1, 2. a) ¿Imatan wakin partepi hermanokuna ruwashanku sasaña predicay chaypas? ¿Imatan chaymanta yachasunman? (Kay paginapi fotota qhaway.) b) ¿Jesuspa nisqan jina facilchu pipaqpas llaqtanpi predicay? (Willakuyta qhaway.)

SERGIOMANTA OLINDAMANTAWAN yachasun. Paykunaqa casadon kanku, 80 wata maspiñan kashanku, precursorkunataqmi kankupas. Ñataq kuraqña kashanku chayqa manan faciltachu purinku. Chaywanpas sapa tutaymastinmi llaqtanku plazaq ladonpi terminalman rinku chaypi predicaq. Unayñan chayta ruwashanku. Runakunaqa manan anchi cuentatapas paykunamanqa churankuchu. Chhaynaña kaqtinpas llapa qhawarimuqkunatan paykunaqa kusisqa qhawarinku. Doce horas chayamuqtintaq susigollawan wasinkuman kutipunku. Sapa p’unchaymi las sietetaqa chaypiña kashanku. Chaytan ruwanku sapa watan, semanapi soqta kutita.

² Paykuna jinan wakin hermanokunapas chhayna mana uyarikuq runakuna ukhupiña tiyanku chaypas predicashallanku. Chaytachus qanpas ruwashanki chayqa “¡kusa!”  niykikun mana pisipaspa predicasqaykimanta. * Ejemploykiqa llapa hermanokunatan yanapashan, wakin allin experienciayoq hermanokunatapas yanapashanmi. Chhaynatan willakunku wakin watukuq umalliqkunapas. Jujninmi nin: “Chay hermanokunawan predicaspayqa kallpachasqan kani”, nispa. Jujkaqtaq nin: “Paykunaq ejemplonmi yanapawan mana pisipaspa predicashanallaypaq”, nispa. Juj kaqmi nillantaq: “Paykunaq ejemplonqa sonqoytapunin kuyurichiwan”, nispa.

3. ¿Ima kinsa tapuykunamantan kaypi yachasun? ¿Imapaqmi chayta yachay yanapawasun?

³ ¿Imaraykun mayninpi mana ganasninchis kanmanchu predicananchispaq? ¿Iman ruruy? ¿Iman yanapawasun sasachakuykunaña kaqtinpas rurushanallanchispaq? Chay kinsantin tapuykunamantan kaypi yachasun. Chaykunan yanapawasun Jesuspa kamachisqanta tukuy sonqo junt’ananchispaq.

4. a) ¿Imaynan Pablo tarikuq judiokuna mana uyarikusqankuta rikuspa? b) ¿Imatan pay chay runakunapaq munasharan?

⁴ Runakunaq mana uyarikusqan llaqtakunapi Diosmanta willayqa manan facilchu. Chhaynapi tarikushanki chayqa allintachá entiendenki Pablota. Payqa yaqa 30 wata jinan askha runakunata yanaparan Cristota qatikunankupaq (Hech. 14:21; 2 Cor. 3:2, 3). Askhataña yanaparan chaypas wakin judiokunaqa manan uyarikuyta munaqkuchu. Aswanmi payta cheqnikuqku qatikachaqku ima (Hech. 14:19; 17:1, 4, 5, 13). Chaywanmi payqa nishuta llakikuq. Arí, ‘sonqonpin sinchita llakikuq, may nanasqan kaq’ (Rom. 9:1-3). Ichaqa manan qatikachasqankuraykullachu llakikuq. Payqa chay llaqtamasinkuna salvasqa kanankuta, Diosmantapas yachanankuta iman munasharan. Paykunan ichaqa mana uyarikuqkuchu, chaymi Pablotaqa astawan llakichiq.

5. a) ¿Imaraykun predicanchis? b) ¿Imaraykun mayninpi mana ganasninchis kanmanchu predicananchispaq?

⁵ Qanpas Pablo jina runakunata munakusqaykiraykuchá imaña kaqtinpas willamushallanki paykunamanqa (Mat. 22:39; 1 Cor. 11:1). Chaymantapas, manan imapas Diosta serviy jinaqa kanmanchu. Maytachá munanki paykunapas Diosta servispa kusisqa kausanankuta. Chaychá rimashallanki Diosmantaqa, kay pacha paraisoman tukunanmantapas. Chay willakuykunaqa juj sumaq regalo jinan. Ichaqa, ¿iman pasan mana uyarikuyta munaqtinku? Pabloq sonqon jinan sonqonchis nanan ¿riki? Sonqonchisña nanan chaypas, manaña ganas kanchu chaypas predicashallanchismi. ¿Imarayku? Predicay gustawasqanchisrayku, runakunata munakusqanchisrayku ima. Hermananchis Elenapas 25 watañan precursora jina llank’ashan. Paymi nin: “Sasan noqapaqqa chhayna runakuna ukhupi predicay, ichaqa manan imapas kay ruway jinaqa kanmanchu”, nispa.

6. ¿Imamantan yachasun kay parrafokunapi?

⁶ Maypiña kasunman chaypas manaña runakuna uyarikunkumanchu chaypas atisunmanmi  ruruytaqa. ¿Cheqaqchu chay kanman? Chayta allinta entiendenapaq Jesuspa willasqan iskay comparacionkunamanta yachasun. Chay comparacionkunapin rimashan allinta ruruna kasqanmanta (Mat. 13:23). Ñaupaqtaqa rimasun uvas sach’amanta.

7. a) ¿Pikunatan representan chajra llank’aq, uvas sach’a, uvas k’allmakunapas? b) ¿Imatan allinta entiendenanchis kashan?

⁷ (Leey Juan 15:1-5, 8). Jesuspa willasqan jina paysi “uvas sach’aqa”, papantaqsi “chajra llank’aq”, discipulonkunataqsi ‘uvas k’allmakuna’. Chaykunata willasqan qhepamanmi Jesusqa discipulonkunata niran: “Sichus askhata rurunkichis, rikuchinkichistaq discipuloykuna kasqaykichistapas chayqa, Yayaymi jatunchasqa kanqa”, nispa. * ¿Imatan Jesús nishanman karan “rurunkichis” nispa nisqanwan? Uvas sach’amanta willasqanpiqa manan willanchu imatas “ruru” representan chayta. Ichaqa allinta leespaqa entiendesunmanmi imamantas rimasharan chayta.

8. a) ¿Imaraykun nisunman “ruruyqa manan discipulokuna ruwaychu” nispa? b) ¿Jayk’aqpas mana atinanchista Dios kamachiwasunmanchu?

⁸ Papanmanta rimashaspan Jesusqa niran: “Noqapi kaq llapa mana ruruq k’allmakunataqa paymi wit’upunqa”, nispa. ¿Imatan chaywan nisharan? Serviqninkunata jina Dios chaskiwananchispaqqa rurunanchismi, manachus rurusunman chayqa manan chaskisqachu kasunman (Mat. 13:23; 21:43). Chhaynaqa, “ruru” nispaqa ¿discipulokuna ruwaymantachu Jesús rimashanman karan? Manan (Mat. 28:19). Discipulokuna ruwaymanta rimashanman chayqa mana serviq k’allmakuna jinachá wakin junt’aq sonqo hermanokunaqa wit’usqa kankuman. Chayqa manachá allinchu kanman. Acaso paykunaq juchankuchu runakuna mana uyarikunanpaq. Chaymantapas Diosqa munakuwanchistaq chayqa manan mana atinataqa imatapas kamachiwasunmanchu (Deut. 30:11-14).

9. a) ¿Imata ruwaspan rurushanchis? b) ¿Imamantan yachasun qatimuq parrafokunapi?

⁹ Chhaynaqa, ¿imamantan Jesús rimashanman karan “rurunkichis” nispa nisqanwan? Imatas llapanchispas ruwayta atisunman chaymantan rimasharan. ¿Imataq chayri? Predicacionmi. * Runakunaman siminta apananchistan Diosqa munan (Mat. 24:14). Chayta allinta entiendenapaq trigo t’akaqmanta Jesuspa rimasqanmantawan yachasun.

10. a) ¿Imatan representan mujupas allpapas? b) ¿Imaraykun nisunman “trigoqa manan q’achutachu rurun” nispa?

¹⁰ (Leey Lucas 8:5-8, 11-15). Jesuspa willasqan jina, mujuqa Diospa siminmi, otaq nisunman willamusqanchis willakuy. Allpataq runakunaq sonqon. Allin allpaman chayaq mujuqa ch’ijchimuspan wiñan. Wiñaspataq espigamun, espigaspataq wakinqa pachajta imaraq rurun. Ichaqa, ¿imatan trigo rurun? ¿Q’achutachu? Manan, aswanpas trigollatataqmi ¿riki?  Chay rurumantan Jesusqa willasharan, manan t’akaspa wiñamusqanmantachu. Ichaqa, ¿imaynapitaq kaqlla kanman ruruywan predicaywanri?

11. a) ¿Imaynapin kaqlla kanman ruruywan predicaywan? b) ¿Imata ruwaspan Diospa siminta t’akashanchis?

¹¹ Yaqapaschá noqanchistaqa tayta-mamanchis o mayqen Testigopas Diosmanta yachachiwaranchis. Yachachiqninchisqa maytachá kusikuran Diospa siminta sumaqta chaskikusqanchismanta. Allin allpapas kasunman jinachá karanchis. Chhaynapichá pisi-pisimanta wiñaspa ruruyta qallariranchis. Ichaqa, ¿imatataq rurunchisri? ¿Mosoq discipulokunatachu? Manan chaytachu. * Diosmanta yachaspaqa jujkunamanmi yachasqanchista willayta qallariranchis ¿riki? Chaymi chay rurusqanchis karan. Arí, Diosmanta jujkunaman willaspanchismi trigotapas wisñishasunman jina Diospa siminta t’akashanchis (Luc. 6:45; 8:1). Chhaynaqa, Jesuspa nisqan jina, ama pisipaspa rurushallasun otaq predicashallasun.

12. a) ¿Imatan yachasunman Jesuspa willasqan iskaynin comparacionmanta? b) ¿Ima niwaqmi chaymanta?

¹² ¿Imatan yachasunman Jesuspa willasqan iskaynin comparacionmanta? Tukuy atisqanchistan ruwananchis Diospa siminta jujkunaman willananchispaq, chhaynapin rikuchisun rurusqanchista. Apóstol Pabloq nisqan jina “sapankan premiotaqa chaskinqaku imaynachus llank’asqankuman jina”, manan jayk’a runakuna pusamusqankuman jinachu (1 Cor. 3:8). Chaywanmi hermananchis Matildapas kusikun, payqa 20 watañan precursora kashan. Paymi nin: “Maytan kusikuni Jehová Diosqa tukuy llank’asqanchismanta premio qowananchista yachaspa”, nispa.

13, 14. Romanos 10:1, 2 textopi nisqan jina, ¿imakunan Pablota kallpacharan predicashanallanpaq?

¹³ ¿Imatan ruwasunman rurushanallanchispaq? Qallariypi yachamusqanchis jina Pabloqa nishutan llakikuq judiokuna Diospa gobiernonmanta willakuyta mana uyarikusqankumanta. Chaywanpas manan payqa jinatachu chay runakunata saqerpariran. Roma llaqtapi cristianokunaman cartata  apachisqanpin willaran imaynatachus paykunata qhawariran chayta. Niranmi: “Noqaqa tukuy sonqoywanmi munashani paykuna salvasqa kanankuta, chaytan Diosmantapas rogakushani. Noqaqa allintan yachani tukuy sonqowan Dios serviy munasqankuta, ichaqa manan allintachu paymanta yachanku”, nispa (Rom. 10:1, 2). ¿Imaraykun paykunaman predicashallanman karan?

¹⁴ Juj: Paypa willakusqan jina Pabloqa tukuy sonqonwanmi munasharan paykuna yanapayta. Manan munaranchu mayqenninkupas wañunanta (Rom. 11:13, 14). Iskaypi: Pabloqa Diosmantan rogakuq chay judiokunamanta mayqellanpas willasqanta uyarikunanpaq. Kinsapi: Pabloqa chay runakunaq allin ruwaykuna ruwasqankutan qhawaq, chaymi niranpas “noqaqa allintan yachani tukuy sonqowan Dios serviy munasqankuta” nispa. Chay sonqonkutan payqa Diosman orientayta munasharan.

15. ¿Imatan ruwasunman Pablo jina kananchispaq? Ejemplokunata willay.

¹⁵ ¿Imatan ruwasunman Pablo jina kananchispaq? Ñaupaqta: Kallpachakushallasun “wiñay kausayman apaq ñanninta” puriy munaqkunata tarinanchispaq. Iskaypi: Diosmanta mañakusun uyarikuy munaqkunaq sonqonta kicharinanpaq (Hech. 13:48; 16:14). Chaytan hermananchis Silvanapas ruwan, payqa yaqa 30 watañan precursora kashan. Paymi nin: “Manaraq ima punkutapas takashaspan noqaqa Diospa yanapayninta mañakuni”,  nispa. Pay jinan noqanchispas mañakunanchis munaqkunaq wasinman angelkuna chayachiwananchispaq (Mat. 10:11-13; Apo. 14:6). Hermano Robertpas chaytan ruwan, payqa 30 wata masñan precursor kashan. Paymi nin: “Angelkunawan llank’ayqa manan imawanpas igualakunmanchu, paykunaqa allintan yachanku runakunaq vidanta”, nispa. Kinsapi: Runakunaq imapas allinkuna ruwasqankuta qhawarisun. Chaytan Carl sutiyoq umalliq hermanopas ruwan, payqa 50 wata masñan Testigo kashan. Paymi nin: “Wakinqa kusisqan qhawarikuyta yachanku, wakintaq tukuy sonqo imatapas tapukunku. Chaykunatan noqaqa qhawarini, chaykunan rikuchin imas sonqonkupi kashan chayta”, nispa. Chaykunata ruwasun chayqa Pablo jinan noqanchispas allinta rurusun.

16, 17. a) ¿Imatan yachasunman Eclesiastés 11:6 textomanta? b) Manaña wakin runakuna uyarikunkuchu chaypas, ¿imatan rikushankuman? Juj ejemplota willay.

¹⁶ Manaña runakuna uyarikuyta munanqakuchu chaypas, kanqapunin imallapas willaspa purisqanchismantaqa (leey Eclesiastés 11:6). Yaqapaschá paykunaqa reparawashanchis imayna p’achasqas purishanchis chayta. Sumaq sonqochus kanchis icha manachus, respetoyoqchus kanchis icha manachus chaytapas. Chaykunata noqanchispi reparanqaku chayqa yaqapaschá noqanchismanta ima mana allin piensasqankutapas cambianqaku. Chaymi pasaran qallariypi rimamusqanchis hermanonchis Sergiowan Olindawanpas.

¹⁷ Hermano Sergion nin: “Onqosqan kasharayku chaymi askha p’unchay mana plazaman riraykuchu. Kutinaykupaqqa llapa chayninta pasaqkunan extrañawashasqaku”, nispa. Hermana Olindataq nin: “Choferkunapas llapankun napaykuyta qallariwanku, wakintaq ‘kusatan llank’ashankichis’ niwanku. Revistakunata imaraqmi mañakuwankupas”, nispa. Juj p’unchaysi chay hermanokunaman juj runa achhuykusqa, jinaspa llank’asqankumanta “gracias” nispa t’ikakunata paykunaman qoykusqa.

18. ¿Imaraykun sasachakuykunaña kaqtinpas rurushanallanchis?

¹⁸ Bibliaq nisqan jina ‘ch’isinkamapas llank’ashallasunpuni’. Arí, maypiña kaspapas rimashallasunpuni Diospa gobiernonmantaqa, chhaynapin ‘llapa nacionkuna yachanqaku’ chay gobiernomanta (Mat. 24:14). Astawanqa Jehová Diostan kusichisun, kaypi yachasqanchis jina payqa ‘sasachakuykunata aguantaspa ruruqkunatan’ munakun.