1, 2. a) ¿Ima ninkun wakin runakuna Dios serviymanta? b) ¿Imamantan kay estudiopi yachasunchis?

WAKIN runakunan ninku: “Diosta servinapaqqa manan juj religionmanraqchu jaykuna, sapallaykin Diostaqa serviwaq”, nispa. ¿Cheqaqchu kanman chay nisqanku?

² Manan. Jehová Diosqa tukuy imatapas ordenpin ruwan, payta serviq runakunatapas allintan organizan, chaymi paypa churasqan umalliqkuna imatapas kamachiwaqtinchisqa kasukunanchis. Chaykunamantan kay estudiopi yachasunchis (1 Cor. 14:33, 40). Apostolkunaq tiemponpi cristianokunaqa kasukurankun Jehová Diospa simin qelqata, chhaynapin paykunaqa allin willakuykunata askha llaqtakunaman chayachiranku. Noqanchispas paykuna jinan Bibliaq nisqanta kasukunanchis, Diospa llaqtanpi umalliqkunatapas kasukunanchismi, chhaynapin pachantinpi predicayta atisun. Chaymantapas kallpachakunanchismi Diospa llaqtanpi ch’uya kausay, sumaq kausay, juj nisqalla kausay ima kananpaq.

3. ¿Imakunan rikuchin Diosqa lliutapas allinta organizaq kasqanta?

³ Imaymana kamasqankunapin reparakun Diosqa lliutapas allinta organizaq kasqanta. Chaymi Biblia nin: “Diosqa yachaywanmi kay pachata teqsicharan, yuyaywanmi janaq pachata allinta sayachiran”, nispa (Prov. 3:19). Diospa ruwasqankunamanta pisillataña yachanchis chaypas, allintan reparanchis tukuy imapas allin organizasqa kasqanta (Job 26:14; Sal. 8:3, 4). Chaymi ch’askakunapas mana yupay atiyraq ordenpi muyushanku. Kaqllataq planetakunapas ordenpi muyunku intiq muyuriqninta. Diosmi tukuy chaykunataqa kamaran chhayna ordenpi muyunankupaq. Chayraykun Diostaqa jatunchananchis, alabananchis ima, pay sonqollataqmi kananchispas (Sal. 136:1, 5-9).

4. ¿Imanaqtinmi cientificokuna mana yachankuchu wakin importante yachachikuykunata?

⁴ Científico runakunaqa Diospa kamasqankunata estudiaspan imaymanakuna ruwayta yachanku runakunaq allinninpaq, ichaqa manan yachankuchu imaynapis tukuy imapas paqarimuran chayta, imaraykus kay pachapi runakuna, animalkuna, plantakunapas kan chaytapas. Chaymantapas yaqa llapa runakunan mana yachankuchu imanaqtinsi runakuna wiñaypaq kausayta munanchis chayta (Ecl. 3:11). ¿Imanaqtinmi cientificokunapas juj runakunapas mana chaykunata yachankuchu? Diospi mana creesqankuraykun. Paykunaqa “evolución” nisqatan yachachinku. Diosmi ichaqa lliuta allinta entiendechiwanchis Bibliapi.

5. ¿Imaynapin lliupas Diospa churasqan leykunata kasukunku?

⁵ Jehová Diosqa lliu kamasqankunapin leykunata churaran. Chay leykunaqa manan cambianmanchu, chaymi electricistakuna, gasfiterokuna, ingenierokuna, avión manejaqkuna, doctorkunapas chay leykunaman jina imatapas ruwanku. Ejemplopaq, sonqonchisqa maychus kananpin tarikun cuerponchispi, chaymi doctorkuna operananku kaqtinqa facil-llata chayta tarinku. Kallantaqmi “ley de la gravedad” nisqapas, chaymi mana pipas nishu alto patamantaqa saltaykamunmanchu, mana chayqa wañupunmanchá.

6. ¿Imanaqtinmi Diosta serviqkuna allin organizasqa kananchis?

⁶ Rikusqanchis jina, Jehová Diosqa lliu kamasqantan allinta organizaran, chayraykun munan pay sonqo runakunapas allin organizasqa kanankuta, chaypaqmi Bibliata qowaranchis. Chayraykun kasukunanchis Bibliaq nisqanta, paypa llaqtanpi churasqan umalliqkunatapas. Chayta ruwaspallan kusisqaqa kausasunchis.

7. ¿Iman alayri rikukun Biblia imaynachus qelqasqa kasqanpi?

⁷ Bibliaqa Diosmanta jamuq libropunin, wakin yachayniyoq runakunan ichaqa ninku: “Bibliaqa runaq ruwasqallanmi, wakin judiokunaq cristianokunaq ruwasqallanmi”, nispa. Ichaqa runakunaña Bibliata qelqaranku chaypas, Diosmi ajllaran chay runakunata, paymi decidiran jayk’aqchus qelqanankuta, imatachus qelqanankutawan. Chaymi Biblialla entiendechiwasunman imatachus Dios munan chayta. Génesis  libromanta Apocalipsiskaman willashan juj “miray” jamunanmanta, chay miraysi kay pachata paraisoman tukuchipunqa. Yachasqanchis jina, chay mirayqa Criston karan, paypa gobiernonmi rikuchinqa Jehová Dioslla lliutapas kamachinanpaq jina kasqanta (leey Génesis 3:15; Mateo 6:10; Apocalipsis 11:15).

8. ¿Imayna organizasqan kasharanku Israel runakuna?

⁸ Israel runakunaqa allin organizasqan kasharanku Diospa kamachikuyninkunata kasukusqankurayku. Ejemplopaq, karanmi “Dioswan Tupana Karpa punkupi serviq warmikuna” (Éx. 38:8). Chaymantapas Israel runakunaqa organizasqan kasharanku maymanpas imayna astakunankupaq, Dios adorana karpata imayna apanankupaqpas. Tiempowanqa rey Davidmi sacerdotekunata Leví runakunatawan organizaran templopi imayna llank’anankupaq (1 Crón. 23:1-6; 24:1-3). Israel runakuna Jehová Diosta kasukuqtinkuqa ordenpin tukuy imapas ruwakuq, chhaynapitaq thajpi juj nisqalla kausaranku (Deut. 11:26, 27; 28:1-14).

9. ¿Imayna organizasqan kasharanku apostolkunaq tiemponpi cristianokuna?

⁹ Apostolkunaq tiemponpi cristianokunapas allin organizasqan kasharanku. Paykunata umallinankupaqmi juj umalliq t’aqa churasqa karan. Qallariypiqa apostolkunallan chay t’aqapi karanku, chaymantan ichaqa juj umalliqkunapiwan chaypi karanku (Hech. 6:1-6; 15:6). Jehová Diosqa umalliq t’aqamanta wakin umalliqkunawan, paykunata yanapaq wakin cristianokunapiwanmi wakin cartakunata qelqachiran iñiq t’aqakunata yachachinanpaq (1 Tim. 3:1-13; Tito 1:5-9). Iñiq t’aqakunaqa allinpin tarikuranku umalliq t’aqaq nisqanta kasukusqankurayku.

10. ¿Imaynapin apostolkunaq tiemponpi cristianokuna tarikuqku umalliq t’aqaq nisqanta kasukuspa? (9 paginapi dibujota qhaway.)

¹⁰ Leey Hechos 16:4, 5. Apostolkunaq tiemponpi wakin cristianokunaqa iñiq t’aqakunamanmi kachasqa karanku “Jerusalenpi kaq apostolkunaq umalliqkunaq imachus decidisqankuta” willanankupaq, arí, umalliq t’aqaq decidisqanta willanankupaq. Iñiq t’aqakunataq chay decidisqankuta kasukuspa “iñiyninkupi aswan-aswanta kallpachakusharanku, sapa p’unchaytaqmi askhayasharankupas”. ¿Imatan chaymanta yachasunman?

11. ¿Imatan nombrasqa cristianokuna ruwananku Diospa llaqtanpi chaskisqanchis kamachikuykunawan?

¹¹ Sucursalmanta otaq Betel wasimanta encargakuqkuna, watukuq umalliqkuna, iñiq t’aqapi umalliqkuna, yanapakuq kamachikunapas (siervo ministerialkuna) kasukunankun Diospa llaqtanpi churasqa umalliqkunata. Jehová Diosmi chayta ruwanankupaqqa Bibliapi kamachikun (Deut. 30:16; Heb. 13:7, 17). Diosman sonqo kaqkunaqa kasukuqmi kananchis, manataqmi Diospa llaqtanpi kamachikuykunamantapas rimapakunanchischu. Manan Diótrefes jinachu kananchis, payqa manan umalliqkunata respetaqchu (leey 3 Juan 9, 10). Diospa llaqtanpi chaskisqanchis kamachikuykunata kasukusunchis chayqa, sumaq kausaymi iñiq t’aqapi  kanqa. Chaymi tapukunanchis: “¿Kallpachanichu iñiqmasiykunata Jehová Diosta tukuy sonqo kasukunankupaq? ¿Tukuy sonqochu kasukuni Diospa llaqtanpi kamachikuykunata?”, nispa.

12. ¿Imaynatan nombrakun umalliqkunata yanapakuq kamachikunatawan?

¹² Qayna watakunallan umalliq t’aqaqa kamachikamuran jujniraymanta umalliqkunata yanapakuq kamachikunatapas nombrakunanpaq. 2014 wata 15 noviembre La Atalaya revistapi, “Leeqkunaq tapukusqan” nisqa partepin willakuran apostolkunaq tiemponpi imaynatachus nombramientokunata ruwakuran chayta. Chay tiempopiqa umalliq t’aqan watukuq umalliqkunaman autoridadta qoran umalliqkunata yanapakuq kamachikunatawan nombranankupaq. Chaymi watukuq umalliqkunaqa 2014 watapi setiembre killamantapacha chay nombramientokunata ruwashanku. Paykunaqa umalliqkunaq recomendasqan hermanotan reqsinanku, jinallataq paypa familiantapas. Chaypaqmi watukuq umalliqqa chay hermanowan predicanan (1 Tim. 3:4, 5). Chaymantataq iñiq t’aqapi umalliqkunawan juñukunan, chaypin Bibliaq nisqanman jina qhawarinku chay recomendasqa hermano nombrasqañachus kanman ichaqa manachus chayta (1 Tim. 3:1-10, 12, 13; 1 Ped. 5:1-3).

13. ¿Imata ruwaspan umalliqkunaq kamachikusqanta kasukusunman?

¹³ Iñiq t’aqapi umalliqkunaqa allinninchispaqmi consejokunata qowanchis, chaymi kasukunanchis ima niwasqanchistapas (1 Tim. 6:3). Apostolkunaq tiemponpi wakin cristianokunaqa ‘mana kasukuqmi’ karanku. Paykunaqa manan llank’ayta munarankuchu, chaymantapas jujkunaq vidankumanmi chapukusharanku. Chaymi umalliqkunaqa paykunata anyaranku cambianankupaq, paykunan ichaqa mana kasukurankuchu. Chaymi Pabloqa niran: ‘Chay runata señalaychis, amataq paywanqa juñunakuychispaschu. Ichaqa aman enemigoykichista jinachu qhawarinkichis’, nispa (2 Tes. 3:11-15). Kay tiempopi umalliqkunapas Diospa wakin kamachikuyninkunata mana kasukuq iñiqmasinchistaqa reparachinankun juchanta. Ejemplopaq, chaytan ruwankuman chay iñiqmasinchis mana iñiq runawan enamoradontin kapuqtin (1 Cor. 7:39). Chay iñiqmasinchis manapuni uyarikuyta munaqtinqa umalliqkunaqa juj discursotan qonkuman, chaypin willankuman imaynas chay iñiqmasinchispa ruwasqanqa manapuni allinchu chayta. ¿Imatan ruwananchis chhayna discursota uyarispa? Manañan chay iñiqmasiwanqa amigontin jinaqa purinanchischu, chhaynapi juchanta reparachinanchispaq. Chhaynapin payta yanapasunchis chay mana allin ruwasqanta saqepunanpaq ^[1] (14 paginapi willakuyta qhaway).

14. ¿Imaynatan yanapakusunman iñiq t’aqanchis limpio kananpaq?

¹⁴ ¿Imatan ruwananchis iñiq t’aqanchispi ch’uya kausay kananpaq? Chaypaq yuyarisunchis imatachus Corinto llaqtapi kaq cristianokunawan pasaran chayta. Pabloqa munakuranmi chaypi kaq cristianokunata, pay kikinmi wakinkunatapas Jehová Diosmanta yachachiran (1 Cor. 1:1, 2). Chaywanpas chay iñiq t’aqapin juj hermano qhelli juchapi purishasqa, wakin iñiqmasikunataq mana imatapas ruwasqakuchu chayta rikuspa. Chaymi Pabloqa umalliqkunata kamachiran: ‘Chay juchallikuq runata Satanasman entregaychis’, nispa. Chaywanmi payqa nisharan chay runata qarqopunankupaq (1 Cor. 5:1, 5-7, 12). Kay tiempopipas umalliqkunaqa decidinkumanmi juchankumanta mana pesapakuqkunata qarqoyta. ¿Imatan ruwananchis chay pasaqtin? Bibliaq nisqanman jinan chay qarqosqa kaqta qhawarinanchis. Chhaynapin chay juchallikuqta yanapasunchis juchanta reqsikuspa Jehová Diosmanta perdonta mañakunanpaq.

15. ¿Imatan ruwananchis iñiq t’aqapi sumaq kausay kananpaq?

¹⁵ Corinto llaqtapi wakin iñiqmasinchiskunaqa paykunapuran juicioman jaykusharanku. Chaymi Pablo niran: “¿Manachu aswan aguantallawaqchis mana allin ruwaykunata?”, nispa (1 Cor. 6:1-8). Chayqa pasashanmi kay tiempopipas. Wakin iñiqmasinchiskunaqa paykunapura ima negociotapas ruwaspan fracasapuranku, chaymi juicioman jaykuranku. Chay pasaqtinqa millaytan runakunaqa Jehová Diosmanta paypa llaqtanmantapas rimanku, iñiq t’aqapipas manañan sumaq kausay kanñachu. Chaymi Biblia kamachiwanchis iñiqmasinchiswan juicioman rinamantaqa aswan qolqenchista pierdenanchispaq listo kashananchispaq ^[2] (14 paginapi willakuyta qhaway). Chaymantapas Jesusmi yachachiran imaynatachus ima problematapas iñiqmasinchiswan allichananchis chayta (leey Mateo 5:23, 24; 18:15-17). Paypa nisqanman jina ruwaqtinchisqa iñiq t’aqapin kashallanqa sumaq kausay, juj sonqolla kausay ima.

16. ¿Imanaqtinmi Diospa llaqtan jujllachasqa kashanku?

¹⁶ Biblian nin: “¡Mayna allinmi, ancha sumaqmi wayqe-panakunaq juj nisqalla kausayninkuqa!”, nispa (Sal. 133:1). Chaymi pasaran Israel runakunawan. Jehová Diosta kasukuspaqa allin organizasqan karanku, sumaqtan kausarankupas. Chaymi Diosqa profetanwan willachiran: ‘Israelmanta puchuqtan juñuykamusaq. Kanchamanmi ovejakunata jina  juñuykamusaq’, nispa (Miq. 2:12). Jehová Diosqa willallarantaqmi paypa llaqtanqa simin qelqamanta yachaspa juj nisqalla payta servinankumanta. Niranmi: “Chay tiempo chayamuqtinmi, suyukunaq sonqonta mosoqyachisaq, jinan llapallan noqa Señor Diosmanta mañakamuwanqaku, llapallan juj nisqalla serviwanqaku”, nispa (Sof. 3:9). ¿Manachu kusikunchis chhaynata Jehová Diosninchista servispa?

17. ¿Imatan umalliqkuna ruwananku pipas jatun juchaman urmaqtin?

¹⁷ Pi iñiqmasinchispas ima juchamanpas urmaqtinqa umalliqkunaqa munakuywanmi chay iñiqmasinchista yanapananku allin ñanman kutimunanpaq. Chhaynapin paykunaqa iñiq t’aqata mana juchayoqta jujllachasqata ima jap’inqaku. Chay ruwanankutan Jehová Diosqa munan (Prov. 15:3). Pabloqa anchatan munakuran Corinto llaqtapi kaq iñiqmasinkunata, chaymi necesitasqanku ratopi paykunata corregiran. Chaytan allinta rikukun paykunaman ñaupaq carta qelqasqanpi. Corintopi umalliqkunaqa kasukurankun apóstol Pabloq nisqanta, chaymi wakin killakuna qhepamanqa apóstol Pablo paykunata “allinmi” niran kasukusqankumanta. Chhaynaqa pipas “mana reparakuspa pantanman” chayqa, umalliqkunaqa munakuywanmi allin ñanman kutirichinanku (Gál. 6:1).

18. a) ¿Imaynatan Diospa simin yanaparan ñaupa tiempopi kausaq cristianokunata? b) ¿Imamantan yachasunchis qatimuq estudiopi?

¹⁸ Rikusqanchis jina, ñaupa tiempopi cristianokunaqa Diospa siminta kasukuspallan ch’uya kausayta, sumaq kausayta, juj sonqolla kausaytawan atiranku (1 Cor. 1:10; Efes. 4:11-13; 1 Ped. 3:8). Chhaynapin paykunaqa allin willakuykunata ‘pachantinpi predicaranku’ (Col. 1:23). Kay tiempopipas Jehová Diospa llaqtanqa juj nisqalla allin organizasqa iman kashan, chaymi pachantinman allin willakuykunata chayachishanku. Paykunaqa Jehová Diosllatan jatunchayta munanku, paypa siminpi nisqanman jinataqmi kausaytapas munanku. Chaymantan qatimuq estudiopi yachasunchis (Sal. 71:15, 16).