Juj domingo tardenmi Kenneth Filomenawan Curazao llaqtapi tiyaq juj parejaman visitaranku, paykunamanmi Bibliamanta cursota qoranku.

Kenneth willakun: “Chayaqtiykun wasi wisq’asqa kashasqa, carropas manan kasqachu. Ichaqa imaraykuchá kanpas, telefonopin esposanta wajayta piensarani”, nispa.

Señoraqa telefonopin willaran qosan llank’ananpi kashasqanta. Ichaqa Kennethwan Filomenawan jawapi kashasqankuta yachaspan wasinman jaykuchiran.

Ratollan repararanku señora waqasqa uyayoq kasqanta. Biblia estudiayta qallarinankupaq Kenneth oracionta ruwaqtintaq yapamanta waqallarantaq. Chaymi Kennethwan Filomenawanqa sumaqllata tapuranku ima pasasqanta.

Jinan señoraqa willaran chay tardenpacha wañuchikunanpaq planeasqanta, qosanmanta despedikunanpaq juj cartata qelqashasqantawan, chayllamantaq Kenneth wajasqanta. Willakuranmi depresión onqoywan kasqanta, chaymi Bibliamanta kallpachaq textokunata leepuranku. Chaytaq yanaparan vidanta salvananpaq.

Kenneth nin: “Jehová Diostan agradecekurayku, chay llakisqa señorata yanapasqaykumanta, astawanqa angelninwan otaq santo espiritunwan sonqoykuta kuyurichisqanmanta, chhaynapi telefonopi wajanaykupaq”, nispa. *

Kennethta Filomenatawan sucedesqanpi, ¿cheqaqtapunichu Dios yanapanman karan juj angelninwan otaq santo espiritunwan? Icha, ¿payllamantachu Kenneth wajanman karan?

Manan segurotapuni nisunmanchu, ichaqa yachanchismi Diosqa angelninta yanapawananchispaq utilizasqanta. Ejemplopaq, Biblian willan evangelio willaq Felipeta Dios angelninwan pusarisqanta, chhaynapi Etiopía llaqtamanta umallita yanapananpaq, chay runaqa necesitasharanmi yanapanata (Hechos 8:26-31).

Askha religionkunan yachachinku atiyniyoq espiritukuna kananpaq, paykunamanta wakinqa Diospa munayninta ruwanankupaq otaq cuidaqninku ángel kananpaq. Askha runakunan creenku angelkuna kasqanta, jinallataq vidankupi yanapananpaq. Wakinmi ichaqa mana creenkuchu angelkunapi.

¿Kanchu angelkuna? Chhayna kaqtinqa, ¿imaynapin paqariranku? ¿Ima ninmi Biblia paykunamanta? ¿Vidanchispi yanapawasunmanchu otaq dañota ruwawasunmanchu? Pruebakunata qhawarisun.