuna-jujkunawan munanakunkichis. Qankunapura munanakusqaykichispin lliupas yachanqaku discipuloykuna kasqaykichista”, nispa (Juan 13:34, 35).

¹⁶ Imaynan Jehová Diostapas munakunchis chhaynatan iñiqmasinchiskunatapas munakunanchis. Apóstol Juanmi niran: “Pipas: ‘Diostan munakuni’ nishaspa wayqenta cheqnikushanman chayqa, llullakushanmanmi. Rikushaspataq wayqenta mana munakushanmanchu chayqa, ¿imaynapitaq mana rikusqan Diostari munakunman?”, nispa (1 Juan 4:20). Chaymantapas Jehová Diosta iñiqmasikunatawan munakuspaqa Diospa palabran munakusqanchistan rikuchisunchis. ¿Imaynataq chayri? Bibliapi yachachikuykunata munakusun chayqa kasukusunmi Diosta iñiqmasitapas munakunapaq kamachikuyta (1 Ped. 1:22; 1 Juan 4:21).

17. ¿Imaynatan rikuchisunman iñiqmasinchiskuna munakusqanchista?

 ¹⁷ (Leey 1 Tesalonicenses 4:9, 10). ¿Imaynatan rikuchisunman iñiqmasinchiskuna munakusqanchista? Wakinqa kuraqña otaq viuda kasqankuraykupaschá yanapanata necesitashanku juñunakuyman jamunankupaq otaq imankutapas allicharinapaq, chaykunapin iñiqmasinchiskunataqa yanaparinanchis (Sant. 1:27). Chaymantapas yanaparinanchismi llakisqa kaqkunata Diosta servishanallankupaq (Prov. 12:25; Col. 4:11). Lliupaqmi allin kaqkunata ruwapunanchis astawanqa iñiqmasinchiskunapaqmi, chhaynapin paykunaqa kallpachasqa kanqaku (Gál. 6:10).

18. ¿Iman yanapawasun iñiqpurapi phiñachinakuy kaqtin?

¹⁸ Bibliaq nisqan jina kay ‘tukukuy tiempokunapi’ runakunaqa paykunallapin piensananku karan, chhaynataqmi kashanpas (2 Tim. 3:1, 2). Chaymi noqanchisqa astawanraq kallpachakunanchis Jehová Diosta, palabranta, iñiqmasikunatapas munakushanallanchispaq. Yaqapaschá mayninpiqa runa kaypi phiñachinakusun, ichaqa munakuq kaymi yanapawasun sumaqllata chaykunata allichanapaq (Efes. 4:32; Col. 3:14). Chhaynaqa amapuni jayk’aqpas munakuyninchistaqa chiriyachisunchu. Aswanpas tukuy sonqo munakushallasun Jehová Diosninchista, Bibliata, iñiqmasinchiskunatapas.