¿Munawaqchu kusisqa kausayta?
DANIELWAN MIRIAMWANQA, 2000 watapi setiembre killapin casarakusqaku, chaymantataq Barcelona (España) llaqtaman ripusqaku. Danielmi nin: “Allintan ganaq kayku, allin pensionkunallapin mijuqpas kayku. Munasqayku raton viajaqpas kayku, allin p’achasqataqmi puriqpas kayku. Predicaqpas lloqsillaqmi kayku”, nispa. Ichaqa chayllamanmi vidanku cambiaran.
2006 wata asambleapin juj discurso Danielpa sonqonman chayasqa. Chaypin discurso qoq tapumusqa: “¿Tukuy atisqanchistachu ruwashanchis ‘wañuchinapaqña nisqakunata kacharichispa’ wiñay kausay ñanman apamunanchispaq?”, nispa (Prov. 24:11). Chaypin allinta explicakuran runakuna vidankuta salvanankupaqqa predicananchispuni kasqanta (Hech. 20:26, 27). Danielmi nillantaq: “Diospas noqata rimapayawashanman jinaraqmi chaypi kasharani”, nispa. Chaypin willakullarantaq Diospa munayninta ñaupaqman churaqkunaqa kusisqa kanankuta. Danielqa yacharanmi chay cheqaq kasqanta. Esposanqa kusisqan precursora jina Diosta servisharan.
Danielmi nillantaq: “Chay discurson yanapawaran astawan Diosta servinaypaq”, nispa. Chaymantapachan manaña nishutachu llank’aran, chhaynapin precursor kapuran, chaymantataq maypichus astawan predicaqkunata munasharanku chayman esposanwan riranku.
LLAKIKUYMANTA KUSIKUY JAMUN
2007 watapin mayo killapi Panamá nacionman astakuranku. Chaypin paykunaqa islakunapi predicaqku; chay islakunapiqa tiyanku “ngäber” runakunan. Danielwan Miriamwanqa pusaq killalla chaypi kanankupaqmi qolqeta juñusqaku.
Chay islakunapin paykunaqa barcopiñataq bicicletapiñataq puriqku. Chayllaraq chaypi predicashaspankuqa 30 kilometrota jinan ruphaypi bicicletata manejasqaku. Chaypin Danielqa yaqa desmayasqa, chayta rikuspan runakunaqa sumaqta atiendesqaku. Ngäber simi rimaypi wakin simikunata yachaqtinkus aswan sumaqtaraq chaskiqku. Pisi tiempollapin paykunaqa 23 runakunamanña Bibliamanta yachachisharanku.
¿Iman pasaran qolqenku tukukuqtin? Danielmi nin: “May llakisqan kasharayku; estudiachisqayku runakunatan mana saqeyta munasharaykuchu”, nispa. Chaymanta juj killa jinallamanmi ichaqa kusisqa kasharanku. ¿Imarayku? Miriammi nin: “Precursor especial kanaykupaqmi nombrawaranku, chaymi kusisqa kasharayku”, nispa.
ANCHA KUSIKUYTA TARINKU
2015 watapin paykunaqa Diospa llaqtanpi cambiokuna kasqanwan manaña precursor especialchu karanku. Ichaqa Salmos 37:5 textoq nisqanpin confiaranku, chaypin nishan: ‘Diosman kausayniykita jap’iykachiy, payman jap’ipakuy, paytaqmi yanapaykusunki’, nispa. Chayllamanmi juj llank’anata tariranku precursor regular kanankupaq jina, kunanqa Veraguas provinciapin kashanku.
Danielmi nin: “Manaraq Españamanta lloqsimushaspaykuqa manan ni piensaraykupaschu pisillawan kausaytaqa. Kunanqa yachakapuykuñan chhayna kausayman; manataqmi imaykupas faltawankuchu”, nispa. ¿Imawanmi kusisqa kanku? Paykunan ninku: “Runakunata Jehová Diosmanta yachachispaykun may kusisqa kayku, manan chay kusikuyqa imawanpas igualakunmanchu”, nispa.