Ch’askakunata qhawaq runakunaq nisqankuman jinaqa, ima fechapichus juj wawa nacen chayman jinan yachakunña imayna runachus kananta, imayna kausayniyoqchus kanantapas.

Babilonia llaqtapiraqmi ch’askakunataqa qhawaqku, ichaqa kay tiempopipas kashanraqmi. Runakunaqa kunankamapas ch’askakuna qhawaqkunapin confianku, chaymi horoscoponkuq imachus nisqanpi makilla kashanku. Ichaqa, ¿confianapaqchu chaykuna? Manan. ¿Imarayku? Qhawasunchis wakin razonkunata:

• Ch’askakunapas planetakunapas manan runaq kausayninpiqa yanapanmanchu nitaq dañota ruwanmanchu.

• Ch’askakunata qhawaspa adivinaqqa común ruwaykunallatan willan.

• Ch’askakunata qhawaspa adivinaqqa, ñaupa tiempopi pantasqa yachachikuyman jinan kashan. Chay tiempopiqa piensaqku allpata planetakuna muyuykunanpaqmi, manataq intita muyuykunanpaqchu.

• Juj runallapaq askha adivinokuna ch’askata qhawaspaqa manan kaqllatachu ninku.

• Ch’aska qhawaqkunaqa runakunaq ima fechapichus nacesqanman jinan 12 signokunamantan jujninta churanku, chaymi horóscopo nisqa. Ichaqa allpaq muyusqanpas tiempowanqa variantaq chayqa, fechakunapas variallantaqmi chaymi horoscopoq sapanka signonpas manaña tupanñachu.

Runakunan creenku horoscoponpa signonman jina juj runa kasqanta. Ichaqa manan yachasunmanchu ima fechapichus nacesqanman jinallaqa imayna runachus kasqanta. Ch’aska qhawaqkunaqa manaraq juj runata reqsishaspan imayna runachus kasqanta willanku yanqa creenciakunapi confiaspa. Chayqa manan allinchu, ¿riki?

Ñaupa tiempomantaraqmi runakunaqa adivinokunaman riqku. Wakinqa jamuq tiempo imaynachus kanantan adivinaqku animalkunaq higadonpi, tukuq waqasqanpi otaq juj animalkunaq waqasqanpipas. Kay tiempopitaq naypesta otaq cocata qhawaspa adivinanku. Ichaqa, ¿confianapaqchu chaykuna? Manan. ¿Imarayku? Qhawasunchis wakin razonkunata:

Adivinokunaqa kaq cosasllataña utilizanku adivinanankupaq chaypas, sapa kutillanmi adivinasqankupi contranakunku. Ejemplopaq, iskay adivinaqkunan naypeswan juj runaq suertenta qhawaspa mana igualtachu adivinanku.

Imaynatachus imaraykuchus adivinasqankupas manan confianapaqchu. Wakin runakunan ninku adivinokunaqa runaq imayna reaccionasqanta makilla qhawasqankuta. Naypeskunapas, cocapas adornolla kasqanta. Ejemplopaq, wakin adivinokunaqa payman jamuq runatan imaymanata tapunku tukuy yuyaytaq kutichisqanta uyarinku, uyantapas qhawanku. Chaypin suerte qhawachikuqqa mana reparakuspalla imatapas willakun, chaytataq adivinoqa paypa adivinasqanta jina willan. Suerte qhawachikuqtaq adivinopi confiaspa askha qolqeta pagan.

Ch’aska qhawaqkunapas, adivinokunapas piensankun imaynachus kausayninchis kasqanqa qelqasqaña kasqanpi. ¿Cheqaqchu chay? Manan. Biblian willawanchis imatapas ruwanapaq creenapaqpas sapankanchis decidinapaq libre kasqanchista. Decidisqanchisman jinataq imapipas tarikunanchista (Josué 24:15).

Diospa allin qhawarisqan kayta munaqkunaqa, manan ch’aska qhawaqkunawan nitaq adivinokunawanpas suerteta qhawachikunkuchu. Diosqa cheqnikunmi chay ruwaykunata. Biblian nin: “Aman qankuna ukhupiqa [...] watuqpas, suerte qhawaqpas, ch’askata qhawaqpas, layqapas, mana allin espiritukunata rimachiqpas, wañuqpa alman rimachiqpas qankuna ukhupiqa kanqachu. Chay jina ruwaqkunataqa sinchitan Señor Diosqa cheqnikun”, nispa (Deuteronomio 18:10-12).