Jesuspa nisqan jina Diospa gobiernonmanta allin willakuykunaqa entero pachantinpin predicakushan (Mateo 24:14). Bibliapi Danielpa qelqasqanpin willakushan chay gobierno Diosmanta jamusqanta. 2 capitulopin willakushan kay tiempokama jatun nacionkuna otaq gobiernokuna rijurimunanmanta, chaykunan qallariran Babilonia gobiernowan, 44 versiculopitaq willashan imakuna sucedenanta:

“Janaq Pacha Diosqa mana jayk’aq thunikuq suyuta sayarichinqa, manataqmi waj suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas”.

Kay profeciapas juj profeciakunapas willankun Diospa gobiernon kay pachapi gobiernokuna chinkachinanta, jinaspa kay pachapi thaj kausay apamunanmanta. ¿Imaynan kausay kanqa Diospa gobiernonpi? Yachasun wakin promesakunamanta, imaynatan junt’akunqa chaytawan.

• GUERRAKUNAN TUKUKAPUNQA

  Salmos 46:9. Diosmi “teqsimuyuntinpi auqa-tinkuykunata qolluchin, wach’ina p’eqtakunatapas lanzakunatapas p’akirqarin, carretakunatapas ruphaykachin”.

  Kay tiempopiqa armakunata ruwanankupaqmi runakunaqa askha qolqeta gastanku unay tiempotataq chaypaq estudianku. Diospa gobiernonpin ichaqa tukuyta ruwanqaku jujkunata yanapanankupaq. Guerrakunaqa manapunin kanqañachu.

• ONQOYKUNAN TUKUKAPUNQA

  Isaías 33:24. Kay pachapi “tiyaqkunaqa manan mayqellanpas: ‘Onqosqan kani’, ninqachu”.

  Kaypi piensay: runakunaqa manañan ninqakuchu: “Corazonmanta mal kashani, cáncer onqoywan kashani, otaq kaymanta malmi kashani”, nispa. Chaypi kaqkunaqa hospitalkunatapas pastillakunatapas manañan necesitanqakuñachu. Chaytapunin Diospa gobiernonqa ruwanqa.

• YARQAY TUKUKAPUNQA

  Salmos 72:16. “Askhallaña trigo kachun, orqo patakunapi askhallaña aytikuchun”.

  Kay allpapiqa imaymana mijuymi rurunqa, llapa runapaqtaq kanqa. Yarqayqa chinqapunqan.

• MANAN LLAKIKUYPAS, WAQAYPAS, NANAYPAS KANQAÑACHU

  Apocalipsis 21:4. Diosmi “ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu. Arí, ñaupaq kaqkunaqa manañan kanqachu”.

   Llapankun perfecto kapunqaku, wiñaypaqmi paraisopi kausanqaku. Munakuq kamaqninchis Jehová Diosmi chayta prometewanchis.

¿Imaynantan qhawarinki kay promesakunata? Yaqa llapa runakunan Bibliapi promesakunamanta yachaspa ninkun: “¡May allinchá kanman!”, nispa. Ichaqa askha runakunan mana creeyta atinkuchu, mana pipas kay tiempopi wiñaypaq kausasqanrayku.

Tukuy tiempo runakunaqa juchasapa kaspanku wañupushanku. Chaymi ninku “chhaynapaqchá kamasqa karanchis” nispa. Llakikuypas ñak’ariypas normalmi paykunapaqqa. Ichaqa manan Diospa munayninchu chayqa karan.

Jehová Diospa palabranpi kallpachawanchis promesankunapi astawan confiananchispaq, niwanchismi: “Rimasqay simiyqa manan jinallachu kutimuwanqa, aswanpas imachus munasqaytan ruwanqa, jinaspan kamachisqayta llapantapuni junt’anqa”, nispa (Isaías 55:11).

Biblian willan “mana jayk’aq llullakuq” Diosmanta (Tito 1:2). Paymi kay sumaq promesakunata ruwawaranchis, chayraykun kay tapuykunapi allinta piensananchis: “¿Atisunmanchu juj paraisopi wiñaypaq kausayta? ¿Imatan ruwananchis Diospa promesankunata chaskinanchispaq?”. Qatimuqpi kaykunamanta yachasun.